ᱢᱟᱹᱧᱡᱽᱦᱤ ᱛᱷᱟᱱ - ᱦᱚᱲ ᱦᱚᱯᱚᱱᱟᱜ ᱥᱟᱶᱛᱟ ᱟᱨ ᱫᱷᱚᱨᱚᱢ ᱵᱩᱴᱟᱹ
ᱢᱟᱹᱧᱡᱽᱦᱤ ᱛᱷᱟᱱ
ᱡᱚᱛᱚ ᱦᱚᱲ ᱦᱚᱯᱚᱱ ᱥᱮ ᱥᱟᱱᱛᱟᱞ ᱟᱛᱩ ᱨᱮᱜᱤ ᱢᱟᱹᱧᱡᱽᱦᱤ ᱛᱷᱟᱱ ᱛᱟᱦᱮᱱᱟ᱾ ᱱᱚᱣᱟ ᱢᱟᱹᱧᱡᱽᱦᱤ ᱛᱷᱟᱱ ᱵᱮᱲᱦᱟᱭ ᱛᱮ ᱜᱤ ᱦᱚᱲ ᱦᱚᱯᱚᱱᱟᱜ ᱥᱟᱶᱛᱟ ᱟᱨ ᱫᱷᱚᱨᱚᱢ ᱠᱟᱹᱢᱤ ᱪᱟᱞᱟᱜᱼᱟ᱾ ᱢᱟᱹᱧᱡᱽᱦᱤ ᱛᱷᱟᱱ ᱵᱮᱲᱦᱟᱭ ᱛᱮ ᱢᱚᱬᱮ ᱦᱚᱲ ᱢᱮᱱᱟᱜ ᱠᱚᱣᱟ᱾ ᱱᱩᱠᱩ ᱢᱚᱬᱮ ᱦᱚᱲ ᱟᱛᱮ ᱜᱤ ᱢᱟᱹᱧᱡᱽᱦᱤ ᱜᱟᱶᱛᱟ᱾ ᱩᱱᱠᱳ ᱢᱚᱬᱮ ᱦᱚᱲ ᱵᱮᱲᱦᱟᱭ ᱛᱮ ᱟᱛᱩ ᱦᱚᱲ᱾
ᱢᱟᱹᱧᱡᱽᱦᱤ ᱛᱷᱟᱱ ᱨᱮᱱᱟ ᱢᱩᱲᱩᱫ
ᱢᱟᱹᱧᱡᱽᱦᱤ ᱛᱷᱟᱱ ᱫᱚ ᱦᱚᱲ ᱦᱚᱯᱚᱱᱟᱜ ᱫᱷᱚᱨᱚᱢ ᱯᱟᱹᱛᱤᱭᱟᱹᱧ ᱠᱷᱚᱱ ᱜᱤ ᱦᱮᱡ ᱟᱠᱟᱱᱟ᱾ ᱦᱚᱲ ᱦᱚᱯᱚᱱᱟᱜ ᱫᱷᱚᱨᱚᱢ ᱥᱟᱹᱨᱤ ᱫᱷᱚᱨᱚᱢ ᱨᱮᱱᱟᱜ ᱵᱤᱱᱛᱤ ᱥᱮ ᱫᱷᱚᱨᱚᱢ ᱥᱟᱥᱛᱚᱨ ᱡᱚᱢᱥᱤᱢ ᱵᱤᱱᱛᱤ ᱞᱮᱠᱟᱛᱮ, ᱥᱤᱥᱤᱨᱡᱟᱹᱣᱤᱡ ᱪᱟᱱᱫᱚ ᱵᱟᱵᱟ ᱴᱷᱟᱹᱠᱳᱨ ᱟᱨ ᱴᱷᱟᱹᱠᱨᱟᱹᱱ ᱫᱚ ᱟᱨᱦᱚᱸ ᱵᱚᱝᱜᱟ ᱵᱩᱨᱩ ᱟᱛᱮ ᱥᱚᱨᱚᱜᱽ ᱨᱮ ᱠᱤᱱ ᱛᱟᱦᱮᱱᱟ᱾ ᱚᱱᱰᱮ ᱩᱱᱠᱤᱱᱟᱜ ᱢᱚᱡᱽᱞᱤᱥ ᱢᱮᱱᱟᱜᱼᱟ᱾ ᱚᱱᱟ ᱢᱚᱡᱽᱞᱤᱥ ᱨᱮᱱᱟ ᱧᱩᱛᱩᱢ ᱫᱚ ᱪᱟᱹᱣᱨᱤᱭᱟ ᱢᱮᱞᱟ᱾ ᱪᱟᱹᱣᱨᱤᱭᱟ ᱢᱮᱞᱟ ᱨᱮᱱ ᱵᱩᱴᱟᱹ ᱫᱚ ᱠᱤᱱ ᱦᱩᱭᱩᱜ ᱠᱟᱱᱟ ᱴᱷᱟᱹᱠᱳᱨ ᱟᱨ ᱴᱷᱟᱹᱠᱨᱟᱹᱱ᱾ ᱮᱴᱟᱜ ᱵᱚᱝᱜᱟ ᱠᱚᱣᱟᱜ ᱫᱚ ᱟᱭᱢᱟ ᱞᱮᱠᱟ ᱠᱟᱹᱢᱤ ᱢᱮᱱᱟᱜ ᱛᱟᱠᱚᱣᱟ᱾ ᱚᱱᱟ ᱪᱟᱹᱣᱨᱤᱭᱟ ᱢᱮᱞᱟ ᱨᱮᱱᱟᱜ ᱩᱢᱩᱞ ᱞᱮᱠᱟᱛᱮ ᱫᱷᱟᱹᱨᱛᱤ ᱨᱮ ᱢᱟᱱᱣᱟ ᱛᱟᱞᱟ ᱨᱮ ᱢᱟᱹᱧᱡᱽᱦᱤ ᱛᱷᱟᱱ ᱵᱤᱨᱤᱫ ᱮᱱᱟ᱾ ᱢᱟᱹᱧᱡᱽᱦᱤ ᱛᱷᱟᱱ ᱟᱨ ᱢᱟᱹᱧᱡᱽᱦᱤ ᱵᱮᱲᱦᱟᱭ ᱛᱮ ᱜᱤ ᱟᱹᱪᱩᱨᱚᱜ ᱠᱟᱱᱟ ᱦᱚᱲ ᱦᱚᱯᱚᱱᱟᱜ ᱟᱛᱩ ᱫᱚ᱾ ᱢᱟᱹᱧᱡᱽᱦᱤ ᱛᱷᱟᱱ ᱫᱚ ᱦᱟᱥᱟ ᱟᱨ ᱫᱷᱤᱨᱤ ᱛᱮ ᱠᱳ ᱛᱮᱭᱟᱨᱟ᱾ ᱯᱮ ᱟᱨᱵᱟᱝᱠᱷᱟᱱ ᱢᱚᱬᱮ ᱫᱷᱟᱯ ᱪᱮᱛᱟᱱ ᱛᱟᱞᱟ ᱨᱮ ᱫᱷᱤᱨᱤ ᱫᱚᱦᱚ ᱠᱟᱛᱮᱜ ᱚᱱᱟ ᱪᱮᱛᱟᱱ ᱦᱟᱥᱟ ᱛᱮ ᱡᱮᱨᱮᱲ ᱠᱟᱛᱮᱜ ᱵᱩᱨᱩ ᱞᱮᱠᱟ ᱢᱩᱴᱷᱟᱹᱱ ᱠᱳ ᱮᱢᱟᱜᱼᱟ᱾ ᱫᱷᱤᱨᱤ ᱵᱟᱝ ᱧᱟᱢ ᱞᱮᱱ ᱠᱷᱟᱱ ᱮᱠᱮᱱ ᱦᱟᱥᱟ ᱛᱮ ᱦᱚᱸ ᱢᱟᱹᱧᱡᱽᱦᱤ ᱛᱷᱟᱱ ᱠᱳ ᱵᱮᱱᱟᱣ ᱜᱮᱭᱟ᱾ ᱵᱚᱝᱜᱟ ᱫᱚ ᱵᱩᱨᱩ ᱠᱷᱚᱱ ᱠᱳ ᱩᱰᱩᱠ ᱞᱮᱱ ᱛᱮ ᱜᱤ ᱵᱚᱝᱜᱟ ᱵᱩᱨᱩ ᱵᱳᱱ ᱨᱚᱲᱟ᱾ ᱟᱛᱩ ᱨᱮᱱᱟᱜ ᱡᱚᱛᱚ ᱞᱮᱠᱟᱱ ᱯᱚᱨᱚᱵᱽ ᱯᱩᱱᱟᱹᱭ ᱨᱮ ᱢᱟᱹᱧᱡᱽᱦᱤ ᱵᱟᱵᱟ ᱢᱟᱹᱧᱡᱽᱦᱤ ᱛᱷᱟᱱ ᱨᱮ ᱢᱟᱹᱧᱡᱽᱦᱤ ᱵᱚᱝᱜᱟ ᱧᱩᱛᱩᱢ ᱛᱮ ᱴᱷᱟᱹᱠᱩᱨ ᱟᱨ ᱴᱷᱟᱹᱠᱨᱟᱹᱱ ᱜᱤᱭᱮ ᱵᱚᱝᱜᱟ ᱟᱠᱤᱱᱟ᱾ ᱢᱟᱹᱧᱡᱽᱦᱤ ᱜᱟᱶᱛᱟ ᱨᱮᱱ ᱯᱩᱭᱞᱩ ᱢᱟᱹᱧᱡᱽᱦᱤ ᱥᱮ ᱢᱚᱬᱮ ᱦᱚᱲ ᱫᱚ ᱠᱳ ᱦᱩᱭᱩᱜ ᱠᱟᱱᱟ ᱯᱤᱞᱪᱩ ᱦᱟᱲᱟᱢ ᱵᱩᱰᱦᱤ ᱨᱮᱱ ᱢᱚᱬᱮ ᱠᱚᱲᱟ ᱦᱚᱯᱚᱱ᱾ ᱱᱩᱠᱩ ᱜᱤ ᱦᱚᱲ ᱦᱚᱯᱚᱱ ᱫᱚ ᱢᱚᱬᱮ ᱠᱳ ᱵᱚᱝᱜᱟ ᱢᱮᱱ ᱛᱮ ᱵᱳ ᱢᱟᱱᱟᱣᱮᱫ ᱠᱚᱣᱟ᱾ ᱱᱟᱣᱟ ᱟᱛᱩ ᱵᱮᱨᱮᱛ ᱨᱮ ᱟᱹᱭᱩᱨ ᱟᱠᱟᱫ ᱦᱚᱲ ᱠᱳ ᱛᱟᱞᱟ ᱠᱷᱚᱱ ᱜᱤ ᱢᱚᱬᱮ ᱦᱚᱲ ᱠᱳ ᱦᱩᱭᱩᱜᱼᱟ᱾ ᱛᱟᱭᱚᱢ ᱫᱟᱨᱟᱢ ᱩᱱᱠᱩ ᱨᱮᱱ ᱵᱤᱨᱟᱹᱫᱟᱹᱞᱤ ᱠᱳ ᱴᱷᱮᱱ ᱜᱤ ᱢᱚᱬᱮ ᱦᱚᱲ ᱨᱮᱱᱟᱜ ᱟᱝᱜᱤᱵᱷᱟᱨ ᱫᱚ ᱟᱹᱪᱩᱨᱚᱜᱼᱟ᱾ ᱚᱱᱟ ᱛᱮ ᱜᱤ ᱢᱮᱱ ᱜᱟᱱᱚᱜᱼᱟ ᱢᱟᱧᱹᱡᱽᱦᱤ ᱛᱷᱟᱱ ᱟᱨ ᱢᱟᱹᱧᱡᱽᱦᱤ ᱨᱮᱱ ᱢᱚᱬᱮ ᱦᱚᱲ ᱫᱚ ᱢᱤᱫᱼᱴᱮᱱ ᱟᱛᱩ ᱨᱮᱱ ᱱᱟᱜᱟᱢ ᱟᱨ ᱥᱮᱨᱣᱟ ᱠᱟᱱᱟᱠᱳ᱾ ᱱᱩᱠᱩ ᱢᱚᱬᱮ ᱦᱚᱲ ᱫᱚ ᱟᱛᱩ ᱨᱮᱱ ᱡᱚᱛᱚ ᱦᱚᱲ ᱥᱟᱶ ᱜᱟᱞᱢᱟᱨᱟᱣ ᱠᱟᱛᱮᱜ ᱜᱤ ᱡᱟᱦᱟᱱ ᱴᱷᱟᱹᱣᱠᱟᱹ ᱠᱳ ᱦᱟᱛᱟᱣᱟ᱾
ᱢᱟᱹᱧᱡᱽᱦᱤ ᱛᱷᱟᱱ ᱨᱮ ᱵᱚᱝᱜᱟ ᱵᱩᱨᱩ᱾
ᱟᱛᱩ ᱢᱚᱬᱮ ᱦᱚᱲᱟᱜ ᱩᱯᱨᱩᱢ
᱑ᱹ ᱢᱟᱹᱧᱡᱽᱦᱤ
ᱢᱟᱹᱧᱡᱽᱦᱤ ᱜᱟᱶᱛᱟ ᱨᱮᱱ ᱵᱚᱦᱚᱜ ᱠᱟᱱᱟᱭ ᱢᱟᱹᱧᱡᱽᱦᱤ ᱥᱮ ᱢᱟᱹᱧᱡᱽᱦᱤ ᱵᱟᱵᱟ᱾ ᱢᱟᱹᱧᱡᱽᱦᱤ ᱛᱷᱟᱱ ᱟᱨ ᱢᱟᱹᱧᱡᱽᱦᱤ ᱚᱲᱟᱜ ᱵᱤᱨᱤᱫ ᱛᱟᱞᱟ ᱛᱮ ᱜᱤ ᱟᱛᱩ ᱵᱤᱨᱤᱫᱚᱜᱼᱟ᱾ ᱢᱟᱹᱧᱡᱽᱦᱤ ᱜᱤ ᱟᱛᱩ ᱫᱚᱭ ᱟᱹᱭᱩᱨᱟ᱾ ᱟᱛᱩ ᱵᱤᱨᱤᱫ ᱨᱮ ᱟᱹᱭᱩᱨᱤᱡ ᱟᱹᱠᱤᱞᱟᱱ ᱦᱚᱲ ᱜᱤ ᱢᱟᱹᱧᱡᱽᱦᱤ ᱫᱚᱭ ᱦᱩᱭᱩᱜᱼᱟ᱾ ᱫᱤᱥ ᱦᱩᱫᱤᱥ ᱛᱮ ᱟᱹᱠᱤᱞᱟᱱ ᱟᱨ ᱵᱟᱰᱟᱭᱟᱱ ᱦᱚᱲ ᱠᱷᱟᱹᱛᱤᱨ ᱢᱟᱹᱧᱡᱽᱦᱤ ᱫᱚ ᱢᱟᱹᱧᱡᱽᱦᱤ ᱦᱟᱲᱟᱢ ᱦᱚᱸ ᱠᱳ ᱢᱮᱛᱟᱭᱟ᱾ ᱟᱨ ᱮᱨᱟ ᱛᱮᱫ ᱫᱚ ᱢᱟᱹᱧᱡᱽᱦᱤ ᱵᱩᱰᱦᱤ ᱠᱳ ᱢᱮᱛᱟᱭᱟ᱾ ᱢᱟᱹᱧᱡᱽᱦᱤ ᱢᱩᱰᱟᱹᱢ ᱨᱮ ᱜᱤ ᱢᱟᱹᱧᱡᱽᱦᱤ ᱛᱷᱟᱱ ᱫᱚ ᱛᱟᱦᱮᱱᱟ᱾ ᱟᱭᱢᱟ ᱞᱮᱠᱟᱱ ᱯᱚᱨᱚᱵᱽ ᱯᱩᱱᱟᱹᱭ ᱨᱮ ᱢᱟᱹᱧᱡᱽᱦᱤ ᱦᱟᱲᱟᱢ ᱜᱤ ᱢᱟᱹᱧᱡᱽᱦᱤ ᱛᱷᱟᱱ ᱨᱮᱭ ᱵᱚᱝᱜᱟᱭᱟ᱾ ᱟᱨ ᱢᱟᱹᱧᱡᱽᱦᱤ ᱵᱩᱰᱦᱤ ᱫᱚ ᱢᱟᱹᱧᱡᱽᱦᱤ ᱛᱷᱟᱱ ᱥᱟᱯᱷᱟᱥᱟᱹᱯᱷᱤᱭ ᱫᱚᱦᱚ ᱠᱟᱜᱼᱟ᱾ ᱡᱟᱦᱟᱱ ᱜᱟᱞᱢᱟᱨᱟᱣ ᱥᱮ ᱟᱛᱩ ᱫᱩᱲᱩᱵ ᱞᱟᱹᱜᱤᱫ ᱢᱟᱹᱧᱡᱽᱦᱤ ᱦᱟᱲᱟᱢ ᱫᱚ ᱱᱟᱭᱠᱮ ᱫᱟᱨᱟᱭ ᱛᱮ ᱟᱛᱩ ᱦᱚᱲᱮ ᱦᱚᱦᱚ ᱡᱟᱣᱨᱟ ᱠᱚᱣᱟ᱾ ᱢᱟᱹᱧᱡᱽᱦᱤ ᱛᱷᱟᱱ ᱥᱟᱢᱟᱝ ᱨᱮ ᱜᱤ ᱜᱟᱞᱢᱟᱨᱟᱣ ᱠᱳ ᱫᱚ ᱦᱩᱭ ᱵᱟᱲᱟᱜᱼᱟ᱾ ᱢᱟᱹᱧᱡᱽᱦᱤ ᱦᱟᱲᱟᱢ ᱫᱚ ᱟᱛᱩ ᱡᱚᱛᱚ ᱦᱚᱲᱟᱜ ᱨᱚᱲ ᱟᱧᱡᱚᱢ ᱠᱟᱛᱮᱜ ᱴᱷᱟᱹᱣᱠᱟᱹᱭ ᱦᱟᱛᱟᱣᱟ᱾ ᱦᱚᱲ ᱦᱚᱯᱚᱱᱟᱜ ᱡᱟᱱᱟᱢ ᱠᱷᱚᱱ ᱜᱚᱡᱚᱜ ᱦᱟᱹᱵᱤᱡ ᱡᱚᱛᱚ ᱠᱟᱹᱢᱤ ᱨᱮ ᱢᱟᱹᱧᱡᱽᱦᱤ ᱠᱳ ᱞᱟᱹᱭᱟᱭᱟ᱾ ᱢᱟᱹᱧᱡᱽᱦᱤ ᱵᱟᱭ ᱛᱟᱦᱮᱱ ᱠᱷᱟᱱ ᱟᱡ ᱨᱮᱱ ᱜᱤᱫᱽᱨᱟᱹ ᱥᱟᱢᱟᱝ ᱠᱟᱛᱮᱜ ᱠᱟᱹᱢᱤ ᱠᱳ ᱯᱟᱨᱚᱢᱟ᱾
᱒ᱹ ᱯᱟᱨᱟᱱᱤᱠ
ᱯᱟᱨᱟᱱᱤᱠ ᱫᱚ ᱟᱭᱢᱟ ᱞᱮᱠᱟᱱ ᱠᱟᱹᱢᱤ ᱨᱮ ᱢᱟᱹᱧᱡᱽᱦᱤᱭ ᱜᱚᱸᱲᱚ ᱟᱭᱟ᱾ ᱢᱟᱹᱧᱡᱽᱦᱤ ᱵᱟᱝ ᱛᱟᱦᱮᱱ ᱨᱮ ᱯᱟᱨᱟᱱᱤᱠ ᱜᱤᱭ ᱟᱹᱭᱩᱨᱟ ᱥᱮ ᱴᱷᱟᱹᱣᱠᱟᱹᱭ ᱦᱟᱛᱟᱣᱟ᱾ ᱢᱟᱹᱧᱡᱽᱦᱤ ᱨᱮᱱ ᱵᱤᱨᱟᱹᱫᱟᱹᱞᱤ ᱵᱟᱠᱳ ᱛᱟᱦᱮᱱ ᱠᱷᱟᱱ ᱯᱟᱨᱟᱱᱤᱠ ᱜᱤ ᱢᱟᱹᱧᱡᱽᱦᱤᱭ ᱦᱩᱭᱩᱜᱼᱟ᱾
᱓ᱹ ᱡᱚᱜᱽᱢᱟᱹᱧᱡᱽᱦᱤ
ᱡᱚᱜᱽᱢᱟᱹᱧᱡᱽᱦᱤ ᱫᱚ ᱡᱩᱣᱟᱹᱱ ᱠᱚᱲᱟ ᱠᱩᱲᱤ ᱨᱮᱱ ᱟᱹᱭᱩᱨᱤᱡ ᱠᱟᱱᱟᱭ᱾ ᱡᱚᱜᱽᱢᱟᱹᱧᱡᱽᱦᱤ ᱦᱟᱲᱟᱢ ᱵᱩᱰᱦᱤ ᱟᱹᱭᱩᱨ ᱛᱮ ᱜᱤ ᱦᱚᱲ ᱦᱚᱯᱚᱱᱟᱜ ᱵᱟᱯᱞᱟ ᱦᱩᱭᱩᱜᱼᱟ᱾ ᱡᱚᱜᱽᱢᱟᱹᱧᱡᱽᱦᱤᱭᱟᱜ ᱟᱹᱭᱩᱨ ᱛᱮ ᱜᱤ ᱠᱚᱲᱟ ᱠᱩᱲᱤ ᱮᱱᱮᱡ ᱥᱤᱨᱤᱧ ᱨᱮ ᱠᱳ ᱥᱮᱞᱮᱫᱚᱜᱼᱟ᱾ ᱠᱚᱲᱟ ᱠᱩᱲᱤ ᱵᱷᱟᱜᱮ ᱦᱚᱨ ᱛᱮ ᱟᱹᱭᱩᱨ ᱨᱮᱱᱟᱜ ᱟᱝᱜᱤᱵᱷᱟᱨ ᱫᱚ ᱡᱚᱜᱽᱢᱟᱹᱧᱡᱽᱦᱤ ᱪᱮᱛᱟᱱ ᱜᱤ᱾ ᱞᱟᱹᱴᱩ ᱟᱛᱩ ᱠᱳ ᱨᱮ ᱫᱚ ᱡᱚᱜᱽᱢᱟᱹᱧᱡᱽᱦᱤ ᱜᱚᱸᱲᱚ ᱞᱟᱹᱜᱤᱫ ᱡᱚᱜᱽᱯᱟᱨᱟᱱᱤᱠᱼᱮ ᱛᱟᱦᱮᱱᱟ᱾
᱔ᱹ ᱱᱟᱭᱠᱮ
ᱱᱟᱭᱠᱮ ᱫᱚᱭ ᱦᱩᱭᱩᱜ ᱠᱟᱱᱟ ᱫᱷᱚᱨᱚᱢ ᱠᱟᱹᱢᱤ ᱨᱮᱱ ᱦᱚᱲ᱾ ᱟᱛᱩ ᱨᱮᱱᱟᱜ ᱵᱚᱝᱜᱟ ᱵᱩᱨᱩ ᱠᱳ ᱨᱮ ᱱᱟᱭᱠᱮ ᱜᱤᱭ ᱵᱚᱝᱜᱟᱭᱟ᱾ ᱡᱚᱛᱚ ᱞᱮᱠᱟᱱ ᱫᱷᱚᱨᱚᱢ ᱠᱟᱹᱢᱤ ᱱᱟᱭᱠᱮ ᱴᱷᱮᱱ ᱠᱷᱚᱱ ᱮᱦᱚᱵᱚᱜᱼᱟ᱾ ᱡᱟᱦᱮᱨ ᱛᱷᱟᱱ, ᱜᱚᱴ ᱴᱟᱹᱱᱰᱤ ᱮᱢᱟᱱ ᱴᱷᱟᱶ ᱨᱮ ᱱᱟᱭᱠᱮ ᱜᱤᱭ ᱵᱚᱝᱜᱟᱭᱟ᱾ ᱱᱟᱭᱠᱮ ᱜᱚᱬᱚ ᱞᱟᱹᱜᱤᱫ ᱠᱩᱰᱟᱹᱢ ᱱᱟᱭᱠᱮᱭ ᱛᱟᱦᱮᱱᱟ᱾ ᱠᱩᱰᱟᱹᱢ ᱱᱟᱭᱠᱮ ᱫᱚ ᱥᱤᱢᱟᱹ ᱴᱟᱹᱱᱰᱤ ᱨᱮᱭ ᱵᱚᱝᱜᱟᱭᱟ᱾
᱕ᱹ ᱜᱚᱰᱮᱛ
ᱜᱚᱰᱮᱛ ᱫᱚᱭ ᱦᱩᱭᱩᱜ ᱠᱟᱱᱟ ᱟᱛᱩ ᱦᱚᱦᱚ ᱦᱚᱲ᱾ ᱟᱭᱢᱟ ᱚᱠᱛᱮ ᱢᱟᱹᱧᱡᱽᱦᱤᱭᱟᱜ ᱢᱮᱱᱛᱮ ᱟᱛᱩ ᱦᱚᱲᱮ ᱦᱚᱲᱚ ᱡᱟᱣᱨᱟ ᱠᱚᱣᱟ᱾ ᱯᱚᱨᱚᱵᱽ ᱯᱩᱱᱟᱹᱭ ᱨᱮ ᱵᱷᱮᱡᱟ ᱟᱨ ᱫᱟᱸᱲᱮ ᱠᱳ ᱨᱟᱠᱟᱵ ᱨᱮᱱᱟᱜ ᱵᱷᱟᱨ ᱫᱚ ᱱᱟᱭᱠᱮ ᱪᱮᱛᱟᱱ ᱨᱮ ᱛᱟᱦᱮᱱᱟ᱾ ᱜᱚᱰᱮᱛ ᱫᱚ ᱟᱛᱩ ᱦᱚᱲ ᱴᱷᱮᱱ ᱠᱷᱚᱱ ᱥᱮᱨᱢᱟ ᱠᱤᱭᱟᱹ ᱫᱟᱨᱢᱟᱦᱟᱭ ᱧᱟᱢᱟ᱾
ᱢᱩᱪᱟᱹᱫ ᱨᱮ ᱢᱮᱱ ᱜᱟᱱᱚᱜᱼᱟ, ᱢᱟᱹᱧᱡᱽᱦᱤ ᱛᱷᱟᱱ ᱫᱚ ᱦᱚᱲ ᱦᱚᱯᱚᱱᱟᱜ ᱥᱟᱶᱛᱟ ᱨᱮᱱᱟᱜ ᱨᱮᱦᱮᱫ ᱠᱟᱱᱟ᱾ ᱢᱟᱹᱧᱡᱽᱦᱤ ᱛᱷᱟᱱ ᱧᱮᱞ ᱛᱮ ᱜᱤ ᱵᱩᱡᱽᱦᱟᱹᱜᱼᱟ ᱢᱤᱫᱼᱴᱮᱱ ᱟᱛᱩ ᱨᱮᱱᱟᱜ ᱫᱷᱚᱨᱚᱢ ᱟᱨ ᱟᱹᱨᱤᱪᱟᱹᱞᱤ ᱪᱮᱫ ᱞᱮᱠᱟ ᱢᱮᱱᱟᱜᱼᱟ᱾ ᱢᱟᱹᱧᱡᱽᱦᱤ ᱛᱷᱟᱱ ᱧᱮᱞ ᱛᱮ ᱜᱤ ᱵᱩᱡᱽᱦᱟᱹᱜ ᱼᱟ ᱱᱚᱣᱟ ᱫᱚ ᱦᱚᱲ ᱟᱛᱩ ᱠᱟᱱᱟ᱾ ᱚᱠᱟ ᱟᱛᱩ ᱨᱮ ᱢᱟᱹᱧᱡᱽᱦᱤ ᱛᱷᱟᱱ ᱵᱟᱹᱱᱩᱜᱼᱟ ᱚᱱᱟ ᱫᱚ ᱦᱚᱲ ᱟᱛᱩ ᱵᱟᱝ ᱠᱟᱱᱟ᱾ ᱢᱟᱹᱧᱡᱽᱦᱤ, ᱯᱟᱨᱟᱱᱤᱠ, ᱡᱚᱜᱽᱢᱟᱹᱧᱡᱽᱦᱤ, ᱱᱟᱭᱠᱮ, ᱜᱚᱰᱮᱛ ᱧᱮᱞ ᱛᱮ ᱜᱤ ᱵᱩᱡᱽᱦᱟᱹᱜᱼᱟ ᱱᱚᱣᱟ ᱜᱷᱟᱨᱚᱡᱽ ᱨᱮᱱ ᱦᱚᱲ ᱜᱤ ᱱᱚᱣᱟ ᱟᱛᱩ ᱠᱳ ᱵᱤᱨᱤᱫ ᱟᱠᱟᱫᱟ᱾ ᱚᱱᱟᱛᱮ ᱟᱛᱩ ᱨᱮᱱ ᱡᱚᱛᱚ ᱦᱚᱲ ᱱᱩᱠᱩ ᱠᱳ ᱢᱟᱱᱚᱛ ᱠᱚᱣᱟ᱾ ᱚᱠᱟ ᱟᱛᱩ ᱨᱮ ᱱᱩᱠᱩ ᱢᱚᱬᱮ ᱦᱚᱲ ᱵᱟᱠᱚ ᱢᱟᱱᱟᱣ ᱠᱳ ᱚᱱᱟ ᱟᱛᱩ ᱫᱚ ᱵᱟᱹᱲᱤᱡᱚᱜᱼᱟ᱾ ᱚᱠᱟ ᱟᱛᱩ ᱨᱮ ᱤᱞᱮᱠᱥᱚᱱ ᱠᱟᱛᱮᱜ ᱢᱟᱹᱧᱡᱽᱦᱤ ᱠᱳ ᱵᱚᱫᱚᱞ ᱠᱳ ᱚᱱᱟ ᱟᱛᱩ ᱦᱚᱸ ᱵᱟᱹᱲᱤᱡᱚᱜᱼᱟ᱾ ᱚᱱᱟᱛᱮ ᱢᱟᱹᱧᱡᱽᱦᱤ ᱛᱷᱟᱱ ᱟᱨ ᱢᱟᱹᱧᱡᱽᱦᱤ ᱜᱟᱶᱛᱟ ᱫᱚ ᱩᱛᱛᱚᱨᱟᱫᱷᱤᱠᱟᱨ ᱨᱮ ᱜᱤ ᱛᱟᱦᱮᱱ ᱡᱟᱹᱨᱩᱲ᱾ ᱥᱟᱱᱛᱟᱞ ᱥᱟᱶᱛᱟ ᱞᱟᱦᱟ ᱤᱫᱤᱭ ᱠᱷᱟᱱ ᱱᱩᱠᱩ ᱟᱛᱩ ᱢᱚᱬᱮ ᱦᱚᱲ ᱢᱟᱱᱟᱣ ᱟᱨ ᱜᱚᱸᱲᱚᱣᱟᱠᱳ ᱜᱤ ᱦᱩᱭᱩᱜᱼᱟ᱾
ᱯᱷᱮᱰᱮᱛ:
᱑. ᱡᱚᱢᱥᱤᱢ ᱵᱤᱱᱛᱤ - ᱥᱳᱢᱟᱭ ᱠᱤᱥᱠᱩ
᱒. ᱦᱚᱲ ᱠᱳ ᱨᱮᱱ ᱢᱟᱨᱮ ᱦᱟᱯᱲᱟᱢ ᱠᱳ ᱨᱮᱭᱟᱜ ᱠᱟᱛᱷᱟ - ᱠᱚᱞᱮᱭᱟᱱ ᱜᱩᱨᱩ
᱓. ᱡᱟᱦᱮᱨ ᱵᱚᱸᱜᱟ ᱥᱟᱱᱛᱟᱲ ᱠᱳ - ᱨᱟᱢᱮᱥᱣᱚᱨ ᱢᱩᱨᱢᱩ(ᱟᱹᱫᱤᱢ ᱥᱟᱱᱛᱟᱲ)
