ᱵᱚᱝᱜᱟ ᱫᱚ ᱚᱠᱚᱭ?
 |
| ᱢᱟᱹᱧᱡᱽᱦᱤ ᱛᱷᱟᱱ |
ᱰᱟᱹᱱ, ᱵᱷᱩᱛ, ᱥᱚᱭᱛᱟᱱ ᱢᱮᱱᱛᱮ ᱫᱚ ᱪᱤᱞᱤ ᱜᱤ ᱵᱟᱹᱱᱩᱜ ᱠᱚᱣᱟ᱾ ᱱᱚᱣᱟ ᱠᱳ ᱫᱚ ᱮᱠᱮᱱ ᱦᱚᱲ ᱠᱚᱣᱟᱜ ᱛᱮᱭᱟᱨ ᱡᱟᱹᱲ ᱠᱟᱹᱦᱱᱤ ᱠᱷᱚᱱ ᱦᱮᱡ ᱟᱠᱟᱱᱟ᱾ ᱚᱠᱚᱭ ᱡᱚᱫᱤ ᱱᱚᱣᱟ ᱠᱳᱭ ᱯᱟᱹᱛᱤᱭᱟᱹᱜ ᱠᱷᱟᱱ ᱦᱟᱛᱟᱝ ᱟᱱᱫᱽᱦᱟ ᱛᱮ ᱩᱱᱤ ᱫᱚ ᱱᱩᱠᱩᱭ ᱧᱮᱞ ᱧᱟᱢ ᱠᱚᱣᱟ ᱥᱮᱭ ᱟᱹᱭᱠᱟᱹᱣ ᱠᱚᱣᱟ᱾ ᱚᱠᱚᱭ ᱠᱳ ᱰᱟᱹᱱ, ᱵᱷᱩᱛ, ᱥᱚᱭᱛᱟᱱ ᱨᱮ ᱠᱳ ᱯᱟᱹᱛᱤᱭᱟᱹᱜ ᱠᱟᱱ ᱩᱱᱠᱩᱣᱟᱜ ᱜᱤ ᱠᱷᱚᱛᱤ ᱦᱩᱭᱩᱜ ᱠᱟᱱᱟ᱾ ᱟᱨ ᱚᱠᱚᱭ ᱵᱟᱭ ᱯᱟᱹᱛᱤᱭᱟᱹᱜ ᱠᱟᱱ ᱩᱱᱤ ᱪᱮᱛᱟᱱ ᱫᱚ ᱰᱟᱹᱱ, ᱵᱷᱩᱛ, ᱥᱚᱭᱛᱟᱱᱟᱜ ᱮᱥᱮᱨ ᱵᱟᱝ ᱯᱟᱲᱟᱜ ᱠᱟᱱᱟ᱾ ᱚᱱᱟᱛᱮ ᱠᱷᱚᱛᱤ ᱦᱚᱸ ᱵᱟᱝ ᱦᱩᱭᱩᱜ ᱠᱟᱱ ᱛᱟᱠᱚᱣᱟ᱾ ᱚᱱᱟᱛᱮ ᱢᱮᱱᱚᱜᱼᱟ ᱰᱟᱹᱱ, ᱵᱷᱩᱛ, ᱥᱚᱭᱛᱟᱱ ᱫᱚ ᱟᱱᱫᱽᱦᱟ ᱯᱟᱹᱛᱤᱭᱟᱹᱣ ᱠᱟᱱᱟ᱾ ᱡᱚᱛᱚ ᱠᱳ ᱢᱟᱡᱽ ᱛᱟᱦᱮᱱ ᱞᱟᱹᱜᱤᱫ ᱱᱚᱝᱠᱟᱱ ᱟᱱᱫᱽᱦᱟ ᱯᱟᱹᱛᱤᱭᱟᱹᱣ ᱠᱷᱚᱱ ᱥᱟᱦᱟᱜ ᱡᱟᱹᱨᱩᱲ ᱠᱟᱱᱟ᱾
ᱢᱮᱱᱠᱷᱟᱱ ᱵᱚᱝᱜᱟ ᱫᱚ ᱡᱟᱦᱟᱸᱭᱟᱜ ᱯᱟᱹᱛᱤᱭᱟᱹᱣ ᱟᱨ ᱵᱟᱝ ᱯᱟᱹᱛᱤᱭᱟᱹᱣ ᱪᱮᱛᱟᱱ ᱵᱟᱝ ᱛᱤᱝᱜᱩ ᱟᱠᱟᱱᱟ᱾ ᱢᱮᱱᱮᱫ ᱫᱚ ᱡᱟᱦᱟᱸᱭ ᱯᱟᱹᱛᱤᱭᱟᱹᱜ ᱨᱮᱦᱚᱸ ᱵᱚᱝᱜᱟ ᱫᱚ ᱢᱮᱱᱟᱭᱟ, ᱵᱟᱝ ᱯᱟᱹᱛᱤᱭᱟᱹᱜ ᱨᱮᱦᱚᱸ ᱵᱚᱝᱜᱟ ᱫᱚ ᱢᱮᱱᱟᱭᱟ᱾ ᱱᱚᱣᱟ ᱵᱩᱡᱽᱦᱟᱹᱣ ᱞᱟᱹᱜᱤᱫ ᱞᱟᱦᱟ ᱵᱟᱰᱟᱭ ᱡᱟᱹᱨᱩᱲ ᱠᱟᱱᱟ ᱵᱚᱝᱜᱟ ᱫᱚᱭ ᱚᱠᱚᱭ ᱠᱟᱱᱟ ᱥᱮ ᱵᱚᱝᱜᱟ ᱫᱚ ᱪᱮᱫ ᱠᱟᱱᱟ?
ᱵᱚᱝᱜᱟ ᱫᱚ ᱫᱚ ᱦᱩᱭᱩᱜ ᱠᱟᱱᱟ ᱫᱟᱲᱮ᱾ ᱚᱠᱟ ᱫᱟᱲᱮ ᱛᱮ ᱟᱵᱳ ᱵᱳ ᱡᱟᱱᱟᱢ ᱟᱠᱟᱱ, ᱚᱠᱟ ᱫᱟᱲᱮ ᱠᱷᱟᱹᱛᱤᱨ ᱛᱮ ᱡᱚᱛᱚᱣᱟᱜ ᱥᱤᱨᱡᱟᱹᱣ ᱟᱠᱟᱱ, ᱚᱱᱟ ᱫᱟᱲᱮ ᱜᱤ ᱵᱚᱝᱜᱟ ᱠᱟᱱᱟ᱾ ᱟᱨ ᱚᱠᱚᱭ ᱥᱮ ᱚᱠᱟ ᱛᱟᱞᱟ ᱛᱮ ᱱᱚᱣᱟ ᱫᱟᱲᱮ ᱥᱚᱫᱚᱨᱚᱜ ᱠᱟᱱ ᱥᱮ ᱥᱟᱨᱥᱟᱣᱚᱜ ᱠᱟᱱ ᱩᱱᱠᱩ ᱥᱮ ᱚᱱᱟ ᱜᱤ ᱵᱚᱝᱜᱟ ᱫᱚ᱾ ᱟᱵᱳ ᱫᱚ ᱵᱳ ᱡᱟᱱᱟᱢ ᱟᱠᱟᱱᱟ ᱜᱚᱜᱚᱼᱵᱟᱵᱟ ᱴᱷᱮᱱ ᱠᱷᱚᱱ᱾ ᱩᱱᱠᱤᱱ ᱴᱷᱮᱱ ᱠᱷᱚᱱ ᱜᱤ ᱡᱤᱣᱤ ᱵᱳ ᱧᱟᱢ ᱟᱠᱟᱫᱟ᱾ ᱚᱱᱟᱛᱮ ᱜᱚᱜᱚᱼᱵᱟᱵᱟ ᱫᱚ ᱠᱤᱱ ᱵᱚᱝᱜᱟ ᱠᱟᱱᱟ᱾ ᱱᱚᱝᱠᱟ ᱜᱤ ᱟᱵᱳ ᱨᱮᱱ ᱟᱹᱜᱤᱞ ᱦᱟᱯᱲᱟᱢ ᱠᱳ ᱫᱚ ᱟᱵᱳ ᱨᱮᱱ ᱵᱚᱝᱜᱟ ᱠᱟᱱᱟ ᱠᱳ᱾ ᱫᱟᱨᱮ ᱱᱟᱹᱬᱤ ᱵᱮᱜᱚᱨ ᱢᱟᱱᱣᱟ ᱵᱟᱵᱳ ᱵᱟᱧᱪᱟᱣ ᱫᱟᱲᱮᱭᱟᱜᱼᱟ᱾ ᱥᱤᱧ ᱪᱟᱱᱫᱚ ᱟᱨ ᱧᱤᱱᱫᱟᱹ ᱪᱟᱱᱫᱚ ᱵᱮᱜᱚᱨ ᱚᱠᱚᱭ ᱡᱤᱣᱤᱭᱟᱱ ᱦᱚᱸ ᱵᱟᱝᱠᱳ ᱵᱟᱧᱪᱟᱣ ᱫᱟᱲᱮᱭᱟᱜᱼᱟ᱾ ᱚᱱᱟᱛᱮ ᱟᱵᱩ ᱫᱚ ᱫᱟᱨᱮ ᱱᱟᱹᱬᱤ ᱟᱨ ᱥᱤᱧ ᱪᱟᱱᱫᱚ ᱧᱤᱱᱫᱟᱹ ᱪᱟᱱᱫᱚ ᱫᱚ ᱵᱚᱝᱜᱟ ᱢᱮᱱᱛᱮ ᱵᱳ ᱢᱟᱱᱟᱣ ᱠᱚᱣᱟ᱾ ᱱᱚᱣ ᱥᱤᱨᱡᱚᱱ ᱚᱠᱟ ᱠᱷᱚᱱ ᱥᱮ ᱚᱠᱚᱭ ᱠᱷᱚᱱ ᱮᱦᱚᱵ ᱟᱠᱟᱱ ᱩᱱᱤ ᱥᱮ ᱚᱱᱟ ᱜᱤ ᱟᱹᱫᱤᱢ ᱫᱟᱲᱮ ᱜᱤ ᱵᱚᱝᱜᱟ ᱫᱚ᱾ ᱟᱵᱳ ᱦᱚᱲ ᱦᱚᱯᱚᱱᱟᱜ ᱫᱷᱚᱨᱚᱢ ᱨᱮ ᱫᱚ ᱚᱱᱟ ᱥᱮ ᱩᱱᱤ ᱫᱚ ᱴᱷᱟᱹᱠᱩᱨ ᱡᱤᱣ ᱟᱨ ᱴᱷᱟᱹᱠᱨᱟᱹᱱ ᱢᱮ ᱛᱮ ᱵᱳ ᱢᱟᱱᱟᱣᱮᱭᱟ᱾ ᱡᱟᱦᱟᱭ ᱦᱚᱛᱮ ᱛᱮ ᱱᱚᱣᱟ ᱡᱤᱣᱚᱱ ᱜᱷᱟᱨᱚᱡᱽ ᱪᱟᱞᱟᱜ ᱠᱟᱱ ᱩᱱᱤ ᱜᱤ ᱵᱚᱝᱜᱟ᱾ ᱟᱵᱳ ᱦᱚᱲ ᱦᱚᱯᱚᱱ ᱫᱚ ᱚᱱᱟ ᱫᱟᱲᱮ ᱵᱳ ᱢᱟᱱᱟᱣ ᱟᱠᱟᱫᱟ ᱢᱟᱨᱟᱝᱵᱩᱨᱩ, ᱡᱟᱦᱮᱨ ᱟᱭᱚ, ᱢᱚᱲᱮ ᱠᱳ ᱛᱩᱨᱩᱭ ᱠᱳ ᱧᱩᱛᱩᱢ ᱛᱮ᱾
ᱚᱱᱟᱛᱮ ᱵᱚᱝᱜᱟ ᱢᱟᱝ ᱢᱟᱱᱟᱣ ᱢᱟᱱᱮ ᱫᱚ ᱟᱯᱱᱟᱨ ᱜᱚᱜᱚᱼᱵᱟᱵᱟ ᱵᱟᱝ ᱢᱟᱱᱟᱣ᱾ ᱤᱱᱟᱹ ᱪᱷᱟᱰᱟ ᱠᱟᱛᱮᱜ ᱦᱚᱸ ᱥᱤᱧ ᱪᱟᱱᱫᱚ, ᱧᱤᱱᱫᱟᱹ ᱪᱟᱱᱫᱚ, ᱫᱟᱨᱮᱼᱱᱟᱹᱲᱤ, ᱜᱚᱜᱚᱼᱵᱟᱵᱟ ᱫᱚ ᱡᱟᱦᱟᱸᱭᱟᱜ ᱯᱟᱹᱛᱤᱭᱟᱹᱣ ᱪᱮᱛᱟᱱ ᱫᱚ ᱵᱟᱝ ᱛᱤᱝᱜᱩ ᱟᱠᱟᱱᱟ᱾ ᱯᱟᱹᱛᱤᱭᱟᱹᱜ ᱨᱮᱦᱚᱸ ᱱᱩᱠᱩ ᱢᱮᱱᱟᱜ ᱠᱚᱣᱟ, ᱵᱟᱝ ᱯᱟᱹᱛᱤᱭᱟᱹᱜ ᱨᱮᱦᱚᱸ ᱱᱩᱠᱩ ᱫᱚ ᱢᱮᱱᱟᱜ ᱠᱚᱣᱟ᱾ ᱚᱠᱚᱭ ᱦᱚᱸ ᱵᱟᱭ ᱢᱮᱱ ᱫᱟᱲᱮᱭᱟᱜᱼᱟ ᱟᱡ ᱨᱮᱱ ᱡᱟᱱᱟᱢ ᱫᱟᱛᱟ ᱵᱟᱹᱱᱩᱜ ᱠᱤᱱᱟᱹ ᱥᱮ ᱵᱟᱹᱠᱤᱱ ᱛᱟᱦᱮᱸ ᱠᱟᱱᱟ᱾ ᱵᱚᱝᱜᱟ ᱢᱟᱱᱟᱣ ᱢᱟᱱᱮ ᱦᱟᱯᱲᱟᱢ ᱠᱳ ᱢᱟᱱᱟᱣ, ᱩᱱᱠᱩ ᱥᱟᱨᱦᱟᱣ᱾ ᱵᱚᱝᱜᱟ ᱢᱟᱱᱟᱣ ᱢᱟᱱᱮ ᱯᱨᱚᱠᱨᱤᱛᱤ ᱵᱟᱝ ᱱᱟᱥᱟᱣ ᱠᱟᱛᱮᱜ ᱥᱟᱶ ᱥᱟᱶᱛᱮ ᱢᱮᱥᱟ ᱛᱟᱦᱮᱱ᱾ ᱚᱱᱟᱛᱮ ᱡᱚᱛᱚ ᱠᱳ ᱱᱟᱯᱟᱭ ᱛᱟᱦᱮᱱ ᱞᱟᱹᱜᱤᱫ ᱜᱤ ᱵᱚᱝᱜᱟ ᱢᱟᱱᱟᱣ ᱫᱚ ᱡᱟᱹᱨᱩᱲᱟ᱾ ᱵᱚᱝᱜᱟ ᱵᱚᱝᱜᱟᱣᱟᱠᱳ ᱦᱩᱭᱩᱜᱼᱟ, ᱢᱟᱱᱟᱣ ᱠᱳ ᱦᱩᱭᱩᱜᱼᱟ᱾
ᱵᱚᱝᱜᱟ ᱫᱚ ᱵᱟᱠᱳ ᱵᱟᱹᱲᱤᱡᱼᱟ
ᱟᱭᱢᱟ ᱦᱚᱲ ᱜᱤ ᱠᱳ ᱢᱮᱱᱟ “ᱵᱚᱝᱜᱟ ᱫᱚ ᱠᱳ ᱡᱚᱡᱚᱢᱟ”᱾ ᱟᱥᱚᱠᱟᱭᱛᱮ ᱤᱥᱟᱹᱭ ᱫᱷᱚᱨᱚᱢ ᱵᱮᱯᱟᱨᱤ ᱠᱳ ᱱᱚᱝᱠᱟ ᱢᱮᱱ ᱠᱟᱛᱮᱜ ᱦᱚᱲ ᱠᱳ ᱵᱷᱤᱲᱠᱟᱹᱣ ᱠᱚᱣᱟ ᱟᱨ ᱠᱳ ᱤᱥᱟᱹᱭ ᱠᱚᱣᱟ᱾ ᱢᱮᱱᱟᱠᱳ ᱵᱚᱝᱜᱟ ᱜᱤ ᱥᱚᱭᱛᱟᱱ᱾ ᱱᱚᱣᱟ ᱫᱚ ᱮᱠᱟᱞ ᱮᱲᱮ ᱠᱟᱛᱷᱟ ᱠᱟᱱᱟ᱾
ᱞᱟᱦᱟ ᱨᱮ ᱞᱟᱹᱭ ᱟᱠᱟᱱ ᱵᱚᱝᱜᱟ ᱫᱚ ᱪᱮᱫ ᱥᱮ ᱚᱠᱚᱭ ᱠᱟᱱᱟᱭ - ᱚᱱᱟ ᱢᱚᱡᱽ ᱛᱮ ᱵᱩᱡᱽᱦᱟᱹᱣ ᱞᱮᱱ ᱠᱷᱟᱱ ᱟᱞᱜᱟ ᱛᱮ ᱜᱤ ᱵᱩᱡᱽᱦᱟᱹᱜᱼᱟ ᱵᱚᱝᱜᱟ ᱫᱚ ᱵᱟᱠᱳ ᱵᱟᱹᱲᱤᱡᱼᱟ ᱥᱮ ᱵᱟᱹᱲᱤᱡ ᱡᱟᱦᱟᱱᱟᱜ ᱵᱟᱝ ᱠᱟᱱᱟ᱾ ᱟᱢ ᱵᱟᱵᱟᱼᱜᱚᱜᱚ ᱫᱚ ᱪᱮᱫ ᱟᱢᱟᱜ ᱠᱤᱱ ᱵᱟᱹᱲᱤᱡ ᱛᱮ? ᱫᱟᱨᱮᱼᱱᱟᱹᱲᱤ, ᱪᱟᱱᱫᱚ ᱫᱚ ᱟᱢᱟᱜ ᱠᱳ ᱵᱟᱹᱲᱤᱡ ᱛᱮ? ᱵᱟᱝ ᱵᱟᱠᱳ ᱵᱟᱹᱲᱤᱡᱟ᱾ ᱵᱤᱪᱠᱚᱢ ᱟᱵᱳ ᱠᱳ ᱜᱚᱸᱲᱚ ᱟᱵᱚᱱᱟ᱾ ᱫᱩᱠᱷ ᱵᱤᱯᱚᱫᱽ ᱨᱮ ᱟᱵᱳ ᱥᱟᱶ ᱠᱳ ᱛᱤᱝᱜᱩᱱᱟ᱾
