ᱮᱴᱟᱜ ᱫᱷᱚᱨᱚᱢ ᱨᱮᱱ ᱠᱳ ᱫᱚ ᱦᱚᱲ ᱦᱚᱯᱚᱱᱟᱜ ᱯᱟᱹᱨᱤᱥ ᱟᱞᱚ ᱠᱳ ᱵᱮᱵᱚᱦᱟᱨ ᱢᱟ
ᱟᱵᱩ ᱦᱚᱲ ᱦᱚᱯᱚᱱᱟᱜ ᱯᱟᱹᱨᱤᱥ ᱫᱚ ᱑᱒(ᱜᱮᱞ ᱵᱟᱨ) ᱜᱚᱴᱟᱝᱟ᱾ ᱚᱱᱟ ᱠᱩ ᱫᱚ ᱦᱩᱭᱩᱜ ᱠᱟᱱᱟ - ᱦᱟᱸᱥᱫᱟ, ᱠᱤᱥᱠᱩ, ᱢᱟᱹᱨᱰᱤ, ᱢᱩᱨᱢᱩ, ᱴᱩᱰᱩ, ᱵᱟᱥᱠᱮ, ᱪᱚᱸᱲᱮ, ᱯᱟᱹᱣᱨᱤᱭᱟ, ᱵᱮᱥᱨᱟ, ᱥᱚᱨᱮᱱ, ᱦᱮᱢᱨᱚᱢ ᱟᱨ ᱵᱮᱫᱮᱭᱟ᱾ ᱱᱚᱣᱟ ᱯᱟᱹᱨᱤᱥ ᱠᱳ ᱫᱚ ᱮᱠᱮᱱ ᱧᱩᱛᱩᱢ ᱢᱩᱪᱟᱹᱫ ᱨᱮᱱᱟᱜ ᱫᱚ ᱵᱟᱝ ᱠᱟᱱᱟ᱾ ᱱᱚᱣᱟ ᱥᱟᱶ ᱟᱵᱩ ᱦᱚᱲ ᱦᱚᱯᱚᱱᱟᱜ ᱫᱷᱚᱨᱢ ᱟᱨ ᱞᱟᱠᱪᱟᱨ ᱡᱚᱯᱲᱟᱣ ᱢᱮᱱᱟᱜᱼᱟ᱾ ᱪᱮᱫᱟᱜ ᱮᱴᱟᱜ ᱫᱷᱚᱨᱚᱢ ᱛᱮ ᱩᱪᱟᱹᱲᱟᱱ ᱠᱳ ᱯᱟᱹᱨᱤᱥ ᱚᱞ ᱢᱟᱱᱟ ᱦᱩᱭᱩᱜ ᱠᱟᱱᱟ ᱚᱱᱟ ᱞᱟᱛᱟᱨ ᱨᱮᱧ ᱚᱞ ᱠᱮᱫᱟ -
᱑) ᱦᱚᱲ ᱦᱚᱯᱚᱱ ᱟᱠᱩᱣᱟᱜ ᱥᱤᱨᱡᱳᱱ ᱱᱟᱜᱟᱢ ᱞᱮᱠᱟᱛᱮ ᱠᱳ ᱯᱟᱹᱛᱤᱭᱟᱹᱜᱼᱟ ᱟᱹᱜᱤᱞ ᱦᱟᱯᱲᱟᱢ ᱯᱤᱞᱪᱩ ᱦᱟᱲᱟᱢ ᱟᱨ ᱯᱤᱞᱪᱩ ᱵᱩᱰᱦᱤ ᱛᱟᱹᱠᱤᱱ ᱟᱹᱠᱤᱱ ᱨᱮᱱ ᱯᱟᱹᱦᱤᱞ ᱑᱒(ᱜᱮᱞ ᱵᱟᱨ) ᱜᱚᱴᱟᱝ ᱜᱤᱫᱽᱨᱟᱹ ᱢᱟᱨᱟᱝᱵᱩᱨᱩᱣᱟᱜ ᱠᱟᱛᱦᱟ ᱞᱮᱠᱟᱛᱮ ᱱᱚᱣᱟ ᱯᱟᱹᱨᱤᱥ ᱠᱤᱱ ᱮᱢᱟᱜ ᱠᱳ ᱛᱟᱦᱮᱱᱟ᱾ ᱮᱴᱟᱜ ᱫᱷᱚᱨᱚᱢ ᱛᱮ ᱪᱟᱞᱟᱣᱟᱱ ᱠᱳ ᱫᱚ ᱱᱚᱣᱟ ᱱᱟᱜᱟᱢ ᱟᱨ ᱢᱟᱨᱟᱝᱵᱩᱨᱩ ᱦᱚᱸ ᱵᱟᱠᱳ ᱯᱟᱹᱛᱤᱭᱟᱹᱜᱼᱟ᱾ ᱚᱱᱟᱛᱮ ᱯᱟᱹᱨᱤᱥ ᱦᱚᱸ ᱟᱞᱚ ᱠᱳ ᱵᱮᱵᱚᱦᱟᱨ ᱢᱟ᱾
᱒) ᱡᱚᱛᱚ ᱯᱟᱹᱨᱤᱥ ᱨᱮᱱ ᱜᱤ ᱡᱩᱫᱟᱹ ᱡᱩᱫᱟᱹ ᱚᱲᱟᱜ ᱵᱚᱝᱜᱟ ᱢᱮᱱᱟᱜ ᱠᱚᱣᱟ᱾ ᱱᱤᱭᱚᱢ ᱢᱟᱱᱟᱣ ᱠᱟᱛᱮᱜ ᱩᱱᱠᱩ ᱵᱚᱱ ᱢᱟᱱᱟᱣ ᱠᱚᱣᱟ ᱵᱚᱝᱜᱟ ᱟᱠᱚᱣᱟ᱾ ᱢᱮᱱᱠᱷᱟᱱ ᱮᱴᱟᱜ ᱫᱷᱚᱨᱚᱢ ᱛᱮ ᱪᱟᱞᱟᱣᱟᱱ ᱠᱳ ᱫᱚ ᱱᱚᱣᱟ ᱵᱟᱠᱚ ᱢᱟᱱᱟᱣᱟ᱾ ᱚᱱᱟᱛᱮ ᱯᱟᱹᱨᱤᱥ ᱦᱚᱸ ᱟᱞᱚ ᱠᱳ ᱵᱮᱵᱚᱦᱟᱨ ᱢᱟ᱾
᱓) ᱦᱚᱲ ᱦᱚᱯᱚᱱ ᱫᱚ ᱢᱤᱫ ᱯᱟᱹᱨᱤᱥ ᱨᱮ ᱵᱟᱯᱞᱟ ᱢᱟᱱᱟ ᱜᱮᱭᱟ᱾ ᱚᱱᱟᱛᱮ ᱵᱟᱹᱦᱩ ᱥᱮᱱᱫᱽᱨᱟ ᱚᱠᱛᱮ ᱞᱟᱦᱟ ᱨᱮ ᱯᱟᱹᱨᱤᱥ ᱥᱮ ᱡᱟᱹᱛ ᱠᱳ ᱠᱩᱞᱤᱭᱟ᱾ ᱱᱚᱣᱟ ᱠᱷᱟᱹᱛᱤᱨ ᱜᱤ ᱥᱟᱱᱛᱟᱞ ᱫᱚ ᱮᱴᱟᱜ ᱡᱟᱹᱛ ᱨᱮ ᱦᱚᱸ ᱵᱟᱝ ᱠᱳ ᱵᱟᱯᱞᱟᱜᱼᱟ᱾ ᱢᱮᱱᱠᱷᱟᱱ ᱮᱴᱟᱜ ᱫᱷᱚᱨᱚᱢ ᱨᱮ ᱪᱟᱞᱟᱣ ᱟᱠᱟᱱ ᱠᱳ ᱴᱷᱮᱱ ᱫᱚ ᱱᱚᱣᱟ ᱠᱳ ᱵᱟᱝ ᱡᱟᱹᱨᱩᱲᱟ᱾ ᱩᱱᱠᱳ ᱫᱚ ᱠᱳ ᱧᱮᱞ ᱟᱠᱳ ᱫᱷᱚᱨᱚᱢ ᱨᱮᱱ ᱠᱟᱱᱟᱭ ᱥᱮ ᱵᱟᱝ? ᱟᱠᱳ ᱫᱷᱚᱨᱚᱢ ᱨᱮᱱ ᱠᱷᱟᱱ ᱜᱤ ᱵᱟᱯᱞᱟ ᱪᱟᱞᱟᱣ ᱛᱟᱠᱚᱣᱟ᱾ ᱚᱱᱟᱛᱮ ᱡᱟᱦᱟᱱ ᱡᱟᱹᱛ ᱨᱮ ᱜᱤ ᱠᱳ ᱵᱟᱯᱞᱟᱜᱼᱟ᱾ ᱯᱟᱹᱨᱤᱥ ᱫᱚ ᱵᱟᱝ ᱡᱟᱹᱨᱩᱲᱟ᱾
᱔) ᱟᱵᱩ ᱦᱚᱲ ᱦᱚᱯᱚᱱᱟᱜ ᱡᱚᱛᱚ ᱯᱟᱹᱨᱤᱥ ᱨᱮ ᱜᱤ ᱢᱟᱱᱟᱣ ᱵᱟᱛᱟᱣ ᱢᱮᱱᱟᱜᱼᱟ᱾ ᱫᱟᱹᱭᱠᱟᱹ ᱞᱮᱠᱟᱛᱮ, ᱚᱠᱟ ᱯᱟᱹᱨᱤᱥ ᱫᱚ ᱢᱟᱹᱲ ᱵᱟᱝ ᱪᱟᱞᱟᱜ ᱛᱟᱠᱳᱣᱟ, ᱚᱠᱟ ᱯᱟᱹᱨᱤᱥ ᱫᱚ ᱪᱟᱞᱟᱜ ᱛᱟᱠᱳ ᱜᱮᱭᱟ᱾ ᱮᱴᱟᱜ ᱫᱷᱚᱨᱚᱢ ᱩᱪᱟᱹᱲ ᱛᱟᱭᱚᱢ ᱱᱚᱣᱟ ᱢᱟᱱᱟᱣ ᱵᱟᱛᱟᱣ ᱵᱟᱝ ᱛᱟᱦᱮᱱᱟ᱾ ᱚᱱᱟᱛᱮ ᱯᱟᱹᱨᱤᱥ ᱦᱚᱸ ᱟᱞᱚ ᱠᱳ ᱵᱮᱵᱚᱦᱟᱨ ᱢᱟ᱾
᱕) ᱦᱚᱲ ᱦᱚᱯᱚᱱᱟᱜ ᱪᱷᱩᱛ ᱯᱷᱮᱰᱟᱣ ᱞᱮᱠᱟᱱ ᱟᱭᱢᱟ ᱫᱷᱚᱨᱚᱢ ᱠᱟᱹᱢᱤ ᱮᱠᱮᱱ ᱢᱩᱨᱢᱩ ᱯᱟᱹᱨᱤᱥ ᱨᱮᱱ ᱦᱚᱲ ᱠᱳ ᱠᱟᱹᱢᱤ ᱫᱟᱲᱮᱜᱼᱟ᱾ ᱮᱴᱟᱜ ᱯᱟᱹᱨᱤᱥ ᱨᱮᱱ ᱫᱚ ᱵᱟᱝ᱾ ᱢᱮᱱᱠᱷᱟᱱ ᱮᱴᱟᱜ ᱫᱷᱚᱨᱚᱢ ᱛᱮ ᱩᱪᱟᱹᱲ ᱟᱠᱟᱱ ᱠᱳ ᱨᱮᱱ ᱫᱷᱚ ᱟᱠᱳ ᱨᱮᱱ ᱫᱷᱚᱨᱚᱢ ᱜᱩᱨᱩ ᱜᱤ ᱡᱚᱛᱚ ᱠᱩ ᱠᱟᱹᱢᱤᱭ ᱛᱟᱠᱚᱣᱟ᱾ ᱚᱱᱟᱛᱮ ᱯᱟᱹᱨᱤᱥ ᱦᱚᱸ ᱟᱞᱚ ᱠᱳ ᱵᱮᱵᱚᱦᱟᱨ ᱢᱟ᱾
ᱪᱮᱛᱟᱱ ᱨᱮᱱᱟᱜ ᱚᱞ ᱛᱮ ᱱᱚᱣᱟ ᱫᱚ ᱥᱟᱯᱷᱟ ᱟᱠᱟᱱᱟ ᱡᱮᱹ ᱦᱚᱲ ᱦᱚᱯᱚᱱᱟᱜ ᱫᱷᱚᱨᱚᱢ ᱵᱟᱹᱜᱤ ᱠᱟᱛᱮᱜ ᱚᱠᱚᱭ ᱮᱴᱟᱜ ᱫᱷᱚᱨᱚᱢᱮ ᱪᱟᱞᱟᱣ ᱟᱠᱟᱱ ᱩᱱᱤᱭᱟᱜ ᱫᱚ ᱦᱚᱲ ᱦᱚᱯᱚᱱᱟᱜ ᱯᱟᱹᱨᱤᱥ ᱚᱞ ᱥᱮ ᱵᱮᱵᱚᱦᱟᱨ ᱵᱟᱝ ᱡᱟᱹᱨᱩᱲᱟ᱾ ᱮᱱᱨᱮᱦᱚᱸ ᱡᱟᱦᱟᱭᱮ ᱚᱞ ᱥᱮ ᱵᱮᱵᱚᱦᱟᱨ ᱠᱷᱟᱱ ᱵᱩᱡᱽᱦᱟᱹᱣ ᱦᱩᱭᱩᱜᱼᱟ ᱩᱱᱤ ᱫᱚ ᱢᱚᱡᱽ ᱛᱮ ᱮᱴᱟᱜ ᱫᱷᱚᱨᱢ ᱛᱮ ᱵᱟᱭ ᱩᱪᱟᱹᱲ ᱫᱟᱲᱮ ᱟᱠᱟᱫᱟ ᱟᱨ ᱵᱟᱝ ᱠᱷᱟᱱ ᱥᱟᱱᱛᱟᱞ ᱩᱯᱨᱩᱢ ᱠᱷᱚᱱ ᱚᱡᱚᱜᱚᱜᱼᱮ ᱵᱚᱛᱚᱨᱚᱜ ᱠᱟᱱᱟ ᱟᱨ ᱵᱟᱝ ᱠᱷᱟᱱ ᱵᱟᱹᱲᱤᱡ ᱢᱚᱛᱞᱚᱵᱽ ᱢᱮᱱᱟᱜ ᱛᱟᱭᱟ᱾
