ᱦᱚᱲ ᱦᱚᱯᱚᱱᱟᱜ ᱫᱷᱚᱨᱚᱢ ᱩᱯᱨᱩᱢ
ᱮᱴᱟᱜ ᱟᱭᱢᱟ ᱡᱟᱹᱛ ᱜᱤ ᱠᱳ ᱢᱚᱱᱮᱭᱟ ᱟᱵᱩ ᱦᱚᱲ ᱦᱚᱯᱚᱱ ᱥᱮ ᱥᱟᱱᱛᱟᱞᱟᱜ ᱫᱚ ᱫᱷᱚᱨᱚᱢ ᱵᱟᱹᱱᱩᱜ ᱛᱟᱵᱩᱱᱟ᱾ ᱟᱵᱩ ᱨᱮᱱ ᱟᱭᱢᱟ ᱦᱚᱲ ᱦᱚᱸ ᱵᱟᱠᱩ ᱵᱟᱰᱟᱭᱟ ᱟᱵᱩᱣᱟᱜ ᱫᱷᱚᱨᱚᱢ ᱨᱮᱱᱟᱜ ᱧᱩᱛᱩᱢ ᱪᱮᱫ᱾ ᱢᱮᱱᱠᱷᱟᱱ ᱦᱚᱲ ᱦᱚᱯᱚᱱᱟᱜ ᱥᱟᱶᱛᱟ ᱡᱩᱫᱤ ᱥᱩᱨ ᱠᱷᱚᱱᱮᱢ ᱧᱮᱞ ᱞᱮᱠᱷᱟᱱ; ᱱᱟᱜᱟᱢ, ᱥᱮᱨᱣᱟ ᱟᱨ ᱞᱟᱠᱪᱟᱨᱮᱢ ᱥᱟᱞᱟ ᱜᱚᱴᱟ ᱞᱮᱠᱷᱟᱱ; ᱮᱱᱠᱷᱟᱱᱮᱢ ᱧᱮᱞ ᱧᱟᱢᱟ ᱟᱵᱩ ᱦᱚᱲ ᱦᱚᱯᱚᱱ ᱫᱚ ᱟᱹᱰᱤ ᱥᱮᱫᱟᱭ ᱠᱷᱚᱱ ᱜᱤ ᱫᱷᱚᱨᱚᱢ ᱵᱩ ᱯᱟᱧᱡᱟ ᱟᱹᱜᱩ ᱮᱫᱟ᱾ ᱧᱮᱛᱚᱜ ᱦᱚᱸ ᱵᱩᱱ ᱯᱟᱧᱡᱟ ᱠᱟᱱ ᱜᱤᱭᱟ᱾
ᱮᱱᱠᱷᱟᱱ ᱪᱮᱫᱟᱜ ᱠᱩᱠᱞᱤ ᱨᱟᱠᱟᱵᱚᱜ ᱠᱟᱱᱟ ᱡᱮ, ᱦᱚᱲ ᱦᱚᱯᱚᱱ ᱥᱮ ᱥᱟᱱᱛᱟᱞᱟᱜ ᱫᱚ ᱫᱷᱚᱨᱚᱢ ᱢᱮᱱᱟᱜᱼᱟ ᱥᱮ ᱵᱟᱝ᱾ ᱪᱮᱫᱟᱜ ᱮᱴᱟᱜ ᱠᱳ ᱠᱳ ᱢᱚᱱᱮ ᱮᱫᱟ ᱦᱚᱲ ᱦᱚᱯᱚᱱᱟᱜ ᱫᱷᱚᱨᱚᱢ ᱵᱟᱹᱱᱩᱜᱼᱟ? ᱥᱮ ᱟᱭᱢᱟ ᱦᱚᱲ ᱦᱚᱯᱚᱱ ᱜᱤ ᱠᱩᱞᱤ ᱞᱤᱠᱩ ᱠᱷᱟᱱ ᱟᱯᱱᱟᱨᱟᱜ ᱫᱷᱚᱨᱚᱢ ᱵᱟᱨᱮ ᱛᱮ ᱥᱟᱯᱷᱟ ᱛᱮ ᱪᱮᱫ ᱦᱚᱸ ᱵᱟᱠᱩ ᱞᱟᱹᱭ ᱫᱟᱲᱮᱜᱼᱟ ᱪᱮᱫᱟᱜ?
ᱱᱚᱣᱟ ᱠᱩᱠᱞᱤ ᱨᱮᱱᱟᱜ ᱛᱮᱞᱟ ᱫᱚ ᱦᱩᱭᱩᱜ ᱠᱟᱱᱟ, ᱟᱹᱰᱤ ᱥᱮᱫᱟᱭ ᱠᱷᱚᱱ ᱦᱚᱲ ᱦᱚᱯᱚᱱ ᱫᱚ ᱫᱷᱚᱨᱚᱢ ᱵᱩ ᱢᱟᱱᱟᱣ ᱟᱹᱜᱩᱭᱮᱫ ᱠᱟᱱ ᱨᱮᱦᱚᱸ ᱫᱷᱚᱨᱚᱢ ᱨᱮᱱᱟᱜ ᱢᱤᱫᱼᱴᱮᱱ ᱧᱩᱛᱩᱢ ᱞᱟᱜᱟᱜ ᱚᱱᱟ ᱫᱚ ᱵᱟᱵᱩᱱ ᱩᱭᱦᱟᱹᱨ ᱟᱠᱟᱫᱟ᱾ ᱚᱱᱟ ᱛᱮ ᱡᱟᱦᱟᱸᱭ ᱦᱚᱲ ᱦᱚᱯᱚᱱᱮᱢ ᱠᱩᱞᱤ ᱞᱮᱠᱷᱟᱱ, ᱟᱢᱟᱜ ᱫᱷᱚᱨᱚᱢ ᱪᱮᱫ? ᱥᱮ ᱟᱢᱟᱜ ᱫᱷᱚᱨᱚᱢ ᱨᱮᱱᱟᱜ ᱧᱩᱛᱩᱢ ᱪᱮᱫ? ᱮᱱᱠᱷᱟᱱ ᱩᱤ ᱦᱚᱲ ᱦᱚᱯᱚᱱ ᱫᱚ ᱟᱹᱰᱤ ᱢᱩᱥᱠᱤᱞ ᱨᱮᱭ ᱯᱟᱲᱟᱜᱼᱟ ᱪᱮᱫ ᱛᱮᱞᱟᱭ ᱮᱢᱟ ᱢᱮᱱᱛᱮ᱾ ᱟᱭᱢᱟ ᱦᱚᱲ ᱦᱚᱯᱚᱱ ᱜᱤ ᱟᱵᱩᱣᱟᱜ ᱵᱚᱝᱜᱟ ᱵᱩᱨᱩ ᱥᱟᱶ ᱦᱤᱱᱫᱩ ᱠᱩᱣᱟᱜ ᱯᱩᱡᱟ ᱨᱮᱱᱟᱜ ᱱᱟᱥᱮ ᱡᱩᱨᱤ ᱧᱮᱞ ᱛᱮ ᱠᱳ ᱢᱮᱱᱟ ᱟᱵᱩᱣᱟᱜ ᱫᱷᱚᱨᱚᱢ ᱦᱚᱸ ᱦᱤᱱᱫᱩ ᱥᱮ ᱥᱚᱱᱟᱛᱚᱱ ᱫᱷᱚᱨᱚᱢ ᱠᱟᱱᱟ᱾ ᱢᱮᱱᱠᱷᱟᱱ ᱱᱚᱣᱟ ᱫᱚ ᱪᱮᱫ ᱡᱚᱛᱷᱟᱛᱟ?
ᱟᱨ ᱦᱚᱲ ᱦᱚᱯᱚᱱ ᱫᱷᱚᱨᱚᱢ ᱧᱩᱛᱩᱢ ᱵᱟᱝ ᱞᱟᱹᱭ ᱫᱟᱲᱮ ᱨᱮᱱᱟᱜ ᱯᱷᱟᱭᱫᱟ ᱠᱳ ᱦᱟᱛᱟᱣ ᱟᱠᱟᱫᱟ ᱫᱷᱚᱨᱚᱢ ᱵᱮᱯᱟᱨᱤ ᱠᱳ᱾ ᱩᱱᱠᱩ ᱦᱚᱲ ᱦᱚᱯᱚᱱ ᱠᱳ ᱵᱩᱡᱽᱦᱟᱹᱣ ᱟᱠᱟᱫ ᱠᱩᱣᱟ ᱟᱯᱮᱭᱟᱜ ᱫᱷᱚᱨᱚᱢ ᱵᱟᱹᱱᱩᱜᱼᱟ᱾ ᱫᱷᱚᱨᱚᱢ ᱛᱟᱦᱮᱱ ᱠᱷᱟᱱ ᱚᱱᱟ ᱨᱮᱱᱟᱜ ᱧᱩᱛᱩᱢ ᱪᱮᱫᱟᱜ ᱵᱟᱯᱮ ᱞᱟᱹᱭ ᱫᱟᱲᱮᱜ ᱠᱟᱱᱟ? ᱱᱚᱝᱠᱟ ᱫᱷᱚᱨᱚᱢ ᱧᱩᱛᱩᱢ ᱵᱟᱝ ᱞᱟᱹᱭ ᱫᱟᱲᱮ ᱨᱮᱱᱟᱜ ᱫᱟᱶ ᱦᱟᱛᱟᱣ ᱠᱟᱛᱮᱜ ᱫᱷᱚᱨᱚᱢ ᱵᱮᱯᱟᱨᱤ ᱠᱳ ᱟᱠᱚᱣᱟᱜ ᱫᱷᱚᱨᱚᱢ ᱨᱮ ᱠᱳ ᱩᱪᱟᱹᱲᱮᱫ ᱵᱩᱱᱟ᱾ ᱟᱨ ᱚᱠᱚᱭᱠᱩ ᱵᱟᱵᱩ ᱩᱪᱟᱹᱲᱚᱜ ᱠᱟᱱ ᱩᱱᱠᱩ ᱫᱚ ᱠᱩ ᱢᱮᱛᱟᱜ ᱵᱩᱱᱟ ᱵᱮᱫᱤᱱ ᱥᱮ ᱵᱮ ᱫᱷᱚᱨᱚᱢᱟᱱ ᱦᱚᱲ᱾
ᱫᱷᱚᱨᱢ ᱢᱮᱱᱛᱮ ᱡᱩᱫᱤ ᱢᱟᱱᱣᱟᱣᱟᱜ ᱫᱷᱚᱨᱚᱢ ᱥᱮ ᱢᱟᱱᱚᱵᱚᱛᱟ ᱵᱩᱱ ᱢᱮᱱ ᱠᱷᱟᱱ ᱚᱱᱟ ᱫᱚ ᱡᱚᱛᱚ ᱢᱟᱱᱣᱟ ᱨᱮ ᱜᱤ ᱰᱷᱤᱨ ᱥᱮ ᱱᱟᱥᱮ ᱢᱮᱱᱟᱜᱼᱟ᱾ ᱢᱟᱱᱣᱟᱣᱟᱜ ᱱᱚᱣᱟ ᱫᱷᱚᱨᱚᱢ ᱞᱟᱹᱜᱤᱫ ᱫᱚ ᱫᱷᱚᱨᱢ ᱴᱷᱟᱶ ᱵᱟᱝ ᱡᱟᱹᱨᱩᱲᱟ᱾ ᱢᱮᱱᱠᱷᱟᱱ ᱰᱷᱤᱨ ᱵᱷᱟᱜ ᱦᱚᱲ ᱜᱤ ᱫᱷᱚᱨᱚᱢ ᱢᱮᱱᱛᱮ ᱚᱠᱟ ᱵᱩ ᱵᱩᱡᱽᱦᱟᱹᱣ ᱚᱱᱟ ᱫᱚ ᱦᱩᱭᱩᱜ ᱠᱟᱱᱟ ᱵᱚᱝᱜᱟ ᱵᱩᱨᱩ ᱥᱮ ᱥᱤᱥᱤᱨᱡᱟᱹᱣᱤᱡ ᱥᱟᱶ ᱛᱮ ᱥᱟᱹᱜᱟᱹᱭ ᱡᱚᱯᱲᱟᱣ ᱫᱷᱚᱨᱚᱢ᱾ ᱮᱴᱟᱜ ᱠᱩ ᱞᱮᱠᱟ ᱟᱵᱩ ᱦᱚᱲ ᱦᱚᱯᱚᱱᱟᱜ ᱦᱚᱸ ᱱᱚᱝᱠᱟᱱ ᱫᱷᱚᱨᱚᱢ ᱢᱮᱱᱟᱜ ᱛᱟᱵᱩᱱᱟ᱾ ᱟᱵᱩ ᱦᱚᱸ ᱥᱤᱥᱤᱨᱡᱟᱹᱣᱤᱡ ᱟᱨ ᱵᱚᱝᱜᱟ ᱵᱩᱨᱩ ᱵᱩ ᱫᱮᱣᱟᱥᱮᱣᱟ ᱠᱚᱣᱟ᱾ ᱫᱷᱚᱨᱚᱢ ᱴᱷᱟᱶ ᱡᱟᱦᱮᱨ ᱛᱷᱟᱱ ᱟᱨ ᱢᱟᱹᱧᱡᱽᱦᱤ ᱛᱷᱟᱱ ᱢᱮᱱᱟᱜ ᱛᱟᱵᱩᱱᱟ᱾ ᱫᱮᱞᱟ ᱦᱚᱲ ᱦᱚᱯᱚᱱᱟᱜ ᱫᱷᱚᱨᱚᱢ ᱵᱟᱨᱮ ᱛᱮ ᱱᱟᱥᱮ ᱵᱩ ᱵᱟᱰᱟᱭ ᱠᱟᱜ ᱞᱤᱜᱤ᱾
ᱟᱵᱩ ᱦᱚᱲ ᱦᱚᱯᱚᱱ ᱫᱚ ᱥᱤᱥᱤᱨᱡᱟᱹᱣᱤᱡ ᱟᱭᱚ ᱟᱨ ᱵᱟᱵᱟ ᱨᱩᱯ ᱴᱷᱟᱹᱠᱩᱨ ᱟᱨ ᱴᱷᱟᱹᱠᱨᱟᱹᱱ ᱱᱚᱣᱟ ᱵᱟᱨᱭᱟ ᱨᱩᱯ ᱛᱮ ᱵᱩ ᱢᱟᱱᱟᱣ ᱠᱤᱱᱟᱹ᱾ ᱱᱩᱠᱤᱱ ᱜᱤ ᱡᱚᱛᱚ ᱨᱮᱱ ᱥᱤᱥᱤᱨᱡᱟᱹᱣᱤᱡ᱾ ᱪᱟᱱᱫᱚ ᱵᱟᱵᱟ ᱢᱮᱱ ᱛᱮ ᱦᱚᱸ ᱵᱩ ᱢᱟᱱᱟᱣ ᱠᱤᱱᱟᱹ᱾ ᱢᱟᱨᱟᱝ ᱵᱩᱨᱩ ᱦᱩᱭᱩ ᱠᱟᱱᱟᱭ ᱟᱵᱩ ᱨᱮᱱᱟ ᱢᱟᱨᱟᱝ ᱵᱚᱝᱜᱟ᱾ ᱢᱟᱨᱟᱝ ᱵᱩᱨᱩ ᱜᱤ ᱟᱵᱩᱣᱟᱜ ᱡᱟᱱᱟᱢ ᱠᱷᱚᱱ ᱜᱚᱡᱚᱜ ᱨᱮᱱᱟᱜ ᱡᱚᱛᱚ ᱠᱟᱹᱢᱤ ᱦᱚᱨᱟᱭ ᱪᱤᱫ ᱟᱴᱚ ᱟᱠᱟᱫ ᱵᱩᱱᱟ᱾ ᱥᱟᱶ ᱨᱮ ᱢᱮᱱᱟᱜ ᱠᱩᱣᱟ ᱡᱟᱦᱮᱨ ᱟᱭᱚ ᱥᱮ ᱡᱟᱦᱮᱨ ᱵᱩᱰᱤ, ᱫᱷᱚᱨᱚᱢ ᱜᱚᱸᱥᱟᱭ ᱟᱨ ᱢᱚᱬᱮ ᱠᱚ ᱛᱩᱨᱩᱭ ᱠᱚ ᱵᱚᱝᱜᱟ ᱵᱩᱨᱩ᱾ ᱟᱵᱩᱣᱟᱜ ᱯᱚᱨᱚᱵᱽ ᱯᱩᱱᱟᱹᱭ ᱨᱮ ᱱᱩᱠᱩ ᱵᱚᱝᱜᱟ ᱟᱵᱩᱣᱟᱜ ᱫᱷᱚᱨᱚᱢ ᱴᱷᱟᱶ ᱡᱟᱦᱮᱨ ᱛᱷᱟᱱ ᱟᱨ ᱢᱟᱹᱧᱡᱽᱦᱤ ᱛᱷᱟᱱ ᱨᱮ ᱵᱩ ᱵᱚᱝᱜᱟ ᱟᱠᱚᱣᱟ᱾ ᱥᱚᱦᱨᱟᱭ ᱯᱚᱨᱚᱵᱽ ᱨᱮ ᱫᱚ ᱜᱚᱴ ᱨᱮ ᱵᱩ ᱵᱚᱝᱜᱟ ᱟᱠᱚᱣᱟ᱾
ᱟᱵᱩ ᱦᱚᱲ ᱦᱚᱯᱚᱱ ᱫᱚ ᱚᱲᱟᱜ ᱨᱮ ᱥᱮ ᱟᱛᱩ ᱨᱮ ᱡᱟᱦᱟᱱ ᱯᱚᱨᱚᱵᱽ ᱯᱩᱱᱟᱹᱭ ᱦᱩᱭ ᱞᱮᱱ ᱠᱷᱟᱱ ᱜᱤ ᱦᱟᱯᱲᱟᱢ ᱵᱚᱝᱜᱟ ᱵᱩ ᱫᱤᱥᱟᱹ ᱠᱩᱣᱟ᱾ ᱩᱱᱠᱩ ᱧᱩᱛᱩᱢ ᱛᱮ ᱦᱟᱹᱱᱰᱤ ᱵᱩ ᱪᱚᱰᱚᱨᱟ᱾ ᱱᱚᱣᱟ ᱡᱚᱛᱚ ᱜᱤ ᱟᱵᱩᱣᱟᱜ ᱫᱷᱚᱨᱚᱢ ᱨᱮᱱᱟᱜ ᱥᱮᱨᱣᱟ ᱟᱨ ᱠᱟᱹᱢᱤ ᱦᱚᱨᱟ ᱠᱟᱱᱟ᱾
ᱱᱚᱜᱼᱚᱭ ᱱᱚᱣᱟ ᱦᱩᱭᱩᱜ ᱠᱟᱱᱟ ᱦᱚᱲ ᱦᱚᱯᱚᱱᱟᱜ ᱫᱷᱚᱨᱚᱢ ᱨᱮᱱᱟᱜ ᱱᱟᱥᱮ ᱩᱯᱨᱩᱢ᱾ ᱥᱮᱫᱟᱭ ᱫᱚ ᱟᱵᱩᱣᱟᱜ ᱫᱷᱚᱨᱚᱢ ᱨᱮᱱᱟᱜ ᱧᱩᱛᱩᱢ ᱵᱟᱝ ᱡᱟᱹᱨᱩᱲᱟᱵᱩᱱ ᱠᱟᱱ ᱛᱟᱦᱮᱱ ᱨᱮᱦᱚᱸ ᱱᱟᱦᱟᱜ ᱫᱚ ᱮᱴᱟᱜ ᱫᱷᱚᱨᱚᱢ ᱠᱚ ᱥᱟᱶ ᱯᱟᱱᱛᱮ ᱛᱮ ᱛᱟᱦᱮᱱ ᱠᱷᱟᱹᱛᱤᱨ ᱟᱵᱩᱣᱟᱜ ᱦᱚᱸ ᱫᱷᱚᱨᱚᱢ ᱧᱩᱛᱩᱢ ᱡᱟᱹᱨᱩᱲ ᱮᱱᱟ᱾ ᱩᱱ ᱠᱷᱚᱱ ᱜᱤ ᱟᱭᱢᱟ ᱦᱚᱲ ᱟᱭᱢᱟ ᱞᱮᱠᱟ ᱟᱵᱩᱣᱟᱜ ᱫᱷᱚᱨᱚᱢ ᱧᱩᱛᱩᱢ ᱵᱩ ᱧᱩᱢ ᱠᱮᱫᱟ᱾ ᱥᱟᱹᱨᱤ ᱫᱷᱚᱨᱢ, ᱦᱚᱲ ᱫᱷᱚᱨᱚᱢ, ᱢᱟᱨᱮ ᱫᱷᱚᱨᱚᱢ, ᱡᱟᱦᱮᱨ ᱫᱷᱚᱨᱚᱢ, ᱥᱟᱨᱱᱟ ᱫᱷᱚᱨᱚᱢ ᱮᱢᱟᱱ ᱠᱳ᱾ ᱵᱮᱫᱤᱱ ᱫᱷᱚᱨᱚᱢ ᱢᱮᱱ ᱛᱮ ᱫᱚ ᱡᱟᱦᱟᱱ ᱫᱷᱚᱨᱚᱢ ᱵᱟᱹᱱᱩᱜᱼᱟ᱾ ᱱᱚᱣᱟ ᱫᱚ ᱟᱵᱩ ᱱᱟᱥᱲᱟᱣ ᱵᱩᱱ ᱞᱟᱹᱜᱤᱫ ᱫᱷᱚᱨᱚᱢ ᱵᱮᱯᱟᱨᱤ ᱠᱚᱣᱟᱜ ᱮᱢ ᱪᱟᱞ ᱟᱹᱲᱟᱹ ᱠᱟᱱᱟ᱾ ᱱᱮᱛᱚᱜ ᱦᱚᱸ ᱫᱷᱚᱨᱚᱢ ᱧᱩᱛᱩᱢ ᱨᱮ ᱵᱟᱵᱩ ᱢᱤᱫ ᱠᱟᱱ ᱨᱮᱦᱚᱸ ᱵᱟᱹᱭ ᱵᱟᱹᱭ ᱛᱮ ᱟᱵᱩ ᱦᱚᱲ ᱦᱚᱯᱚᱱᱟᱜ ᱫᱷᱚᱨᱚᱢ ᱧᱩᱛᱩᱢ ᱞᱮᱠᱟᱛᱮ ᱥᱟᱹᱨᱤ ᱫᱷᱚᱨᱚᱢ ᱧᱩᱛᱩᱢ ᱜᱤ ᱴᱤᱝᱜᱩ ᱠᱮᱴᱮᱡᱚᱜ ᱠᱟᱱᱟ᱾
ᱢᱩᱪᱟᱹᱫ ᱨᱮ ᱱᱚᱣᱟ ᱜᱤᱧ ᱢᱮᱱᱟ ᱟᱵᱩᱣᱟᱜ ᱫᱷᱚᱨᱢ ᱧᱩᱛᱩᱢ ᱤᱫᱤ ᱠᱟᱛᱮᱜ ᱱᱟᱥᱮ ᱰᱤᱵᱮᱴ ᱢᱮᱱᱟᱜ ᱨᱮᱦᱚᱸ ᱟᱵᱩᱣᱟᱜ ᱫᱷᱚᱨᱚᱢ ᱢᱮᱱᱟᱜᱼᱟ ᱱᱚᱣᱟ ᱤᱫᱤ ᱠᱟᱛᱮᱜ ᱫᱚ ᱡᱟᱦᱟᱱ ᱰᱤᱵᱮᱴ ᱵᱟᱹᱱᱩᱜᱼᱟ᱾ ᱡᱟᱦᱟᱭ ᱵᱟᱠᱚ ᱵᱟᱰᱟᱭ ᱩᱠᱩ ᱵᱩᱱ ᱞᱟᱹᱭ ᱟᱠᱚᱣᱟ, ᱟᱨ ᱡᱟᱦᱟᱭ ᱵᱮᱫᱤᱱ ᱠᱩ ᱢᱮᱱ ᱩᱱᱠᱩ ᱵᱩᱱ ᱥᱩᱫᱷᱨᱟᱹᱣ ᱠᱩᱣᱟ, ᱞᱟᱹᱭ ᱟᱠᱚᱣᱟᱵᱩ ᱟᱵᱩ ᱦᱚᱲ ᱦᱚᱯᱚᱱᱟᱜ ᱫᱷᱚᱨᱚᱢ ᱫᱚ ᱥᱟᱹᱨᱤ ᱫᱷᱚᱨᱚᱢ᱾
