ᱨᱚᱴᱮ ᱫᱚ ᱨᱟᱡᱟ ᱠᱳ ᱠᱷᱚᱡᱽ ᱮᱱᱟ
ᱢᱤᱫᱼᱴᱮᱱ ᱡᱚᱞᱟ ᱨᱮ ᱨᱚᱴᱮ ᱠᱳ ᱛᱟᱦᱮ ᱠᱟᱱᱟ᱾ ᱚᱱᱰᱮ ᱨᱟᱹᱥᱠᱟᱹ ᱟᱨ ᱵᱤᱱ ᱵᱚᱛᱚᱨ ᱟᱛᱮ ᱠᱳ ᱛᱟᱦᱮ ᱠᱟᱱᱟ᱾ ᱟᱠᱳ ᱠᱩᱥᱤ ᱞᱮᱠᱟ ᱠᱳ ᱫᱚᱱ ᱵᱟᱲᱟᱭ ᱟᱨ ᱠᱳ ᱯᱟᱭᱨᱟ ᱵᱟᱲᱟᱭ ᱠᱟᱱ ᱛᱟᱦᱮ ᱠᱟᱱᱟ᱾ ᱚᱠᱚᱭ ᱜᱤ ᱵᱟᱠᱚ ᱪᱮᱠᱟᱭᱮᱫ ᱠᱳ ᱛᱟᱦᱮ ᱠᱟᱱᱟ᱾ ᱢᱮᱱᱠᱷᱟᱱ ᱟᱫᱚᱢ ᱨᱚᱴᱮ ᱫᱚ ᱠᱳ ᱩᱭᱦᱟᱹᱨ ᱠᱮᱫᱟ ᱱᱚᱝᱠᱟ ᱫᱚ ᱵᱟᱝ ᱴᱷᱤᱠᱟ, ᱟᱠᱳ ᱨᱮᱱ ᱢᱤᱫᱼᱴᱮᱱ ᱨᱟᱡᱟ ᱡᱟᱹᱨᱩᱲ ᱟᱨ ᱜᱚᱴᱟ ᱛᱮ ᱥᱚᱝᱵᱤᱫᱷᱟᱱ ᱡᱟᱹᱨᱩᱲ᱾ ᱚᱱᱟᱛᱮ ᱪᱟᱸᱫᱚ ᱵᱟᱵᱟ ᱴᱷᱮᱱ ᱨᱟᱜ ᱟᱛᱮ ᱠᱳ ᱱᱮᱦᱚᱨ ᱮᱱᱟ, “ᱮ ᱪᱟᱸᱫᱚ ᱵᱟᱵᱟ, ᱟᱞᱮ ᱢᱤᱫᱼᱴᱮᱱ ᱨᱟᱡᱟ ᱠᱳᱞ ᱟᱞᱮ ᱢᱮ᱾ ᱡᱟᱸᱦᱟᱭ ᱫᱚ ᱟᱞᱮᱭ ᱥᱟᱥᱚᱱ ᱞᱮᱭᱟ ᱟᱨ ᱱᱤᱭᱚᱢ ᱨᱮᱭ ᱫᱚᱦᱚ ᱠᱟᱞᱮᱭᱟ᱾”
ᱨᱚᱴᱮᱭᱟᱜ ᱨᱟᱜ ᱟᱨ ᱱᱮᱦᱚᱨ ᱟᱧᱡᱚᱢ ᱛᱮ ᱪᱟᱸᱫᱚ ᱵᱟᱵᱟ ᱫᱚᱭ ᱞᱟᱱᱫᱟ ᱠᱮᱫᱟ ᱟᱨ ᱢᱤᱫᱼᱴᱮᱱ ᱟᱹᱰᱤ ᱢᱟᱨᱟᱝ ᱠᱷᱟᱹᱭᱴᱟᱹ ᱥᱮᱨᱢᱟ ᱠᱷᱚᱱ ᱚᱱᱟ ᱡᱚᱞᱟ ᱨᱮᱭ ᱧᱩᱨ ᱠᱮᱫᱟ᱾
ᱟᱠᱳ ᱛᱟᱞᱟ ᱨᱮ ᱤᱱᱟᱹᱜ ᱢᱟᱨᱟᱝ ᱡᱤᱱᱤᱥ ᱧᱩᱨ ᱮᱱ ᱟᱨ ᱫᱟᱜ ᱪᱷᱤᱞᱠᱟᱹᱣ ᱮᱱ ᱧᱮᱞ ᱛᱮ ᱨᱚᱴᱮ ᱫᱚ ᱠᱳ ᱵᱚᱛᱚᱨ ᱮᱱᱟ᱾ ᱵᱚᱛᱚᱨ ᱛᱮ ᱜᱷᱩᱴᱩ ᱨᱮ ᱨᱟᱠᱟᱵ ᱠᱟᱛᱮᱜ ᱠᱳ ᱠᱚᱭᱚᱜ ᱠᱮᱫᱟ᱾ ᱢᱮᱱᱠᱷᱟᱱ ᱢᱤᱫ ᱜᱷᱟᱹᱲᱤᱡ ᱛᱟᱭᱚᱢ ᱠᱳ ᱧᱮᱞ ᱠᱮᱫᱟ ᱚᱱᱟ ᱫᱚ ᱵᱟᱝ ᱞᱟᱲᱟᱜ ᱠᱟᱱᱟ᱾ ᱩᱱᱠᱳ ᱢᱩᱫᱽ ᱠᱷᱚᱱ ᱢᱤᱫ ᱵᱟᱨ ᱥᱟᱦᱚᱥᱟᱱ ᱨᱚᱴᱮ ᱫᱚ ᱚᱱᱟ ᱠᱷᱟᱹᱭᱴᱟᱹ ᱥᱩᱨ ᱠᱳ ᱥᱮᱱ ᱮᱱᱟ᱾ ᱡᱚᱴᱮᱫ ᱟᱹᱭᱠᱟᱹᱣ ᱠᱮᱫᱟ ᱠᱳ ᱵᱟᱝ ᱪᱮᱠᱟ ᱠᱟᱱᱟ᱾ ᱨᱚᱴᱮ ᱨᱮᱱ ᱢᱤᱫ ᱵᱤᱨᱵᱟᱱᱴᱟ ᱫᱚ ᱚᱱᱟ ᱠᱷᱟᱹᱭᱴᱟᱹ ᱪᱮᱛᱟᱱᱮ ᱫᱮᱡ ᱮᱱᱟ ᱟᱨ ᱮᱱᱮᱡᱼᱮ ᱞᱟᱜᱟᱣ ᱮᱱᱟ᱾ ᱩᱱᱤ ᱧᱮᱞ ᱛᱮ ᱮᱴᱟᱜ ᱠᱳ ᱦᱚᱸ ᱠᱳ ᱫᱚᱱ ᱫᱮᱡ ᱮᱱᱟ ᱟᱨ ᱮᱱᱮᱡᱚᱜ ᱠᱳ ᱞᱟᱜᱟᱣ ᱮᱱᱟ᱾
ᱱᱟᱥᱮ ᱫᱤᱱ ᱛᱟᱭᱚᱢ ᱨᱚᱴᱮ ᱫᱚ ᱞᱟᱦᱟ ᱛᱮ ᱞᱮᱠᱟ ᱜᱤ ᱛᱟᱦᱮᱱ ᱠᱳ ᱮᱦᱚᱵ ᱠᱮᱫᱟ᱾ ᱟᱠᱳ ᱛᱟᱞᱟ ᱨᱮ ᱢᱮᱱᱟᱭ ᱠᱟᱴᱷ ᱨᱟᱡᱟᱣᱟᱜ ᱠᱟᱛᱷᱟ ᱫᱚ ᱠᱳ ᱦᱤᱲᱤᱧ ᱠᱮᱫᱟ᱾ ᱢᱮᱱᱠᱷᱟᱱ ᱱᱚᱝᱠᱟ ᱫᱚ ᱵᱟᱠᱳ ᱠᱩᱥᱤ ᱞᱮᱱᱟ᱾ ᱚᱱᱟᱛᱮ ᱪᱟᱸᱫᱚ ᱵᱟᱵᱟ ᱴᱷᱮᱱ ᱟᱨᱦᱚᱸ ᱨᱟᱜ ᱟᱛᱮ ᱠᱳ ᱱᱮᱦᱚᱨ ᱮᱱᱟ, “ᱮ ᱪᱟᱸᱫᱚ ᱵᱟᱵᱟ, ᱟᱞᱮ ᱫᱚ ᱥᱟᱹᱨᱤᱱ ᱨᱟᱡᱟ ᱞᱮ ᱠᱷᱚᱡᱚᱜ ᱠᱟᱱᱟ; ᱚᱠᱚᱭ ᱫᱚ ᱥᱟᱹᱨᱤ ᱥᱟᱹᱨᱤ ᱟᱞᱮᱭ ᱥᱟᱥᱚᱱ ᱞᱮᱭᱟ ᱟᱨ ᱱᱤᱭᱚᱢ ᱨᱮᱭ ᱫᱚᱦᱚ ᱠᱟᱞᱮᱭᱟ᱾”
ᱫᱚᱥᱟᱨ ᱫᱷᱟᱣ ᱨᱚᱴᱮᱭᱟᱜ ᱱᱮᱦᱚᱨ ᱟᱨ ᱨᱟᱜ ᱟᱧᱡᱚᱢ ᱛᱮ ᱪᱟᱸᱫᱚ ᱵᱟᱵᱟ ᱫᱚᱭ ᱤᱫᱽᱨᱤ ᱮᱱᱟ ᱟᱨ ᱢᱤᱫᱼᱴᱮᱱ ᱟᱹᱰᱤ ᱢᱟᱨᱟᱝ ᱠᱚᱸᱜ ᱩᱱᱠᱳ ᱛᱟᱞᱟ ᱨᱮᱭ ᱠᱳᱞ ᱠᱤᱫᱤᱭᱟ᱾ ᱠᱚᱸᱜ ᱫᱚ ᱥᱮᱱ ᱛᱚᱨᱟ ᱩᱠᱳ ᱨᱚᱴᱮ ᱡᱚᱡᱚᱢᱮ ᱮᱦᱚᱵ ᱮᱱᱟ᱾ ᱨᱚᱴᱮ ᱫᱚ ᱵᱟᱧᱪᱟᱜ ᱞᱟᱹᱜᱤᱫ ᱪᱟᱸᱫᱚ ᱵᱟᱵᱟ ᱴᱷᱮᱱ ᱱᱮᱦᱚᱨᱚᱜ ᱨᱮᱱᱟᱜ ᱚᱠᱛᱚ ᱦᱚᱸ ᱵᱟᱠᱚ ᱧᱟᱢ ᱞᱮᱫᱟ᱾
ᱱᱤᱨᱫᱟᱹᱭ ᱨᱟᱡᱟ ᱛᱟᱦᱮᱱ ᱠᱷᱚᱱ ᱨᱟᱡᱟ ᱵᱟᱝ ᱛᱦᱮᱱ ᱜᱤ ᱵᱷᱟᱜᱮᱭᱟ᱾
