ᱥᱚᱦᱨᱟᱭ - ᱦᱟᱹᱛᱤ ᱞᱮᱠᱟᱱ ᱯᱚᱨᱚᱵᱽ

ᱥᱚᱦᱨᱟᱭ - ᱦᱟᱹᱛᱤ ᱞᱮᱠᱟᱱ ᱯᱚᱨᱚᱵᱽ

ᱮᱦᱚᱵ

ᱥᱚᱦᱨᱟᱭ ᱫᱚ ᱟᱵᱩ ᱦᱚᱲ ᱦᱚᱯᱚᱱ ᱥᱮ ᱥᱟᱱᱛᱟᱞᱟᱜ ᱫᱷᱚᱨᱚᱢ ᱨᱮᱱᱟᱜ ᱢᱟᱨᱟᱝ ᱯᱚᱨᱚᱵᱽ ᱠᱟᱱᱟ᱾ ᱱᱚᱣᱟ ᱯᱚᱨᱚᱵᱽ ᱛᱟᱞᱟ ᱛᱮ ᱪᱟᱥ ᱠᱟᱹᱢᱤ ᱡᱤᱱᱤᱣ ᱟᱨ ᱜᱟᱹᱭ ᱰᱟᱝᱨᱟ ᱠᱟᱰᱟ ᱥᱟᱶ ᱦᱚᱲ ᱦᱚᱯᱚᱱᱟᱜ ᱜᱟᱹᱦᱤᱨ ᱥᱟᱹᱜᱟᱹᱭ ᱥᱟᱵ ᱨᱟᱠᱟᱵᱚᱜᱼᱟ᱾ ᱠᱩᱲᱤ ᱦᱚᱯᱚᱱ ᱥᱟᱶ ᱵᱟᱵᱟ ᱜᱷᱟᱨᱚᱡᱽ ᱨᱮᱱᱟᱜ ᱜᱟᱹᱦᱤᱨ ᱥᱟᱹᱜᱟᱹᱭ ᱥᱚᱫᱚᱨᱚᱜᱼᱟ᱾ ᱟᱛᱩ ᱫᱤᱥᱟᱹᱢ ᱨᱮᱱ ᱯᱮᱲᱟ ᱟᱛᱮ ᱜᱩᱵᱩᱰ ᱜᱩᱵᱩᱰ ᱮᱱᱮᱡ ᱥᱤᱨᱤᱧ ᱟᱛᱮ ᱟᱛᱩ ᱟᱱᱫᱚᱲ ᱠᱟᱛᱮᱜ ᱢᱚᱲᱮ ᱥᱤᱧ ᱢᱚᱲᱮ ᱧᱤᱫᱟᱹ ᱥᱚᱦᱨᱟᱭ ᱠᱳ ᱢᱟᱱᱟᱣᱟ᱾

ᱚᱠᱛᱚ

ᱵᱟᱝᱞᱟ ᱠᱟᱨᱛᱤᱠ ᱢᱟᱥ ᱨᱮ ᱠᱟᱨᱛᱤᱠ ᱪᱟᱱᱫᱳ ᱛᱟᱦᱮᱱ ᱚᱠᱛᱮ ᱦᱚᱲ ᱦᱚᱯᱚᱱ ᱫᱚ ᱠᱳ ᱥᱚᱦᱨᱟᱭᱟ᱾ ᱚᱱᱟᱛᱮ ᱠᱟᱨᱛᱤᱠ ᱪᱟᱱᱫᱳ ᱫᱚ ᱥᱚᱦᱨᱟᱭ ᱪᱟᱱᱫᱳ ᱠᱳ ᱢᱮᱛᱟᱜᱼᱟ᱾ ᱢᱮᱱᱠᱷᱟᱱ ᱱᱟᱜᱟᱢᱟᱱ ᱟᱨ ᱠᱟᱹᱣᱰᱤ ᱟᱹᱨᱤ ᱠᱟᱨᱚᱢ ᱛᱮ ᱵᱷᱟᱨᱚᱛ ᱨᱮᱱᱟᱜ ᱟᱫᱚᱢ ᱱᱟᱠᱷᱟ ᱟᱨ ᱵᱟᱝᱞᱟᱫᱤᱥᱟᱹᱢ ᱨᱮ ᱫᱚ ᱯᱩᱥ ᱪᱟᱱᱫᱳ ᱨᱮ ᱦᱩᱲᱩ ᱨᱟᱠᱟᱵ ᱛᱟᱭᱚᱢ ᱠᱳ ᱥᱚᱦᱨᱟᱭᱟ᱾ ᱢᱟᱹᱧᱡᱽᱦᱤ ᱵᱟᱵᱟ ᱜᱚᱰᱤᱛ ᱫᱟᱨᱟᱭ ᱛᱮ ᱟᱛᱩ ᱦᱚᱲ ᱦᱚᱦᱚ ᱠᱟᱛᱮᱜ ᱡᱚᱛᱚ ᱦᱚᱲᱟᱜ ᱥᱩᱵᱤᱫᱷᱟ ᱞᱮᱠᱟ ᱫᱤᱱ ᱨᱮ ᱫᱤᱱ ᱠᱟᱛᱮᱜ ᱥᱚᱦᱨᱟᱭ ᱠᱳ ᱢᱟᱱᱟᱣᱟ᱾

ᱥᱚᱦᱨᱟᱭ ᱨᱮᱱᱟᱜ ᱯᱚᱨᱛᱚᱱ

ᱦᱚᱲ ᱦᱚᱯᱚᱱᱟᱜ ᱫᱷᱚᱨᱚᱢ ᱥᱟᱹᱨᱤ ᱫᱷᱚᱨᱚᱢ ᱨᱮᱱᱟᱜ ᱫᱷᱚᱨᱢᱚ ᱥᱟᱥᱛᱚᱨ ᱡᱚᱢᱥᱤᱢ ᱵᱤᱱᱛᱤ ᱨᱮ ᱥᱚᱦᱨᱟᱭ ᱯᱚᱨᱛᱚᱱ ᱨᱮᱱᱟᱜ ᱱᱟᱜᱟᱢ ᱧᱟᱢᱚᱜᱼᱟ᱾ ᱚᱱᱰᱮ ᱢᱮᱱ ᱟᱠᱟᱱᱟ, ᱢᱟᱱᱣᱟ ᱥᱤᱨᱡᱳᱱ ᱛᱟᱭᱚᱢ ᱡᱚᱠᱷᱚᱱ ᱫᱷᱟᱹᱨᱛᱤ ᱯᱩᱨᱤ ᱨᱮ ᱠᱳ ᱥᱟᱝᱜᱮ ᱮᱱᱟ ᱤᱱᱡᱚᱠᱷᱚᱡ ᱩᱱᱠᱩᱣᱟᱜ ᱡᱚᱢ ᱧᱩ ᱨᱮᱱᱟᱜ ᱦᱟᱨᱠᱮᱛ ᱮᱦᱚᱵ ᱮᱱᱟ᱾ ᱡᱚᱢ ᱧᱩ ᱦᱟᱨᱠᱮᱛ ᱪᱟᱵᱟᱭ ᱞᱟᱹᱜᱤᱫ ᱥᱤᱥᱤᱨᱡᱟᱹᱣᱤᱡ ᱴᱷᱟᱹᱠᱩᱨ ᱟᱨ ᱴᱷᱟᱹᱠᱨᱟᱹᱱ ᱫᱚ ᱢᱟᱨᱟᱝ ᱵᱚᱝᱜᱟ ᱢᱟᱨᱟᱝᱵᱩᱨᱩ ᱫᱟᱨᱟᱭ ᱛᱮ ᱢᱟᱱᱣᱟ ᱠᱳ ᱛᱟᱞᱟ ᱨᱮ ᱪᱟᱥ ᱠᱟᱹᱢᱤ ᱞᱟᱹᱜᱤᱫ ᱱᱟᱦᱮᱞ, ᱡᱳᱣᱟᱞ, ᱟᱲᱜᱚᱢ ᱮᱢᱟᱱ ᱛᱮᱭᱟᱜ ᱥᱟᱶ ᱛᱮ ᱜᱟᱹᱭ ᱰᱟᱝᱨᱟ ᱢᱮᱨᱚᱢ ᱮᱢᱟᱱ ᱠᱳ ᱠᱤᱱ ᱪᱟᱞ ᱠᱮᱫ ᱠᱚᱣᱟ᱾ ᱪᱟᱥ ᱠᱟᱹᱢᱤ ᱟᱨ ᱛᱚᱣᱟ ᱫᱟᱦᱮ ᱛᱮ ᱢᱟᱱᱣᱟᱣᱟᱜ ᱡᱚᱢ ᱧᱩ ᱨᱮᱱᱟᱜ ᱦᱟᱨᱠᱮᱛ ᱪᱟᱵᱟ ᱮᱱᱟ᱾ ᱢᱟᱱᱣᱟ ᱥᱩᱠᱷ ᱟᱨ ᱱᱤᱨᱟᱹᱭ ᱨᱮ ᱛᱟᱦᱮᱱ ᱠᱳ ᱮᱦᱚᱵ ᱮᱱᱟ᱾ ᱢᱮᱱᱠᱷᱟᱱ ᱵᱟᱹᱭ ᱵᱟᱹᱭ ᱛᱮ ᱫᱷᱚᱨ ᱰᱟᱦᱟᱨ ᱵᱟᱹᱜᱤ ᱠᱟᱛᱮᱜ ᱵᱮᱫᱷᱚᱨᱚᱢ ᱛᱮ ᱛᱟᱲᱟᱢ ᱠᱳ ᱞᱟᱜᱟᱣ ᱮᱱᱟ᱾ ᱪᱟᱥ ᱠᱟᱹᱢᱤ ᱡᱤᱱᱤᱥ ᱠᱳ ᱚᱡᱚᱛᱚᱱ ᱠᱮᱫᱟ᱾ ᱜᱟᱹᱭ ᱰᱟᱝᱨᱟ ᱠᱳ ᱚᱱᱚᱦᱮᱞᱟ ᱠᱮᱫ ᱠᱚᱣᱟ᱾ ᱩᱱᱠᱩᱣᱟᱜ ᱡᱚᱛᱚᱱ ᱵᱟᱝ ᱦᱟᱛᱟᱣ ᱠᱟᱛᱮᱜ ᱮᱠᱮᱱ ᱟᱠᱚ ᱞᱟᱹᱜᱤᱫ ᱠᱳ ᱵᱮᱵᱚᱦᱟᱨ ᱠᱮᱫ ᱠᱚᱣᱟ᱾ ᱜᱟᱹᱭ ᱰᱟᱝᱨᱟ ᱠᱳ ᱮᱠᱮᱱ ᱯᱟᱧᱡᱽᱨᱟ ᱮᱱᱟ᱾ ᱱᱟᱦᱮᱞ ᱵᱟᱠᱚ ᱚᱨ ᱫᱟᱲᱮᱜ ᱠᱟᱱ ᱠᱷᱟᱱ ᱫᱮ ᱢᱟᱹᱨᱤᱭᱟᱹ ᱠᱳ ᱫᱟᱞᱮᱫ ᱠᱚᱣᱟ᱾ ᱜᱟᱹᱭ ᱰᱟᱝᱨᱟ ᱪᱮᱛᱟᱱ ᱟᱭᱢᱟ ᱞᱮᱠᱟᱱ ᱱᱟᱦᱟᱪᱟᱨ ᱠᱳ ᱮᱦᱚᱵ ᱠᱮᱫᱟ᱾

ᱢᱟᱱᱣᱟᱣᱟᱜ ᱱᱚᱝᱠᱟᱱ ᱠᱚᱪᱞᱚᱱ ᱠᱷᱚᱱ ᱵᱟᱧᱪᱟᱜ ᱞᱟᱹᱜᱤᱫ ᱜᱟᱹᱭ ᱰᱟᱝᱨᱟ ᱫᱚ ᱥᱤᱥᱤᱨᱡᱟᱹᱣᱤᱡ ᱴᱷᱟᱹᱠᱩᱨᱼᱴᱷᱟᱹᱠᱨᱟᱹᱱ ᱴᱷᱮᱱ ᱠᱚ ᱱᱟᱹᱞᱤᱥ ᱠᱮᱫᱟ᱾ ᱟᱠᱚᱣᱟᱜ ᱫᱩᱠᱷ ᱦᱟᱨᱠᱮᱛ ᱨᱮᱭᱟᱜ ᱠᱟᱛᱷᱟ ᱠᱳ ᱞᱟᱹᱭ ᱠᱮᱫᱟ᱾ ᱥᱤᱥᱤᱨᱡᱟᱹᱣᱤᱡ ᱴᱷᱮᱱ ᱠᱳ ᱱᱮᱦᱚᱨ ᱮᱱᱟ, ᱩᱱᱠᱩ ᱫᱚ ᱢᱟᱱᱣᱟ ᱛᱟᱞᱟ ᱟᱨ ᱵᱟᱝ ᱠᱳ ᱛᱟᱦᱮᱱᱟ᱾ ᱴᱷᱟᱹᱠᱩᱨ ᱩᱱᱠᱩ ᱥᱮᱨᱢᱟ ᱯᱩᱨᱤᱭ ᱨᱟᱠᱟᱵ ᱠᱳ ᱢᱟ᱾ ᱴᱷᱟᱹᱠᱩᱨ ᱫᱚ ᱜᱟᱹᱭ ᱰᱟᱝᱨᱟᱣᱟᱜ ᱠᱟᱛᱷᱟ ᱟᱧᱡᱚᱢ ᱠᱟᱛᱮᱜ ᱟᱹᱰᱤᱭ ᱵᱮᱡᱟᱨ ᱮᱱᱟ᱾ ᱜᱟᱹᱭ ᱰᱟᱝᱨᱟ ᱥᱮᱨᱢᱟ ᱯᱩᱨᱤ ᱨᱟᱠᱟᱵ ᱨᱮᱱᱟᱜ ᱠᱟᱛᱷᱟᱭ ᱩᱭᱦᱟᱹᱨ ᱠᱮᱫᱟ᱾ ᱢᱮᱱᱠᱷᱟᱱ ᱜᱟᱹᱭ ᱰᱟᱝᱨᱟ ᱵᱟᱠᱳ ᱛᱟᱦᱮᱱ ᱠᱷᱟᱱ ᱢᱟ ᱪᱟᱥ ᱠᱟᱹᱢᱤ ᱵᱟᱝ ᱦᱩᱭᱩᱜ᱾ ᱱᱚᱝᱠᱟ ᱛᱮ ᱢᱟ ᱫᱷᱟᱹᱨᱛᱤ ᱠᱷᱚᱱ ᱢᱟᱱᱣᱟ ᱠᱳ ᱫᱷᱟᱥᱟᱣ ᱪᱟᱵᱟᱜ᱾ ᱚᱱᱟᱛᱮ ᱥᱤᱥᱤᱨᱡᱟᱹᱣᱤᱡ ᱨᱮᱱ ᱜᱚᱜᱚ ᱨᱩᱯ ᱴᱷᱟᱹᱠᱨᱟᱹᱱᱮ ᱞᱟᱦᱟ ᱦᱮᱡ ᱮᱱᱟ᱾ ᱴᱷᱟᱹᱠᱩᱨᱟᱜ ᱨᱟᱝᱜᱟᱣᱮ ᱨᱟᱲᱮᱡ ᱠᱮᱫᱟ᱾ ᱢᱟᱱᱣᱟ ᱠᱳ ᱫᱷᱚᱨᱚᱢ ᱰᱟᱦᱟᱨ ᱛᱮ ᱨᱩᱣᱟᱹᱲᱚᱜ ᱨᱮᱱᱟᱜ ᱫᱟᱣ ᱮᱢᱮ ᱱᱮᱦᱚᱨ ᱟᱫᱮᱭᱟ᱾ ᱴᱷᱟᱹᱠᱩᱨ ᱢᱟᱱᱣᱟ ᱫᱟᱣᱮ ᱮᱢᱟᱫ ᱠᱚᱣᱟ ᱵᱮᱫᱷᱚᱨᱚᱢ ᱠᱷᱚᱱ ᱫᱷᱚᱨᱚᱢ ᱦᱚᱨ ᱛᱮ ᱨᱩᱣᱟᱹᱲᱚᱜ ᱨᱮᱱᱟᱜ, ᱜᱟᱹᱭ ᱰᱟᱝᱨᱟ ᱡᱚᱛᱚᱱ ᱨᱮᱱᱟᱜ᱾ ᱢᱟᱱᱣᱟ ᱚᱱᱟ ᱴᱷᱤᱠ ᱞᱮᱠᱟ ᱠᱳ ᱪᱟᱞᱟᱜ ᱠᱟᱱᱟ ᱥᱮ ᱵᱟᱝ ᱚᱱᱟ ᱧᱮᱞ ᱞᱟᱹᱜᱤᱫ ᱢᱚᱧᱪᱚ ᱯᱩᱨᱤᱭ ᱪᱟᱞᱟᱜᱼᱟ᱾

ᱤᱱ ᱚᱠᱛᱮ ᱴᱷᱟᱹᱠᱨᱟᱹᱱ ᱫᱚ ᱢᱟᱨᱟᱝᱵᱩᱨᱩᱭᱮ ᱦᱚᱦᱚ ᱟᱫᱮᱭᱟ᱾ ᱜᱟᱹᱭ ᱰᱟᱝᱨᱟ ᱥᱟᱶ ᱴᱷᱟᱹᱠᱩᱨᱟᱜ ᱜᱟᱞᱢᱟᱨᱟᱣ ᱨᱮᱱᱟᱜ ᱠᱟᱛᱷᱟᱭ ᱞᱟᱹᱭ ᱟᱫᱮᱭᱟ᱾ ᱢᱟᱱᱣᱟ ᱠᱳ ᱫᱷᱚᱨᱚᱢ ᱨᱮᱱᱟᱜ ᱦᱚᱨ ᱛᱮ ᱨᱩᱣᱟᱹᱲ ᱠᱳ ᱞᱟᱹᱜᱤᱫ ᱢᱟᱱᱣᱟ ᱠᱳ ᱛᱟᱞᱟ ᱥᱚᱦᱨᱟᱭ ᱵᱚᱝᱜᱟᱵᱩᱨᱩ ᱪᱚᱞᱚᱱ ᱨᱮᱱᱟᱜᱼᱮ ᱢᱮᱛᱟ ᱟᱫᱮᱭᱟ᱾ ᱥᱚᱦᱨᱟᱭ ᱯᱚᱨᱚᱵᱽ ᱨᱮ ᱦᱚᱯᱚᱱ ᱮᱨᱟ ᱥᱮ ᱢᱤᱥᱨᱟ ᱟᱨ ᱩᱱᱠᱩ ᱨᱮᱱ ᱡᱟᱣᱟᱭ ᱱᱮᱣᱛᱟ ᱮᱠᱟᱞᱛᱮ ᱮᱢᱮ ᱢᱮᱛᱟ ᱟᱫᱮᱭᱟ᱾ ᱪᱮᱫᱟᱜ ᱥᱮ ᱦᱚᱯᱚᱱ ᱮᱨᱟ ᱢᱤᱥᱨᱟ ᱟᱨ ᱩᱱᱠᱩ ᱨᱮᱱ ᱡᱟᱣᱟᱭ ᱨᱩᱯ ᱛᱮ ᱜᱤ ᱴᱷᱟᱹᱠᱩᱨ ᱟᱨ ᱴᱷᱟᱹᱠᱨᱟᱹᱱ ᱥᱚᱦᱨᱟᱭ ᱧᱮᱞ ᱠᱤᱱ ᱦᱟᱹᱡᱩᱜᱼᱟ᱾ ᱩᱱᱠᱩ ᱠᱳ ᱠᱩᱥᱤ ᱞᱮᱱᱠᱷᱟᱱ ᱜᱤ ᱴᱷᱟᱹᱠᱩᱨ ᱟᱨ ᱴᱷᱟᱹᱠᱨᱟᱹᱱ ᱠᱤᱱ ᱠᱩᱥᱤᱜᱼᱟ᱾ ᱢᱟᱱᱣᱟ ᱠᱳ ᱵᱟᱧᱪᱟᱣ ᱛᱟᱦᱮᱱᱟ ᱫᱷᱟᱹᱨᱛᱤ ᱯᱩᱨᱤ ᱨᱮ᱾ ᱱᱚᱝᱠᱟ ᱵᱟᱝ ᱦᱩᱭ ᱞᱮᱱ ᱠᱷᱟᱱ ᱫᱷᱟᱹᱨᱛᱤ ᱠᱷᱚᱱ ᱢᱟᱱᱣᱟ ᱠᱳ ᱱᱟᱥᱟᱣᱚᱜᱼᱟ᱾ ᱴᱷᱟᱹᱠᱨᱟᱹᱱᱟᱜ ᱠᱟᱛᱷᱟ ᱞᱮᱠᱟ ᱜᱤ ᱢᱟᱨᱟᱝᱵᱩᱨᱩ ᱫᱚ ᱫᱷᱟᱹᱨᱛᱤ ᱨᱮ ᱦᱮᱡ ᱠᱟᱛᱮᱜ ᱢᱟᱱᱣᱟ ᱠᱳᱭ ᱵᱩᱡᱽᱦᱟᱹᱣᱟᱜ ᱠᱚᱣᱟ᱾ ᱢᱟᱱᱣᱟ ᱠᱳ ᱛᱟᱞᱟ ᱨᱮ ᱥᱚᱦᱨᱟᱭᱮ ᱪᱚᱞ ᱠᱮᱫᱟ᱾ ᱢᱟᱱᱣᱟ ᱫᱚ ᱟᱠᱚᱨᱮᱱ ᱟᱹᱭᱩᱨᱤᱡ ᱢᱟᱨᱟᱝ ᱵᱚᱝᱜᱟ ᱢᱟᱨᱟᱝᱵᱩᱨᱩᱣᱟᱜ ᱢᱮᱱ ᱞᱮᱠᱟ ᱜᱤ ᱱᱤᱭᱚᱢ ᱫᱷᱚᱨᱚᱢ ᱟᱛᱮ ᱥᱚᱦᱨᱟᱭ ᱠᱳ ᱢᱟᱱᱟᱣ ᱠᱮᱫᱟ᱾ ᱴᱷᱟᱹᱠᱩᱨᱼᱴᱷᱟᱹᱠᱨᱟᱹᱱ ᱧᱮᱞ ᱠᱟᱛᱮᱜ ᱠᱤᱱ ᱠᱩᱥᱤ ᱮᱱᱟ᱾ ᱫᱷᱟᱹᱨᱛᱤ ᱨᱮ ᱢᱟᱱᱣᱟ ᱠᱳ ᱵᱟᱧᱪᱟᱣ ᱛᱟᱦᱮ ᱮᱱᱟ᱾ ᱟᱵᱩ ᱢᱟᱱᱣᱟ ᱥᱮ ᱦᱚᱲ ᱦᱚᱯᱚᱱ ᱛᱟᱞᱟ ᱨᱮ ᱥᱚᱦᱨᱟᱭ ᱫᱚ ᱪᱚᱞ ᱮᱱᱟ᱾

ᱥᱚᱦᱨᱟᱭ ᱨᱮᱱᱟᱜ ᱠᱟᱹᱢᱤ ᱠᱳ

ᱟᱵᱩ ᱦᱚᱲ ᱦᱚᱯᱚᱱ ᱫᱚ ᱱᱤᱭᱚᱢ ᱫᱷᱚᱨᱚᱢ ᱨᱮᱱᱟᱜ ᱠᱟᱹᱢᱤ ᱛᱟᱞᱟ ᱛᱮ ᱢᱚᱲᱮ ᱥᱤᱧ ᱢᱚᱲᱮ ᱧᱤᱫᱟᱹ ᱠᱩ ᱥᱚᱦᱨᱟᱭᱟ᱾ ᱱᱤᱭᱚᱢ ᱫᱷᱚᱨᱚᱢ ᱨᱮᱱᱟᱜ ᱠᱟᱹᱢᱤ ᱦᱚᱨᱟ ᱠᱳ ᱞᱟᱛᱟᱨ ᱨᱮ ᱚᱞ ᱮᱱᱟ-

᱑ᱹ ᱩᱢ ᱢᱟᱦᱟ - ᱥᱚᱦᱨᱟᱭ ᱨᱮᱱᱟᱜ ᱯᱩᱭᱞᱩ ᱢᱟᱦᱟ ᱫᱚ ᱠᱳ ᱢᱮᱛᱟᱜᱼᱟ ᱩᱢ ᱢᱟᱦᱟ᱾ ᱤᱱᱦᱤᱞᱟᱹᱜ ᱫᱚ ᱚᱲᱟᱜ ᱫᱩᱣᱟᱹᱨ, ᱠᱤᱪᱨᱤᱡ ᱠᱷᱟᱹᱱᱰᱣᱟᱹᱜ, ᱪᱟᱥ ᱠᱟᱹᱢᱤ ᱨᱮᱱᱟᱜ ᱱᱟᱦᱮᱞ, ᱟᱸᱨᱟᱲ ᱥᱟᱯᱷᱟ ᱦᱩᱭᱩᱜᱼᱟ᱾ ᱜᱟᱹᱭ ᱰᱟᱝᱨᱟ ᱰᱟᱹᱵᱨᱟᱹ ᱥᱟᱯᱷᱟ ᱦᱩᱭᱩᱜᱼᱟ᱾ ᱠᱚᱲᱟ ᱦᱚᱯᱚᱱ ᱫᱚ ᱩᱢ ᱥᱟᱯᱷᱟ ᱠᱟᱛᱮᱜ ᱜᱚᱴ ᱵᱚᱝᱜᱟ ᱠᱳ ᱪᱞᱟᱜᱼᱟ᱾

᱒ᱹ ᱜᱚᱴ ᱵᱚᱝᱜᱟ - ᱥᱚᱦᱨᱟᱭ ᱩᱢ ᱦᱤᱞᱟᱹᱜ ᱟᱛᱩ ᱨᱮᱱ ᱡᱚᱛᱚ ᱠᱚᱲᱟ ᱦᱚᱯᱚᱱ ᱜᱚᱴ ᱴᱟᱹᱱᱰᱤ ᱥᱮ ᱜᱟᱹᱭ ᱰᱟᱝᱨᱟ ᱟᱹᱛᱤᱧ ᱴᱷᱟᱣ ᱨᱮ ᱥᱮᱱ ᱠᱟᱛᱮᱜ ᱵᱚᱝᱜᱟ ᱠᱷᱚᱱᱰ ᱠᱳ ᱛᱮᱭᱟᱨᱟ᱾ ᱚᱱᱮ ᱠᱳ ᱜᱚᱴ ᱵᱚᱝᱜᱟᱭᱟ᱾ ᱱᱟᱭᱠᱮ ᱵᱟᱵᱟ ᱵᱮᱲᱟ ᱨᱟᱠᱟᱵ ᱥᱮᱡ ᱤᱠᱷᱲᱩᱢ ᱠᱟᱛᱮᱜᱼᱮ ᱫᱩᱲᱩᱵᱼᱟ᱾ ᱠᱷᱚᱱᱰ ᱨᱮᱱᱟᱜ ᱪᱮᱛᱟᱱ ᱥᱮᱡ ᱵᱟᱨᱭᱟ ᱥᱤᱢ ᱵᱤᱞᱤᱭ ᱫᱚᱲᱚᱢᱟ᱾ ᱚᱱᱟ ᱞᱟᱛᱟᱨ ᱨᱮ ᱩᱛᱟᱹᱨ ᱫᱷᱟᱹᱠᱷᱤᱱ ᱛᱮ ᱞᱮᱝᱜᱟ ᱥᱮᱡ ᱠᱷᱚᱵ ᱮᱦᱚᱵ ᱠᱟᱛᱮᱜ ᱡᱚᱡᱚᱢ ᱥᱮᱡ ᱟᱫᱽᱣᱟ ᱦᱚᱞᱚᱝ ᱫᱟᱜ ᱛᱮ ᱯᱮᱭᱟ ᱜᱩᱱᱟᱹᱰ ᱠᱷᱚᱱᱰ ᱠᱳ ᱵᱮᱱᱟᱣᱟ᱾ ᱚᱱᱟ ᱠᱷᱚᱱᱰ ᱛᱟᱞᱟ ᱨᱮ ᱢᱤᱫ ᱪᱩᱯᱩᱫ ᱠᱟᱛᱮᱜ ᱟᱫᱽᱣᱟ ᱪᱟᱣᱞᱮ ᱠᱳ ᱪᱩᱨᱩᱡᱟᱜᱼᱟ᱾ ᱱᱣᱟ ᱯᱮᱭᱟ ᱠᱷᱚᱱᱰ ᱨᱮ ᱯᱮᱭᱟ ᱥᱤᱢ ᱟᱹᱛᱤᱧ ᱠᱟᱛᱮᱜ ᱠᱳ ᱵᱚᱝᱜᱟ ᱠᱚᱣᱟ᱾ ᱯᱩᱭᱞᱩᱣᱟᱜ ᱠᱷᱚᱱᱰ ᱨᱮ ᱫᱚ ᱢᱟᱨᱟᱝᱵᱩᱨᱩ ᱧᱩᱛᱩᱢ ᱛᱮ, ᱫᱚᱥᱟᱨᱟᱜ ᱨᱮ ᱫᱚ ᱡᱟᱦᱮᱨ ᱟᱭᱚ ᱧᱩᱛᱩᱢ ᱛᱮ, ᱛᱮᱥᱟᱨᱟᱜ ᱨᱮ ᱫᱚ ᱫᱷᱚᱢᱚ ᱟᱨ ᱢᱚᱲᱮ ᱠᱳ ᱛᱩᱨᱩᱭ ᱠᱳ ᱧᱩᱛᱩᱢ ᱛᱮ᱾ ᱚᱱᱟ ᱛᱟᱭᱚᱢ ᱟᱛᱩ ᱨᱮᱱᱟᱜ ᱡᱚᱛᱚ ᱜᱷᱟᱨᱚᱡᱽ ᱠᱷᱚᱱ ᱟᱹᱜᱩ ᱟᱠᱟᱱ ᱫᱟᱸᱲᱮ ᱥᱤᱢ, ᱯᱟᱣᱨᱟ ᱮᱢᱟᱱᱠᱳ ᱠᱳ ᱵᱚᱝᱜᱟ ᱠᱚᱣᱟ᱾ ᱱᱟᱭᱠᱮ ᱯᱟᱱᱛᱮ ᱨᱮ ᱫᱩᱲᱩᱵ ᱠᱟᱛᱮᱜ ᱟᱛᱩ ᱦᱚᱲ ᱠᱳ ᱥᱚᱝᱜᱮᱜᱼᱟ᱾ ᱵᱚᱝᱜᱟ ᱛᱟᱭᱚᱢ ᱡᱚᱛᱚ ᱫᱟᱸᱲᱮ ᱥᱳᱲᱮ ᱠᱟᱛᱮᱜ ᱠᱳ ᱡᱚᱢ ᱠᱚᱣᱟ᱾ ᱚᱠᱟ ᱫᱚ ᱠᱳ ᱢᱮᱛᱟᱜ ᱠᱟᱱᱟ ᱜᱚᱴ ᱥᱳᱲᱮ᱾

ᱜᱚᱴ ᱴᱟᱹᱱᱰᱤ ᱨᱮ ᱮᱴᱟᱜ ᱥᱮᱡ ᱨᱮ ᱠᱩᱰᱟᱹᱢ ᱱᱟᱭᱠᱮ ᱫᱚ ᱟᱨ ᱢᱤᱫᱼᱴᱮᱱᱮ ᱠᱷᱚᱱᱰᱟ᱾ ᱚᱱᱰᱮ ᱫᱚ ᱥᱤᱢᱟᱹ ᱥᱟᱲᱮ ᱧᱩᱛᱩᱢ ᱛᱮ ᱥᱮᱱᱫᱮ ᱥᱤᱢᱮ ᱵᱚᱝᱜᱟᱭᱤᱭᱟ᱾ ᱟᱛᱩᱨᱮ ᱨᱳᱜᱽ ᱟᱡᱟᱨ ᱥᱮ ᱯᱨᱟᱠᱨᱤᱛᱤᱠ ᱥᱮ ᱵᱟᱹᱲᱤᱡ ᱡᱟᱦᱟᱱᱟᱜ ᱟᱞᱚ ᱵᱚᱞᱚᱜ ᱚᱱᱟ ᱠᱷᱟᱹᱛᱤᱨ ᱱᱚᱣᱟ ᱠᱳ ᱵᱚᱝᱜᱟᱭᱟ᱾ ᱱᱩᱭ ᱥᱤᱢᱟᱜ ᱥᱳᱲᱮ ᱫᱚ ᱠᱩᱰᱟᱹᱢ ᱱᱟᱭᱠᱮ ᱮᱥᱠᱟᱨᱮ ᱡᱚᱢᱟ᱾

ᱡᱚᱛᱚ ᱞᱮᱠᱟᱱ ᱵᱚᱝᱜᱟ ᱥᱟᱹᱛ ᱞᱮᱱ ᱠᱷᱟᱱ ᱱᱟᱭᱠᱮ ᱫᱚ ᱟᱭᱟᱜ ᱯᱩᱡᱟᱹ ᱡᱤᱱᱤᱥ ᱠᱳ ᱦᱟᱴᱟᱜ ᱨᱮ ᱦᱟᱹᱨ ᱥᱟᱢᱴᱟᱣ ᱠᱟᱛᱮᱜᱼᱮ ᱵᱤᱨᱤᱫᱼᱟ᱾ ᱥᱤᱢ ᱵᱤᱞᱤ ᱫᱚ ᱚᱱᱰᱮ ᱜᱤ ᱛᱟᱦᱮᱱᱟ᱾ ᱟᱛᱩ ᱨᱮᱱ ᱡᱚᱛᱚ ᱜᱟᱹᱭ ᱰᱟᱝᱨᱟ ᱚᱱᱟ ᱠᱷᱚᱱᱰ ᱪᱮᱛᱟᱱ ᱛᱮ ᱠᱳ ᱞᱟᱜᱟ ᱯᱟᱨᱚᱢ ᱠᱚᱣᱟ᱾ ᱚᱠᱚᱭᱴᱟᱜ ᱜᱟᱹᱭ ᱞᱟᱦᱟ ᱚᱱᱟ ᱵᱤᱞᱤᱭ ᱞᱮᱵᱮᱫᱟ ᱩᱱᱤ ᱜᱤ ᱠᱟᱹᱯᱤᱞ ᱜᱟᱹᱭ ᱢᱮᱱᱛᱮ ᱠᱳ ᱪᱤᱱᱦᱟᱹ ᱮᱭᱟ᱾ ᱧᱮᱞ ᱟᱠᱟᱱᱟ ᱮᱴᱟᱜ ᱰᱟᱝᱨᱟ ᱠᱳ ᱛᱟᱦᱮᱱ ᱨᱮᱦᱚᱸ ᱮᱠᱮᱱ ᱜᱟᱹᱭ ᱜᱤ ᱱᱚᱣᱟ ᱵᱤᱞᱤ ᱠᱳ ᱞᱮᱵᱮᱫ ᱟᱠᱟᱫᱟ᱾ ᱚᱠᱚᱭ ᱨᱮᱱ ᱜᱟᱹᱭᱮ ᱞᱮᱵᱮᱫ ᱩᱱᱤ ᱫᱚ ᱟᱹᱰᱤ ᱵᱷᱟᱜᱜᱳᱵᱟᱱᱮ ᱞᱮᱠᱷᱟᱜᱼᱟ᱾ ᱚᱱᱟᱛᱮ ᱫᱟᱨᱟᱭ ᱥᱚᱦᱨᱟᱭ ᱨᱮ ᱜᱚᱴ ᱨᱮ ᱦᱚᱲᱮ ᱡᱚᱢ ᱧᱩ ᱟᱪᱚ ᱠᱚᱣᱟ᱾ ᱚᱱᱟ ᱛᱟᱭᱚᱢ ᱩᱱᱤ ᱜᱟᱹᱭ ᱠᱳ ᱥᱟᱵᱮᱭᱟ᱾ ᱡᱚᱜᱽ ᱢᱟᱹᱧᱡᱽᱦᱤ ᱫᱚ ᱜᱩᱯᱤ ᱠᱚᱲᱟᱭ ᱜᱷᱚᱸᱲᱟᱭᱮᱭᱟ᱾ ᱢᱟᱹᱧᱡᱽᱦᱤ ᱵᱟᱵᱟ ᱥᱟᱢᱟᱝ ᱠᱳ ᱤᱫᱤ ᱠᱤᱱᱟ᱾ ᱜᱟᱹᱭ ᱫᱚ ᱫᱤᱨᱤᱧ ᱟᱨ ᱪᱟᱹᱫᱤ ᱨᱮ ᱥᱩᱱᱩᱢ ᱠᱳ ᱚᱡᱚᱜ ᱟᱭᱟ ᱟᱨ ᱠᱳ ᱥᱤᱱᱫᱩᱨᱮᱭᱟ᱾ ᱜᱩᱯᱤ ᱠᱚᱲᱟ ᱦᱚᱸ ᱥᱩᱱᱩᱢ ᱠᱳ ᱚᱡᱚᱜ ᱟᱭᱟ᱾ ᱯᱟᱸᱭᱲᱟ ᱴᱷᱮᱝᱜᱟ ᱨᱮᱦᱚᱸ ᱥᱩᱱᱩᱢ ᱠᱳ ᱚᱡᱚᱜᱟᱜᱼᱟ᱾ ᱜᱩᱯᱤ ᱠᱚᱲᱟ ᱫᱚ ᱡᱚᱛᱚ ᱦᱚᱲᱮ ᱰᱚᱵᱚᱜ ᱟᱠᱚᱣᱟ᱾ ᱚᱱᱟ ᱛᱟᱭᱚᱢ ᱡᱚᱛᱚ ᱦᱚᱲ ᱮᱱᱮᱡ ᱮᱱᱮᱡ ᱛᱮ ᱟᱛᱩ ᱠᱳ ᱵᱚᱞᱚᱜᱼᱟ᱾ ᱯᱩᱭᱞᱩ ᱱᱟᱭᱠᱮ ᱚᱲᱟᱜ, ᱤᱱᱟᱹ ᱠᱟᱛᱮᱜ ᱢᱟᱹᱧᱡᱽᱦᱤ, ᱯᱟᱨᱟᱱᱤᱠ, ᱡᱚᱜᱽᱢᱟᱹᱧᱡᱽᱦᱤ ᱟᱨ ᱜᱚᱰᱤᱛ ᱚᱲᱟᱜ ᱠᱳ ᱪᱟᱞᱟᱜᱼᱟ᱾ ᱡᱚᱛᱚ ᱚᱲᱟᱜ ᱨᱮ ᱜᱤ ᱱᱟᱥᱮ ᱡᱚᱢ ᱧᱩ ᱠᱳ ᱮᱢᱟᱠᱚᱣᱟ᱾

ᱛᱟᱨᱟᱥᱤᱧ ᱥᱮ ᱟᱹᱭᱩᱵ ᱵᱮᱞᱟ ᱫᱚ ᱡᱚᱛᱚ ᱦᱚᱲ ᱟᱠᱚ ᱨᱮᱱ ᱜᱟᱹᱭ ᱰᱟᱝᱨᱟ ᱢᱮᱨᱚᱢ ᱵᱷᱤᱰᱤ ᱠᱟᱰᱟ ᱵᱤᱛᱠᱤᱞ ᱠᱚ ᱥᱩᱱᱩᱢ ᱥᱤᱱᱫᱩᱨ ᱠᱳ ᱚᱡᱚᱜ ᱟᱠᱚᱣᱟ᱾ ᱧᱩᱦᱩᱢ ᱥᱮᱡ ᱟᱭᱚ ᱦᱚᱲ ᱠᱳ ᱫᱚ ᱦᱟᱴᱟᱜ ᱨᱮ ᱵᱟᱹᱛᱤ ᱡᱩᱞ ᱠᱟᱛᱮᱜ ᱫᱷᱩᱵᱤ ᱜᱷᱟᱥ, ᱦᱩᱲᱩ ᱟᱨ ᱟᱫᱣᱟ ᱪᱟᱣᱞᱮ ᱛᱮ ᱜᱚᱲᱟ ᱨᱮ ᱡᱚᱛᱚ ᱠᱳ ᱪᱩᱢᱟᱹᱲᱟ ᱠᱚᱣᱟ᱾ ᱚᱱᱟ ᱛᱟᱭᱚᱢ ᱟᱛᱩ ᱨᱮᱱ ᱠᱚᱲᱟ ᱠᱩᱲᱤ ᱫᱚ ᱥᱟᱨᱟ ᱧᱤᱫᱟᱹ ᱮᱱᱮᱡ ᱥᱤᱨᱤᱧᱟᱛᱮ ᱟᱛᱩ ᱨᱮᱱ ᱜᱟᱹᱭ ᱰᱟᱝᱨᱟ ᱠᱳ ᱡᱟᱜᱟᱣ ᱠᱚᱣᱟ᱾

᱓ᱹ ᱵᱚᱝᱜᱟ ᱢᱟᱦᱟ - ᱥᱚᱦᱨᱟᱭ ᱨᱮᱱᱟᱜ ᱫᱚᱥᱟᱨ ᱫᱤᱱ ᱫᱚ ᱵᱩ ᱢᱮᱛᱟᱜᱼᱟ ᱵᱚᱝᱜᱟ ᱢᱟᱦᱟ᱾ ᱱᱚᱣᱟ ᱢᱟᱦᱟ ᱨᱮ ᱫᱚ ᱯᱮᱲᱟ ᱠᱳ ᱠᱳ ᱦᱟᱹᱡᱩᱜᱼᱟ᱾ ᱡᱚᱛᱚ ᱚᱲᱟᱜ ᱨᱮ ᱦᱟᱯᱲᱟᱢ ᱟᱨ ᱢᱟᱨᱟᱝᱵᱩᱨᱩ ᱧᱩᱛᱩᱢ ᱛᱮ ᱦᱟᱺᱰᱤ ᱪᱚᱰᱚᱨ ᱦᱩᱭᱩᱜᱼᱟ᱾ ᱵᱟᱯᱞᱟ ᱟᱠᱟᱱ ᱠᱩᱲᱤ ᱦᱚᱯᱚᱱ ᱠᱳ ᱦᱚᱸ ᱦᱟᱯᱲᱟᱢ ᱠᱳ ᱞᱟᱹᱜᱤᱫ ᱵᱚᱝᱜᱟᱭ ᱞᱟᱹᱜᱤᱫ ᱡᱟᱣᱟᱭ ᱚᱲᱟᱜ ᱠᱷᱚᱱ ᱡᱚᱢᱟᱜ ᱠᱳ ᱟᱹᱜᱩ ᱛᱚᱨᱟᱭᱟ᱾ ᱵᱚᱝᱜᱟ ᱢᱟᱦᱟ ᱨᱮ ᱫᱚ ᱱᱚᱣᱟ ᱡᱚᱛᱚ ᱜᱤ ᱵᱷᱤᱛᱨᱤ ᱚᱲᱟᱜ ᱨᱮ ᱵᱚᱝᱜᱟ ᱦᱩᱭᱩᱜᱼᱟ᱾ ᱛᱟᱨᱟᱥᱤᱧ ᱥᱮᱡ ᱫᱚ ᱟᱛᱩ ᱨᱮᱱ ᱡᱚᱛᱚ ᱠᱳ ᱠᱩᱞᱦᱤ ᱠᱩᱞᱦᱤ ᱛᱮ ᱠᱳ ᱮᱱᱮᱡᱼᱟ᱾ ᱵᱚᱝᱜᱟ ᱢᱟᱦᱟ ᱨᱮ ᱫᱚ ᱜᱟᱹᱭ ᱰᱟᱝᱨᱟ ᱠᱚᱣᱟᱜ ᱡᱤᱨᱟᱹᱣ ᱢᱟᱦᱟ ᱠᱟᱱᱟ᱾

᱔ᱹ ᱠᱷᱩᱱᱴᱟᱹᱣ ᱢᱟᱦᱟ - ᱥᱚᱦᱨᱟᱭ ᱨᱮᱱᱟᱜ ᱛᱮᱥᱟᱨ ᱢᱟᱦᱟ ᱫᱚ ᱦᱩᱭᱩᱜ ᱠᱟᱱᱟ ᱠᱷᱩᱱᱴᱟᱹᱣ ᱢᱟᱦᱟ᱾ ᱠᱷᱩᱱᱴᱟᱹᱣ ᱢᱟᱦᱟ ᱦᱤᱞᱟᱹᱜ ᱫᱚ ᱥᱮᱛᱟᱜ ᱨᱮ ᱜᱟᱹᱭ ᱰᱟᱝᱨᱟ ᱩᱰᱩᱝ ᱞᱟᱦᱟ ᱟᱨ ᱵᱟᱝᱠᱷᱟᱱ ᱞᱟᱦᱟ ᱦᱤᱞᱟᱹᱜ ᱧᱤᱱᱫᱟᱹ ᱨᱮ ᱜᱚᱲᱟ ᱫᱩᱣᱟᱹᱨ ᱨᱮ ᱟᱫᱣᱟ ᱪᱟᱣᱞᱮ ᱦᱚᱞᱚᱝ ᱫᱟᱜ ᱛᱮ ᱠᱷᱚᱱᱰ ᱠᱳ ᱛᱮᱭᱟᱨᱟ᱾ ᱱᱚᱣᱟ ᱠᱷᱚᱱᱰ ᱫᱚ ᱯᱟᱹᱨᱤᱥ ᱯᱤᱪᱷᱟᱹ ᱡᱩᱫᱟᱹ ᱡᱩᱫᱟᱹ ᱜᱮᱭᱟ᱾ ᱟᱫᱚᱢ ᱚᱲᱟᱜ ᱫᱚ ᱜᱚᱲᱟ ᱫᱩᱣᱟᱹᱨ ᱠᱷᱚᱱ ᱠᱩᱞᱦᱤ ᱦᱟᱹᱵᱤᱡ ᱱᱟᱱᱟ ᱦᱩᱱᱟᱹᱨ ᱵᱟᱦᱟ ᱠᱳ ᱛᱮᱭᱟᱨᱟ᱾ ᱠᱷᱩᱱᱴᱟᱹᱣ ᱢᱟᱦᱟ ᱥᱮᱛᱟᱜ ᱨᱮ ᱜᱟᱹᱭ ᱰᱟᱝᱨᱟ ᱠᱳ ᱥᱩᱱᱩᱢ ᱥᱤᱱᱫᱩᱨ ᱠᱳ ᱚᱡᱚᱜ ᱟᱠᱚᱣᱟ᱾ ᱦᱩᱲᱩ ᱜᱮᱞᱮ ᱟᱨ ᱥᱩᱱᱩᱢ ᱯᱤᱴᱷᱟᱹ ᱛᱮ ᱢᱟᱞᱟ ᱛᱮᱭᱟᱨ ᱠᱟᱛᱮᱜ ᱠᱳ ᱦᱚᱨᱚᱜ ᱟᱠᱚᱣᱟ᱾ ᱡᱚᱜᱽᱢᱟᱹᱧᱡᱽᱦᱤ ᱫᱚ ᱟᱛᱩ ᱠᱚᱲᱟ ᱠᱳ ᱢᱟᱹᱧᱡᱽᱦᱤ, ᱯᱟᱨᱟᱱᱤᱠ, ᱡᱚᱜᱽᱢᱟᱹᱧᱡᱽᱦᱤ, ᱱᱟᱭᱠᱮ ᱟᱨ ᱜᱚᱰᱤᱛᱟᱜ ᱚᱲᱟᱜ ᱠᱩᱰᱟᱹᱢ ᱨᱮ ᱠᱷᱩᱱᱴᱤ ᱵᱤᱫᱼᱮ ᱢᱮᱛᱟ ᱠᱚᱣᱟ᱾ ᱜᱚᱲᱟ ᱠᱷᱚᱱ ᱩᱰᱩᱝ ᱠᱟᱛᱮᱜ ᱚᱱᱰᱮ ᱜᱟᱹᱭ ᱰᱟᱝᱨᱟ ᱠᱳ ᱛᱚᱞ ᱠᱚᱣᱟ᱾ ᱟᱛᱩ ᱨᱮᱱ ᱮᱴᱟᱜ ᱦᱚᱲ ᱫᱚ ᱟᱠᱚ ᱛᱮ ᱠᱷᱩᱱᱴᱤ ᱠᱳ ᱵᱤᱫᱟ ᱟᱨ ᱜᱟᱹᱭ ᱰᱟᱝᱨᱟ ᱠᱳ ᱛᱚᱞ ᱠᱚᱣᱟ᱾ ᱚᱱᱟ ᱛᱟᱭᱚᱢ ᱚᱲᱟᱜ ᱨᱮᱱ ᱟᱭᱚ ᱦᱚᱲ ᱠᱳ ᱫᱚ ᱜᱟᱹᱭ ᱰᱟᱝᱨᱟ ᱠᱳ ᱪᱩᱢᱟᱹᱲᱟ ᱠᱚᱣᱟ᱾ ᱟᱨ ᱠᱚᱲᱟ ᱠᱩᱲᱤ ᱥᱮ ᱮᱴᱟᱜ ᱦᱚᱲ ᱠᱳ ᱫᱚ ᱠᱳ ᱮᱱᱮᱡᱼᱟ ᱟᱨ ᱜᱟᱹᱭ ᱰᱟᱝᱨᱟ ᱠᱳ ᱪᱟᱨᱦᱟᱣ ᱠᱚᱣᱟ᱾

᱖ᱹ ᱡᱟᱞᱮ ᱢᱟᱦᱟ - ᱡᱟᱞᱮ ᱢᱟᱦᱟ ᱨᱮ ᱫᱚ ᱫᱷᱚᱨᱚᱢ ᱨᱮᱱᱟᱜ ᱠᱟᱹᱢᱤ ᱵᱟᱝ ᱛᱟᱦᱮᱱᱟ᱾ ᱱᱚᱣᱟ ᱦᱤᱞᱟᱹᱜ ᱫᱚ ᱦᱮᱡ ᱟᱠᱟᱱ ᱯᱮᱲᱟ ᱟᱨ ᱟᱛᱩ ᱨᱮᱱ ᱦᱚᱲ ᱜᱚᱴᱟ ᱠᱩᱞᱦᱤ ᱠᱳ ᱮᱱᱮᱡᱼᱟ᱾ ᱚᱲᱟᱜ ᱚᱲᱟᱜ ᱠᱳ ᱮᱱᱮᱡ ᱵᱚᱞᱚᱜᱼᱟ᱾ ᱡᱚᱛᱚ ᱚᱲᱟᱜ ᱨᱮ ᱜᱤ ᱱᱟᱥᱮ ᱡᱚᱢ ᱧᱩ ᱠᱳ ᱮᱢᱟᱠᱚᱣᱟ᱾

ᱪᱮᱛᱟᱱ ᱨᱮ ᱚᱞ ᱟᱠᱟᱱ ᱯᱩᱱ ᱢᱟᱦᱟ ᱨᱮᱱᱟᱜ ᱠᱟᱛᱷᱟ᱾ ᱤᱱᱟᱹ ᱥᱟᱶ ᱟᱨ ᱢᱤᱫ ᱢᱟᱦᱟ ᱢᱮᱱᱟᱜᱼᱟ ᱚᱱᱟ ᱫᱚ ᱫᱤᱥᱟᱹᱢ ᱠᱷᱩᱱᱴᱟᱹᱣ ᱟᱢᱟᱦᱟ᱾ ᱱᱚᱣᱟ ᱢᱟᱦᱟ ᱫᱚ ᱠᱷᱩᱱᱴᱟᱹᱣ ᱫᱚᱥᱟᱨ ᱦᱤᱞᱟᱹᱜ ᱠᱳ ᱢᱟᱱᱟᱣᱟ᱾ ᱱᱚᱣᱟ ᱢᱟᱦᱟ ᱨᱮ ᱟᱛᱩ ᱨᱮᱱ ᱡᱚᱛᱚ ᱜᱟᱹᱭ ᱰᱟᱝᱨᱟ ᱟᱛᱩ ᱵᱟᱨᱦᱮ ᱟᱹᱛᱤᱧ ᱴᱷᱟᱸᱣ ᱨᱮ ᱠᱳ ᱡᱟᱣᱨᱟ ᱠᱚᱣᱟ᱾ ᱚᱱᱰᱮ ᱠᱷᱩᱱᱴᱟᱹᱣ ᱠᱟᱛᱮᱜ ᱠᱳ ᱪᱩᱢᱟᱹᱲᱟ ᱟᱠᱚᱣᱟ ᱟᱨ ᱠᱳ ᱪᱟᱨᱦᱟᱣ ᱠᱚᱣᱟ᱾ ᱟᱭᱢᱟ ᱞᱮᱠᱟ ᱠᱳ ᱮᱱᱮᱡ ᱥᱤᱨᱤᱧᱟ᱾ ᱫᱤᱥᱟᱹᱢ ᱠᱷᱩᱱᱴᱟᱹᱣ ᱢᱟᱦᱟ ᱛᱟᱭᱚᱢ ᱡᱟᱞᱮ ᱢᱟᱦᱟ ᱢᱟᱱᱟᱣ ᱛᱟᱞᱟ ᱛᱮ ᱢᱚᱲᱮ ᱢᱟᱦᱟ ᱥᱚᱦᱨᱟᱭ ᱢᱩᱪᱟᱹᱫᱚᱜᱼᱟ᱾

ᱢᱮᱱᱠᱷᱟᱱ ᱟᱭᱢᱟ ᱟᱛᱩ ᱨᱮ ᱜᱤ ᱫᱤᱥᱟᱹᱢ ᱠᱷᱩᱱᱴᱟᱹᱣ ᱢᱟᱦᱟ ᱫᱚ ᱵᱟᱠᱚ ᱢᱟᱱᱟᱣ ᱮᱫᱟ᱾ ᱟᱥᱚᱠᱟᱭᱛᱮ ᱚᱠᱟᱠᱳ ᱱᱟᱠᱷᱟ ᱨᱮ ᱯᱩᱥ ᱪᱟᱸᱫᱚ ᱠᱳ ᱥᱚᱦᱨᱟᱭ ᱠᱟᱱ ᱚᱱᱟ ᱠᱳ ᱟᱛᱩ ᱨᱮ ᱫᱚ ᱫᱤᱥᱟᱹᱢ ᱠᱷᱩᱱᱴᱟᱹᱣ ᱵᱟᱝ ᱠᱟᱛᱮᱜ ᱥᱟᱠᱨᱟᱛ ᱜᱤ ᱢᱚᱲᱮ ᱢᱟᱦᱟ ᱥᱚᱦᱨᱟᱭ ᱨᱮᱱᱟᱜ ᱢᱩᱪᱟᱹᱫ ᱢᱟᱦᱟ ᱢᱮᱱᱛᱮ ᱠᱳ ᱢᱟᱱᱟᱣ ᱮᱫᱟ᱾ ᱮᱱᱠᱷᱟᱱ ᱵᱟᱰᱟᱭ ᱛᱟᱦᱮᱱ ᱢᱟ ᱥᱟᱠᱨᱟᱛ ᱫᱚ ᱥᱚᱦᱨᱟᱭ ᱨᱮᱱᱟᱜ ᱦᱟᱹᱴᱤᱧ ᱫᱚ ᱵᱟᱝ ᱠᱟᱱᱟ᱾ ᱥᱟᱠᱨᱟᱛ ᱫᱚ ᱵᱮᱜᱟᱨ ᱟᱨ ᱢᱤᱫ ᱯᱚᱨᱚᱵᱽ ᱠᱟᱱ ᱛᱟᱵᱩᱱᱟ᱾ ᱯᱩᱥ ᱪᱟᱸᱫᱚ ᱢᱩᱪᱟᱫ ᱥᱮ ᱟᱢᱟᱵᱟᱥᱤᱭᱟᱹ ᱦᱤᱞᱟᱹᱜ ᱥᱟᱠᱨᱟᱛ ᱵᱚᱝᱜᱟᱵᱩᱨᱩ ᱫᱚ ᱦᱩᱭᱩᱜᱼᱟ᱾

ᱥᱚᱦᱨᱟᱭ ᱫᱚᱨᱥᱚᱱ -

ᱜᱟᱹᱦᱤᱨ ᱛᱮ ᱥᱚᱦᱨᱟᱭ ᱵᱩ ᱧᱮᱞ ᱞᱮᱠᱷᱟᱱ ᱧᱮᱞ ᱧᱟᱢᱟᱵᱩ- ᱥᱚᱦᱨᱟᱭ ᱫᱚ ᱮᱠᱮᱱ ᱦᱚᱲ ᱦᱚᱯᱚᱱᱟᱜ ᱫᱷᱚᱨᱚᱢ ᱯᱚᱨᱚᱵᱽ ᱫᱚ ᱵᱟᱝ ᱠᱟᱱᱟ, ᱱᱚᱣᱟ ᱯᱚᱨᱚᱵᱽ ᱥᱟᱶ ᱢᱟᱱᱣᱟ ᱥᱚᱵᱵᱷᱚᱛᱟ ᱨᱮᱱᱟᱜ ᱱᱟᱜᱟᱢ ᱡᱚᱯᱲᱟᱣ ᱢᱮᱱᱟᱜᱼᱟ᱾ ᱵᱟᱹᱲᱛᱤ ᱢᱟᱱᱣᱟ ᱠᱚᱣᱟ ᱡᱚᱢ ᱧᱩ ᱡᱚᱜᱟᱞ ᱞᱟᱹᱜᱤᱫ ᱯᱩᱭᱞᱩ ᱚᱠᱟ ᱵᱤᱯᱞᱚᱵᱽ ᱥᱮ ᱨᱤᱵᱷᱩᱞᱮᱥᱚᱱ ᱦᱩᱭ ᱞᱮᱱ ᱚᱱᱟ ᱫᱚ ᱦᱩᱭᱩᱜ ᱠᱟᱱᱟ ᱪᱟᱥ ᱥᱮ ᱠᱨᱤᱥᱤ ᱵᱤᱯᱞᱚᱵᱽ᱾ ᱚᱱᱟ ᱨᱮᱱᱟᱜ ᱱᱟᱜᱟᱢ ᱵᱩ ᱧᱮᱞ ᱧᱟᱢᱟ ᱥᱚᱦᱨᱟᱭ ᱨᱮ, ᱡᱚᱠᱷᱚᱱ ᱢᱟᱨᱟᱝᱵᱩᱨᱩ ᱢᱟᱱᱣᱟ ᱛᱟᱞᱟ ᱨᱮᱪᱟᱥ ᱞᱟᱹᱜᱤᱫ ᱱᱟᱦᱮᱞ, ᱰᱟᱝᱨᱟ, ᱠᱟᱰᱟ ᱮᱢᱟᱱᱠᱳ ᱨᱟᱠᱟᱵ ᱮᱫ ᱠᱳ᱾ ᱠᱨᱤᱥᱤ ᱵᱤᱯᱞᱚᱵᱽ ᱡᱚᱫᱤ ᱵᱟᱝ ᱦᱩᱭ ᱠᱚᱜ ᱢᱟᱱᱣᱟ ᱥᱚᱵᱵᱷᱚᱛᱟ ᱛᱤᱦᱤᱧᱟᱜ ᱡᱩᱜᱽ ᱨᱮ ᱵᱟᱝ ᱦᱮᱡ ᱫᱟᱲᱮ ᱠᱚᱜᱼᱟ᱾ ᱱᱮᱛᱚᱜᱼᱦᱚᱸ ᱡᱚᱫᱤ ᱟᱵᱩ ᱠᱨᱤᱥᱤ ᱠᱷᱚᱱ ᱵᱩ ᱵᱤᱪᱷᱟᱹᱲᱚᱜ - ᱢᱟᱱᱣᱟ ᱥᱚᱵᱵᱷᱚᱛᱟ ᱫᱟᱹᱥᱩᱲᱚᱜᱼᱟ᱾ ᱚᱱᱟᱛᱮ ᱡᱟᱣ ᱥᱮᱨᱢᱟ ᱥᱚᱦᱨᱟᱭ ᱟᱵᱩᱭ ᱫᱤᱥᱟᱹ ᱟᱵᱩᱱᱟ ᱠᱨᱤᱥᱤ ᱟᱨ ᱜᱟᱹᱭ ᱰᱟᱝᱨᱟ ᱥᱟᱶ ᱟᱵᱚᱣᱟᱜ ᱜᱟᱹᱦᱤᱨ ᱥᱟᱹᱜᱟᱹᱭ ᱨᱮᱱᱟᱜ ᱠᱟᱛᱷᱟ᱾ ᱚᱱᱟ ᱥᱟᱹᱜᱟᱹᱭ ᱟᱞᱚ ᱵᱩ ᱛᱚᱯᱟᱠ ᱢᱟ᱾ ᱟᱞᱚ ᱵᱩ ᱚᱱᱚᱦᱮᱞᱟᱭ ᱢᱟ᱾ ᱡᱚᱛᱚᱱ ᱨᱮ ᱵᱩ ᱫᱚᱦᱚ ᱠᱟᱜᱼᱟ᱾

ᱥᱚᱦᱨᱟᱭ ᱛᱟᱞᱟ ᱛᱮ ᱵᱟᱵᱟ ᱚᱲᱟᱜ ᱥᱟᱶ ᱠᱩᱲᱤ ᱦᱚᱯᱚᱱᱟᱜ ᱥᱟᱹᱜᱟᱹᱭ ᱥᱮ ᱵᱚᱭᱦᱟ ᱢᱤᱥᱨᱟᱣᱟᱜ ᱜᱟᱹᱦᱤᱨ ᱥᱟᱹᱜᱟᱹᱭ ᱨᱮᱱᱟᱜ ᱪᱤᱛᱟᱨ ᱧᱮᱞᱚᱜᱼᱟ᱾ ᱱᱚᱣᱟ ᱫᱚ ᱫᱩᱞᱟᱹᱲ ᱨᱮᱱᱟᱜ ᱥᱟᱹᱜᱟᱹᱭ, ᱫᱟᱭᱤᱛᱛᱚ ᱨᱮᱱᱟᱜ ᱥᱟᱹᱜᱟᱹᱭ᱾ ᱦᱚᱲ ᱦᱚᱯᱚᱱᱟᱜ ᱥᱟᱶᱛᱟ ᱟᱹᱨᱤ ᱞᱮᱠᱟᱛᱮ ᱜᱤ ᱠᱩᱲᱤ ᱦᱚᱯᱚᱱ ᱫᱚ ᱟᱯᱟᱛᱟᱜ ᱡᱚᱢᱤ ᱦᱟᱹᱴᱤᱧ ᱵᱟᱠᱚ ᱧᱟᱢᱟ᱾ ᱚᱱᱟᱛᱮ ᱦᱚᱯᱚᱱ ᱠᱳ ᱪᱮᱛᱟᱱ ᱵᱟᱵᱟᱣᱟᱜ ᱟᱫᱮᱥ ᱛᱟᱦᱮᱱᱟ ᱦᱚᱯᱚᱱᱮᱨᱟᱣᱟᱜ ᱟᱯᱚᱫᱽ ᱵᱤᱯᱚᱫᱽ ᱨᱮ ᱜᱚᱸᱲᱚ ᱛᱟᱦᱮᱱ ᱨᱮᱱᱟᱜ᱾ ᱡᱚᱛᱚ ᱞᱮᱠᱟᱱ ᱯᱚᱨᱚᱵᱽ ᱯᱩᱱᱟᱹᱭ ᱨᱮ ᱦᱚᱯᱚᱱᱮᱨᱟ ᱢᱤᱥᱨᱟ ᱟᱨ ᱩᱱᱠᱩ ᱨᱮᱱ ᱡᱟᱣᱟᱭ ᱠᱳ ᱱᱮᱣᱟᱛᱟ ᱠᱳ᱾ ᱢᱟᱱ ᱢᱟᱱᱚᱛ ᱠᱳ᱾ ᱦᱚᱲ ᱦᱚᱯᱚᱱ ᱫᱚ ᱡᱩᱜᱽ ᱡᱩᱜᱽ ᱱᱚᱣᱟ ᱟᱫᱮᱥ ᱵᱩ ᱢᱟᱱᱟᱣ ᱟᱹᱜᱩ ᱟᱠᱟᱫᱟ᱾ ᱚᱱᱟᱛᱮ ᱧᱮᱞᱚᱜᱼᱟ ᱦᱚᱲ ᱦᱚᱯᱚᱱᱟᱜ ᱥᱟᱶᱛᱟ ᱨᱮ ᱫᱚ ᱵᱚᱭᱦᱟ ᱢᱤᱥᱨᱟ ᱥᱟᱹᱜᱟᱹᱭ ᱟᱹᱰᱤ ᱜᱟᱹᱦᱤᱨ ᱟᱨ ᱠᱮᱴᱮᱡᱼᱟ᱾ ᱟᱨ ᱚᱠᱚᱭ ᱠᱳ ᱱᱚᱣᱟ ᱱᱤᱭᱚᱢ ᱵᱟᱨᱦᱮ ᱠᱳ ᱪᱟᱞᱟᱣ ᱟᱠᱟᱱ ᱩᱱᱠᱩ ᱛᱟᱞᱟ ᱨᱮ ᱵᱚᱭᱦᱟ ᱢᱤᱥᱨᱟ ᱥᱟᱹᱜᱟᱹᱭ ᱫᱚ ᱛᱚᱯᱟᱜᱚᱜ ᱠᱟᱱᱟ᱾

ᱥᱚᱦᱨᱟᱭ ᱛᱟᱞᱟ ᱛᱮ ᱟᱨᱦᱚᱸ ᱥᱟᱢᱟᱝᱚᱜᱼᱟ ᱢᱚᱦᱟᱵᱤᱥᱥᱚ, ᱫᱷᱟᱹᱨᱛᱤ ᱟᱨ ᱢᱟᱱᱣᱟ ᱥᱤᱨᱡᱳᱱ ᱨᱮᱱᱟᱜ ᱱᱟᱜᱟᱢ᱾ ᱦᱚᱲ ᱦᱚᱯᱚᱱᱟᱜ ᱫᱷᱚᱨᱢ ᱨᱮ ᱢᱮᱱᱟᱜᱼᱟ, ᱯᱩᱭᱞᱩ ᱢᱟᱱᱢᱤ ᱠᱤᱱ ᱡᱟᱱᱟᱢ ᱞᱮᱱᱟ ᱦᱟᱸᱥ ᱦᱟᱺᱥᱞᱤ ᱪᱮᱬᱮᱭᱟᱜ ᱵᱤᱞᱤ ᱠᱷᱚᱱ᱾ ᱚᱱᱟᱛᱮ ᱜᱤ ᱜᱚᱴ ᱴᱟᱹᱱᱰᱤ ᱠᱷᱚᱱᱰ ᱨᱮ ᱫᱚ ᱵᱟᱨᱭᱟ ᱵᱤᱞᱤ ᱫᱚᱲᱚᱢ ᱦᱩᱭᱩᱜ ᱠᱟᱱᱟ᱾ ᱦᱟᱸᱥ ᱦᱟᱺᱥᱞᱤ ᱪᱮᱬᱮᱭᱟᱜ ᱵᱤᱞᱤ ᱠᱷᱚᱱ ᱢᱟᱱᱢᱤ ᱥᱤᱨᱡᱳᱱ ᱫᱚ ᱱᱟᱦᱟᱜ ᱥᱟᱬᱮᱥ ᱨᱮᱱᱟᱜ ᱵᱤᱵᱚᱨᱛᱚᱱᱵᱟᱫᱽ ᱥᱮ ᱮᱵᱷᱩᱞᱩᱥᱚᱱ ᱨᱮᱱᱟᱜ ᱪᱤᱛᱟᱹᱨ ᱥᱚᱫᱚᱨᱚᱜ ᱠᱟᱱᱟ᱾ ᱜᱚᱴ ᱴᱟᱹᱱᱰᱤ ᱨᱮᱱᱟᱜ ᱜᱩᱞᱟᱹᱴ ᱠᱷᱚᱱ ᱫᱚ ᱜᱩᱞᱟᱹᱴ ᱫᱷᱟᱹᱨᱛᱤ ᱨᱮᱱᱟᱜ ᱪᱤᱛᱟᱹᱨᱮ ᱥᱚᱫᱚᱨ ᱮᱫᱟ᱾ ᱜᱩᱞᱟᱹᱴ ᱠᱷᱚᱱᱰ ᱛᱟᱞᱟ ᱨᱮ ᱢᱤᱫ ᱪᱩᱨᱩᱡ ᱪᱟᱣᱞᱮ ᱫᱚ ᱵᱤᱜᱽᱵᱮᱝ ᱫᱟᱨᱟᱭ ᱛᱮ ᱥᱤᱨᱡᱳᱱ ᱟᱠᱟᱱ ᱱᱚᱣᱟ ᱢᱚᱦᱟᱵᱤᱥᱥᱚ ᱨᱮᱱᱟᱜ ᱪᱤᱛᱟᱹᱨ ᱥᱚᱫᱚᱨᱚᱜ ᱠᱟᱱᱟ᱾

ᱱᱟᱦᱟᱜ ᱥᱟᱬᱮᱥ ᱥᱟᱶ ᱱᱚᱣᱟ ᱠᱳ ᱨᱮᱱᱟᱜ ᱡᱩᱨᱤ ᱫᱚ ᱮᱝᱠᱟᱛᱮ ᱫᱚ ᱵᱟᱝ ᱦᱩᱭ ᱟᱠᱟᱱᱟ᱾ ᱥᱮᱫᱟᱭ ᱠᱷᱚᱱ ᱯᱟᱧᱡᱟ ᱦᱮᱡ ᱟᱠᱟᱱ ᱱᱚᱣᱟ ᱟᱹᱨᱤᱪᱟᱹᱞᱤ ᱫᱚ ᱱᱚᱣᱟ ᱜᱤᱭ ᱥᱚᱫᱚᱨ ᱮᱫᱟ ᱡᱮ, ᱟᱵᱩ ᱨᱮᱱ ᱦᱟᱯᱲᱟᱢ ᱠᱳ ᱫᱚ ᱟᱹᱠᱤᱞ ᱟᱨ ᱥᱟᱬᱮᱥ ᱠᱳ ᱪᱟᱨᱪᱟ ᱟᱠᱟᱫᱟ᱾ ᱟᱫᱚ ᱟᱭᱢᱟ ᱴᱚᱴᱷᱟ ᱨᱮ ᱟᱭᱢᱟ ᱞᱮᱠᱟᱱ ᱠᱷᱚᱱᱰ ᱧᱮᱞᱚᱜ ᱠᱟᱱ ᱜᱮᱭᱟ᱾ ᱢᱮᱱᱠᱷᱟᱱ ᱚᱱᱟᱠᱩ ᱫᱚ ᱪᱮᱫᱟ ᱚᱱᱠᱟ ᱦᱩᱭ ᱟᱠᱟᱱᱟ ᱚᱱᱟ ᱨᱮᱱᱜᱟ ᱡᱚᱛᱷᱟᱛ ᱛᱮᱞᱟ ᱫᱚ ᱵᱟᱝ ᱧᱟᱢ ᱟᱠᱟᱱᱟ᱾ ᱯᱟᱥᱮᱡ ᱡᱩᱜᱽ ᱡᱩᱜᱽ ᱦᱚᱲ ᱦᱚᱯᱚᱱ ᱫᱚ ᱦᱟᱹᱨᱤᱡ ᱯᱟᱹᱥᱤᱨ ᱵᱩ ᱛᱟᱦᱮ ᱠᱟᱱ ᱠᱷᱟᱹᱛᱤᱨ ᱛᱮ ᱟᱹᱨᱤᱪᱟᱹᱞᱤ ᱠᱩ ᱦᱚᱸ ᱦᱟᱹᱨᱤᱡ ᱯᱟᱹᱥᱤᱨ ᱟᱠᱟᱱᱟ᱾

ᱢᱤᱫᱼᱴᱮᱱ ᱢᱟᱱᱣᱟ ᱵᱟᱧᱪᱟᱣ ᱵᱷᱳᱨ ᱟᱡ ᱨᱮᱱ ᱦᱟᱯᱲᱟᱢ ᱠᱳ ᱴᱷᱮᱱ ᱠᱨᱤᱛᱚᱜᱜᱚ ᱛᱟᱦᱮᱱ ᱩᱪᱤᱛ ᱛᱟᱭ᱾ ᱪᱮᱫᱟᱜ ᱥᱮ ᱦᱟᱯᱲᱟᱢ ᱵᱮᱜᱚᱨ ᱚᱠᱚᱭ ᱜᱤ ᱵᱟᱵᱩᱱ ᱡᱟᱱᱟᱢ ᱠᱚᱜᱼᱟ᱾ ᱥᱤᱥᱤᱨᱡᱟᱹᱣᱤᱡ ᱴᱷᱟᱹᱠᱩᱨ ᱯᱩᱭᱞ ᱢᱟᱱᱢᱤ ᱦᱚᱲᱢᱚ ᱨᱮ ᱚᱠᱟ ᱡᱤᱣᱤ ᱵᱟᱹᱛᱤᱭ ᱡᱩᱞ ᱞᱮᱜ, ᱚᱱᱟ ᱫᱚ ᱦᱟᱯᱲᱟᱢ ᱠᱳ ᱛᱟᱞᱟ ᱛᱮ ᱟᱵᱩᱣᱟᱜ ᱦᱚᱲᱢᱚ ᱨᱮ ᱦᱮᱡ ᱟᱠᱟᱱᱟ᱾ ᱚᱱᱟ ᱡᱤᱣᱤ ᱫᱚ ᱥᱤᱥᱤᱨᱡᱟᱹᱣᱤᱡ ᱴᱷᱟᱹᱠᱩᱨᱟᱜ ᱦᱤᱸᱥ ᱠᱟᱱᱟ᱾ ᱟᱵᱩ ᱫᱚ ᱴᱷᱟᱹᱠᱩᱨ ᱡᱤᱣ ᱵᱟᱵᱩ ᱧᱮᱞ ᱟᱠᱟᱫᱤᱭᱟ᱾ ᱦᱟᱯᱲᱟᱢ ᱟᱨ ᱵᱚᱝᱜᱟᱵᱩᱨᱩ ᱢᱟᱱᱟᱣ ᱵᱟᱛᱟᱣ ᱫᱟᱨᱟᱭ ᱛᱮ ᱜᱤ ᱟᱵᱩ ᱫᱚ ᱴᱷᱟᱹᱠᱩᱨ ᱥᱟᱶ ᱥᱟᱜᱟᱹᱭ ᱵᱩ ᱡᱚᱲᱟᱣᱟ᱾ ᱚᱱᱟᱛᱮ ᱜᱤ ᱟᱵᱩ ᱦᱚᱲ ᱦᱚᱯᱚᱱ ᱫᱚ ᱥᱚᱦᱨᱟᱭ ᱥᱮ ᱡᱚᱛᱚ ᱞᱮᱠᱟᱱ ᱯᱚᱨᱚᱵᱽ ᱯᱩᱱᱟᱹᱭ ᱨᱮ ᱢᱟᱨᱟᱝᱵᱩᱨᱩ ᱟᱨ ᱦᱟᱯᱲᱟᱢ ᱫᱤᱥᱟᱹ ᱛᱮ ᱦᱟᱹᱰᱤ ᱟᱨ ᱡᱚᱢᱟᱜ ᱠᱳ ᱦᱚᱸ ᱡᱚᱢ ᱞᱟᱜᱟ ᱨᱮ ᱵᱩ ᱦᱟᱹᱨᱤᱡᱟ᱾ ᱚᱱᱟ ᱛᱟᱭᱚᱢ ᱟᱵᱩ ᱵᱩ ᱡᱚᱢ ᱧᱩᱭᱟ᱾

ᱡᱚᱛᱚ ᱟᱛᱩ ᱜᱤ ᱟᱯᱱᱟᱨ ᱥᱩᱵᱤᱫᱷᱟ ᱞᱮᱠᱟᱱ ᱚᱠᱛᱚ ᱨᱮ ᱥᱚᱦᱨᱟᱭ ᱥᱮ ᱮᱴᱟᱜ ᱯᱚᱨᱚᱵᱽ ᱯᱩᱱᱟᱹᱭ ᱵᱩ ᱢᱟᱱᱟᱣᱟ᱾ ᱚᱱᱟᱛᱮ ᱜᱤ ᱮᱴᱟᱜ ᱟᱛᱩ ᱥᱟᱶ ᱥᱚᱦᱨᱟ ᱥᱮ ᱯᱚᱨᱚᱵᱽ ᱯᱩᱱᱟᱹᱭ ᱛᱷᱚᱲᱟ ᱫᱤᱱ ᱞᱟᱦᱟ ᱛᱟᱭᱚᱢᱚᱜᱼᱟ᱾ ᱱᱚᱣᱟ ᱞᱟᱦᱟ ᱛᱟᱭᱚᱢ ᱠᱟᱨᱚᱢ ᱛᱮ ᱜᱤ ᱟᱵᱩᱣᱟᱜ ᱯᱮᱲᱟ ᱥᱟᱹᱜᱟᱹᱭ ᱠᱮᱴᱮᱡ ᱢᱮᱱᱟᱜᱼᱟ᱾ ᱦᱚᱯᱚᱱᱮᱨᱟ ᱢᱤᱥᱨᱟ ᱠᱳ ᱟᱠᱚ ᱟᱛᱩ ᱨᱮᱱᱟᱜ ᱥᱚᱦᱨᱟᱭ ᱢᱩᱪᱟᱹᱫ ᱠᱟᱛᱮᱜ ᱟᱨ ᱵᱟᱝᱠᱷᱟᱱ ᱞᱟᱦᱟ ᱨᱮ ᱵᱟᱵᱟ ᱥᱮ ᱵᱚᱭᱦᱟ ᱚᱲᱟᱦ ᱯᱮᱲᱟᱜ ᱠᱳ ᱦᱮᱡ ᱥᱮᱱ ᱫᱟᱲᱮᱜ ᱠᱟᱱᱟ᱾ ᱥᱮᱫᱟᱭ ᱜᱟᱛᱮ ᱠᱳ ᱥᱟᱶ ᱮᱱᱮᱡ ᱥᱤᱨᱤᱧ ᱟᱨ ᱨᱟᱹᱥᱠᱟᱹ ᱨᱮ ᱠᱳ ᱥᱮᱞᱮᱫ ᱫᱟᱲᱮᱜ ᱠᱟᱱᱟ᱾ ᱞᱟᱦᱟ ᱛᱟᱭᱚᱢ ᱚᱠᱛᱚ ᱨᱮ ᱵᱟᱵᱩ ᱯᱚᱨᱚᱵᱽ ᱞᱮᱱ ᱠᱷᱟᱱ ᱱᱚᱣᱟ ᱫᱚ ᱵᱟᱝ ᱦᱩᱭ ᱫᱟᱲᱮ ᱠᱚᱜᱼᱟ᱾ ᱮᱱᱟᱹ ᱪᱟᱲᱟ ᱠᱟᱛᱮᱜ ᱦᱚᱸ ᱪᱟᱸᱫᱚ ᱧᱮᱞ ᱠᱟᱛᱮᱜ ᱥᱚᱦᱨᱟᱭ ᱥᱮ ᱯᱚᱨᱚᱵᱽ ᱢᱟᱱᱟᱣ ᱛᱟᱞᱟᱛᱮ ᱟᱵᱩ ᱦᱚᱲ ᱦᱚᱯᱚᱱ ᱫᱚ ᱯᱨᱚᱠᱨᱤᱛᱤ ᱥᱟᱶ ᱦᱚᱸ ᱟᱵᱩᱣᱟᱜ ᱥᱟᱹᱜᱟᱹᱭ ᱵᱩ ᱡᱚᱲᱟᱣ ᱫᱚᱦᱚ ᱠᱟᱜ ᱠᱟᱱᱟ᱾

ᱮᱱᱨᱮᱦᱚᱸ ᱟᱵᱩ ᱥᱟᱶᱛᱟ ᱨᱮᱱ ᱟᱭᱢᱟ ᱦᱚᱲ ᱜᱤ ᱥᱚᱨᱠᱟᱨᱤ ᱪᱷᱩᱴᱤ ᱧᱟᱢ ᱠᱷᱟᱹᱛᱤᱨ ᱢᱤᱫ ᱫᱤᱱ ᱛᱮ ᱯᱚᱨᱚᱵᱽ ᱢᱟᱱᱟᱣ ᱨᱮᱱᱟᱜ ᱠᱟᱛᱷᱟ ᱠᱳ ᱢᱮᱱ ᱮᱫᱟ᱾ ᱚᱱᱟ ᱦᱩᱭ ᱞᱮᱱ ᱠᱷᱟᱱ ᱟᱵᱩ ᱦᱚᱲ ᱥᱚᱢᱟᱡᱽ ᱨᱮ ᱯᱮᱲᱟ ᱦᱚᱲᱚᱜ ᱞᱮᱠᱟᱱ ᱱᱟᱯᱟᱭ ᱟᱹᱨᱤ ᱪᱟᱵᱟᱜᱼᱟ᱾ ᱯᱮᱲᱟ ᱥᱟᱹᱜᱟᱹᱭ ᱨᱟᱹᱯᱩᱫᱚᱜᱼᱟ᱾ ᱥᱟᱶᱛᱟ ᱟᱨ ᱫᱷᱚᱨᱚᱢ ᱨᱮ ᱟᱭᱢᱟ ᱞᱮᱠᱟᱱ ᱟᱱᱟᱴ ᱛᱮᱭᱟᱨᱚᱜᱼᱟ᱾ ᱪᱷᱩᱴᱤ ᱦᱟᱛᱟᱣ ᱨᱮᱱᱟᱜ ᱟᱱᱟᱴ ᱫᱚ ᱮᱴᱟᱜ ᱞᱮᱠᱟᱛᱮ ᱵᱩ ᱥᱚᱞᱦᱟ ᱫᱟᱲᱮ ᱠᱮᱭᱟ᱾ ᱥᱚᱨᱠᱟᱨ ᱵᱩ ᱵᱩᱡᱽᱦᱟᱹᱣ ᱟᱭᱟ ᱟᱞᱮ ᱦᱚᱲ ᱦᱚᱯᱚᱱ ᱫᱚ ᱠᱟᱨᱛᱤ/ᱯᱩᱥ ᱪᱟᱸᱫᱚ ᱞᱮ ᱥᱚᱦᱨᱟᱭᱟ᱾ ᱱᱚᱣᱟ ᱚᱠᱛᱚ ᱥᱚᱨᱠᱟᱨᱤ ᱱᱩᱠᱷᱨᱤᱭᱟᱱ ᱦᱚᱲ ᱦᱚᱯᱚᱱ ᱫᱚ ᱟᱭᱟᱜ ᱥᱩᱵᱤᱫᱷᱟ ᱞᱮᱠᱟ ᱯᱚᱨᱚᱵᱽ ᱵᱟᱠᱷᱨᱟ ᱪᱷᱩᱴᱤ ᱮᱢᱟᱭ ᱢᱟ᱾ ᱮᱱᱠᱷᱟᱱ ᱜᱤ ᱥᱚᱨᱠᱟᱨᱟᱜ ᱠᱮᱞᱮᱱᱰᱟᱨ ᱨᱮ ᱠᱟᱨᱛᱤᱠ/ᱯᱩᱥ ᱢᱟᱥ ᱫᱚ ᱥᱚᱦᱨᱟᱭ ᱵᱟᱠᱷᱨᱟ ᱪᱤᱱᱦᱟᱹ ᱛᱟᱦᱮᱱᱟ᱾

ᱢᱩᱪᱟᱹᱫ -

ᱢᱩᱪᱟᱹᱫ ᱨᱮ ᱱᱚᱣᱟ ᱜᱤ ᱢᱮᱱᱚᱜᱼᱟ ᱥᱚᱦᱨᱟᱭ ᱫᱚ ᱦᱚᱲ ᱦᱚᱯᱚᱱ ᱥᱮ ᱥᱟᱱᱛᱟᱞ ᱠᱚᱣᱟᱜ ᱱᱟᱜᱟᱢ, ᱥᱮᱨᱣᱟ, ᱫᱷᱚᱨᱚᱢ ᱟᱨ ᱞᱟᱠᱪᱟᱨᱮ ᱥᱚᱫᱚᱨᱟ᱾ ᱟᱵᱩᱣᱟᱜ ᱩᱯᱨᱩᱢ ᱥᱟᱵ ᱨᱟᱠᱟᱵᱚᱜᱼᱟ᱾ ᱡᱟᱦᱟ ᱨᱮ ᱫᱚ ᱢᱟᱱᱣᱟ ᱥᱚᱵᱵᱷᱚᱛᱟ ᱨᱮᱱᱟᱜ ᱫᱚᱨᱥᱚᱱ ᱧᱟᱢᱚᱜᱼᱟ᱾ ᱯᱟᱥᱮᱡ ᱚᱠᱛᱚ ᱠᱟᱨᱚᱢ ᱛᱮ ᱥᱚᱦᱨᱟᱭ ᱢᱟᱱᱟᱣ ᱴᱚᱴᱷᱟᱠᱤᱭᱟᱹ ᱦᱟᱱᱛᱮ ᱱᱟᱛᱮ ᱟᱠᱟᱱᱟ, ᱢᱮᱱᱠᱷᱟᱱ ᱥᱚᱦᱨᱟᱭ ᱨᱮᱱᱟᱜ ᱵᱩᱴᱟᱹ ᱫᱚ ᱢᱤᱫ ᱜᱤ ᱛᱟᱵᱩᱱᱟ᱾ ᱮᱱᱠᱷᱟᱱ ᱤᱱᱯᱷᱚᱨᱢᱮᱥᱚᱱ ᱟᱨ ᱴᱮᱠᱱᱚᱞᱚᱡᱤ ᱨᱮᱱᱟᱜ ᱱᱚᱣᱟ ᱡᱩᱜᱽ ᱨᱮ ᱜᱚᱴᱟ ᱫᱷᱟᱹᱨᱛᱤ ᱨᱮᱱ ᱥᱟᱱᱛᱟᱞ ᱛᱟᱞᱟ ᱨᱮ ᱥᱟᱹᱜᱟᱹᱭ ᱛᱮᱭᱟᱨ ᱨᱩᱣᱟᱹᱲᱚᱜ ᱠᱟᱱᱟ᱾ ᱚᱱᱟᱛᱮ ᱢᱤᱫ ᱚᱠᱛᱮ ᱫᱚ ᱱᱚᱣᱟ ᱦᱟᱹᱨᱤᱡ ᱯᱟᱹᱥᱤᱨ ᱦᱚᱸ ᱵᱟᱝ ᱛᱟᱦᱮᱱᱟ᱾ ᱜᱚᱴᱟ ᱫᱷᱟᱹᱨᱛᱤ ᱨᱮᱱ ᱦᱚᱲ ᱦᱚᱯᱚᱱ ᱟᱨᱦᱚᱸ ᱠᱮᱴᱮᱡ ᱛᱮ ᱵᱩ ᱛᱚᱞ ᱢᱤᱫᱩᱜᱼᱟ᱾ ᱟᱨ ᱚᱠᱚᱭᱠᱩ ᱥᱚᱦᱨᱟᱭ ᱠᱷᱚᱱ ᱠᱩ ᱚᱪᱚᱜ ᱟᱠᱟᱱ ᱥᱮ ᱠᱩ ᱛᱚᱯᱟᱜ ᱟᱠᱟ ᱩᱱᱠᱩ ᱫᱚ ᱦᱚᱲ ᱦᱚᱯᱚᱱ ᱥᱮ ᱥᱟᱱᱛᱟᱞ ᱩᱯᱨᱩᱢ ᱠᱩ ᱟᱫᱟ᱾

ᱯᱷᱮᱰᱮᱛ -

᱑ᱹ ᱡᱚᱢᱥᱤᱢ ᱵᱤᱱᱛᱤ - ᱥᱳᱢᱟᱭ ᱠᱤᱥᱠᱩ

᱒ᱹ The culture and philosophy of Santal - Bhogla Soren

᱓ᱹ ᱦᱚᱲᱠᱳᱨᱮᱱ ᱢᱟᱨ ᱦᱟᱯᱲᱟᱢᱠᱳ ᱨᱮᱭᱟᱜ ᱠᱟᱛᱷᱟ - ᱠᱚᱞᱮᱭᱟᱱ ᱦᱟᱲᱟᱢ

᱔ᱹ ᱡᱟᱦᱮᱨ ᱵᱚᱸᱜᱟ ᱥᱟᱱᱛᱟᱲ ᱠᱚ - ᱨᱟᱢᱮᱥᱥᱚᱨ ᱢᱩᱨᱢᱩ(ᱟᱹᱫᱤᱢ ᱥᱟᱱᱛᱟᱲ)

᱕ᱹ ᱤᱥᱨᱚᱲ - ᱥᱟᱫᱷᱩ ᱨᱟᱢᱪᱟᱸᱫ ᱢᱩᱨᱢᱩ

᱖ᱹ Santhali a natural language - Dr. P. C. Hembram