ᱪᱟᱱᱫᱚ ᱜᱟᱱᱦᱟ ᱤᱫᱤ ᱠᱟᱛᱮᱜ ᱦᱚᱲ ᱦᱚᱯᱚᱱᱟᱜ ᱢᱤᱛᱷ(Myth)
 |
ᱪᱟᱱᱫᱚ ᱜᱟᱱᱦᱟ |
ᱱᱟᱦᱟᱜ ᱥᱟᱬᱮᱥ ᱵᱟᱰᱟᱭᱟᱱ ᱡᱚᱛᱚ ᱦᱚᱲ ᱠᱳ ᱵᱟᱰᱟᱭᱟ ᱪᱟᱱᱫᱚ ᱜᱟᱱᱦᱟ ᱫᱚ ᱯᱨᱟᱠᱨᱤᱛᱤᱠ ᱜᱷᱚᱴᱚᱱ ᱠᱟᱱᱟ᱾ ᱪᱮᱫᱟᱜ ᱟᱨ ᱪᱮᱫ ᱞᱮᱠᱟ ᱛᱮ ᱱᱚᱣᱟ ᱦᱩᱭᱩᱜ ᱠᱟᱱᱟ ᱚᱱᱟ ᱦᱚᱸ ᱥᱟᱬᱟᱥᱤ ᱠᱳ ᱞᱟᱹᱭ ᱟᱠᱟᱫᱟ᱾ ᱢᱮᱱᱠᱷᱟᱱ ᱥᱮᱫᱟᱭ ᱢᱟᱱᱣᱟ ᱫᱚ ᱤᱱᱟᱹᱜ ᱵᱟᱠᱳ ᱵᱟᱰᱟᱭ ᱠᱟᱱ ᱛᱟᱦᱮᱱ ᱛᱮ ᱡᱚᱛᱚ ᱢᱟᱱᱣᱟ ᱜᱩᱴ ᱜᱤ ᱪᱟᱱᱫᱚ ᱜᱟᱱᱦᱟ ᱤᱫᱤ ᱠᱟᱛᱮᱜ ᱟᱠᱳ ᱞᱮᱠᱟ ᱧᱮᱱᱮᱞ ᱟᱨ ᱵᱮᱠᱠᱷᱟ ᱥᱮ ᱢᱤᱛᱷ(Myth) ᱛᱟᱦᱮ ᱠᱟᱱ ᱛᱟᱠᱚᱣᱟ᱾ ᱪᱟᱱᱫᱚ ᱜᱟᱱᱦᱟ ᱤᱫᱤ ᱠᱟᱛᱮᱜ ᱱᱟᱥᱮ ᱠᱟᱹᱢᱤ ᱦᱚᱨᱟ ᱦᱚᱸ ᱛᱟᱦᱮᱸ ᱠᱟᱱ ᱛᱟᱠᱚᱣᱟ᱾ ᱟᱵᱩ ᱦᱚᱲ ᱥᱟᱶᱛᱟ ᱨᱮ ᱦᱚᱸ ᱪᱟᱱᱫᱚ ᱜᱟᱱᱦᱟ ᱤᱫᱤ ᱠᱟᱛᱮᱜ ᱢᱤᱛᱷ ᱟᱨ ᱠᱟᱹᱢᱤ ᱦᱚᱨᱟ ᱢᱮᱱᱟᱜᱼᱟ᱾
ᱪᱟᱱᱫᱚ ᱜᱟᱱᱦᱟ ᱤᱫᱤ ᱠᱟᱛᱮᱜ ᱥᱟᱬᱟᱥᱤᱭᱟᱜ ᱞᱟᱹᱱᱟᱹᱭ-
ᱥᱤᱧ ᱪᱟᱱᱫᱚ ᱥᱮ ᱵᱮᱲᱟ ᱵᱮᱲᱦᱟᱭ ᱛᱮ ᱫᱷᱟᱹᱨᱛᱤ ᱟᱹᱪᱩᱨᱚᱜ ᱠᱟᱱᱟ᱾ ᱚᱠᱟ ᱫᱚ ᱥᱮᱨᱢᱟ ᱠᱤᱭᱟᱹ ᱜᱷᱩᱨᱞᱟᱹᱣ ᱥᱮ ᱟᱹᱪᱩᱨ(Annual Motion) ᱠᱳ ᱢᱮᱛᱟᱜᱼᱟ᱾ ᱢᱤᱫ ᱫᱷᱟᱣ ᱟᱹᱪᱩᱨ ᱯᱩᱨᱟᱹᱣ ᱛᱮ ᱢᱤᱫ ᱥᱮᱨᱢᱟ ᱦᱩᱭᱩᱜᱼᱟ᱾ ᱱᱚᱣᱟ ᱟᱹᱪᱩᱨ ᱠᱟᱨᱚᱢ ᱛᱮ ᱜᱤ ᱟᱭᱢᱟ ᱞᱮᱠᱟ ᱨᱤᱛᱩ ᱦᱩᱭᱩᱜ ᱠᱟᱱᱟ᱾ ᱚᱱᱟ ᱥᱟᱶ ᱫᱷᱟᱹᱨᱛᱤ ᱟᱡ ᱦᱚᱸ ᱞᱟᱹᱴᱤᱢ ᱞᱮᱠᱟᱭ ᱜᱷᱩᱨᱞᱟᱹᱣ ᱟᱹᱪᱩᱨᱚᱜ ᱠᱟᱱᱟ᱾ ᱚᱠᱟ ᱫᱚ ᱠᱳ ᱢᱮᱛᱟᱜ ᱠᱟᱱᱟ ᱫᱤᱱᱟᱹᱢ ᱟᱹᱪᱩᱨ(Diurnal motion)᱾ ᱱᱚᱣᱟ ᱟᱹᱪᱩᱨ ᱠᱟᱨᱚᱢ ᱛᱮ ᱜᱤ ᱥᱤᱧ ᱟᱨ ᱧᱤᱱᱫᱟᱹ ᱫᱚ ᱦᱩᱭᱩᱜ ᱠᱟᱱᱟ᱾ ᱟᱨ ᱫᱷᱟᱹᱨᱛᱤ ᱵᱮᱲᱦᱟᱭ ᱛᱮᱭ ᱟᱹᱪᱩᱨᱚᱜ ᱠᱟᱱᱟ ᱫᱷᱟᱹᱨᱛᱤ ᱨᱮᱱ ᱦᱚᱯᱚᱱ ᱮᱝᱜᱮᱞ(satellite) ᱧᱤᱱᱫᱟᱹ ᱪᱟᱱᱫᱚ᱾ ᱥᱤᱧ ᱪᱟᱱᱫᱚᱣᱟᱜ ᱢᱟᱨᱥᱟᱞ ᱧᱤᱱᱫᱟᱹ ᱪᱟᱱᱫᱚ ᱨᱮ ᱛᱟᱹᱠᱤᱡ ᱠᱟᱛᱮᱜ ᱟᱵᱩ ᱴᱷᱮᱱ ᱦᱟᱹᱡᱩᱜᱼᱟ, ᱚᱱᱟ ᱛᱮ ᱜᱤ ᱧᱤᱱᱫᱟᱹ ᱪᱟᱱᱫᱚ ᱡᱩᱞᱩᱜ ᱞᱮᱠᱟ ᱵᱩ ᱧᱮᱞᱮᱭᱟ᱾ ᱫᱷᱟᱹᱨᱛᱤ ᱟᱨ ᱧᱤᱱᱫᱟᱹ ᱪᱟᱱᱫᱚᱣᱟᱜ ᱱᱚᱣᱟ ᱟᱹᱪᱩᱨᱚᱜ ᱚᱠᱛᱮ ᱡᱚᱠᱷᱚᱱ ᱥᱤᱧ ᱪᱟᱱᱫᱚ ᱟᱨ ᱫᱷᱟᱹᱨᱛᱤ ᱛᱟᱞᱟ ᱨᱮ ᱧᱤᱱᱫᱟᱹ ᱪᱟᱱᱫᱚᱭ ᱯᱟᱱᱛᱮᱜᱼᱟ ᱤᱱᱡᱚᱠᱷᱚᱡ ᱥᱤᱧ ᱪᱟᱱᱫᱚᱭ ᱫᱟᱱᱟᱝᱚᱜᱼᱟ᱾ ᱥᱤᱧ ᱪᱟᱱᱫᱚᱣᱟᱜ ᱢᱟᱨᱥᱟᱞ ᱫᱷᱟᱹᱨᱛᱤ ᱨᱮ ᱵᱟᱝ ᱦᱟᱹᱡᱩᱜᱼᱟ᱾ ᱚᱱᱟ ᱜᱤ ᱥᱤᱧ ᱪᱟᱱᱫᱚᱣᱟᱜ ᱜᱟᱱᱦᱟ ᱠᱳ ᱢᱮᱛᱟᱜ ᱠᱟᱱᱟ᱾ ᱟᱨ ᱥᱤᱧ ᱪᱟᱱᱫᱚ ᱟᱨ ᱧᱤᱱᱫᱟᱹ ᱪᱟᱱᱫᱚ ᱛᱟᱞᱟ ᱨᱮ ᱡᱚᱠᱷᱚᱱ ᱫᱷᱟᱹᱨᱛᱤ ᱯᱟᱱᱛᱮᱜᱼᱟ ᱤᱱᱡᱚᱠᱷᱚᱡ ᱫᱷᱟᱹᱨᱛᱤᱣᱟᱜ ᱩᱢᱩᱞ ᱧᱤᱱᱫᱟᱹ ᱪᱟᱱᱫᱚ ᱪᱮᱛᱟᱱ ᱯᱟᱲᱟᱜᱼᱟ᱾ ᱚᱱᱟ ᱜᱤ ᱧᱤᱱᱫᱟᱹ ᱪᱟᱱᱫᱚᱣᱟᱜ ᱜᱟᱱᱦᱟ ᱠᱳ ᱢᱮᱛᱟᱜᱼᱟ᱾
ᱦᱚᱲ ᱦᱚᱯᱚᱱᱟᱜ ᱠᱳᱣᱟᱜ ᱢᱤᱛᱷ ᱟᱨ ᱠᱟᱹᱢᱤ ᱦᱚᱨᱟ-
ᱦᱚᱲ ᱦᱚᱯᱚᱱᱟᱜ ᱢᱤᱛᱷ ᱨᱮ ᱢᱮᱱᱟᱜᱼᱟ- ᱛᱤᱥ ᱨᱮ ᱪᱚ ᱫᱷᱟᱹᱨᱛᱤ ᱨᱮ ᱟᱠᱟᱞ ᱯᱟᱲᱟᱣ ᱞᱮᱱᱟ᱾ ᱢᱟᱱᱣᱟ ᱟᱹᱰᱤ ᱡᱚᱢ ᱟᱱᱟᱴ ᱨᱮ ᱠᱳ ᱧᱩᱨ ᱮᱱᱟ᱾ᱤᱱ ᱚᱠᱛᱮ ᱥᱤᱧ ᱪᱟᱱᱫᱚ ᱟᱨ ᱧᱤᱱᱫᱟᱹ ᱪᱟᱱᱫᱚ ᱫᱩᱥᱟᱹᱛ ᱠᱤᱥᱟᱺᱲ ᱴᱷᱮᱱ ᱠᱷᱚ ᱪᱟᱣᱞᱮ ᱯᱟᱧᱪᱟ ᱟᱹᱜᱩ ᱠᱟᱛᱮᱜ ᱢᱟᱱᱣᱟ ᱠᱤᱱ ᱮᱢᱟᱜ ᱠᱳ ᱛᱟᱦᱮᱱᱟ᱾ ᱫᱩᱥᱟᱹᱛ ᱠᱤᱥᱟᱺᱲ ᱫᱚ ᱴᱷᱚᱠ ᱜᱤᱭ ᱛᱟᱦᱮ ᱠᱟᱱᱟ᱾ ᱯᱟᱧᱪᱟ ᱪᱟᱣᱞᱮ ᱨᱩᱣᱟᱹᱲ ᱠᱟᱛᱮᱜ ᱨᱮ ᱦᱚᱸ ᱩᱱᱤ ᱫᱚ ᱟᱨᱦᱚᱸ ᱪᱟᱣᱞᱮ ᱞᱟᱹᱜᱤᱫ ᱪᱟᱱᱫᱚᱭ ᱥᱟᱵ ᱠᱤᱱᱟᱹ᱾ ᱪᱟᱱᱫᱚ ᱥᱟᱵ ᱠᱤᱱ ᱞᱟᱹᱜᱤᱫ ᱮᱥᱮᱫ ᱚᱠᱛᱮ ᱪᱟᱱᱫᱚ ᱜᱟᱱᱦᱟ ᱦᱩᱭᱩᱜᱼᱟ᱾ ᱩᱱ ᱚᱠᱛᱮ ᱠᱨᱤᱛᱚᱜᱜᱚᱛᱟ ᱞᱮᱠᱟᱛᱮ ᱫᱷᱟᱹᱨᱛᱤ ᱠᱷᱚᱱ ᱦᱚᱲ ᱦᱚᱯᱚᱱ ᱫᱚ ᱜᱟᱱᱦᱟ ᱪᱷᱳᱲ ᱢᱮᱱ ᱠᱟᱛᱮᱜ ᱠᱟᱹᱣᱢᱟᱹᱣ ᱠᱳ ᱦᱚᱦᱚᱭᱟ᱾ ᱚᱱᱟ ᱠᱟᱹᱣᱢᱟᱹᱣ ᱟᱧᱡᱚᱢ ᱛᱮ ᱫᱩᱥᱟᱹᱛ ᱠᱤᱥᱟᱺᱲ ᱫᱚ ᱥᱤᱧ ᱪᱟᱱᱫᱚ ᱟᱨ ᱧᱤᱱᱫᱟᱹ ᱪᱟᱱᱫᱚᱭ ᱟᱲᱟᱜ ᱠᱤᱱᱟ᱾ ᱚᱱᱟᱛᱮ ᱪᱟᱱᱫᱚ ᱜᱟᱱᱦᱟ ᱪᱟᱵᱟᱜᱼᱟ᱾
ᱦᱚᱲ ᱦᱚᱯᱚᱱᱟᱜ ᱯᱟᱹᱛᱤᱭᱟᱹᱣ ᱞᱮᱠᱟᱛᱮ ᱪᱟᱱᱫᱚ ᱜᱟᱱᱦᱟᱜ ᱚᱠᱛᱮ ᱦᱚᱲᱢᱚ ᱨᱮᱱᱟᱜ ᱦᱟᱥᱚ ᱡᱟᱜᱟ ᱨᱮ ᱱᱤᱢ ᱪᱟᱨᱮᱡ ᱥᱮ ᱫᱟᱛᱨᱚᱢ ᱥᱮᱝᱜᱮᱞᱨᱮ ᱞᱚ ᱠᱟᱛᱮᱜ ᱛᱚᱵᱟᱜ ᱞᱮᱠᱷᱟᱱ ᱰᱟᱱᱰᱟ ᱦᱟᱥᱩ, ᱜᱩᱱᱴᱷᱤ ᱦᱟᱥᱩ, ᱦᱚᱲᱢᱚ ᱦᱟᱥᱩ ᱠᱳ ᱪᱟᱵᱟᱜᱼᱟ᱾ ᱚᱠᱟ ᱠᱳ ᱫᱟᱨᱮ ᱵᱟᱝ ᱡᱚᱜ ᱠᱟᱱ ᱥᱮ ᱱᱟᱥᱮ ᱡᱚᱜ ᱠᱟᱱ ᱚᱱᱟ ᱠᱳ ᱫᱟᱨ ᱜᱟᱱᱦᱟᱜ ᱚᱠᱛᱮ ᱵᱩᱥᱩᱵ ᱛᱮ ᱛᱚᱞ ᱞᱮᱠᱷᱟᱱ ᱵᱷᱟᱜᱮ ᱡᱚᱜᱼᱟ᱾
ᱱᱟᱦᱟᱜ ᱚᱠᱛᱮ ᱱᱚᱣᱟ ᱟᱧᱡᱚᱢ ᱠᱟᱛᱮᱜ ᱯᱟᱥᱮᱡ ᱞᱟᱱᱫᱟ ᱦᱟᱹᱡᱩᱜᱼᱟ ᱥᱮ ᱟᱱᱫᱽᱦᱟ ᱯᱟᱹᱛᱤᱭᱟᱹᱣ ᱢᱚᱱᱮᱜᱼᱟ᱾ ᱢᱮᱱᱠᱷᱟᱱ ᱱᱚᱣᱟ ᱢᱤᱛᱷ ᱟᱨ ᱠᱟᱹᱢᱤ ᱦᱚᱨᱟ ᱨᱮᱱᱟᱜ ᱦᱚᱸ ᱜᱩᱨᱩᱛᱛᱚ ᱢᱮᱱᱟᱜᱼᱟ᱾ ᱱᱚᱣᱟ ᱫᱟᱨᱟᱭ ᱛᱮ ᱵᱟᱰᱟᱭᱚᱜ ᱠᱟᱱᱟ ᱡᱮᱹ, ᱦᱚᱲ ᱦᱚᱯᱚᱱ ᱦᱚᱸ ᱪᱟᱱᱫᱚ ᱜᱟᱱᱦᱟᱜ ᱤᱫᱤ ᱠᱟᱛᱮᱜ ᱠᱳ ᱩᱭᱦᱟᱹᱨ ᱟᱠᱟᱱᱟ᱾ ᱚᱱᱟ ᱨᱮᱱᱟᱜ ᱠᱟᱨᱚᱱ ᱠᱳ ᱥᱮᱱᱫᱽᱨᱟ ᱟᱠᱟᱫᱟ᱾ ᱯᱟᱥᱮᱡ ᱵᱟᱠᱳ ᱯᱩᱨᱟᱹᱣ ᱫᱟᱲᱮ ᱟᱠᱟᱫᱟ᱾ ᱢᱮᱱᱠᱷᱟᱱ ᱚᱱᱟ ᱠᱳ ᱜᱤ ᱱᱟᱦᱟᱜ ᱩᱭᱦᱟᱹᱨ ᱥᱮ ᱥᱟᱬᱮᱥ ᱨᱮᱱᱟᱜ ᱩᱫᱩᱜ ᱦᱚᱨ ᱛᱟᱦᱮ ᱠᱟᱱᱟ᱾
Photo- Wikipedia.
