ᱫᱷᱤᱨᱤᱭᱟᱜ ᱨᱮᱝᱜᱮᱡ
ᱨᱚᱵᱤᱱᱫᱨᱚᱱᱟᱛᱷ ᱴᱷᱟᱠᱩᱨ
ᱛᱚᱨᱡᱚᱢᱟ ᱨᱮ ᱥᱩᱵᱟᱥ ᱢᱩᱨᱢᱩ
 |
ᱫᱷᱤᱨᱤᱭᱟᱜ ᱨᱮᱝᱜᱮᱡ |
ᱤᱧ ᱟᱨ ᱤᱧ ᱨᱮᱱ ᱢᱤᱫ ᱜᱟᱛᱮ ᱠᱚᱲᱟ ᱪᱷᱩᱴᱤ ᱨᱮ ᱫᱟᱲᱟᱱ ᱞᱤᱧ ᱥᱮᱱ ᱞᱮᱱᱟ᱾ ᱫᱟᱲᱱ ᱠᱷᱚᱱ ᱨᱩᱣᱟᱹᱲᱚᱜ ᱚᱠᱛᱮ ᱫᱚ ᱨᱮᱹᱞ ᱜᱟᱹᱰᱤ ᱛᱮ ᱞᱤᱧ ᱨᱩᱣᱟᱹᱲ ᱠᱟᱱ ᱛᱟᱦᱮᱸ ᱠᱟᱱᱟ᱾ ᱚᱱᱟ ᱚᱠᱛᱮ ᱨᱮᱹᱞ ᱜᱟᱹᱰᱤ ᱨᱮ ᱢᱤᱫᱼᱴᱮᱱ ᱦᱚᱲ ᱥᱟᱶ ᱧᱟᱯᱟᱢ ᱦᱩᱭ ᱮᱱᱟ᱾ ᱩᱱᱤ ᱦᱚᱲᱟᱜ ᱜᱟᱞᱢᱟᱨᱟᱣ ᱟᱧᱡᱚᱢ ᱛᱮ ᱞᱤᱧ ᱦᱟᱦᱟᱲᱟ ᱮᱱᱟ᱾ ᱩᱱᱤᱭᱟᱜ ᱠᱟᱛᱷᱟᱢ ᱟᱧᱡᱚᱢ ᱞᱮᱠᱷᱟᱱ ᱢᱚᱱᱮ ᱦᱩᱭᱩᱜᱼᱟ ᱫᱷᱟᱹᱨᱛᱤ ᱨᱮᱱᱟᱜ ᱟᱭᱢᱟ ᱡᱤᱱᱤᱥ ᱵᱟᱢ ᱵᱟᱰᱟᱭᱟ᱾ ᱜᱷᱟᱱᱮ ᱥᱟᱬᱮᱥ ᱨᱮᱱᱟᱜ ᱠᱟᱛᱷᱟᱭ ᱞᱟᱹᱭ ᱮᱫᱟ, ᱜᱷᱟᱱᱮ ᱱᱟᱜᱟᱢ ᱨᱮᱱᱟᱜ, ᱜᱷᱟᱱᱮ ᱫᱷᱚᱨᱚᱢ ᱨᱮᱱᱟᱜ, ᱜᱷᱟᱱᱮ ᱤᱨᱟᱹᱱ ᱨᱮᱱᱟᱜ ᱯᱟᱹᱨᱥᱤ ᱛᱮᱭ ᱨᱚᱲ ᱮᱫᱟ᱾ ᱟᱹᱞᱤᱧ ᱵᱟᱱᱟ ᱦᱚᱲ ᱜᱤ ᱤᱱᱟᱹᱜ ᱵᱟᱨᱦᱮ ᱫᱟᱲᱟᱱ ᱦᱚᱲ ᱫᱚ ᱵᱟᱝ ᱠᱟᱱᱟᱞᱤᱧ᱾ ᱚᱱᱟᱛᱮ ᱩᱱᱤᱭᱟᱜ ᱠᱟᱛᱷᱟ ᱪᱟᱦᱟᱵ ᱠᱟᱛᱮᱜ ᱞᱤᱧ ᱟᱧᱡᱚᱢᱮᱜ ᱛᱟᱭᱟ᱾ ᱤᱧ ᱨᱮᱱ ᱜᱟᱛᱮ ᱫᱚᱭ ᱯᱟᱹᱛᱤᱭᱟᱹᱣ ᱮᱱᱟ ᱱᱩᱭ ᱦᱚᱲᱟᱜ ᱫᱚ ᱯᱟᱥᱮᱡ ᱟᱭᱢᱟ ᱞᱮᱠᱟᱱ ᱫᱟᱲᱮ ᱢᱮᱱᱟᱜ ᱛᱟᱭᱟ᱾ ᱩᱱᱤ ᱦᱚᱲ ᱦᱚᱸ ᱟᱹᱞᱤᱧᱟᱜ ᱵᱷᱟᱵᱽ ᱵᱩᱡᱽᱦᱟᱹᱣ ᱧᱟᱢᱟ ᱠᱟᱛᱮᱜ ᱠᱩᱥᱤ ᱛᱮ ᱠᱷᱩᱵᱼᱮ ᱜᱟᱞᱢᱟᱨᱟᱣ ᱟᱞᱤᱧ ᱠᱟᱱᱟ᱾
ᱨᱮᱹᱞ ᱜᱟᱹᱰᱤ ᱢᱤᱫ ᱡᱚᱝᱥᱚᱝ ᱨᱮ ᱛᱷᱤᱨ ᱮᱱᱟ᱾ ᱚᱱᱰᱮ ᱯᱷᱮᱰ ᱠᱟᱛᱮᱜ ᱟᱨ ᱢᱤᱫᱼᱴᱮᱱ ᱨᱮᱹᱞ ᱜᱟᱹᱰᱤ ᱞᱟᱹᱜᱤᱫ ᱛᱟᱹᱝᱜᱤ ᱞᱟᱜᱟᱣᱟᱫ ᱞᱤᱧᱟᱹ᱾ ᱧᱤᱫᱟᱹ ᱜᱮᱞ ᱴᱟᱲᱟᱝ ᱜᱟᱱ ᱦᱩᱭ ᱟᱠᱟᱱᱟ᱾ ᱦᱚᱨ ᱨᱮ ᱜᱟᱹᱰᱤ ᱵᱟᱹᱲᱤᱡ ᱟᱠᱟᱱ ᱛᱮᱜ ᱦᱟᱹᱡᱩᱜ ᱵᱤᱞᱚᱢᱚᱜᱼᱟ᱾ ᱜᱤᱛᱤᱡ ᱡᱤᱨᱟᱹᱜ ᱞᱟᱹᱜᱤᱫ ᱤᱧ ᱟᱴᱮᱫ ᱡᱩᱫ ᱟᱠᱟᱫᱟ᱾ ᱩᱱ ᱚᱠᱛᱮ ᱩᱱᱤ ᱦᱚᱲ ᱦᱚᱸᱭ ᱥᱮᱴᱮᱨ ᱮᱱᱟ᱾ ᱟᱨ ᱱᱚᱣᱟ ᱡᱟᱹᱲᱮ ᱮᱦᱚᱵ ᱠᱮᱫᱟ -
ᱩᱱ ᱫᱚ ᱛᱩᱞᱟᱹᱢ ᱨᱮᱱᱟᱜ ᱠᱷᱟᱡᱽᱱᱟ ᱨᱟᱠᱟᱵ ᱨᱮᱱᱟᱜ ᱤᱧ ᱠᱟᱹᱢᱤ ᱠᱟᱱ ᱛᱟᱦᱮᱸ ᱠᱟᱱᱟ᱾ ᱫᱟᱨᱢᱚᱴ ᱦᱚᱲ ᱧᱮᱞ ᱛᱮ ᱦᱟᱭᱫᱨᱟᱵᱟᱫᱽ ᱨᱮᱱᱟᱜ ᱵᱚᱨᱤᱪ ᱨᱮ ᱠᱟᱹᱢᱤ ᱠᱳ ᱠᱩᱳᱞ ᱠᱤᱫᱤᱧᱟᱹ᱾ ᱵᱚᱨᱤᱪ ᱫᱚ ᱟᱹᱰᱤ ᱱᱟᱯᱟᱭ ᱡᱟᱭᱜᱟ᱾ ᱵᱤᱨ ᱵᱩᱨᱩ ᱞᱟᱛᱟᱨ ᱛᱮ ᱥᱩᱥᱛᱟ ᱧᱩᱛᱩᱢᱟᱱ ᱢᱤᱫᱼ ᱜᱟᱰᱟ ᱵᱤᱧ ᱞᱮᱠᱟ ᱠᱟᱱᱰᱮᱭᱟ ᱠᱚᱱᱰᱮᱭᱟ ᱟᱹᱛᱩ ᱪᱟᱞᱟᱣ ᱟᱠᱟᱱᱟ᱾ ᱚᱱᱟ ᱜᱟᱰᱟ ᱟᱲᱮ ᱨᱮ ᱜᱤ ᱵᱟᱨ ᱥᱟᱭ ᱞᱟᱦᱟ ᱨᱮ ᱫᱚᱥᱟᱨ ᱥᱟᱼᱢᱟᱢᱩᱫᱽ ᱵᱮᱱᱟᱣ ᱢᱤᱫ ᱫᱷᱤᱨᱤ ᱜᱟᱲ ᱢᱮᱱᱟᱜᱼᱟ᱾ ᱨᱟᱹᱥᱠᱟᱹ ᱨᱚᱢᱚᱡᱽ ᱞᱟᱹᱜᱤᱫ ᱱᱚᱣᱟ ᱫᱷᱤᱨᱤ ᱜᱟᱲ ᱫᱚᱭ ᱵᱮᱱᱟᱣ ᱞᱮᱫᱟ᱾ ᱱᱟᱱᱟ ᱦᱩᱱᱟᱹᱨ ᱫᱤᱨᱤ ᱛᱮ ᱛᱚᱞ ᱚᱱᱟ ᱫᱟᱞᱟᱱ ᱥᱮ ᱜᱟᱲ᱾ ᱚᱱᱰᱮ ᱠᱳ ᱮᱱᱮᱡ ᱥᱤᱨᱤᱧ ᱠᱟᱱᱟ ᱛᱟᱦᱮᱸ ᱠᱟᱱᱟ ᱤᱨᱟᱹᱱ ᱫᱤᱥᱟᱹᱢ ᱨᱮᱱ ᱮᱥᱮᱞ ᱥᱟᱯᱷᱟ ᱠᱩᱲᱤ ᱠᱳ᱾ ᱞᱟᱹᱵᱤᱫ ᱡᱟᱝᱜᱟ ᱛᱮ ᱠᱳ ᱫᱟᱹᱲ ᱵᱟᱲᱟ ᱠᱟᱱ ᱛᱟᱦᱮᱸ ᱠᱟᱱᱟ ᱜᱚᱴᱟ ᱚᱲᱟᱜ᱾ ᱚᱱᱟᱜ ᱨᱮᱱᱟᱜ ᱡᱟᱹᱨᱱᱟ ᱨᱮ ᱰᱟᱹᱵᱽᱨᱟᱹ ᱠᱟᱛᱮᱜ ᱠᱳ ᱞᱚᱦᱚᱫ ᱮᱫ ᱠᱟᱱ ᱛᱟᱦᱮᱸ ᱠᱟᱱᱟ ᱟᱠᱚᱣᱟᱜ ᱞᱟᱹᱵᱤᱫ ᱦᱚᱲᱢᱚ᱾
ᱱᱟᱦᱟᱜ ᱫᱚ ᱚᱱᱟ ᱫᱷᱤᱨᱤ ᱜᱟᱲ ᱱᱤᱥᱩᱱ ᱜᱮᱭᱟ, ᱫᱷᱤᱨᱤ ᱠᱳ ᱦᱚᱸ ᱯᱮᱱᱰᱚ ᱮᱱᱟ, ᱡᱷᱟᱨᱱᱟ ᱠᱳ ᱦᱚᱸ ᱟᱧᱡᱮᱫ ᱠᱮᱭᱟ, ᱜᱚᱴᱟ ᱚᱲᱟᱜ ᱥᱤᱨᱤᱧ ᱛᱮ ᱟᱱᱫᱚᱲ ᱤᱨᱟᱱ ᱨᱮᱱ ᱠᱩᱲᱤ ᱦᱚᱸ ᱵᱟᱹᱱᱩᱜ ᱠᱚᱣᱟ᱾ ᱱᱟᱦᱟᱜ ᱫᱚ ᱠᱷᱟᱡᱽᱱᱟ ᱨᱟᱠᱟᱵ ᱞᱟᱹᱜᱤᱫ ᱚᱯᱤᱥ ᱠᱳ ᱵᱮᱱᱟᱣ ᱟᱠᱟᱫᱟ ᱚᱱᱟ ᱱᱤᱥᱩᱱ ᱚᱲᱟᱜ ᱥᱮ ᱫᱟᱞᱟᱱ ᱫᱚ᱾ ᱚᱱᱰᱮ ᱛᱟᱦᱮᱱ ᱡᱟᱜᱟ ᱢᱮᱱᱟᱜ ᱨᱮᱦᱚᱸ ᱚᱠᱚᱭ ᱜᱤ ᱧᱤᱫᱟᱹ ᱫᱚ ᱚᱱᱰᱮ ᱵᱟᱠᱳ ᱛᱟᱦᱮᱸᱱ ᱠᱟᱱ ᱛᱟᱦᱮᱸ ᱠᱟᱱᱟ᱾ ᱥᱚᱝᱜᱮᱱ ᱠᱟᱹᱢᱤ ᱠᱳ ᱤᱧ ᱦᱚᱸ ᱧᱤᱫᱟᱹ ᱛᱟᱦᱮᱸ ᱠᱳ ᱢᱟᱱᱟ ᱠᱤᱫᱤᱧᱟ᱾ ᱞᱟᱹᱭᱟᱠᱳ ᱠᱩᱢᱲᱩ ᱦᱚᱸ ᱠᱟᱛᱷᱟᱭ ᱵᱚᱛᱚᱨ ᱛᱮ ᱱᱚᱣᱟ ᱚᱲᱟᱜ ᱵᱟᱠᱳ ᱦᱟᱹᱡᱩᱜᱼᱟ᱾ ᱤᱧ ᱫᱚ ᱩᱱᱠᱩᱣᱟᱜ ᱠᱟᱛᱷᱟᱧ ᱞᱟᱱᱫᱟ ᱜᱤᱰᱤ ᱠᱟᱫᱟ᱾
ᱯᱩᱭᱞᱩ ᱯᱩᱭᱞᱩ ᱦᱮᱡ ᱠᱟᱛᱮᱜ ᱚᱱᱟ ᱚᱲᱟᱜ ᱨᱮᱱᱟᱜ ᱱᱤᱥᱩᱱ ᱫᱷᱤᱨᱤ ᱛᱮ ᱠᱚᱲᱟᱢ ᱛᱮᱱ ᱠᱟᱹᱫᱤᱧ ᱞᱮᱠᱟᱧ ᱤᱠᱟᱹᱣ ᱮᱫ ᱠᱟᱱ ᱛᱟᱦᱮᱸ ᱠᱟᱱᱟ, ᱵᱟᱨᱦᱮ ᱠᱷᱟᱡᱱᱟ ᱠᱳ ᱨᱟᱠᱟᱵ ᱠᱷᱚᱱ ᱦᱮᱡ ᱠᱟᱛᱮᱜ, ᱧᱤᱫᱟᱹ ᱞᱟᱝᱜᱟ ᱦᱚᱲᱢᱚᱧ ᱡᱟᱹᱯᱤᱫ ᱮᱫ ᱛᱟᱦᱮᱸ ᱠᱟᱱᱟ᱾
ᱢᱮᱱᱠᱷᱟᱱ ᱦᱟᱯᱛᱟ ᱜᱟᱱ ᱪᱟᱞᱟᱣ ᱮᱱ ᱛᱮ ᱜᱤ ᱚᱱᱟ ᱚᱲᱟᱜ ᱤᱧ ᱵᱩᱞᱟᱹᱣᱮ ᱞᱟᱜᱟᱣ ᱮᱱᱟ᱾ ᱚᱱᱟ ᱚᱵᱚᱥᱛᱷᱟ ᱫᱚ ᱵᱟᱝ ᱞᱟᱹᱭ ᱫᱟᱲᱮᱭᱟ᱾ ᱦᱚᱲ ᱦᱚᱸ ᱵᱟᱢ ᱯᱟᱹᱛᱤᱭᱟᱹᱣ ᱟᱪᱚ ᱫᱟᱲᱮ ᱟᱭᱟ᱾ ᱜᱚᱴᱟ ᱫᱟᱞᱟᱱ ᱜᱤ ᱢᱤᱫ ᱡᱤᱣᱟᱹᱫ ᱦᱚᱲᱢᱚ ᱞᱮᱠᱟ ᱤᱧᱮ ᱦᱟᱹᱲᱩᱵ ᱞᱤᱫᱤᱧᱟ᱾ ᱚᱱᱟ ᱫᱚ ᱯᱟᱥᱮᱡ ᱤᱧ ᱚᱱᱟ ᱚᱲᱟᱜ ᱵᱚᱞᱚᱜ ᱮᱦᱚᱵ ᱦᱤᱞᱟᱹᱜ ᱠᱷᱚᱱ ᱜᱤ᱾ ᱤᱧ ᱫᱚ ᱵᱟᱹᱧ ᱵᱩᱡᱽᱦᱟᱹᱧ ᱟᱠᱟᱫ ᱛᱟᱦᱮ ᱠᱟᱱᱟ᱾ ᱢᱮᱱᱠᱷᱟᱱ ᱯᱩᱭᱞᱩ ᱡᱚᱠᱷᱚᱱᱤᱧ ᱵᱩᱡᱽᱦᱟᱹᱧ ᱚᱱᱟ ᱠᱟᱛᱷᱟ ᱫᱚ ᱥᱟᱯᱷᱟ ᱛᱮ ᱫᱤᱥᱟᱹ ᱢᱮᱱᱟᱜ ᱛᱤᱧᱟᱹ᱾
ᱚᱱᱟ ᱫᱚ ᱛᱟᱦᱮᱸ ᱠᱟᱱᱟ ᱥᱤᱛᱩᱝ ᱨᱤᱛᱩ᱾ ᱛᱮᱢᱚᱱ ᱠᱟᱹᱢᱤ ᱦᱚᱸ ᱵᱟᱝ ᱛᱟᱦᱮ ᱠᱟᱱᱟ᱾ ᱪᱟᱱᱫᱚ ᱦᱟᱹᱥᱩᱨ ᱞᱟᱦᱟ ᱜᱟᱰᱟ ᱟᱲᱮ ᱨᱮ ᱫᱩᱲᱩᱵ ᱠᱟᱛᱮᱜ ᱤᱧ ᱦᱚᱭᱚᱧ ᱠᱟᱱᱟ᱾ ᱜᱟᱰᱟ ᱫᱚ ᱟᱧᱡᱮᱫ ᱟᱠᱟᱱᱟ᱾ ᱥᱟᱯᱷᱟ ᱫᱟᱜ ᱛᱟᱞᱟ ᱛᱮ ᱞᱟᱛᱟᱨ ᱨᱮᱱᱟᱜ ᱜᱟᱹᱝᱜᱤᱴ ᱧᱮᱞ ᱧᱟᱢᱚᱜ ᱠᱟᱱᱟ᱾ ᱦᱚᱭ ᱰᱚ ᱵᱟᱭ ᱦᱚᱭ ᱮᱫᱟ᱾ ᱢᱮᱱᱠᱷᱟᱱ ᱵᱤᱨ ᱜᱟᱡᱟᱲ ᱠᱷᱚᱱ ᱵᱟᱦᱟ ᱨᱮᱱᱟᱜ ᱥᱚ ᱧᱟᱢᱚᱜ ᱠᱟᱱᱟ᱾ ᱵᱩᱨᱩ ᱫᱤᱥᱟᱹᱢ ᱠᱟᱱ ᱛᱮ ᱞᱟᱦᱟ ᱨᱮ ᱜᱤ ᱪᱟᱱᱫᱚᱭ ᱦᱟᱹᱥᱩᱨ ᱮᱱᱟ᱾ ᱧᱩᱦᱩᱢ ᱵᱮᱲᱟ ᱥᱟᱫᱚᱢ ᱛᱮ ᱫᱟᱲᱟᱱ ᱩᱰᱩᱝᱚᱜ ᱞᱟᱹᱜᱤᱫ ᱤᱧ ᱵᱤᱨᱤᱫᱚᱜ ᱞᱟᱹᱜᱤᱫ, ᱩᱱ ᱚᱠᱛᱚ ᱚᱠᱚᱭ ᱪᱚ ᱥᱤᱲᱦᱤ ᱛᱮ ᱫᱮᱡᱚᱜ ᱞᱮᱠᱟᱧ ᱟᱧᱡᱚᱢ ᱠᱮᱫᱟ - ᱛᱟᱭᱚᱢ ᱥᱮᱡ ᱠᱚᱭᱚᱜ ᱠᱟᱛᱮᱜ ᱤᱧ ᱧᱮᱞ ᱠᱮᱫᱟ ᱚᱠᱚᱭ ᱦᱚᱸ ᱵᱟᱹᱱᱩᱜ ᱠᱚᱣᱟ᱾
ᱦᱩᱫᱤᱥ ᱠᱤᱫᱟᱹᱧ ᱢᱚᱱᱮ ᱛᱮᱧ ᱟᱱᱫᱽᱦᱟ ᱟᱠᱟᱱᱟ᱾ ᱚᱱᱟᱛᱮᱧ ᱫᱩᱲᱩᱵ ᱨᱩᱣᱟᱹᱲ ᱮᱱᱟ᱾ ᱟᱪᱠᱟ ᱜᱤ ᱟᱭᱢᱟ ᱡᱟᱝᱜᱟ ᱨᱮᱱᱜᱟ ᱛᱟᱲᱟᱢ ᱥᱟᱰᱮᱧ ᱟᱧᱡᱚᱢ ᱠᱮᱫᱟ - ᱟᱭᱢᱟ ᱦᱚᱲ ᱛᱮ ᱫᱟᱹᱲ ᱯᱷᱮᱰᱚᱜ ᱠᱟᱱ ᱞᱮᱠᱟ᱾ ᱦᱚᱲᱢᱚ ᱫᱚ ᱨᱩᱢᱩᱧ ᱨᱩᱢᱩᱧ ᱮᱱ ᱛᱤᱧᱟᱹ᱾ ᱛᱟᱭᱚᱢ ᱥᱮᱡ ᱠᱚᱭᱚᱜ ᱨᱩᱣᱟᱹᱲ ᱠᱟᱛᱮᱜ ᱚᱠᱚᱭ ᱦᱚᱸ ᱵᱟᱹᱧ ᱧᱮᱞ ᱧᱟᱢ ᱞᱮᱫ ᱠᱚᱣᱟ᱾ ᱢᱮᱱ ᱠᱷᱟᱱᱤᱧ ᱵᱩᱡᱽᱦᱟᱹᱣ ᱧᱟᱢ ᱮᱫᱟ - ᱞᱚᱞᱚ ᱥᱤᱛᱩᱝ ᱛᱤᱱ ᱤᱧ ᱟᱲᱮ ᱛᱮ ᱟᱭᱢᱟ ᱠᱩᱲᱩ ᱜᱟᱰᱟ ᱛᱮ ᱯᱟᱭᱨᱟᱜ ᱠᱚ ᱪᱟᱞᱟᱜ ᱠᱟᱱᱟ᱾ ᱜᱚᱞᱯᱚ ᱮᱫᱟ ᱠᱳ ᱞᱟᱱᱫᱟ ᱮᱫᱟ ᱠᱳ᱾ ᱤᱧ ᱡᱮᱢᱚᱱ ᱵᱟᱹᱧ ᱧᱮᱞ ᱧᱟᱢᱮᱫ ᱠᱚᱣᱟ, ᱩᱱᱠᱳ ᱦᱚᱸ ᱯᱟᱥᱮᱡ ᱤᱧ ᱵᱟᱠᱳ ᱧᱮᱞ ᱧᱟᱢᱮᱧ ᱠᱟᱱᱟ᱾ ᱜᱟᱰᱟ ᱫᱟᱜ ᱫᱚ ᱵᱟᱝ ᱨᱟᱲᱟᱜ ᱠᱟᱱᱟ᱾ ᱢᱮᱱᱠᱷᱟᱱ ᱤᱠᱟᱹᱣ ᱤᱫᱟᱹᱧ ᱩᱱᱠᱳ ᱫᱟᱜ ᱨᱮ ᱯᱷᱮᱰ ᱠᱟᱛᱮᱜ ᱠᱳ ᱠᱷᱤᱞᱟᱹᱰ ᱠᱟᱱᱟ᱾
 |
| ᱫᱷᱤᱨᱤᱭᱟᱜ ᱨᱮᱝᱜᱮᱡ-᱒ |
ᱤᱧᱟᱜ ᱦᱚᱲᱢᱚ ᱫᱚ ᱛᱟᱨᱠᱚ ᱮᱱᱟ; ᱵᱟᱝ ᱫᱚ ᱵᱚᱛᱚᱨ ᱛᱮ ᱵᱟᱝ ᱫᱚ ᱨᱟᱹᱥᱠᱟᱹ ᱛᱮ ᱴᱷᱤᱠ ᱵᱟᱹᱧ ᱵᱩᱡᱽᱦᱟᱹᱣ ᱫᱟᱲᱮ ᱟᱫᱟ᱾ ᱩᱱᱠᱩ ᱧᱮᱞ ᱥᱟᱱᱟ ᱠᱤᱫᱤᱧᱟ, ᱢᱮᱱᱠᱷᱟᱱ ᱚᱠᱚᱭ ᱜᱤ ᱵᱟᱠᱳ ᱧᱮᱞ ᱧᱟᱢᱚᱜ ᱠᱟᱱᱟ᱾ ᱩᱱᱠᱳᱣᱟᱜ ᱠᱟᱛᱷᱟ ᱟᱛᱮᱱ ᱤᱫᱟᱹᱧ, ᱢᱮᱱᱠᱷᱟᱱ ᱫᱟᱨᱮ ᱥᱟᱠᱟᱢ ᱨᱮᱱᱟᱜ ᱥᱟᱰᱮ ᱵᱮᱜᱚᱨ ᱪᱮᱫ ᱜᱤ ᱵᱟᱝ ᱟᱧᱡᱚᱢᱚᱜ ᱠᱟᱱᱟ᱾ ᱢᱚᱱᱮ ᱦᱩᱭ ᱮᱱᱟ ᱥᱟᱭ ᱥᱮᱨᱢᱟ ᱞᱟᱦᱟ ᱨᱮᱱᱟᱜ ᱚᱱᱟ ᱚᱲᱟᱜ ᱡᱤᱣᱟᱹᱫ ᱨᱩᱣᱟᱹᱲ ᱟᱠᱟᱱᱟ᱾ ᱵᱚᱛᱚᱨ ᱵᱚᱛᱚᱨ ᱛᱮ ᱛᱟᱭᱚᱢ ᱥᱮᱡ ᱤᱧ ᱠᱚᱭᱚᱜ ᱠᱮᱫᱟ᱾ ᱚᱲᱟᱜ ᱨᱮ ᱢᱟᱨᱥᱟᱞ ᱵᱟᱹᱧ ᱡᱮᱨᱮᱫ ᱟᱠᱟᱫᱟ᱾ ᱮᱱᱨᱮᱦᱚᱸ ᱢᱚᱱᱮ ᱮᱱᱟ ᱫᱟᱞᱟᱱ ᱛᱟᱞᱟ ᱨᱮ ᱟᱭᱢᱟ ᱦᱚᱲ ᱥᱚᱵᱷᱟ ᱠᱳ ᱫᱩᱲᱩᱵ ᱟᱠᱟᱱᱟ᱾ ᱢᱮᱱ ᱠᱷᱟᱱ ᱠᱟᱹᱲᱩᱝ ᱠᱩᱪᱩᱝ ᱧᱩᱛ ᱨᱮ ᱪᱮᱫ ᱜᱤ ᱵᱟᱝ ᱧᱮᱞ ᱧᱟᱢᱚᱜ ᱠᱟᱱᱟ᱾
ᱟᱪᱠᱟ ᱜᱤ ᱦᱚᱭ ᱵᱷᱟᱨᱰᱳ ᱦᱮᱡ ᱮᱱᱟ᱾ ᱜᱟᱰᱟ ᱨᱮᱱᱟᱜ ᱛᱷᱤᱨ ᱟᱠᱟᱱ ᱫᱟᱜ ᱦᱤᱞᱠᱟᱹᱣ ᱮᱱᱟ᱾ ᱯᱟᱹᱛᱤᱭᱟᱹᱜ ᱟᱨ ᱵᱟᱢ ᱯᱟᱹᱛᱤᱭᱟᱹᱜ, ᱥᱟᱭ ᱥᱮᱨᱢᱟ ᱞᱟᱦᱟ ᱨᱮᱱᱟᱜ ᱜᱷᱚᱴᱚᱱᱟ ᱤᱧ ᱥᱟᱢᱟᱝ ᱨᱮ ᱥᱚᱫᱚᱨ ᱠᱟᱛᱮᱜ ᱟᱝᱜᱮᱱ ᱮᱱᱟ᱾ ᱚᱠᱚᱭ ᱤᱧ ᱟᱲᱮ ᱛᱮ ᱛᱟᱲᱟᱢ ᱠᱟᱛᱮᱜ ᱫᱟᱜ ᱨᱮ ᱠᱳ ᱯᱷᱮᱰ ᱞᱮᱱ, ᱩᱱᱠᱳ ᱞᱚᱦᱚᱫ ᱠᱤᱪᱨᱤᱡ ᱟᱛᱮ ᱤᱧ ᱟᱲᱮ ᱛᱮ ᱫᱚ ᱵᱟᱠᱳ ᱛᱟᱲᱟᱢ ᱨᱟᱠᱟᱵ ᱞᱮᱱᱟ᱾ ᱦᱚᱭ ᱵᱷᱟᱨᱰᱳ ᱞᱮᱠᱟ ᱠᱳ ᱩᱰᱟᱹᱣ ᱪᱟᱞᱟᱣ ᱮᱱ ᱞᱮᱠᱟᱧ ᱤᱠᱟᱹᱣ ᱠᱮᱫᱟ᱾
 |
| ᱫᱷᱤᱨᱤᱭᱟᱜ ᱨᱮᱝᱜᱮᱡ-᱓ |
ᱩᱱ ᱚᱠᱛᱮᱧ ᱩᱭᱦᱟᱹᱨ ᱠᱮᱫᱟ, ᱯᱟᱥᱮᱡ ᱠᱟᱹᱢᱤ ᱞᱟᱝᱜᱟ ᱦᱚᱲᱢᱚ ᱠᱟᱨᱚᱢ ᱛᱮ ᱱᱚᱝᱠᱟ ᱫᱚᱧ ᱟᱹᱭᱠᱟᱹᱣ ᱮᱫᱟ᱾ ᱚᱱᱟᱛᱮ ᱧᱤᱱᱫᱟᱹ ᱢᱚᱡᱽ ᱛᱮ ᱡᱚᱢ ᱧᱩ ᱠᱟᱛᱮᱜ ᱤᱧ ᱡᱟᱹᱯᱤᱫ ᱠᱮᱫᱟ᱾
ᱫᱚᱥᱟᱨ ᱦᱤᱞᱟᱹᱜ ᱥᱮᱛᱟᱜ ᱵᱮᱲᱟ, ᱦᱚᱞᱟᱱᱟᱜ ᱠᱟᱛᱷᱟ ᱩᱭᱦᱟᱹᱨ ᱠᱟᱛᱮᱜ ᱞᱟᱱᱫᱟ ᱡᱚᱝ ᱞᱮᱠᱟᱧ ᱤᱠᱟᱹᱣ ᱠᱮᱫᱟ᱾ ᱨᱟᱹᱥᱠᱟᱹ ᱢᱚᱱᱮ ᱛᱮ ᱥᱟᱫᱚᱢ ᱥᱟᱜᱟᱲ ᱨᱮ ᱫᱮᱡ ᱠᱟᱛᱮᱜ ᱤᱧ ᱫᱚ ᱤᱧᱟᱜ ᱛᱚᱫᱚᱱᱛᱚ ᱠᱟᱹᱢᱤᱧ ᱢᱚᱱᱰᱦᱟ ᱮᱱᱟ᱾ ᱯᱮ ᱥᱮᱨᱢᱟ ᱨᱮᱱᱟᱜ ᱨᱤᱯᱳᱨᱴ ᱚᱞ ᱦᱩᱭᱩᱜᱼᱟ᱾ ᱚᱱᱟᱛᱮ ᱨᱩᱣᱟᱹᱲᱚᱜ ᱵᱤᱞᱟᱹᱢᱚᱜᱼᱟᱧ ᱢᱚᱱᱮ ᱟᱠᱟᱫ ᱛᱟᱦᱮᱸ ᱠᱟᱱᱟ᱾ ᱢᱮᱱᱠᱷᱟᱱ ᱧᱩᱦᱩᱢᱮᱱ ᱥᱟᱶ ᱚᱲᱟᱜ ᱥᱮᱡ ᱢᱚᱱ ᱚᱨᱚᱜ ᱠᱟᱱ ᱛᱤᱧᱟᱹ᱾ ᱚᱠᱚᱭ ᱚᱨᱮᱫ ᱛᱤᱧᱟᱹ ᱵᱟᱹᱧ ᱢᱮᱱ ᱫᱟᱲᱮᱭᱟᱜᱼᱟ᱾ ᱢᱮᱱᱠᱷᱟᱱ ᱢᱚᱱᱮ ᱦᱩᱭᱩᱜ ᱠᱟᱱᱟ, ᱟᱨ ᱵᱟᱝ ᱵᱤᱞᱟᱹᱢ ᱦᱩᱭᱩᱜᱼᱟ᱾ ᱢᱚᱱᱮ ᱦᱩᱭᱩᱜ ᱠᱟᱱᱟ ᱡᱚᱛᱚ ᱦᱚᱲ ᱤᱧ ᱠᱳ ᱛᱟᱹᱝᱜᱤ ᱤᱫᱤᱧᱟ᱾ ᱥᱟᱫᱚᱢ ᱥᱟᱜᱟᱲ ᱨᱮ ᱫᱮᱡ ᱠᱟᱛᱮᱜ ᱧᱩᱛ ᱟᱨ ᱱᱤᱥᱩᱱ ᱦᱚᱨ ᱛᱮ ᱤᱧ ᱫᱚ ᱫᱷᱤᱨᱤ ᱫᱟᱞᱟᱱᱤᱧ ᱥᱮᱴᱮᱨ ᱮᱱᱟ᱾
ᱵᱚᱞᱚ ᱜᱚᱫᱚᱜ ᱫᱩᱣᱟᱹᱨ ᱥᱟᱢᱟᱝ ᱨᱮᱱᱟᱜ ᱠᱷᱚᱯ ᱫᱚ ᱢᱟᱨᱟᱝ ᱜᱮᱭᱟ᱾ ᱢᱟᱨᱟᱝ ᱠᱷᱚᱯ ᱠᱷᱟᱹᱛᱤᱨ ᱡᱩᱫᱟᱹᱜᱤ ᱥᱟᱰᱮᱭᱟ᱾ ᱤᱱ ᱦᱤᱞᱟᱹᱜ ᱫᱚ ᱧᱩᱦᱩᱢ ᱵᱟᱹᱛᱤ ᱵᱟᱝ ᱡᱮᱨᱮᱫ ᱟᱠᱟᱱ ᱛᱟᱦᱮ ᱠᱟᱱᱟ᱾ ᱫᱩᱣᱟᱹᱨ ᱴᱷᱮᱞᱟᱣ ᱠᱟᱛᱮᱜ ᱵᱚᱞᱚ ᱛᱚᱨᱟ ᱪᱮᱫ ᱞᱮᱠᱟ ᱪᱚᱧ ᱤᱠᱟᱹᱣ ᱠᱮᱫᱟ- ᱟᱪᱠᱟ ᱜᱤ ᱥᱚᱵᱷᱟ ᱠᱷᱚᱱ ᱡᱚᱛᱚ ᱠᱳ ᱵᱤᱨᱤᱫ ᱮᱱᱟ ᱟᱨ ᱚᱠᱚᱭ ᱚᱠᱟ ᱥᱮᱡ ᱠᱳ ᱫᱟᱲᱮᱜ ᱫᱩᱣᱟᱹᱨ ᱡᱟᱱᱞᱟ ᱛᱮ ᱠᱳ ᱧᱤᱨ ᱩᱰᱩᱝ ᱮᱱᱟ᱾ ᱢᱤᱮᱱᱠᱷᱟᱱ ᱚᱠᱚᱭ ᱦᱚᱸ ᱵᱟᱹᱧ ᱧᱮᱞ ᱧᱟᱢᱮᱫ ᱠᱚᱣᱟ᱾ ᱜᱚᱴᱟ ᱦᱚᱲᱢᱚ ᱨᱩᱵᱽᱨᱩᱵᱩᱭᱮᱱ ᱛᱤᱧᱟᱹ᱾ ᱪᱮᱫ ᱞᱮᱠᱟ ᱪᱚ ᱟᱛᱚᱨ ᱨᱮᱱᱟᱜ ᱥᱚᱧ ᱧᱟᱢ ᱠᱮᱫᱟ᱾ ᱚᱱᱟ ᱧᱩᱛ ᱠᱷᱚᱯ ᱨᱮᱱᱟᱜ ᱛᱟᱞᱟ ᱨᱮ ᱛᱤᱝᱜᱩ ᱠᱟᱛᱮᱜᱼᱤᱧ ᱟᱧᱡᱚᱢ ᱧᱟᱢ ᱮᱫᱟ- ᱡᱷᱚᱨᱱᱟ ᱨᱮᱱᱟᱜ ᱥᱟᱰᱮ, ᱚᱠᱟᱥᱮᱡ ᱪᱚ ᱠᱳ ᱵᱟᱱᱟᱢ ᱮᱫᱟ, ᱚᱠᱟᱥᱮᱡ ᱫᱚ ᱦᱚᱨᱚᱜ ᱵᱟᱱᱫᱮ ᱨᱮᱱᱟᱜ ᱥᱟᱰᱮ, ᱥᱟᱶ ᱛᱮ ᱦᱚᱭ ᱨᱮᱱᱟᱜ ᱥᱟᱰᱮ, ᱵᱤᱨ ᱜᱟᱡᱟᱲ ᱨᱮᱱ ᱪᱮᱬᱮᱭᱟᱜ ᱨᱟᱜ ᱛᱮ ᱞᱮᱠᱟ ᱪᱚ ᱵᱚᱛᱚᱨ ᱜᱤ ᱤᱠᱟᱹᱣ ᱮᱱᱟ᱾
ᱤᱧᱟᱜ ᱢᱚᱱᱮ ᱦᱩᱭ ᱮᱱᱟ ᱱᱚᱣᱟ ᱜᱤ ᱥᱟᱹᱨᱤᱭᱟᱜ ᱠᱟᱱᱟ᱾ ᱚᱠᱟᱧ ᱪᱟᱹᱠᱨᱤ ᱠᱟᱱ, ᱠᱷᱟᱡᱱᱟᱧ ᱨᱟᱠᱟᱵ ᱠᱟᱱ - ᱡᱚᱛᱚ ᱜᱤ ᱮᱲᱮ ᱜᱮᱭᱟ᱾ ᱚᱯᱷᱤᱥ ᱨᱮᱱᱟᱜ ᱠᱟᱛᱷᱟ ᱠᱳ ᱫᱤᱥᱟᱹ ᱠᱟᱛᱮᱜ ᱵᱟᱹᱭ ᱵᱟᱹᱭ ᱛᱮ ᱞᱟᱱᱫᱟ ᱛᱩᱫᱩᱜ ᱠᱟᱱ ᱛᱤᱧᱟᱹ᱾
ᱤᱱ ᱚᱠᱛᱮ ᱜᱤ ᱠᱟᱹᱢᱤᱭᱤᱡ ᱢᱟᱨᱥᱟᱞᱟᱛᱮ ᱚᱲᱟᱜᱼᱮ ᱵᱚᱞᱚ ᱮᱱᱟ᱾ ᱤᱧ ᱧᱮᱞ ᱛᱮ ᱯᱟᱜᱽᱞᱟᱭ ᱢᱚᱱᱮ ᱠᱤᱫᱤᱧᱟ ᱥᱮ ᱪᱮᱫ ᱵᱟᱹᱧ ᱵᱟᱰᱟᱭᱟ᱾ ᱢᱟᱨᱥᱟᱞ ᱧᱮᱞ ᱛᱮ ᱤᱧ ᱫᱚᱧ ᱫᱤᱥᱟᱹ ᱨᱩᱣᱟᱹᱲ ᱠᱮᱫᱟ ᱤᱧ ᱫᱚᱧ ᱚᱠᱚᱭ ᱠᱟᱱᱟ᱾ ᱤᱧᱟᱜ ᱠᱟᱹᱢᱤ ᱫᱚ ᱠᱷᱟᱡᱽᱱᱟ ᱨᱟᱠᱟᱵᱽ᱾ ᱢᱟᱨᱥᱟᱞ ᱨᱮ ᱠᱷᱚᱵᱚᱨ ᱠᱟᱜᱚᱡᱽ ᱯᱟᱲᱦᱟᱣᱤᱧ ᱞᱟᱜᱟᱣ ᱮᱱᱟ᱾ ᱟᱨ ᱢᱤᱫ ᱜᱷᱟᱹᱲᱤ ᱞᱟᱦᱟ ᱨᱮᱱᱟᱜ ᱠᱟᱛᱷᱟ ᱛᱤᱥᱟᱹ ᱠᱟᱛᱮᱜ ᱟᱨᱦᱚᱸ ᱞᱟᱱᱫᱟ ᱛᱩᱫᱼᱮᱱ ᱛᱤᱧᱟᱹ᱾
ᱠᱷᱚᱵᱚᱨ ᱠᱟᱜᱚᱡᱽ ᱯᱟᱲᱦᱟᱣ ᱥᱟᱛ ᱠᱟᱛᱮᱜ, ᱧᱤᱫᱟᱹ ᱨᱮᱱᱟᱜ ᱡᱚᱢ ᱠᱟᱛᱮᱜ, ᱰᱤᱵᱤᱭᱟᱹ ᱟᱸᱲᱤᱡᱽ ᱠᱟᱛᱮᱜ ᱟᱴᱮᱫ ᱨᱮᱧ ᱜᱤᱫᱤᱡ ᱮᱱᱟ᱾ ᱥᱟᱢᱟᱝ ᱨᱮᱱᱟᱜ ᱡᱟᱱᱞᱟ ᱛᱮ ᱵᱟᱨᱦᱮ ᱛᱮᱧ ᱠᱚᱭᱚᱜ ᱟᱠᱟᱫᱟ᱾ ᱵᱤᱨ ᱜᱟᱡᱟᱲ ᱨᱮᱱᱟᱜ ᱫᱟᱨᱮ ᱧᱮᱞᱚᱜ ᱠᱟᱱᱟ᱾ ᱥᱟᱹᱝᱜᱤᱧ ᱧᱚᱜ ᱨᱮ ᱵᱩᱨᱩ ᱧᱮᱞᱚᱜ ᱠᱟᱱᱟ᱾ ᱵᱩᱨᱩ ᱪᱮᱛᱟᱱ ᱨᱮ ᱥᱮᱨᱢᱟ ᱤᱯᱤᱞ ᱠᱳ ᱧᱮᱞᱚᱜ ᱠᱟᱱᱟ᱾ ᱦᱟᱦᱟᱲᱟ ᱢᱚᱱᱮ ᱚᱱᱟ ᱠᱳᱧ ᱧᱮᱞ ᱮᱫᱟ᱾ ᱟᱨ ᱪᱮᱫ ᱠᱳ ᱪᱚᱧ ᱜᱩᱱᱟᱹᱱᱚᱜ ᱠᱟᱱᱟ᱾ ᱜᱩᱱᱟᱹᱱ ᱜᱩᱱᱟᱹᱱ ᱛᱮ ᱛᱤᱱ ᱨᱮ ᱪᱚᱧ ᱡᱟᱹᱯᱤᱫ ᱠᱮᱫᱟ ᱵᱟᱹᱧ ᱫᱤᱥᱟᱹ ᱞᱮᱫᱟ᱾ ᱟᱪᱠᱟ ᱜᱤ ᱡᱟᱹᱯᱤᱫ ᱠᱷᱚᱱᱤᱧ ᱮᱵᱽᱦᱮᱱ ᱮᱱᱟ᱾ ᱡᱟᱱᱞᱟ ᱛᱮ ᱛᱮᱨᱫᱮᱡ ᱢᱟᱨᱥᱟᱞ ᱵᱚᱞᱚ ᱟᱠᱟᱱᱟ᱾ ᱟᱰᱮᱯᱟᱥᱮᱧ ᱠᱚᱭᱚᱜ ᱠᱮᱫᱟ ᱚᱠᱚᱭ ᱦᱚᱸ ᱵᱟᱹᱱᱩᱜ ᱠᱚᱣᱟ᱾ ᱢᱮᱱᱠᱷᱟᱱ ᱢᱚᱱᱮ ᱦᱩᱭᱩᱜ ᱠᱟᱱᱟ ᱚᱠᱚᱭ ᱪᱚᱭ ᱴᱷᱮᱞᱟᱣ ᱤᱫᱤᱧᱟᱹ᱾ ᱤᱧ ᱮᱵᱽᱦᱮᱱ ᱛᱚᱨᱟ ᱠᱟᱛᱷᱟ ᱵᱟᱝ ᱨᱚᱲ ᱠᱟᱛᱮᱜ ᱢᱩᱫᱟᱹᱢ ᱦᱚᱨᱚᱜ ᱢᱚᱲᱮ ᱠᱟᱹᱛᱩᱵ ᱛᱮ ᱤᱧᱮ ᱜᱟᱹᱣᱤᱡ ᱟᱹᱧ ᱠᱟᱱᱟ᱾
ᱤᱧ ᱫᱚ ᱵᱟᱹᱭ ᱵᱟᱹᱭ ᱛᱮᱧ ᱵᱤᱨᱤᱫ ᱮᱱᱟ᱾ ᱵᱟᱰᱟᱭᱟᱹᱧ ᱱᱚᱣᱟ ᱚᱲᱟᱜ ᱨᱮ ᱤᱧ ᱵᱮᱜᱚᱨ ᱚᱠᱚᱭ ᱦᱚᱸ ᱵᱟᱹᱱᱩᱜ ᱠᱚᱣᱟ᱾ ᱮᱱᱨᱮᱦᱚᱸ ᱚᱠᱚᱭ ᱪᱚᱧ ᱯᱟᱧᱡᱟᱭᱫᱤ ᱠᱟᱱ ᱞᱮᱠᱟ ᱜᱚᱴᱟ ᱚᱲᱟᱜ ᱤᱧ ᱛᱟᱲᱟᱢ ᱠᱟᱱ᱾ ᱯᱤᱱᱰᱟᱹᱧ ᱛᱟᱲᱟᱢ ᱠᱟᱱᱟ᱾ ᱵᱚᱛᱚᱨᱤᱧ ᱤᱠᱟᱹᱣ ᱮᱫᱟ᱾ ᱢᱮᱱᱠᱷᱟᱱ ᱚᱠᱟ ᱠᱷᱚᱱ ᱚᱠᱟᱧ ᱪᱟᱞᱟᱜ ᱠᱟᱱᱟ ᱵᱟᱹᱧ ᱞᱟᱹᱭ ᱫᱟᱲᱮᱭᱟᱜᱼᱟ᱾
ᱚᱠᱚᱭᱤᱧ ᱯᱟᱧᱡᱟᱭ ᱫᱤᱭᱟ ᱢᱮᱫ ᱛᱮ ᱵᱟᱹᱧ ᱧᱮᱞ ᱧᱟᱢᱮ ᱠᱟᱱ ᱨᱮᱦᱚᱸ ᱚᱱᱛᱚᱨ ᱛᱮᱧ ᱧᱮᱞ ᱧᱟᱢᱮ ᱠᱟᱱᱟ᱾ ᱤᱨᱟᱱ ᱫᱤᱥᱟᱹᱢ ᱨᱮᱱ ᱮᱥᱮᱞ ᱥᱟᱯᱷᱟ ᱠᱩᱲᱤ᱾ ᱚᱱᱟ ᱫᱤᱥᱟᱹᱢ ᱨᱮᱱᱟᱜ ᱠᱤᱪᱨᱤᱡ ᱛᱮᱭ ᱥᱟᱯᱲᱟᱣ ᱟᱠᱟᱱᱟ᱾ ᱴᱩᱴᱩᱨᱤ ᱟᱠᱟᱱᱟ᱾ ᱡᱤᱞᱤᱧ ᱟᱝᱨᱚᱵ ᱠᱷᱚᱱ ᱮᱥᱮᱞ ᱛᱤ ᱧᱮᱞ ᱧᱟᱢᱚᱜ ᱠᱟᱱ ᱛᱟᱭᱟ᱾ ᱰᱟᱱᱰᱟ ᱨᱮ ᱞᱟᱥᱮᱨ ᱪᱟᱹᱠᱩ ᱛᱚᱞ ᱢᱮᱱᱟᱜ ᱛᱟᱭᱟ᱾ ᱤᱧᱟᱜ ᱢᱚᱱᱮ ᱦᱩᱭ ᱮᱱᱟ, ᱯᱟᱥᱮᱡ ᱤᱨᱟᱱ ᱨᱮᱱᱟᱜ ᱜᱚᱞᱯᱚ ᱠᱟᱹᱦᱟᱹᱱᱤ ᱠᱷᱚᱱᱮ ᱵᱤᱨᱤᱫ ᱦᱮᱡ ᱟᱠᱟᱱᱟᱭ᱾
ᱩᱱᱤ ᱯᱟᱧᱡᱟ ᱯᱟᱧᱡᱟ ᱛᱮ ᱢᱤᱫᱼᱴᱮᱱ ᱫᱩᱣᱟᱹᱨᱤᱧ ᱥᱮᱱ ᱮᱱᱟ᱾ ᱪᱮᱫ ᱦᱚᱸ ᱵᱟᱹᱧ ᱧᱮᱞ ᱧᱟᱢ ᱮᱫᱟ᱾ ᱢᱮᱱᱠᱷᱟᱱ ᱢᱚᱱᱮ ᱦᱩᱭᱩᱜ ᱠᱟᱱᱟ, ᱚᱱᱰᱮ ᱫᱩᱣᱟᱹᱨ ᱨᱮ ᱛᱟᱨᱣᱟᱲᱤ ᱦᱚᱵᱚᱨ ᱠᱟᱛᱮᱜᱼᱮ ᱫᱟᱨᱣᱟᱱᱮ ᱠᱩᱱᱰᱞᱟᱹᱝ ᱟᱠᱟᱱᱟ᱾ ᱤᱧ ᱟᱹᱭᱩᱨᱤᱡᱼᱮ ᱩᱫᱩᱜ ᱟᱹᱫᱤᱧᱟ᱾ ᱟᱨ ᱵᱟᱹᱭ ᱵᱟᱹᱭ ᱛᱮ ᱴᱟᱱᱰᱟ ᱯᱟᱨᱚᱢᱚᱜᱼᱮ ᱢᱮᱛᱟᱫᱤᱧᱟᱹ᱾ ᱫᱩᱣᱟᱹᱨ ᱠᱷᱚᱱ ᱧᱮᱞ ᱧᱟᱢᱚᱜ ᱠᱟᱱᱟ ᱚᱲᱟᱜ ᱛᱟᱞᱟ ᱨᱮ ᱤᱨᱟᱱ ᱨᱮᱱᱟᱜ ᱯᱟᱴᱤᱭᱟᱹ ᱠᱳ ᱟᱴᱮᱫ ᱟᱠᱟᱫᱟ᱾ ᱚᱱᱰᱮ ᱚᱠᱚᱭ ᱪᱚᱭ ᱫᱩᱲᱩᱵ ᱟᱠᱟᱱᱟ᱾ ᱩᱱᱤ ᱟᱲᱮ ᱨᱮ ᱟᱭᱢᱟ ᱞᱮᱠᱟᱱ ᱡᱚᱢᱟᱜ ᱠᱳ ᱥᱟᱡᱟᱣ ᱟᱠᱟᱫᱟ᱾ ᱫᱩᱯ ᱟᱛᱚᱨ ᱨᱮᱱᱟᱜ ᱥᱚ ᱧᱟᱢᱚᱜ ᱠᱟᱱᱟ᱾ ᱢᱚᱱᱮ ᱦᱩᱭᱩᱜ ᱠᱟᱱᱟ ᱤᱧ ᱛᱟᱹᱝᱜᱤ ᱨᱮ ᱢᱮᱱᱟᱜ ᱠᱚᱣᱟ᱾ ᱚᱱᱟ ᱠᱷᱚᱯ ᱵᱚᱞᱚᱜ ᱞᱟᱹᱜᱤᱫ ᱛᱮ ᱫᱟᱨᱣᱟᱱᱟᱜ ᱡᱟᱝᱜᱟᱧ ᱴᱟᱱᱰᱟ ᱯᱟᱨᱚᱢᱮᱫ ᱠᱟᱱ ᱛᱟᱦᱮᱸ ᱠᱟᱱᱟ᱾ ᱫᱟᱨᱣᱟᱱ ᱱᱟᱥᱮᱧ ᱡᱚᱥ ᱠᱤᱫᱤᱭᱟ᱾ ᱤᱧ ᱧᱮᱞ ᱛᱮ ᱨᱟᱝᱜᱟᱣ ᱛᱮᱭ ᱧᱤᱨ ᱵᱤᱨᱤᱫ ᱮᱱᱟ᱾ ᱦᱚᱵᱚᱨ ᱨᱮᱱᱟᱜ ᱛᱟᱨᱣᱟᱲᱤ ᱥᱟᱰᱮ ᱟᱛᱮ ᱧᱩᱨᱮᱱ ᱛᱟᱭᱟ᱾
ᱟᱪᱠᱟ ᱜᱤ ᱠᱟᱹᱠᱤᱧᱟᱹᱣ ᱟᱧᱡᱚᱢ ᱛᱮᱧ ᱪᱚᱢᱠᱟᱣ ᱮᱱᱟ᱾ ᱜᱚᱴᱟ ᱦᱚᱲᱢᱚ ᱩᱫᱽᱜᱟᱹᱨ ᱛᱮ ᱞᱚᱦᱚᱫ ᱟᱠᱟᱱ ᱛᱤᱧᱟᱹ᱾ ᱧᱮᱞ ᱠᱤᱫᱟᱹᱧ ᱤᱧᱟᱜ ᱟᱴᱮᱫ ᱨᱮ ᱜᱤᱧ ᱫᱩᱲᱩᱵ ᱟᱠᱟᱱᱟ᱾ ᱟᱝᱜᱟ ᱦᱟᱹᱡᱩᱜ ᱠᱟᱱᱟ᱾ ᱵᱟᱨᱦᱮ ᱨᱮ ᱡᱟᱣ ᱫᱤᱱ ᱞᱮᱠᱟ ᱢᱮᱦᱮᱨ ᱯᱟᱜᱽᱞᱟ ᱠᱟᱹᱣᱢᱟᱹᱣ ᱤᱫᱤ ᱮᱫᱟᱭ, “ᱥᱟᱹᱝᱜᱤᱧ ᱨᱮ ᱛᱟᱦᱮᱱ ᱢᱮ” “ᱥᱟᱹᱝᱜᱤᱧ ᱨᱮ ᱛᱟᱦᱮᱱ ᱢᱮ”᱾
ᱱᱚᱝᱠᱟ ᱛᱮ ᱢᱤᱫ ᱧᱤᱱᱫᱟᱹ ᱟᱯᱟᱨᱚᱢ ᱮᱱ ᱛᱤᱧᱟᱹ- ᱢᱮᱱᱠᱷᱟᱱ ᱥᱟᱢᱟᱝ ᱨᱮ ᱟᱨᱦᱚᱸ ᱧᱤᱫᱟᱹ ᱢᱮᱱᱟᱜᱼᱟ᱾
ᱤᱧᱟᱜ ᱥᱤᱧ ᱟᱨ ᱧᱤᱫᱟᱹ ᱨᱮ ᱯᱷᱟᱨᱟᱠ ᱛᱮᱭᱟᱨᱚᱜ ᱮᱦᱚᱵ ᱮᱱᱟ᱾ ᱥᱤᱧ ᱵᱮᱲᱟ ᱠᱟᱹᱢᱤ ᱛᱟᱞᱟ ᱨᱮ ᱧᱤᱫᱟᱹ ᱨᱮᱱᱟᱜ ᱠᱟᱛᱷᱟ ᱠᱳᱧ ᱩᱭᱦᱟᱹᱨ ᱞᱮᱠᱷᱟᱱ ᱵᱟᱹᱧ ᱠᱩᱥᱤᱭᱟᱜᱼᱟ᱾ ᱟᱨ ᱧᱩᱦᱩᱢ ᱞᱮᱱ ᱠᱷᱟᱱ ᱥᱤᱧ ᱵᱮᱲᱟ ᱨᱮᱱᱟᱜ ᱠᱟᱹᱢᱤ ᱠᱳ ᱵᱟᱹᱧ ᱠᱩᱥᱤᱭᱟᱜᱼᱟ᱾ ᱧᱩᱦᱩᱢ ᱵᱮᱲᱟ ᱢᱚᱱᱮ ᱦᱩᱭᱩᱜᱼᱟ ᱤᱝᱨᱮᱡᱽ ᱥᱟᱯᱟᱵ ᱛᱮ ᱫᱚ ᱵᱟᱹᱧ ᱢᱟᱱᱟᱣᱚᱜ ᱠᱟᱱᱟ᱾ ᱚᱱᱟᱛᱮ ᱤᱝᱨᱮᱡᱽ ᱥᱟᱯᱟᱵ ᱵᱷᱩᱸᱲᱩᱡ ᱠᱟᱛᱮᱜ ᱥᱟᱭ ᱥᱮᱨᱢᱟ ᱢᱟᱨᱮ ᱤᱨᱟᱱᱤ ᱥᱟᱯᱟᱵ ᱛᱮᱧ ᱥᱟᱯᱲᱟᱜ ᱠᱟᱱ ᱛᱟᱦᱮᱸ ᱠᱟᱱᱟ᱾ ᱤᱨᱟᱱᱤ ᱞᱮᱠᱟ ᱴᱩᱯᱨᱤᱧ ᱦᱚᱨᱚᱜᱼᱮᱫ ᱠᱟᱱ ᱛᱟᱦᱮᱸ ᱠᱟᱱᱟ, ᱡᱤᱞᱤᱧ ᱟᱝᱨᱚᱵ ᱤᱧ ᱦᱚᱨᱚᱜᱼᱮᱫ ᱠᱟᱱ ᱛᱟᱦᱮᱸ ᱠᱟᱱᱟ᱾ ᱚᱱᱟ ᱛᱟᱭᱚᱢ ᱤᱧ ᱥᱟᱶ ᱯᱟᱹᱛᱤᱭᱟᱹᱜ ᱵᱟᱝ ᱯᱟᱹᱛᱤᱭᱟᱹᱜ ᱞᱮᱠᱟᱱ ᱟᱭᱢᱟ ᱜᱷᱚᱴᱚᱱᱟ ᱦᱩᱭᱩᱜ ᱠᱟᱱ ᱛᱟᱦᱮᱸ ᱠᱟᱱᱟ᱾
ᱠᱩᱠᱢᱩ ᱞᱮᱠᱟᱱ ᱚᱱᱟ ᱚᱠᱛᱮ ᱵᱟᱦᱟ ᱨᱮᱱᱟᱜ ᱥᱚᱧ ᱧᱟᱢᱟ, ᱥᱤᱨᱤᱧᱤᱧ ᱟᱧᱡᱚᱢ ᱧᱟᱢᱟ, ᱚᱠᱟ ᱫᱚ ᱩᱱᱤ ᱠᱩᱲᱤᱭᱟᱜ ᱡᱷᱟᱞᱟᱠᱤᱧ ᱧᱮᱞ ᱧᱟᱢᱟ᱾ ᱩᱱᱤᱭᱟᱜ ᱦᱚᱨᱚᱜ ᱵᱟᱱᱫᱮ, ᱟᱧᱪᱟᱨ, ᱥᱟᱯᱲᱟᱣ ᱛᱤ ᱡᱟᱝᱜᱟᱧ ᱧᱮᱞ ᱧᱟᱢᱟ᱾ ᱩᱱᱤ ᱤᱧᱟᱮ ᱯᱟᱜᱽᱞᱟ ᱠᱤᱫᱤᱧ ᱞᱮᱠᱟ᱾ ᱩᱱᱤ ᱥᱟᱶ ᱧᱟᱯᱟᱢ ᱞᱟᱹᱜᱤᱫ ᱚᱲᱟᱜ ᱠᱷᱚᱯ ᱠᱷᱚᱯ ᱛᱮᱧ ᱥᱮᱱᱫᱽᱨᱟ ᱵᱟᱲᱟᱭᱤᱭᱟ᱾
ᱢᱤᱢᱤᱫ ᱧᱤᱫᱟᱹ ᱯᱟᱥᱮᱡ ᱰᱤᱵᱤᱭᱟᱹ ᱢᱟᱨᱥᱟᱞ ᱛᱮ ᱟᱹᱨᱥᱤ ᱥᱟᱢᱟᱝ ᱨᱮ ᱛᱤᱝᱜᱩ ᱠᱟᱛᱮᱜ ᱤᱧ ᱥᱟᱯᱲᱟᱜ ᱠᱟᱱ, ᱟᱪᱠᱟ ᱜᱤᱧ ᱧᱮᱞᱮᱭᱟ ᱩᱱᱤ ᱠᱩᱲᱤ ᱟᱹᱨᱥᱤ ᱨᱮ ᱤᱧ ᱛᱟᱭᱚᱢ ᱨᱮᱭ ᱛᱤᱝᱜᱩ ᱟᱠᱟᱱᱟ᱾ ᱛᱟᱭᱚᱢ ᱥᱮᱡ ᱠᱚᱭᱚᱜ ᱠᱟᱛᱮᱜ ᱤᱧ ᱧᱮᱞᱮᱭᱟ ᱵᱟᱹᱱᱩᱭᱟ᱾ ᱰᱤᱵᱤᱭᱟᱹ ᱵᱟᱹᱛᱤ ᱟᱺᱲᱤᱡ ᱠᱟᱛᱮᱜ ᱚᱠᱟᱛᱮ ᱪᱚᱭ ᱟᱝᱜᱮᱱ ᱮᱱᱟ᱾ ᱤᱧ ᱫᱚ ᱧᱩᱛ ᱚᱲᱟᱜ ᱨᱮ ᱩᱱᱤᱧ ᱥᱮᱱᱫᱽᱨᱟ ᱵᱟᱲᱟᱭᱤᱭᱟ᱾ ᱢᱚᱱᱮ ᱦᱩᱭᱩᱜᱼᱟ ᱩᱱᱤᱭᱟᱜ ᱠᱤᱪᱨᱤᱡ ᱟᱧᱪᱟᱨ ᱛᱮᱭ ᱡᱚᱴᱮᱫ ᱤᱫᱤᱧᱟ᱾ ᱞᱩᱛᱩᱨ ᱨᱮ ᱥᱟᱦᱮᱫ ᱟᱛᱮ ᱪᱮᱫ ᱪᱚᱭ ᱢᱤᱛᱟᱹᱲ ᱠᱟᱱᱟ᱾ ᱪᱮᱠᱟ ᱪᱚ ᱵᱩᱞ ᱪᱟᱵᱟᱭᱮ ᱞᱮᱠᱟᱧ ᱤᱠᱟᱹᱣᱟ᱾
ᱢᱤᱫ ᱫᱤᱱ ᱛᱟᱨᱟᱥᱤᱧ ᱚᱠᱛᱮ ᱥᱟᱫᱚᱢ ᱨᱮ ᱫᱮᱡ ᱠᱟᱛᱮᱜ ᱵᱟᱨᱦᱮ ᱫᱟᱲᱟᱱ ᱨᱮᱱᱟᱜ ᱤᱧ ᱜᱚᱴᱟ ᱠᱮᱫᱟ - ᱢᱮᱱᱠᱷᱟᱱ ᱚᱠᱚᱭ ᱪᱚᱭ ᱢᱟᱱᱟ ᱠᱤᱫᱤᱧᱟ ᱵᱟᱹᱧ ᱵᱟᱰᱟᱭᱟ - ᱩᱱ ᱦᱤᱞᱟᱹᱜ ᱫᱚ ᱢᱟᱱᱟ ᱵᱟᱹᱧ ᱟᱧᱡᱚᱢ ᱞᱮᱫᱟ᱾ ᱵᱟᱨᱦᱮ ᱨᱮ ᱴᱩᱯᱨᱤ ᱛᱟᱦᱮ ᱛᱟᱦᱮᱸ ᱠᱟᱱ ᱛᱤᱧᱟᱹ᱾ ᱚᱱᱟ ᱦᱚᱨᱚᱜ ᱠᱟᱛᱮᱜ ᱵᱟᱨᱦᱮᱧ ᱪᱟᱞᱟᱜᱼᱟ᱾ ᱩᱱ ᱚᱠᱛᱮ ᱚᱠᱟ ᱠᱷᱚᱱ ᱪᱚ ᱜᱟᱰᱟ ᱜᱤᱛᱤᱞ ᱚᱴᱟᱝ ᱠᱟᱛᱮᱜ ᱦᱚᱭ ᱵᱷᱟᱨᱰᱩ ᱦᱮᱡ ᱮᱱᱟ᱾ ᱤᱧᱟᱜ ᱴᱩᱯᱨᱤᱭ ᱚᱴᱟᱝ ᱤᱫᱤ ᱠᱮᱫᱟ᱾ ᱟᱟᱨ ᱠᱩᱲᱤᱭᱟᱜ ᱞᱟᱱᱫᱟ ᱞᱮᱠᱟᱧ ᱟᱧᱡᱚᱢ ᱠᱮᱫᱟ᱾ ᱵᱟᱹᱭ ᱵᱟᱹᱭ ᱛ ᱚᱱᱟ ᱞᱟᱱᱫᱟ ᱦᱚᱭ ᱥᱟᱶ ᱛᱮ ᱪᱟᱞᱟᱣ ᱟᱫ ᱮᱱᱟ᱾
 |
| ᱫᱷᱤᱨᱤᱭᱟᱜ ᱨᱮᱝᱜᱮᱡ-᱔ |
ᱤᱱ ᱦᱤᱞᱟᱹᱜ ᱰᱚ ᱥᱟᱫᱚᱢ ᱨᱮ ᱫᱮᱡᱚᱜ ᱵᱟᱝ ᱦᱩᱭ ᱞᱮᱱ ᱛᱤᱧᱟᱹ᱾ ᱴᱩᱯᱨᱤ ᱦᱚᱨᱚᱜ ᱦᱚᱧ ᱵᱟᱹᱜᱤ ᱠᱮᱫᱟ᱾
ᱟᱵᱟᱨ ᱤᱱ ᱦᱤᱞᱟᱹᱜ ᱛᱟᱞᱟ ᱧᱤᱱᱫᱟᱹ ᱡᱟᱹᱯᱤᱫ ᱮᱵᱦᱮᱱ ᱠᱟᱛᱮᱜ ᱤᱧ ᱟᱧᱡᱚᱢ ᱮᱫᱟ ᱚᱠᱚᱭ ᱪᱚᱭ ᱨᱟᱨᱟᱜ ᱠᱟᱱᱟ - ᱤᱧᱟᱜ ᱪᱟᱹᱣᱠᱤ ᱞᱟᱛᱟᱨ ᱨᱮ, ᱚᱛ ᱞᱟᱛᱟᱨ ᱨᱮ, ᱚᱱᱟ ᱚᱲᱟᱜ ᱨᱮᱱᱟᱜ ᱫᱷᱤᱨᱤ ᱞᱟᱛᱟᱨ ᱨᱮ᱾ ᱟᱨᱮ ᱢᱤᱛᱟᱹᱧ ᱠᱟᱱᱟ, ᱱᱚᱱᱰᱮ ᱠᱷᱚᱱ ᱤᱫᱤᱭᱤᱧ ᱢᱮ᱾ ᱚᱛ ᱞᱟᱛᱟᱨ ᱠᱷᱚᱱ ᱨᱟᱠᱟᱵ ᱠᱟᱛᱮᱜ ᱟᱢ ᱥᱟᱶ ᱢᱟᱨᱥᱟᱞ ᱨᱮ ᱤᱫᱤᱭᱤᱧ ᱢᱮ᱾
ᱤᱧ ᱫᱚ ᱚᱠᱚᱭ! ᱤᱧ ᱫᱚ ᱪᱮᱠᱟᱛᱮ ᱟᱢᱤᱧ ᱵᱟᱧᱪᱟᱣ ᱢᱮᱭᱟ᱾ ᱪᱮᱠᱟᱛᱮᱧ ᱟᱹᱜᱩ ᱢᱮᱭᱟ᱾ ᱚᱠᱚᱭ ᱪᱚ ᱟᱢ ᱱᱚᱱᱰᱮᱭ ᱟᱹᱜᱩ ᱞᱮᱫ ᱢᱮ᱾ ᱯᱟᱥᱮᱡ ᱡᱳᱨ ᱠᱟᱛᱮᱜ ᱴᱟᱠᱟ ᱛᱮ ᱠᱳ ᱠᱤᱨᱤᱧ ᱟᱹᱜᱩ ᱞᱮᱫ ᱢᱮᱭᱟ᱾ ᱫᱟᱥᱤ ᱠᱳ ᱵᱟᱱᱟᱣ ᱞᱮᱫ ᱢᱮᱭᱟ᱾ ᱠᱚᱪᱞᱚᱱ ᱛᱮ ᱠᱳ ᱜᱚᱡ ᱞᱮᱫ ᱢᱮᱭᱟ᱾ ᱵᱟᱝ ᱫᱚ ᱟᱢ ᱛᱮᱢ ᱜᱚᱡ ᱮᱱ᱾
ᱩᱱ ᱚᱠᱛᱮ ᱵᱟᱨᱦᱮ ᱨᱮ ᱟᱪᱠᱟ ᱜᱤ ᱩᱱᱤ ᱢᱮᱦᱮᱨ ᱯᱟᱜᱽᱞᱟᱭ ᱠᱟᱹᱣᱢᱟᱹᱣ ᱟᱹᱜᱩ ᱠᱮᱫᱟ, “ᱥᱟᱹᱝᱜᱤᱧ ᱨᱮ ᱛᱟᱦᱮᱱ ᱢᱮ, ᱥᱟᱹᱝᱜᱤᱧ ᱨᱮ ᱛᱟᱦᱮᱱ ᱢᱮ᱾ ᱡᱚᱛᱚ ᱮᱲᱮ ᱜᱮᱭᱟ᱾” ᱠᱚᱭᱚᱜ ᱠᱤᱫᱟᱹᱧ ᱥᱮᱛᱟᱜ ᱟᱠᱟᱱᱟ᱾ ᱯᱤᱭᱳᱱ ᱦᱮᱡ ᱠᱟᱛᱮᱜ ᱪᱤᱴᱷᱤᱭ ᱮᱢᱟᱫᱤᱧᱟᱹ᱾ ᱫᱟᱠᱟᱭᱤᱡ ᱦᱮᱡ ᱠᱟᱛᱮᱜᱼᱮ ᱠᱩᱞᱤ ᱠᱤᱫᱤᱧᱟᱹ, ᱛᱤᱦᱤᱧ ᱫᱚ ᱪᱮᱫ ᱠᱳ ᱫᱟᱠᱟ ᱩᱛᱩ ᱦᱩᱭᱩᱜᱼᱟ᱾
ᱤᱧ ᱢᱮᱱ ᱠᱮᱫᱟ, ᱵᱟᱝ, ᱱᱚᱱᱰᱮ ᱫᱚ ᱟᱨ ᱵᱟᱝ ᱛᱟᱦᱮᱱ ᱦᱩᱭᱩᱜᱼᱟ᱾ ᱤᱧᱟᱜ ᱡᱤᱱᱤᱥ ᱟᱛᱮ ᱮᱴᱟᱜ ᱚᱯᱷᱤᱥ ᱨᱮ ᱜᱤᱛᱤᱡ ᱨᱮᱱᱟᱜ ᱤᱧ ᱵᱮᱵᱚᱥᱛᱷᱟ ᱠᱮᱫᱟ᱾ ᱚᱯᱷᱤᱥ ᱨᱮᱱ ᱦᱟᱲᱟᱢ ᱠᱮᱨᱟᱱᱤ ᱫᱚ ᱤᱧ ᱧᱮᱞ ᱛᱮᱭ ᱞᱟᱱᱫᱟ ᱠᱮᱫᱟ᱾ ᱤᱧ ᱫᱚ ᱨᱟᱝᱜᱟᱣ ᱛᱮ ᱪᱮᱫ ᱦᱚᱸ ᱵᱟᱹᱧ ᱢᱮᱛᱟᱫᱤᱭᱟ᱾
ᱧᱩᱦᱩᱢ ᱥᱮᱴᱮᱨᱚᱜ ᱛᱤᱜᱤ ᱢᱚᱱᱮ ᱦᱩᱭᱩᱜ ᱞᱟᱜᱟᱣ ᱮᱱᱟ - ᱚᱠᱟ ᱛᱮ ᱪᱚ ᱪᱟᱞᱟᱜ ᱦᱩᱭᱩᱜ ᱛᱤᱧᱟ᱾ ᱱᱚᱣᱟ ᱪᱟᱠᱨᱤ, ᱱᱚᱣᱟ ᱠᱷᱟᱡᱽᱱᱟ ᱨᱟᱠᱟᱵ ᱠᱟᱹᱢᱤ - ᱡᱚᱛᱚ ᱮᱲᱮ ᱜᱮᱭᱟ ᱢᱚᱱᱮ ᱦᱩᱭᱩᱜ ᱠᱟᱱᱟ᱾ ᱧᱩᱦᱩᱢ ᱥᱟᱶ, ᱠᱷᱟᱛᱟ ᱠᱚᱞᱚᱢ ᱵᱟᱹᱜᱤ ᱠᱟᱛᱮᱜ, ᱥᱟᱫᱚᱢ ᱥᱟᱜᱟᱲ ᱨᱮᱧ ᱫᱮᱡ ᱮᱱᱟ᱾ ᱧᱮᱞ ᱠᱤᱫᱟᱹᱧ ᱥᱟᱫᱚᱢ ᱥᱟᱜᱟᱲ ᱛᱮ ᱚᱱᱟ ᱫᱷᱤᱨᱤ ᱫᱟᱞᱟᱱᱤᱧ ᱥᱮᱴᱮᱨ ᱟᱠᱟᱱᱟ᱾ ᱩᱥᱟᱹᱨᱟ ᱯᱷᱮᱰ ᱠᱟᱛᱮᱜ ᱚᱱᱟ ᱚᱲᱟᱜ ᱛᱮᱧ ᱵᱚᱞᱚ ᱮᱱᱟ᱾
ᱛᱤᱦᱤᱧ ᱫᱚ ᱟᱨᱦᱚᱸ ᱱᱤᱥᱩᱱ ᱤᱠᱟᱹᱜ ᱠᱟᱱᱟ᱾ ᱯᱟᱥᱮᱡ ᱱᱚᱣᱟ ᱚᱲᱟᱜᱼᱮ ᱩᱥᱟᱹᱫ ᱟᱠᱟᱱᱟ᱾ ᱤᱧ ᱦᱚᱸ ᱫᱩᱠᱷᱤᱧ ᱤᱠᱟᱹᱣ ᱠᱮᱫᱟ᱾ ᱢᱚᱱᱮ ᱦᱩᱭᱩᱜ ᱠᱟᱱᱟ ᱤᱠᱟᱹᱧ ᱠᱷᱚᱡᱚᱜᱼᱟ - ᱢᱮᱱᱠᱷᱟᱱ ᱚᱠᱚᱭ ᱴᱷᱮᱱ ᱤᱠᱟᱹᱧ ᱠᱷᱚᱡᱚᱜᱼᱟ᱾ ᱦᱟᱱᱟ ᱚᱲᱟᱜ ᱱᱷᱟᱣᱟ ᱚᱲᱟᱜ ᱤᱧ ᱫᱟᱲᱟ ᱠᱮᱫᱟ᱾ ᱚᱠᱚᱭ ᱜᱤ ᱵᱟᱹᱱᱩᱜ ᱠᱚᱣᱟ᱾ ᱡᱟᱦᱟᱱᱟᱜ ᱨᱩᱣᱟᱜ ᱥᱟᱶ ᱥᱤᱨᱤᱧ ᱥᱟᱱᱟ ᱠᱤᱫᱤᱧᱟ, “ᱤᱠᱟᱹ ᱠᱟᱹᱧ ᱢᱮ ᱡᱩᱨᱤᱹᱹᱹᱹᱹᱹᱹᱹᱹᱹᱹᱹᱹᱹᱹᱹᱹᱹᱹᱹᱹᱹ”
ᱟᱪᱠᱟ ᱜᱤ ᱪᱮᱛᱟᱱ ᱠᱷᱚᱱ ᱢᱮᱫ ᱫᱟᱜ ᱞᱮᱠᱟ ᱫᱟᱜ ᱧᱩᱨ ᱟᱹᱫᱤᱧᱟ ᱪᱟᱱᱫᱤᱨᱮ᱾ ᱤᱱ ᱦᱤᱞᱟᱹᱜ ᱫᱚ ᱵᱩᱨᱩ ᱪᱮᱛᱟᱱ ᱨᱮ ᱥᱮᱨᱢᱟ ᱨᱤᱢᱤᱞ ᱢᱟᱱᱰᱨᱟᱜ ᱠᱟᱱᱟ᱾ ᱦᱩᱰᱩᱨ ᱵᱤᱡᱽᱞᱤ ᱟᱨ ᱦᱚᱭ ᱟᱛᱮ ᱫᱟᱜ ᱦᱟᱹᱡᱩᱜ ᱞᱟᱜᱟᱣ ᱮᱱᱟ᱾ ᱢᱚᱱᱮ ᱦᱩᱭᱜ ᱠᱟᱱᱟ ᱫᱟᱞᱟᱱ ᱚᱲᱟᱜ ᱨᱮᱱᱟᱜ ᱠᱷᱚᱯ ᱠᱚ ᱨᱟᱨᱟᱜ ᱠᱟᱱᱟ᱾
ᱛᱤᱦᱤᱧ ᱠᱟᱹᱢᱤ ᱠᱳ ᱫᱚ ᱡᱚᱛᱚ ᱦᱟᱱᱟ ᱚᱯᱷᱤᱥ ᱚᱲᱟᱜ ᱨᱮ ᱢᱮᱱᱟᱜ ᱠᱚᱣᱟ᱾ ᱱᱚᱱᱰᱮ ᱢᱟᱨᱥᱟᱞ ᱡᱮᱨᱮᱫ ᱨᱮᱱ ᱚᱠᱚᱭ ᱦᱚᱸ ᱵᱟᱹᱱᱩᱜ ᱠᱚᱣᱟ᱾ ᱨᱤᱢᱤᱞ ᱛᱮ ᱮᱥᱮᱫ ᱚᱱᱟ ᱟᱢᱟᱵᱟᱹᱥᱤᱭᱟᱹ ᱧᱤᱱᱫᱟ ᱠᱟᱹᱲᱩᱝᱠᱟᱹᱪᱩᱝ ᱧᱩᱛ ᱨᱮ ᱤᱠᱟᱹᱣ ᱤᱫᱟᱹᱧ - ᱢᱤᱫᱼᱴᱮᱱ ᱠᱩᱲᱤ ᱡᱷᱤᱞᱟᱹᱣᱟᱜ ᱞᱟᱛᱟᱨ ᱨᱮ ᱟᱴᱮᱫ ᱨᱮ ᱜᱤᱛᱤᱡ ᱠᱟᱛᱮᱜ ᱟᱭᱟᱜ ᱵᱚᱦᱚᱜ ᱩᱵᱼᱮ ᱨᱟᱪᱟᱜ ᱛᱚᱯᱟᱜᱼᱮᱫ ᱛᱟᱭᱟ᱾ ᱮᱥᱮᱞ ᱪᱟᱹᱱᱫᱤ ᱠᱷᱚᱱ ᱢᱟᱭᱟᱢ ᱡᱚᱨᱚᱜ ᱠᱟᱱ ᱛᱟᱭᱟ᱾ ᱜᱷᱟᱱᱮᱭ ᱨᱟᱜ ᱮᱫᱟ᱾ ᱜᱷᱟᱱᱮᱭ ᱞᱟᱱᱫᱟ ᱮᱫᱟ᱾ ᱟᱨ ᱵᱟᱱᱟᱨ ᱛᱤ ᱛᱮ ᱠᱚᱲᱟᱢᱮ ᱫᱟᱞᱮᱫ ᱛᱟᱭᱟ᱾ ᱡᱟᱱᱞᱟ ᱛᱮ ᱥᱟᱰᱮ ᱟᱛᱮ ᱦᱚᱭ ᱦᱟᱹᱡᱩᱜ ᱠᱟᱱᱟ᱾ ᱡᱷᱟᱴᱟᱥ ᱫᱟᱜ ᱛᱮ ᱦᱚᱲᱢᱚ ᱞᱚᱦᱚᱫᱚᱜ ᱠᱟᱱ ᱛᱟᱭᱟ᱾
 |
| ᱫᱷᱤᱨᱤᱭᱟᱜ ᱨᱮᱝᱜᱮᱡ-᱕ |
ᱥᱟᱨᱟ ᱧᱤᱫᱟᱹ ᱦᱚᱭ ᱫᱟᱜ ᱦᱚᱸ ᱵᱟᱝ ᱛᱷᱤᱨᱩᱜ ᱠᱟᱱᱟ, ᱨᱟᱜ ᱦᱚᱸ ᱵᱟᱝ ᱛᱷᱤᱨᱩᱜ ᱠᱟᱱ᱾ ᱜᱚᱴᱟ ᱚᱲᱟᱜ ᱤᱧ ᱥᱮᱱᱫᱽᱨᱟ ᱵᱟᱲᱟᱭᱤᱫᱤᱭᱟ ᱨᱟᱜ ᱛᱷᱤᱨ ᱞᱟᱹᱜᱤ, ᱩᱥᱟᱹᱫ ᱛᱷᱤᱨ ᱞᱟᱹᱜᱤᱫ᱾ ᱢᱮᱱᱠᱷᱟᱱ ᱚᱠᱟᱨᱮᱧ ᱧᱟᱢᱮᱭᱟ᱾ ᱚᱠᱟᱨᱮ ᱦᱚᱸ ᱵᱟᱭ ᱧᱮᱞ ᱧᱟᱢᱚᱜ ᱠᱟᱱᱟ᱾
ᱯᱟᱜᱽᱞᱟ ᱠᱟᱹᱣᱢᱟᱹᱣᱮ ᱦᱚᱦᱚ ᱠᱮᱫᱟ, “ᱥᱟᱹᱝᱜᱤᱧ ᱨᱮ ᱛᱟᱦᱮᱱ ᱢᱮ, ᱥᱟᱹᱝᱜᱤᱧ ᱨᱮ ᱛᱟᱦᱮᱱ ᱢᱮ᱾ ᱡᱚᱛᱚ ᱮᱲᱮ ᱜᱮᱭᱟ᱾”
ᱧᱮᱞ ᱠᱤᱫᱟᱹᱧ ᱟᱝᱜᱟᱭᱮᱱᱟ᱾ ᱢᱮᱦᱮᱨ ᱯᱟᱜᱽᱞᱟ ᱫᱚ ᱦᱚᱭ ᱫᱟᱜ ᱛᱟᱞᱟ ᱨᱮᱦᱚᱸ ᱡᱟᱣ ᱫᱤᱱ ᱞᱮᱠᱟ ᱜᱤ ᱚᱱᱟ ᱫᱟᱞᱟᱱ ᱵᱮᱲᱦᱟᱭ ᱛᱮ ᱩᱪᱩᱨ ᱠᱟᱛᱮᱜᱼᱮ ᱠᱟᱹᱣᱢᱟᱹᱣ ᱮᱫᱟ᱾ ᱟᱪᱠᱟ ᱜᱤ ᱢᱚᱱᱮ ᱦᱤᱭᱮᱱ ᱛᱤᱧᱟᱹ, ᱯᱟᱥᱮᱡ ᱩᱱᱤ ᱢᱮᱦᱮᱨ ᱯᱟᱜᱽᱞᱟ ᱦᱚᱸ ᱤᱧ ᱞᱮᱠᱟ ᱱᱚᱣᱟ ᱫᱟᱞᱟᱱ ᱚᱲᱟᱜ ᱨᱮᱭ ᱛᱟᱦᱮᱸ ᱠᱟᱱᱟ᱾ ᱱᱮᱛᱚᱜ ᱯᱟᱜᱽᱞᱟ ᱠᱟᱛᱮᱜ ᱵᱟᱨᱦᱮᱭ ᱪᱟᱞᱟᱣ ᱟᱠᱟᱱ ᱨᱮᱦᱚᱸ ᱱᱚᱣᱟ ᱫᱟᱞᱟᱱ ᱚᱲᱟᱜ ᱨᱮᱱᱟᱜ ᱵᱩᱞ ᱛᱮ ᱵᱮᱲᱦᱟᱭ ᱛᱮᱭ ᱟᱹᱪᱩᱨ ᱠᱟᱱᱟ᱾
ᱤᱧ ᱫᱚ ᱫᱟᱜ ᱦᱚᱸ ᱫᱟᱜ ᱩᱱᱤ ᱯᱟᱜᱽᱞᱟ ᱴᱷᱮᱱᱤᱧ ᱫᱟᱹᱲ ᱤᱫᱤ ᱠᱮᱫᱟ᱾ ᱠᱩᱞᱤ ᱠᱤᱫᱤᱭᱟᱹᱧ, “ᱢᱮᱦᱮᱨ, ᱪᱮᱫ ᱮᱲᱮ ᱜᱮᱭᱟ?”
ᱩᱱᱤ ᱫᱚ ᱤᱧᱟᱜ ᱠᱟᱛᱷᱟ ᱵᱟᱝ ᱞᱩᱛᱩᱜ ᱠᱟᱛᱮᱜ ᱤᱧ ᱴᱷᱮᱞᱟᱣ ᱚᱪᱚᱜ ᱠᱟᱛᱜᱮ ᱫᱟᱞᱟᱱ ᱚᱲᱟᱜ ᱵᱮᱲᱦᱟᱭ ᱟᱹᱪᱩᱨᱚᱜ ᱛᱮ ᱜᱤᱭ ᱛᱟᱦᱮᱸ ᱮᱱᱟ᱾ ᱟᱨ ᱜᱷᱟᱱᱮ ᱜᱷᱟᱱᱮ ᱠᱟᱹᱣᱢᱟᱹᱣ ᱠᱟᱛᱮᱜ ᱮ ᱨᱚᱲ ᱮᱫᱟ, “ᱥᱟᱹᱝᱜᱤᱧ ᱨᱮ ᱛᱟᱦᱮᱱ ᱢᱮ, ᱥᱟᱹᱝᱜᱤᱧ ᱨᱮ ᱛᱟᱦᱮᱱ ᱢᱮ᱾ ᱡᱚᱛᱚ ᱮᱲᱮ ᱜᱮᱭᱟ᱾”
ᱤᱧ ᱫᱚ ᱦᱚᱭ ᱫᱟᱜ ᱛᱟᱞᱟ ᱛᱮ ᱯᱟᱜᱽᱞᱟ ᱞᱮᱠᱟ ᱚᱯᱷᱤᱥ ᱨᱮ ᱥᱮᱱ ᱠᱟᱛᱮᱜ ᱠᱟᱹᱢᱤᱭᱤᱡ ᱠᱚᱨᱤᱢ ᱠᱷᱟᱸᱧ ᱢᱮᱛᱟᱫᱤᱭᱟ, “ᱱᱚᱣᱟ ᱨᱮᱱᱟᱜ ᱢᱮᱱᱮᱫ ᱫᱚ ᱪᱮᱫ ᱥᱟᱯᱷᱟ ᱛᱮ ᱞᱟᱹᱭᱟᱹᱧ ᱢᱮ᱾”
ᱩᱱᱤ ᱦᱟᱲᱟᱢ ᱚᱠᱟᱭ ᱞᱟᱹᱭᱟᱫᱤᱧ ᱚᱱᱟ ᱫᱚ ᱦᱩᱭᱩᱜ ᱠᱟᱱᱟ, ᱢᱤᱫ ᱚᱠᱛᱮ ᱚᱱᱟ ᱫᱟᱞᱟᱱ ᱚᱲᱟᱜ ᱨᱮ ᱛᱮᱛᱟᱝ ᱡᱤᱣᱤᱭᱟᱱ, ᱡᱮᱝᱜᱮᱡ ᱡᱤᱣᱤᱭᱟᱱ ᱠᱳ ᱛᱟᱦᱮ ᱠᱟᱱᱟ᱾ ᱱᱮᱛᱚᱜ ᱫᱚ ᱫᱷᱤᱨᱤ ᱨᱮ ᱠᱳ ᱢᱮᱥᱟ ᱟᱠᱟᱱᱟ᱾ ᱩᱱᱠᱩ ᱧᱮᱛᱚᱜ ᱡᱤᱣᱟᱹᱫ ᱦᱚᱲ ᱠᱚ ᱧᱟᱢ ᱞᱮᱠᱩ ᱠᱷᱟᱱ ᱠᱳ ᱡᱚᱢ ᱠᱚᱣᱟ᱾ ᱡᱟᱦᱟᱸᱭ ᱜᱤ ᱚᱱᱟ ᱚᱲᱟᱜ ᱨᱮ ᱧᱤᱫᱟᱹ ᱠᱳ ᱯᱟᱨᱚᱢ ᱟᱠᱟᱫ, ᱩᱱᱠᱩ ᱢᱩᱫᱽ ᱨᱮ ᱮᱠᱮᱱ ᱢᱮᱦᱮᱨ ᱜᱤ ᱯᱟᱜᱽᱞᱟ ᱠᱟᱛᱮᱜ ᱵᱟᱨᱦᱮᱭ ᱩᱰᱩᱝ ᱫᱟᱲᱮ ᱟᱠᱟᱫᱟ, ᱮᱴᱟᱜ ᱠᱳ ᱫᱚ ᱵᱟᱠᱩ ᱩᱰᱩᱝ ᱫᱟᱲᱮ ᱟᱠᱟᱫᱟ᱾
ᱤᱧ ᱠᱩᱞᱤ ᱠᱤᱫᱤᱭᱟ, “ᱤᱧᱟᱜ ᱵᱟᱧᱪᱟᱜ ᱨᱮᱱᱟᱜ ᱦᱚᱨ ᱫᱚ ᱢᱮᱱᱟᱜᱼᱟ ᱥᱮ ᱵᱟᱝ?”
ᱦᱟᱲᱟᱢᱮ ᱢᱮᱱ ᱠᱮᱫᱟ, “ᱢᱤᱫᱼᱴᱮᱱ ᱦᱚᱨ ᱢᱮᱱᱟᱜᱼᱟ, ᱟᱹᱰᱤ ᱢᱩᱥᱠᱤᱞᱟ᱾ ᱚᱱᱟ ᱤᱧ ᱞᱟᱹᱭᱟᱢ ᱠᱟᱱᱟ - ᱢᱮᱱᱠᱷᱟᱱ ᱚᱱᱟ ᱞᱟᱦᱟ ᱚᱱᱟ ᱜᱩᱞᱵᱟᱜᱽ ᱨᱮᱱ ᱢᱤᱫᱼᱴᱮᱱ ᱤᱨᱟᱱᱤ ᱠᱨᱤᱛᱚᱫᱟᱥᱤᱭᱟᱜ ᱢᱟᱨᱮ ᱱᱟᱜᱟᱢ ᱞᱟᱹᱭ ᱡᱟᱹᱨᱩᱲ᱾ ᱚᱝᱠᱟᱱ ᱦᱟᱦᱟᱲᱟ ᱟᱨ ᱫᱩᱠᱷ ᱨᱮᱱᱟᱜ ᱜᱷᱚᱴᱚᱱᱟ ᱫᱚ ᱟᱨ ᱵᱟᱹᱱᱩᱜᱼᱟ᱾
ᱚᱝᱠᱟᱱ ᱚᱠᱛᱮ ᱨᱮ ᱠᱩᱞᱤ ᱠᱳ ᱦᱮᱡ ᱠᱟᱛᱮᱜ ᱠᱳ ᱞᱟᱹᱭ ᱠᱮᱫᱟ ᱜᱟᱹᱰᱤ ᱦᱟᱹᱡᱩᱜ ᱠᱟᱱᱟ᱾ ᱤᱱᱟᱹᱜ ᱩᱥᱟᱹᱨᱟ? ᱟᱴᱮᱫ ᱠᱳ ᱥᱟᱢᱴᱟᱣ ᱛᱮ ᱜᱤ ᱜᱟᱹᱰᱤ ᱦᱮᱡ ᱮᱱᱟ᱾ ᱢᱤᱫᱼᱴᱮᱱ ᱤᱝᱨᱮᱡᱽ ᱟᱞᱮ ᱥᱟᱶᱛᱮᱱ ᱡᱟᱹᱲ ᱞᱟᱹᱭᱤᱡ ᱧᱮᱞ ᱧᱟᱢ ᱠᱟᱛᱮᱜ ᱦᱮᱞᱳ ᱢᱮᱱ ᱠᱟᱛᱮᱜᱼᱮ ᱦᱚᱦᱚ ᱟᱫᱮᱭᱟ, ᱟᱨ ᱜᱟᱹᱰᱤ ᱨᱮᱭ ᱨᱟᱠᱟᱵ ᱠᱤᱫᱤᱭᱟ᱾ ᱟᱞᱤᱧ ᱫᱚ ᱮᱴᱟᱜᱼᱟᱜ ᱨᱮ ᱞᱤᱧ ᱫᱮᱡᱮ ᱮᱱᱟ᱾ ᱡᱟᱹᱲ ᱞᱟᱹᱭᱤᱡ ᱫᱚ ᱚᱠᱚᱭᱮ ᱛᱟᱦᱮᱸ ᱠᱟᱱᱟ ᱵᱟᱹᱧ ᱵᱟᱰᱟᱭ ᱧᱟᱢ ᱫᱟᱲᱮ ᱟᱫᱟ, ᱡᱟᱹᱲ ᱦᱚᱸ ᱜᱚᱴᱟ ᱛᱮ ᱟᱧᱡᱚᱢ ᱯᱩᱨᱟᱹᱣ ᱵᱟᱝ ᱦᱩᱭ ᱞᱮᱱᱟ᱾
