ᱛᱩᱭᱩ ᱟᱨ ᱠᱚᱸᱜ
ᱟᱹᱰᱤ ᱫᱤᱱ ᱞᱟᱦᱟ ᱨᱮ ᱢᱤᱫᱼᱴᱮᱱ ᱛᱩᱭᱩ ᱟᱨ ᱢᱤᱫᱼᱴᱮᱱ ᱠᱚᱸᱜ ᱟᱹᱰᱤ ᱜᱟᱛᱮ ᱠᱤᱱ ᱛᱟᱦᱮᱸ ᱠᱟᱱᱟ ᱾ ᱛᱭᱩᱭ ᱫᱚ ᱠᱤᱫᱩᱜ ᱡᱚᱢ ᱞᱟᱹᱜᱤᱫ ᱠᱚᱸᱜᱼᱮ ᱱᱮᱣᱛᱟ ᱠᱤᱫᱤᱭᱟ ᱾
ᱠᱚᱸᱜ ᱫᱚ ᱨᱟᱹᱥᱠᱟᱹ ᱛᱮ ᱛᱩᱭᱩᱣᱟᱜ ᱚᱲᱟᱜ ᱯᱮᱲᱟᱜᱼᱮ ᱪᱟᱞᱟᱣ ᱮᱱᱟ ᱾ ᱢᱮᱱᱠᱷᱟᱱ ᱛᱩᱭᱩ ᱫᱚ ᱥᱚᱭᱛᱟᱱᱤ ᱠᱟᱛᱮᱜ ᱛᱮᱞᱯᱮᱧ ᱛᱟᱹᱨᱤ ᱨᱮ ᱮᱠᱮᱱ ᱨᱟᱥᱮ ᱡᱚᱢᱟᱜᱼᱮ ᱥᱟᱢᱟᱝ ᱟᱫᱮᱭᱟ ᱾
ᱠᱚᱸᱜ ᱫᱚ ᱟᱭᱟᱜ ᱡᱤᱞᱤᱧ ᱴᱷᱚᱱᱴᱟ ᱛᱮ ᱵᱟᱭ ᱡᱚᱢ ᱫᱟᱲᱮ ᱟᱫᱟ ᱾ ᱢᱮᱱᱠᱷᱟᱱ ᱛᱩᱭᱩ ᱫᱚ ᱪᱟᱴᱚᱜ ᱪᱟᱴᱚᱜ ᱛᱮᱭ ᱡᱚᱢ ᱠᱮᱫᱟ ᱡᱚᱛᱚ ᱾
ᱠᱚᱸᱜ ᱫᱚ ᱵᱮᱜᱚᱨ ᱡᱚᱢ ᱛᱤᱜᱤᱭ ᱨᱩᱣᱟᱹᱲ ᱮᱱᱟ ᱾ ᱨᱩᱣᱟᱹᱲ ᱚᱠᱛᱮ ᱛᱩᱭᱩ ᱫᱚᱭ ᱢᱮᱛᱟᱭ ᱠᱟᱱᱟ, “ᱟᱹᱰᱤ ᱫᱩᱠᱷᱤᱧ ᱵᱩᱡᱽᱦᱟᱹᱣ ᱮᱫᱟ ! ᱤᱧᱟᱜ ᱨᱟᱥᱮ ᱫᱚ ᱯᱟᱥᱮᱡ ᱵᱟᱝ ᱥᱤᱵᱤᱞ ᱠᱟᱱ ᱛᱟᱦᱮᱸ ᱠᱟᱱᱟ ᱾ ᱚᱱᱟᱛᱮ ᱵᱟᱢ ᱡᱚᱢ ᱫᱟᱲᱮ ᱟᱫᱟ ᱾”
ᱠᱚᱸᱜ ᱫᱚ ᱛᱩᱭᱩᱣᱟᱜ ᱥᱚᱭᱛᱟᱱᱤ ᱵᱩᱡᱽᱦᱟᱹᱣ ᱠᱟᱛᱮᱜ ᱦᱚᱸ ᱪᱮᱫ ᱦᱚᱸ ᱵᱟᱭ ᱢᱮᱱ ᱞᱮᱫᱟ ᱾ ᱠᱚᱸᱜᱼᱮ ᱢᱮᱱ ᱠᱮᱫᱟ, “ᱢᱚᱱ ᱟᱞᱚᱢ ᱠᱷᱟᱴᱚᱭᱟ ᱾ ᱤᱧ ᱴᱷᱮᱱ ᱦᱚᱸ ᱟᱢᱟᱜ ᱱᱮᱣᱛᱟ ᱛᱟᱦᱮᱸ ᱮᱱᱟ᱾ ᱟᱥᱚᱜ ᱠᱟᱹᱱᱟᱧ ᱦᱟᱹᱡᱩᱜ ᱜᱤᱭᱟᱢ ᱾”
ᱱᱟᱥᱮ ᱫᱤᱱ ᱛᱟᱭᱚᱢ ᱛᱩᱭᱩ ᱫᱚ ᱠᱚᱸᱜᱼᱟᱜ ᱚᱲᱟᱜ ᱱᱮᱣᱛᱟ ᱡᱚᱢᱮ ᱦᱮᱡ ᱮᱱᱟ ᱾ ᱵᱟᱱᱟ ᱦᱚᱲ ᱡᱚᱢ ᱠᱤᱱ ᱫᱩᱲᱩᱵ ᱮᱱᱟ ᱾ ᱢᱮᱱᱠᱷᱟᱱ ᱠᱚᱸᱜ ᱫᱚ ᱮᱠᱮᱱ ᱡᱤᱞᱤᱧ ᱦᱚᱴᱚᱜᱼᱟᱱ ᱵᱚᱛᱚᱞ ᱛᱮ ᱡᱚᱢᱟᱜᱼᱮ ᱥᱟᱢᱟᱝ ᱠᱮᱫᱟ ᱾ ᱠᱚᱸᱜ ᱫᱚ ᱟᱭᱟᱜ ᱡᱤᱞᱤᱧ ᱴᱷᱚᱱᱴᱟ ᱛᱮ ᱚᱱᱟ ᱵᱚᱛᱚᱞ ᱠᱷᱚᱱ ᱟᱹᱰᱤ ᱥᱤᱵᱤᱞᱮ ᱡᱚᱢ ᱠᱮᱫᱟ ᱾
ᱢᱮᱱᱠᱷᱟᱱ ᱛᱩᱭᱩ ᱢᱚᱪᱟ ᱫᱚ ᱵᱟᱝ ᱵᱚᱞᱚ ᱞᱮᱱᱟ᱾ ᱥᱤᱵᱤᱞ ᱡᱚᱢᱟᱜ ᱵᱟᱭ ᱡᱚᱢ ᱫᱟᱲᱮ ᱟᱫᱟ᱾ ᱵᱚᱛᱚᱞ ᱪᱮᱛᱟᱱᱮ ᱪᱟᱴᱚᱜ ᱵᱟᱲᱟ ᱠᱮᱫᱟ᱾
ᱠᱚᱸᱜ ᱫᱚ ᱢᱩᱞᱩᱡ ᱞᱟᱱᱫᱟ ᱠᱟᱛᱮᱜᱼᱮ ᱢᱮᱱ ᱠᱮᱫᱟ, “ᱛᱤᱦᱤᱧᱟᱜ ᱡᱚᱢᱟᱜ ᱞᱟᱹᱜᱤᱫ ᱫᱚ ᱤᱠᱟᱹ ᱵᱟᱹᱧ ᱠᱷᱚᱡᱚᱜ ᱠᱟᱱᱟ᱾ ᱪᱮᱫ ᱞᱮᱠᱟ ᱦᱚᱲᱮᱢ ᱯᱮᱲᱟ ᱠᱚᱣᱟ ᱟᱢ ᱦᱚᱸ ᱚᱝᱠᱟ ᱜᱤ ᱠᱳ ᱯᱮᱲᱟ ᱢᱮᱭᱟ᱾”
