ᱦᱚᱲ ᱦᱚᱯᱚᱱᱟᱜ ᱫᱷᱚᱨᱚᱢ ᱧᱩᱛᱩᱢ ᱟᱨ ᱫᱷᱚᱨᱚᱢ ᱯᱩᱛᱷᱤ ᱡᱟᱹᱨᱩᱲᱮᱱᱟ ᱪᱮᱫᱟᱜ?
ᱫᱷᱚᱨᱚᱢ ᱫᱚ ᱦᱩᱭᱩᱜ ᱠᱟᱱᱟ ᱯᱟᱛᱤᱭᱟᱹᱣ᱾ ᱟᱨ ᱯᱟᱹᱛᱤᱭᱟᱹᱣ ᱫᱚ ᱩᱨᱩᱢ ᱨᱮᱱᱟᱜ ᱠᱟᱱᱟ᱾ ᱚᱠᱟ ᱨᱮᱱᱟᱜ ᱫᱚ ᱧᱩᱛᱩᱢ ᱵᱟᱝ ᱛᱟᱦᱮᱱᱟ᱾ ᱫᱷᱚᱨᱚᱢ ᱫᱚ ᱫᱷᱚᱨᱚᱢ ᱜᱤ᱾ ᱡᱮᱹᱞᱮᱠᱟ ᱫᱩᱞᱟᱹᱲ ᱦᱩᱭᱩᱜ ᱠᱟᱱᱟ ᱩᱨᱩᱢ, ᱚᱠᱟ ᱨᱮᱱᱟᱜ ᱫᱚ ᱧᱩᱛᱩᱢ ᱵᱟᱝ ᱦᱩᱭᱩᱜᱼᱟ᱾ ᱦᱤᱱᱫᱩ ᱫᱩᱞᱟᱹᱲ, ᱤᱥᱞᱟᱢ ᱫᱩᱞᱟᱹᱲ, ᱠᱷᱨᱤᱥᱴᱟᱱ ᱫᱩᱞᱟᱹᱲ - ᱱᱚᱝᱠᱟ ᱫᱚ ᱵᱟᱝ ᱦᱩᱭᱩᱜᱼᱟ᱾ ᱫᱩᱞᱟᱹᱲ ᱫᱚ ᱫᱩᱞᱟᱹᱲ ᱜᱤ᱾
ᱟᱵᱩ ᱦᱚᱲ ᱦᱚᱯᱚᱱᱟᱜ ᱫᱷᱚᱨᱚᱢ ᱦᱚᱸ ᱚᱝᱠᱟ ᱜᱤ ᱛᱟᱦᱮᱸ ᱠᱟᱱᱟ᱾ ᱡᱩᱜᱽ ᱡᱩᱜᱽ ᱠᱷᱚᱱ ᱦᱚᱲ ᱦᱚᱯᱚᱱ ᱟᱯᱱᱟᱨ ᱫᱷᱚᱨᱢ ᱠᱳ ᱯᱟᱧᱪᱟ ᱟᱹᱜᱩ ᱟᱠᱟᱫ ᱨᱮᱦᱚᱸ ᱵᱟᱠᱚ ᱩᱭᱦᱟᱹᱨ ᱟᱠᱟᱫᱟ ᱫᱷᱚᱨᱚᱢ ᱥᱮ ᱯᱟᱹᱛᱤᱭᱟᱹᱣ ᱨᱮᱱᱟᱜ ᱧᱩᱛᱩᱢ ᱞᱟᱜᱟᱜᱼᱟ᱾ ᱫᱷᱚᱨᱚᱢ ᱢᱟ ᱯᱟᱹᱛᱤᱭᱟᱹᱣ ᱨᱮᱱᱟᱜ ᱡᱤᱱᱤᱥ, ᱚᱱᱟ ᱨᱮᱱᱟᱜ ᱫᱚ ᱟᱨᱦᱚᱸ ᱪᱮᱫ ᱧᱩᱛᱩᱢ! ᱫᱷᱚᱨᱚᱢ ᱯᱩᱛᱷᱤ ᱤᱫᱤ ᱠᱟᱛᱮᱜ ᱦᱚᱸ ᱦᱚᱲ ᱦᱚᱯᱚᱱᱟᱜ ᱧᱮᱱᱮᱞ ᱫᱚ ᱵᱮᱜᱟᱨ ᱜᱤ ᱛᱟᱦᱮᱸ ᱠᱟᱱᱟ᱾ ᱦᱚᱲ ᱦᱚᱯᱚᱱᱟᱜ ᱫᱷᱚᱨᱚᱢ ᱟᱨ ᱥᱮᱨᱣᱟ ᱠᱳ ᱫᱚ ᱢᱚᱪᱟ ᱢᱚᱪᱟ ᱛᱮ ᱜᱤ ᱦᱮᱡ ᱤᱫᱤ ᱟᱠᱟᱱᱟ᱾ ᱩᱱᱠᱳ ᱠᱳ ᱯᱟᱹᱛᱤᱭᱟᱹᱜ ᱠᱟᱱ ᱛᱟᱦᱮᱸ ᱠᱟᱱᱟ ᱫᱷᱚᱨᱚᱢ ᱠᱟᱛᱷᱟ ᱠᱳ ᱫᱚ ᱚᱞ ᱫᱚᱦᱚ ᱠᱷᱚᱱ ᱚᱱᱛᱚᱨ ᱨᱮ ᱫᱚᱦᱚ ᱜᱤ ᱡᱚᱛᱷᱟᱛᱟ᱾ ᱚᱱᱟᱛᱮ ᱫᱷᱚᱨᱚᱢ ᱯᱩᱛᱷᱤ ᱚᱞ ᱫᱚ ᱡᱟᱹᱨᱩᱲ ᱵᱟᱠᱚ ᱢᱚᱱᱮ ᱟᱠᱟᱫᱟ᱾
ᱢᱮᱱᱠᱷᱟᱱ ᱫᱷᱟᱹᱨᱛᱤ ᱨᱮᱱ ᱯᱨᱚᱵᱷᱟᱵᱟᱱ ᱫᱷᱚᱨᱚᱢ ᱠᱳ ᱛᱤᱱᱨᱮ ᱫᱷᱚᱨᱚᱢ ᱧᱩᱛᱩᱢ ᱟᱨ ᱫᱷᱚᱨᱚᱢ ᱯᱩᱛᱷᱤ ᱥᱟᱢᱟᱝ ᱠᱟᱛᱮᱜ ᱦᱚᱲ ᱦᱚᱯᱚᱱ ᱠᱳ ᱛᱟᱞᱟ ᱮᱥᱮᱨ ᱯᱟᱥᱱᱟᱣ ᱠᱳ ᱞᱟᱜᱟᱣ ᱮᱱᱟ, ᱩᱱᱨᱮ ᱦᱚᱲ ᱦᱚᱯᱚᱱ ᱫᱚ ᱢᱩᱥᱠᱤᱞ ᱨᱮ ᱠᱳ ᱯᱟᱲᱟᱣ ᱮᱱᱟ᱾ ᱠᱩᱞᱤ ᱟᱪᱚ ᱮᱱᱟ ᱠᱳ, ᱟᱯᱮᱭᱟᱜ ᱫᱷᱚᱨᱚᱢ ᱧᱩᱛᱩᱢ ᱪᱮᱫ? ᱟᱯᱮᱭᱟᱜ ᱫᱷᱚᱨᱚᱢ ᱯᱩᱛᱷᱤ ᱨᱮᱱᱟᱜ ᱧᱩᱛᱩᱢ ᱪᱮᱫ? ᱦᱚᱲ ᱦᱚᱯᱚᱱ ᱛᱮᱞᱟ ᱵᱟᱠᱳ ᱮᱢ ᱫᱟᱲᱮ ᱟᱠᱟᱫᱟ᱾ ᱩᱱᱠᱩ ᱵᱟᱠᱳ ᱵᱩᱡᱽᱦᱟᱹᱧ ᱫᱟᱲᱮ ᱟᱠᱟᱫᱟ- ᱫᱷᱚᱨᱚᱢ ᱨᱮᱱᱟᱜ ᱧᱩᱛᱩᱢ ᱫᱚ ᱪᱮᱫ ᱞᱮᱠᱟ! ᱫᱷᱚᱨᱚᱢ ᱯᱩᱛᱷᱤ ᱫᱚ ᱪᱮᱫᱟᱜ ᱡᱟᱹᱨᱩᱲ! ᱱᱟᱦᱟᱸᱜ ᱦᱚᱸ ᱟᱭᱢᱟ ᱦᱚᱲ ᱦᱚᱯᱚᱱ ᱜᱤᱢ ᱠᱩᱞᱤ ᱞᱤᱠᱩ ᱠᱷᱟᱱ ᱵᱟᱠᱩ ᱞᱟᱹᱭ ᱫᱟᱲᱮᱭᱟᱜᱼᱟ ᱟᱠᱚᱣᱟᱜ ᱫᱷᱚᱨᱚᱢ ᱨᱮᱱᱟᱜ ᱧᱩᱛᱩᱢ ᱟᱨ ᱫᱷᱚᱨᱚᱢ ᱯᱩᱛᱷᱤ ᱨᱮᱱᱟᱜ ᱧᱩᱛᱩᱢ᱾ ᱚᱱᱟ ᱚᱨᱡᱚ ᱛᱮ ᱯᱨᱚᱵᱷᱟᱵᱟᱱ ᱫᱷᱚᱨᱚᱢ ᱨᱮᱱ ᱦᱚᱲ ᱠᱳ ᱥᱟᱵ ᱠᱮᱫᱟ- ᱦᱚᱲ ᱦᱚᱯᱚᱱ ᱥᱮ ᱥᱟᱱᱛᱟᱞ ᱠᱚᱣᱟᱜ ᱫᱚ ᱪᱮᱫ ᱫᱷᱚᱨᱚᱢ ᱦᱚᱸ ᱵᱟᱹᱱᱩᱜ ᱛᱟᱠᱚᱣᱟ᱾ ᱫᱷᱚᱨᱚᱢ ᱵᱟᱹᱱᱩᱜ ᱛᱮ ᱵᱮᱫᱷᱚᱨᱚᱢ ᱦᱚᱲ ᱠᱳ ᱞᱮᱠᱷᱟ ᱠᱮᱫ ᱵᱩᱱᱟ᱾ ᱟᱨ ᱚᱠᱚᱭ ᱠᱳ ᱩᱱᱠᱩᱣᱟᱜ ᱫᱷᱚᱨᱚᱢ ᱨᱮ ᱠᱳ ᱩᱪᱟᱹᱲ ᱮᱱᱟ ᱩᱱᱠᱩ ᱫᱚ ᱟᱠᱚᱣᱟᱜ ᱫᱷᱚᱨᱚᱢ ᱧᱩᱛᱩᱢᱟᱱ ᱥᱟᱱᱛᱟᱞ ᱥᱮ ᱦᱚᱲ ᱠᱳ ᱞᱮᱠᱷᱟ ᱠᱮᱫ ᱠᱚᱣᱟ᱾ ᱱᱚᱝᱠᱟᱛᱮ ᱟᱵᱩ ᱫᱚ ᱵᱮᱫᱤᱱ ᱥᱮ ᱵᱮᱫᱷᱚᱨᱚᱢᱟᱱ ᱠᱳ ᱢᱮᱛᱟᱵᱩᱱ ᱠᱟᱱᱟ᱾
ᱱᱚᱣᱟ ᱥᱩᱡᱩᱜᱽ ᱦᱟᱛᱟᱣ ᱠᱟᱛᱮ ᱥᱟᱱᱛᱟᱞ ᱠᱚ ᱯᱨᱚᱵᱷᱟᱵᱽ ᱞᱟᱹᱜᱤᱫ ᱫᱷᱚᱨᱚᱢ ᱵᱮᱯᱟᱨᱤᱭᱟᱹ ᱠᱳ ᱨᱮᱱ ᱮᱡᱮᱱᱴ ᱠᱚ ᱥᱟᱱᱛᱟᱞ ᱠᱚᱣᱟᱜ ᱫᱷᱚᱨᱚᱢ ᱵᱮᱫᱤᱱ ᱫᱷᱚᱨᱚᱢ ᱢᱮᱱ ᱛᱮ ᱠᱳ ᱯᱟᱥᱱᱟᱣ ᱠᱮᱫᱟ᱾ ᱚᱱᱟ ᱥᱮᱡ ᱟᱭᱢᱟ ᱞᱮᱠᱟᱱ ᱦᱟᱦᱟᱲᱟ ᱡᱩᱠᱛᱤ ᱠᱳ ᱛᱤᱝᱜᱩ ᱠᱮᱫᱟ᱾ ᱟᱨᱦᱚᱸ ᱫᱟᱣ ᱠᱚ ᱧᱟᱢ ᱞᱮᱠᱷᱟᱱ ᱠᱚ ᱢᱮᱱᱟ, ᱵᱮᱫᱤᱱ ᱦᱚᱲ ᱠᱚᱣᱟᱜ ᱫᱷᱚᱨᱚᱢ ᱨᱮᱱᱟᱜ ᱴᱷᱤᱠ ᱵᱟᱹᱱᱩᱜᱼᱟ᱾ ᱥᱟᱱᱛᱟᱞ ᱠᱚᱣᱟᱜ ᱯᱟ.ᱛᱤᱭᱟ.ᱣ ᱫᱚ ᱟᱱᱫᱽᱦᱟ ᱯᱟᱹᱛᱤᱭᱟᱹᱣ ᱞᱮᱠᱟᱛᱮ ᱥᱚᱫᱚᱨ ᱠᱳ ᱮᱦᱚᱵ ᱮᱱᱟ᱾ ᱚᱱᱟ ᱥᱟᱶ ᱩᱱᱠᱩ ᱠᱚ ᱯᱚᱨᱪᱟᱨ ᱠᱳ ᱞᱟᱜᱟᱣ ᱮᱱᱟ ᱵᱮᱫᱷᱚᱨᱚᱢ ᱦᱚᱲ ᱫᱚ ᱦᱤᱨᱠᱷᱟᱹᱣᱟᱱ ᱦᱚᱲ ᱠᱟᱱᱟ ᱠᱚ᱾ ᱵᱟᱝ ᱯᱷᱟᱨᱪᱟ ᱦᱚᱲ ᱠᱟᱱᱟ ᱠᱚ᱾ ᱪᱟᱞᱟᱣ ᱤᱫᱤ ᱮᱱᱟ ᱫᱷᱚᱨᱚᱢ ᱩᱪᱟᱹᱲ ᱨᱮᱱᱜᱟᱭᱢᱟ ᱞᱮᱠᱟᱱ ᱦᱚᱨᱟ᱾ ᱚᱠᱚᱭ ᱦᱚᱸ ᱵᱮᱫᱷᱚᱨᱚᱢ ᱥᱮ ᱦᱤᱨᱠᱷᱟᱹᱣᱟᱱ ᱦᱚᱲ ᱦᱩᱭᱩᱜ ᱵᱟᱝ ᱥᱟᱱᱟ ᱠᱚᱣᱟ᱾ ᱚᱱᱟ ᱚᱡᱮ ᱛᱮ ᱦᱚᱲ ᱦᱚᱯᱚᱱ ᱠᱚ ᱦᱟᱞᱮᱰᱷᱟᱞᱮ ᱠᱟᱛᱮᱜ ᱫᱷᱚᱨᱚᱢ ᱵᱚᱫᱚᱞ ᱠᱳ ᱮᱦᱚᱵ ᱠᱮᱫᱟ᱾
ᱦᱚᱲ ᱦᱚᱯᱚᱱᱠᱚᱣᱟᱜ ᱤᱱᱟᱹᱜ ᱫᱤᱱ ᱨᱮᱱᱟᱜ ᱯᱟ.ᱛᱤᱭᱟ.ᱣ ᱪᱮᱛᱟᱱ ᱨᱮ ᱫᱷᱚᱨᱚᱢ ᱵᱮᱯᱟᱨᱤ ᱠᱚᱣᱟᱜ ᱮᱥᱮᱨ ᱦᱟᱹᱡᱩᱜ ᱞᱟᱜᱟᱣ ᱮᱱᱟ᱾ ᱟᱫᱚ ᱠᱳ ᱠᱳ ᱫᱷᱚᱨᱚᱢ ᱩᱪᱟᱹᱲ ᱮᱱᱟ᱾ ᱦᱚᱲ ᱦᱚᱯᱚᱱ ᱠᱳ ᱧᱮᱞ ᱠᱮᱫᱟ ᱫᱷᱚᱨᱚᱢ ᱩᱪᱟᱹᱲ ᱠᱷᱟᱹᱛᱤᱨ ᱥᱚᱢᱟᱡᱽ ᱨᱮ ᱮᱴᱠᱮᱴᱚᱬᱮ ᱥᱤᱨᱡᱟᱹᱜ ᱠᱟᱱᱟ᱾ ᱦᱚᱲ ᱦᱚᱯᱚᱱ ᱠᱳ ᱦᱟᱹᱴᱤᱧᱚᱜ ᱠᱟᱱᱟ᱾ ᱟᱯᱱᱟᱨ ᱦᱚᱲ ᱜᱤ ᱦᱚᱲ ᱦᱚᱯᱚᱱᱟᱜ ᱫᱷᱚᱨᱚᱢ ᱵᱤᱨᱩᱫᱷ ᱠᱳ ᱨᱚᱲ ᱮᱫᱟ᱾ ᱱᱚᱝᱠᱟ ᱪᱟᱞᱟᱜ ᱛᱮ ᱜᱤ ᱛᱟᱦᱮᱱ ᱠᱷᱟᱱ ᱦᱚᱲ ᱦᱚᱯᱚᱱ ᱥᱮ ᱥᱟᱱᱛᱟᱞ ᱠᱚᱣᱟᱜ ᱥᱚᱢᱟᱡᱽ ᱟᱨ ᱫᱷᱚᱨᱚᱢ ᱱᱟᱥᱟᱣᱚᱜᱼᱟ᱾ ᱚᱱᱟ ᱠᱷᱟᱹᱛᱤᱨ ᱛᱮ ᱥᱟᱱᱛᱟᱞ ᱡᱟᱹᱛ ᱥᱮ ᱦᱚᱲ ᱦᱚᱯᱚᱱ ᱨᱮᱱ ᱵᱩᱡᱷᱟ.ᱨᱤ ᱦᱚᱲ ᱠᱚ ᱫᱷᱟᱹᱨᱛᱤ ᱨᱮᱱᱟᱜ ᱯᱨᱚᱵᱷᱟᱵᱟᱱ ᱫᱷᱚᱨᱚᱢ ᱠᱷᱚᱱ ᱦᱚᱲ ᱦᱚᱯᱚᱱᱟᱜ ᱥᱟᱶᱛᱟ ᱟᱨ ᱫᱷᱚᱨᱚᱢ ᱵᱟᱧᱪᱟᱣ ᱞᱟᱜᱤᱫ ᱠᱳ ᱛᱤᱝᱜᱩ ᱮᱱᱟ᱾ ᱦᱚᱲ ᱦᱚᱯᱚᱱᱟᱜ ᱫᱷᱚᱨᱚᱢ ᱨᱮᱱᱟᱜ ᱜᱩᱱ ᱧᱮᱞ ᱠᱟᱛᱮᱜ ᱫᱷᱚᱨᱚᱢ ᱧᱩᱛᱩᱢ ᱠᱳ ᱫᱚᱦᱚ ᱠᱮᱫᱟ “ᱥᱟᱹᱨᱤᱫᱷᱚᱨᱚᱢ”᱾
ᱦᱚᱲ ᱦᱚᱯᱚᱱᱟᱜ ᱫᱷᱚᱨᱚᱢ ᱟᱨ ᱟᱹᱨᱤᱪᱟᱹᱞᱤ ᱫᱚ ᱚᱞ ᱛᱚᱞ ᱵᱟᱝ ᱛᱟᱦᱮᱸ ᱠᱟᱱᱟ᱾ ᱠᱟᱨᱟᱢ ᱵᱤᱱᱛᱤ, ᱵᱷᱟᱱᱰᱟᱱ ᱵᱤᱱᱛᱤ, ᱡᱚᱢᱥᱤᱢ ᱵᱤᱱᱛᱤ ᱱᱚᱣᱟ ᱠᱳ ᱵᱤᱱᱛᱤ ᱵᱟᱸᱠᱷᱮᱲ ᱟᱨ ᱥᱤᱨᱤᱧ ᱛᱟᱞᱟ ᱛᱮ ᱜᱤ ᱦᱚᱲ ᱦᱚᱯᱚᱱᱟᱜ ᱫᱷᱚᱨᱚᱢ ᱫᱚ ᱡᱩᱜᱽ ᱡᱩᱜᱽ ᱦᱮᱡ ᱤᱫᱤ ᱟᱠᱟᱱᱟ᱾ ᱟᱵᱩ ᱨᱮᱱ ᱫᱷᱚᱨᱚᱢ ᱜᱩᱨᱩ ᱠᱳ ᱚᱱᱟ ᱦᱚᱸ ᱠᱳ ᱚᱞ ᱛᱚᱞ ᱠᱮᱫᱟ᱾ ᱦᱚᱲ ᱦᱚᱯᱚᱱᱟᱜ ᱫᱷᱚᱨᱚᱢ ᱯᱩᱛᱷᱤ ᱞᱮᱠᱟᱛᱮ ᱧᱩᱛᱩᱢ ᱠᱳ ᱫᱚᱦᱚ ᱠᱮᱫᱟ “ᱡᱚᱢᱥᱤᱢ ᱵᱤᱱᱛᱤ”᱾
ᱚᱱᱟᱛᱮ ᱱᱟᱦᱟᱜ ᱦᱚᱲ ᱦᱚᱯᱚᱱ ᱫᱚ ᱜᱚᱨᱚᱵᱽ ᱠᱟᱛᱮᱜ ᱵᱩ ᱞᱟᱹᱭᱟ ᱟᱞᱮ ᱵᱮᱫᱷᱚᱨᱚᱢ ᱥᱮ ᱵᱤᱱᱫᱷᱚᱨᱚᱢ ᱦᱚᱲ ᱫᱚ ᱵᱟᱝ ᱠᱟᱱᱟᱞᱮ᱾ ᱟᱞᱮᱭᱟᱜ ᱦᱚᱸ ᱫᱷᱚᱨᱚᱢ ᱢᱮᱱᱟᱜᱼᱟ᱾ ᱟᱞᱮᱭᱟᱜ ᱫᱷᱚᱨᱚᱢ ᱧᱩᱛᱩᱢ “ᱥᱟᱹᱨᱤᱫᱷᱚᱨᱚᱢ”᱾ ᱟᱞᱮᱭᱟᱜ ᱦᱚᱸ ᱫᱷᱚᱨᱚᱢ ᱯᱩᱛᱷᱤ ᱢᱮᱱᱟᱜᱼᱟ᱾ ᱟᱞᱮᱭᱟᱜ ᱫᱷᱚᱨᱚᱢ ᱯᱩᱛᱷᱤ ᱧᱩᱛᱩᱢ “ᱡᱚᱢᱥᱤᱢ ᱵᱤᱱᱛᱤ”᱾
