ᱵᱤᱱ ᱵᱚᱦᱚᱜᱼᱟᱱ ᱵᱷᱩᱛ
 |
| ᱵᱤᱱ ᱵᱚᱦᱚᱜᱼᱟᱱ ᱵᱷᱩᱛ |
ᱟᱞᱮ ᱟᱛᱳ ᱠᱷᱚᱱ ᱯᱩᱨᱩᱵᱽ ᱱᱟᱠᱷᱟ ᱨᱮ ᱢᱤᱫ ᱠᱤᱞᱳ ᱜᱟᱱ ᱥᱟᱹᱝᱜᱤᱧ ᱨᱮ ᱠᱷᱟᱹᱲᱤ ᱢᱮᱱᱟᱜᱼᱟ᱾ ᱚᱱᱟ ᱠᱷᱟᱹᱲᱤ ᱟᱲᱮ ᱨᱮ ᱛᱟᱞᱮ ᱫᱟᱨᱮ ᱟᱨ ᱵᱟᱲᱮ ᱫᱟᱨᱮ ᱢᱮᱱᱟᱜᱼᱟ᱾ ᱚᱱᱟ ᱵᱟᱲᱮ ᱫᱟᱨᱮ ᱞᱟᱛᱟᱨ ᱨᱮ ᱫᱚ ᱥᱮᱫᱟᱭ ᱢᱤᱫ ᱛᱷᱟᱱ ᱥᱮ ᱢᱚᱱᱫᱤᱨ ᱛᱟᱦᱮᱸ ᱠᱟᱱᱟ᱾ ᱞᱟᱹᱭᱟᱠᱳ ᱱᱮᱛᱟᱨ ᱫᱚ ᱠᱟᱛᱷᱟᱭ ᱦᱟᱥᱟ ᱞᱟᱛᱟᱨ ᱨᱮ ᱛᱚᱯᱟ ᱩᱱᱩᱢ ᱮᱱᱟ᱾ ᱚᱱᱟ ᱟᱲᱮ ᱛᱮ ᱜᱤ ᱦᱚᱲ ᱪᱟᱞᱟᱜ ᱦᱟᱹᱡᱩᱜ ᱦᱚᱨ ᱛᱟᱦᱮᱸ ᱠᱟᱱᱟ᱾ ᱱᱮᱛᱟᱨ ᱫᱚ ᱵᱚᱛᱚᱨ ᱛᱮ ᱚᱝᱠᱟ ᱛᱮ ᱚᱠᱚᱭ ᱦᱚᱸ ᱵᱟᱠᱳ ᱪᱟᱞᱟᱜᱼᱟ᱾
ᱟᱞᱮ ᱟᱛᱳ ᱨᱮᱱ ᱦᱟᱲᱟᱢ ᱠᱳ ᱠᱳ ᱞᱟᱹᱭᱟ, ᱚᱱᱟ ᱛᱷᱟᱱ ᱨᱮ ᱫᱚ ᱠᱟᱛᱷᱟᱭ ᱵᱤᱱ ᱵᱚᱦᱚᱜᱼᱟᱱ ᱵᱷᱩᱛ ᱢᱮᱱᱟᱭᱟ᱾ ᱟᱹᱰᱤ ᱢᱟᱨᱟᱝ ᱦᱚᱲᱢᱚ ᱛᱟᱭ᱾ ᱢᱤᱫ ᱛᱤ ᱛᱮ ᱦᱚᱲᱮ ᱛᱚᱦᱚᱵ ᱯᱩᱨᱟᱹᱣ ᱠᱳ ᱞᱮᱠᱟ ᱛᱤ ᱛᱟᱭ᱾ ᱠᱚᱲᱟᱢ ᱨᱮ ᱯᱮᱭᱟ ᱢᱮᱫ ᱛᱟᱭ᱾ ᱢᱩ ᱢᱚᱪᱟ ᱡᱚᱛᱚ ᱜᱤ ᱠᱚᱲᱟᱢ ᱨᱮ᱾ ᱨᱩᱠᱟᱹ ᱞᱮᱠᱟ ᱵᱟᱨᱮᱭᱟ ᱥᱚᱱᱰᱟ ᱰᱟᱴᱟ ᱛᱟᱭ᱾ ᱢᱮᱱᱠᱷᱟᱱ ᱞᱩᱛᱩᱨ ᱵᱟᱹᱱᱩᱜ ᱛᱟᱭᱟ᱾ ᱩᱱᱤ ᱵᱷᱩᱛ ᱫᱚ ᱢᱤᱫᱼᱴᱮᱱ ᱯᱩᱸᱰ ᱥᱟᱫᱚᱢ ᱨᱮ ᱫᱮᱡ ᱠᱟᱛᱮᱡᱼᱮ ᱫᱟᱲᱟᱱᱟ᱾
ᱚᱠᱚᱭ ᱦᱟᱲᱟᱢ ᱠᱳ ᱴᱷᱮᱱ ᱱᱚᱣᱟᱧ ᱟᱧᱡᱚᱢ ᱟᱠᱟᱫ ᱩᱱᱠᱩ ᱚᱠᱚᱭ ᱦᱚᱸ ᱩᱱᱤ ᱵᱷᱩᱛ ᱫᱚ ᱵᱟᱠᱳ ᱧᱮᱞ ᱟᱠᱟᱫᱤᱭᱟ᱾ ᱢᱤᱫᱼᱴᱮᱱ ᱦᱚᱲ ᱩᱱᱤ ᱵᱷᱩᱛ ᱥᱟᱢᱟᱝ ᱨᱮᱭ ᱯᱟᱲᱟᱣ ᱞᱮᱱᱟ᱾ ᱵᱚᱛᱚᱨ ᱛᱮ ᱛᱷᱚᱲᱟ ᱫᱤᱱ ᱛᱟᱭᱚᱢᱮ ᱜᱚᱡ ᱮᱱᱟ᱾ ᱩᱱᱤ ᱦᱚᱲ ᱴᱷᱮᱱ ᱠᱷᱚᱱ ᱜᱤ ᱦᱟᱲᱟᱢ ᱠᱳ ᱫᱚ ᱠᱳ ᱟᱧᱡᱚᱢ ᱟᱠᱟᱫᱟ᱾
ᱵᱷᱩᱛ ᱵᱟᱠᱳ ᱧᱮᱞ ᱟᱠᱟᱫᱤ ᱨᱮᱦᱚᱸ ᱢᱤᱫ ᱵᱟᱨ ᱦᱚᱲ ᱠᱳ ᱞᱟᱹᱭᱟ ᱯᱩᱸᱰ ᱥᱟᱫᱚᱢ ᱵᱚᱞᱮ ᱠᱳ ᱧᱮᱞ ᱛᱤᱭᱟᱹᱜ ᱟᱠᱟᱫᱤᱭᱟ᱾ ᱚᱠᱚᱭ ᱫᱚ ᱥᱟᱫᱚᱢ ᱦᱚᱸ ᱵᱟᱠᱳ ᱧᱮᱞ ᱧᱟᱢ ᱟᱠᱟᱫᱤᱭᱟ, ᱮᱠᱮᱱ ᱥᱟᱫᱚᱢ ᱠᱷᱩᱨᱟᱹ ᱨᱮᱱᱟᱜ ᱥᱟᱰᱮ ᱠᱳ ᱟᱧᱡᱚᱢ ᱟᱠᱟᱫᱟ᱾ ᱟᱞᱮ ᱟᱛᱳ ᱯᱟᱹᱪᱷᱤᱢ ᱨᱮ ᱢᱤᱫᱼᱴᱮᱱ ᱴᱷᱮᱴᱠᱮ ᱵᱟᱲᱮ ᱫᱟᱨᱮ ᱢᱮᱱᱟᱜᱼᱟ᱾ ᱞᱟᱹᱭᱟᱠᱳ ᱟᱞᱮ ᱟᱛᱳ ᱛᱟᱞᱟ ᱛᱮ ᱩᱱᱤ ᱵᱷᱩᱛ ᱚᱱᱟ ᱵᱟᱲᱮ ᱫᱟᱨᱮ ᱨᱮᱭ ᱪᱟᱞᱟᱣ ᱦᱟᱹᱡᱩᱜᱼᱟ᱾ ᱩᱱ ᱚᱠᱛᱮ ᱥᱟᱫᱚᱢ ᱠᱷᱩᱨᱟᱹ ᱨᱮᱱᱟᱜ ᱥᱟᱰᱮ ᱠᱳ ᱟᱧᱡᱚᱢ ᱟᱠᱟᱫᱟ᱾
᱒᱐᱑᱒ ᱥᱮᱨᱢᱟ ᱡᱟᱱᱩᱣᱟᱨᱤ ᱪᱟᱱᱫᱚ ᱨᱮᱱᱟᱜ ᱜᱷᱚᱴᱚᱱᱟ᱾ ᱟᱞᱮ ᱟᱛᱳ ᱨᱮᱱ ᱢᱤᱫᱼᱴᱮᱱ ᱠᱚᱲᱟ ᱚᱱᱟ ᱱᱟᱠᱷᱟ ᱨᱮ ᱢᱮᱥᱤᱱ ᱛᱮ ᱠᱷᱮᱛ ᱨᱮ ᱫᱟᱜᱼᱮ ᱟᱨᱮᱡᱼᱮᱫ ᱠᱟᱱ ᱛᱟᱦᱮᱸ ᱠᱟᱱᱟ᱾ ᱧᱤᱱᱫᱟᱹ ᱑ ᱴᱟᱲᱟᱝ ᱜᱟᱱ ᱦᱩᱭ ᱟᱠᱟᱱ ᱛᱟᱦᱮᱸ ᱠᱟᱱᱟ᱾ ᱩᱱᱤ ᱥᱟᱶ ᱢᱤᱫ ᱠᱟᱹᱢᱤ ᱠᱚᱲᱟᱭ ᱛᱟᱦᱮᱸ ᱠᱟᱱᱟ᱾ ᱠᱷᱮᱛ ᱨᱮ ᱫᱟᱜ ᱮᱢ ᱫᱚ ᱯᱩᱨᱟᱹᱣ ᱦᱮᱡ ᱟᱠᱟᱱᱟ ᱦᱟᱸᱜ᱾ ᱩᱱ ᱚᱠᱛᱮ ᱠᱤᱱ ᱟᱧᱡᱚᱢ ᱧᱟᱢ ᱠᱮᱫᱟ ᱪᱤᱞᱤ ᱪᱚ ᱫᱟᱜ ᱪᱮᱛᱟᱱ ᱛᱮᱭ ᱠᱟᱢᱥᱟᱣ ᱪᱟᱞᱟᱜ ᱠᱟᱱᱟ᱾ ᱛᱮᱨᱫᱮᱡ ᱢᱟᱨᱥᱟᱞ ᱛᱟᱦᱮᱸ ᱠᱟᱱᱟ᱾ ᱫᱟᱜ ᱪᱷᱤᱴᱠᱟᱹᱣ ᱧᱮᱞ ᱧᱟᱢᱚᱜ ᱠᱟᱱᱟ᱾ ᱢᱮᱱᱠᱷᱟᱱ ᱪᱤᱞᱤᱭ ᱪᱷᱤᱴᱠᱟᱹᱣ ᱮᱫᱟ ᱩᱱᱤ ᱫᱚ ᱵᱟᱭ ᱧᱮᱞ ᱧᱟᱢᱚᱜ ᱠᱟᱱᱟ᱾ ᱫᱟᱜ ᱪᱷᱤᱴᱠᱟᱹᱣ ᱧᱮᱞ ᱛᱮ ᱵᱩᱡᱽᱦᱟᱹᱜ ᱠᱟᱱᱟ ᱛᱩᱭᱩ ᱥᱮ ᱠᱷᱤᱸᱠᱲᱤ ᱫᱚ ᱵᱟᱝ, ᱜᱟᱹᱭ ᱰᱟᱝᱨᱟ ᱠᱟᱰᱟ ᱵᱟᱝᱠᱷᱟᱱ ᱥᱟᱫᱚᱢ ᱱᱚᱝᱠᱟᱱ ᱡᱟᱦᱟᱱᱤᱡᱼᱮ ᱠᱟᱢᱥᱟᱣ ᱪᱟᱞᱟᱜ ᱠᱟᱱᱟ᱾ ᱵᱩᱡᱽᱦᱟᱣ ᱠᱮᱫᱟ ᱠᱤᱱ ᱱᱩᱭ ᱫᱚ ᱡᱩᱫᱟᱹᱱᱤᱡ ᱠᱟᱱᱟᱭ᱾ ᱵᱚᱛᱚᱨ ᱛᱮ ᱩᱱᱠᱤᱱ ᱫᱚ ᱢᱮᱥᱤᱱ ᱵᱚᱱᱫᱚ ᱠᱟᱛᱮᱜ ᱩᱥᱟᱹᱨᱟ ᱚᱲᱟᱜ ᱠᱤᱱ ᱦᱮᱡ ᱮᱱᱟ᱾
ᱚᱱᱟ ᱞᱟᱦᱟ ᱨᱮᱱᱟᱜ ᱟᱨ ᱢᱤᱫᱼᱴᱮᱱ ᱜᱷᱚᱴᱚᱱᱟ᱾ ᱟᱞᱮ ᱟᱛᱳ ᱨᱮᱱ ᱢᱤᱫᱼᱴᱮᱱ ᱦᱟᱲᱟᱢ ᱯᱩᱡᱟᱹ ᱞᱟᱹᱜᱤᱫ ᱪᱤᱱᱤ, ᱵᱟᱛᱟᱥᱟ, ᱠᱟᱭᱨᱟ ᱮᱢᱟᱱᱛᱮᱭᱟᱜ ᱠᱤᱨᱤᱧ ᱠᱟᱛᱮᱜ ᱚᱲᱟᱜᱼᱮ ᱨᱩᱣᱟᱹᱲ ᱠᱟᱱᱟ᱾ ᱩᱣᱟᱹᱲᱚᱜ ᱛᱮᱭ ᱧᱩᱦᱩᱢ ᱮᱱᱟ᱾ ᱟᱛᱳ ᱨᱩᱣᱟᱹᱲᱚᱜ ᱛᱮ ᱚᱱᱟ ᱛᱷᱟᱱ ᱟᱲᱮ ᱛᱮ ᱜᱤ ᱦᱚᱨ ᱛᱟᱦᱮᱸ ᱠᱟᱱᱟ᱾ ᱛᱷᱟᱱ ᱟᱲᱮ ᱛᱮ ᱠᱷᱟᱹᱲᱤ ᱯᱟᱨᱚᱢ ᱠᱟᱛᱮᱜ ᱫᱷᱟᱹᱨᱤ ᱨᱮᱭ ᱨᱟᱠᱟᱵ ᱮᱱᱟ᱾ ᱨᱟᱠᱟᱵ ᱛᱚᱨᱟᱭ ᱧᱮᱞ ᱧᱟᱢ ᱠᱤᱫᱤᱭᱟ ᱦᱚᱨ ᱟᱲᱮ ᱨᱮ ᱢᱤᱫᱼᱴᱮᱱ ᱯᱩᱸᱰ ᱥᱟᱫᱚᱢ ᱜᱷᱟᱥᱮ ᱟᱹᱛᱤᱧ ᱠᱟᱱᱟ᱾ ᱦᱟᱲᱟᱢ ᱫᱚᱭ ᱵᱩᱡᱽᱦᱟᱹᱣ ᱠᱮᱫᱟ ᱱᱤᱭ ᱫᱚ ᱮᱠᱮᱱ ᱥᱟᱫᱚᱢ ᱫᱚᱭ ᱵᱟᱝ ᱠᱟᱱᱟ᱾ ᱵᱟᱭ ᱧᱮᱞ ᱧᱟᱢᱚᱜ ᱠᱟᱱ ᱨᱮᱦᱚᱸ ᱩᱱᱤ ᱪᱮᱛᱟᱱ ᱨᱮ ᱵᱤᱱ ᱵᱚᱦᱚᱜᱼᱟᱱ ᱵᱷᱩᱛ ᱢᱮᱱᱟᱭᱟ᱾ ᱵᱚᱛᱚᱨ ᱛᱮ ᱞᱟᱹᱱᱰᱨᱤ ᱨᱚᱦᱚᱲᱮᱱ ᱛᱟᱭᱟ᱾ ᱢᱮᱱᱠᱷᱟᱱ ᱢᱤᱫᱼᱴᱮᱱ ᱫᱟᱶᱮ ᱧᱟᱢ ᱠᱮᱫᱟ᱾ ᱥᱟᱫᱚᱢ ᱫᱚ ᱮᱴᱟᱜ ᱥᱮᱡᱼᱮ ᱥᱟᱢᱟᱝ ᱟᱠᱟᱫᱟ᱾ ᱟᱡ ᱫᱚ ᱥᱟᱫᱚᱢ ᱛᱟᱭᱚᱢ ᱨᱮ ᱢᱮᱱᱟᱭᱟ᱾ ᱫᱤᱥᱟᱹ ᱨᱩᱣᱟᱹᱲ ᱠᱮᱫᱟᱭ ᱱᱩᱭ ᱵᱷᱩᱛᱟᱜ ᱢᱟ ᱞᱩᱛᱩᱨ ᱵᱟᱹᱱᱩᱜ᱾ ᱡᱟᱦᱟᱱ ᱥᱟᱰᱮ ᱵᱟᱭ ᱟᱧᱡᱚᱢ ᱧᱟᱢ᱾ ᱪᱟᱹᱱᱫᱤ ᱞᱤᱠᱷᱚᱱ ᱨᱮ ᱪᱮᱫ ᱢᱮᱱᱟᱜᱼᱟ ᱦᱩᱭᱩᱜᱼᱟ᱾ ᱚᱱᱟ ᱩᱭᱦᱟᱹᱨ ᱠᱟᱛᱮᱜ ᱛᱟᱲᱟᱢᱮ ᱮᱦᱚᱵ ᱮᱱᱟ᱾ ᱥᱟᱫᱚᱢ ᱥᱮᱡ ᱠᱚᱭᱚᱜ ᱛᱷᱤᱨ ᱠᱟᱛᱮᱜ ᱜᱤ ᱥᱟᱫᱚᱢᱮ ᱛᱟᱲᱟᱢ ᱯᱟᱨᱚᱢ ᱠᱤᱫᱤᱭᱟ᱾ ᱚᱱᱟ ᱛᱟᱭᱚᱢ ᱛᱟᱭᱚᱢ ᱥᱮᱡ ᱵᱟᱝ ᱠᱚᱭᱚᱜ ᱠᱟᱛᱮᱜ ᱪᱩᱜᱩᱲ ᱛᱟᱲᱟᱢᱮ ᱮᱦᱚᱵ ᱮᱱᱟ᱾ ᱱᱟᱥᱮ ᱥᱟᱹᱝᱜᱤᱧ ᱥᱮᱱ ᱠᱟᱛᱮᱜ ᱛᱟᱭᱚᱢ ᱥᱮᱡᱼᱮ ᱠᱚᱭᱚᱜ ᱨᱩᱣᱟᱹᱲ ᱠᱮᱫᱟ᱾ ᱥᱟᱫᱚᱢ ᱟᱡ ᱥᱮᱡᱼᱮ ᱫᱟᱹᱲ ᱟᱹᱜᱩ ᱮᱫᱟ᱾ ᱟᱨ ᱪᱮᱫᱼᱮᱢ ᱪᱮᱠᱟᱭᱟ? ᱥᱟᱱᱟᱢᱟᱜ ᱜᱤᱰᱤ ᱠᱟᱛᱮᱜ ᱨᱤᱭᱟᱹᱜ ᱰᱷᱩᱢᱵᱟᱹᱜ ᱫᱟᱹᱫᱟᱹᱲᱮ ᱞᱟᱜᱟᱣ ᱮᱱᱟ᱾ ᱟᱛᱳ ᱥᱩᱨ ᱦᱮᱡ ᱠᱟᱛᱮᱜᱼᱮ ᱠᱚᱭᱚᱜ ᱨᱩᱣᱟᱹᱲ ᱠᱮᱫᱟ᱾ ᱚᱠᱟᱨᱮ ᱠᱟᱭᱨᱟ ᱵᱟᱛᱟᱥᱟ ᱠᱚᱭ ᱜᱤᱰᱤ ᱟᱴᱳ ᱟᱠᱟᱫ ᱥᱟᱫᱚᱢ ᱚᱱᱰᱮᱭ ᱛᱤᱝᱜᱩ ᱟᱠᱟᱱᱟ᱾ ᱢᱮᱫ ᱨᱤᱯᱤᱫ ᱨᱩᱣᱟᱹᱲ ᱛᱤᱜᱤᱭ ᱧᱮᱞ ᱠᱮᱫᱟ ᱥᱟᱫᱚᱢᱮ ᱟᱝᱜᱮᱱ ᱮᱱᱟ᱾
