ᱦᱚᱲ ᱦᱚᱯᱚᱱ ᱪᱮᱫᱟᱜ ᱵᱩᱱ ᱵᱟᱦᱟ ᱵᱝᱜᱟᱜᱼᱟ?
 |
| ᱵᱟᱦᱟ ᱵᱚᱝᱜᱟ |
ᱵᱟᱦᱟ ᱦᱩᱭᱩᱜ ᱠᱟᱱᱟ ᱟᱵᱩ ᱦᱚᱲ ᱦᱚᱯᱚᱱᱟᱜ ᱫᱚᱥᱟᱨ ᱢᱟᱨᱟᱝ ᱯᱚᱨᱚᱵᱽ᱾ ᱟᱵᱩ ᱵᱳᱱ ᱵᱟᱰᱟᱭᱟ ᱵᱟᱦᱟ ᱛᱟᱞᱟ ᱛᱮ ᱜᱤ ᱱᱚᱣᱟ ᱫᱷᱟᱹᱨᱛᱤ ᱱᱟᱱᱟᱦᱩᱨᱱᱟᱹᱨ ᱨᱩᱯ ᱛᱮ ᱥᱟᱡᱟᱣ ᱨᱟᱠᱟᱵᱚᱜᱼᱟ᱾ ᱯᱨᱚᱠᱨᱤᱛᱤ ᱨᱮ ᱱᱟᱣᱟ ᱡᱤᱭᱳᱱ ᱥᱟᱨᱮᱲᱚᱜᱼᱟ᱾ ᱵᱟᱦᱟ ᱠᱷᱚᱱ ᱡᱚ, ᱡᱚ ᱠᱷᱚᱱ ᱟᱨᱦᱚᱸ ᱱᱟᱣᱟ ᱫᱟᱨᱮ ᱥᱮ ᱱᱟᱣᱟ ᱡᱤᱭᱳᱱ᱾ ᱱᱚᱝᱠᱟ ᱜᱤ ᱵᱟᱦᱟ ᱛᱟᱞᱟ ᱛᱮ ᱥᱤᱥᱤᱨᱡᱟᱹᱣᱤᱡ ᱪᱟᱸᱫᱚ ᱵᱟᱵᱟ ᱴᱷᱟᱹᱠᱩᱨ ᱴᱷᱟᱹᱠᱨᱟᱹᱱ ᱟᱭᱟᱜ ᱥᱤᱨᱡᱳᱱᱮ ᱪᱟᱞᱟᱣ ᱤᱫᱤ ᱮᱫᱟ᱾ ᱟᱨ ᱱᱚᱣᱟ ᱥᱤᱨᱡᱳᱱ ᱛᱟᱞᱟ ᱛᱮ ᱜᱤ ᱟᱡᱼᱮ ᱥᱚᱫᱚᱨᱚᱜ ᱠᱟᱱᱟ᱾
ᱢᱤᱫᱼᱴᱮᱱ ᱠᱩᱲᱤ ᱜᱤᱫᱽᱨᱟᱹ ᱛᱤᱱᱨᱮᱭ ᱦᱟᱨᱟ ᱡᱩᱣᱟᱹᱱᱚᱜ ᱟᱨ ᱜᱚᱜᱚ ᱦᱩᱭᱩᱜ ᱫᱟᱲᱮ ᱯᱩᱭᱞᱩ ᱫᱷᱟᱣ ᱥᱚᱫᱚᱨᱚᱜ ᱛᱟᱭᱟ ᱩᱱᱨᱮ ᱵᱩ ᱢᱮᱱᱟ ᱩᱱᱤ ᱠᱩᱲᱤ ᱜᱤᱫᱽᱨᱟᱹ ᱫᱚᱭ ᱵᱟᱦᱟᱜ ᱠᱟᱱᱟ᱾ ᱜᱤᱫᱽᱨᱟᱹ ᱫᱚ ᱵᱟᱦᱟ ᱛᱮ ᱜᱤ ᱟᱡ ᱜᱚᱜᱚ ᱥᱟᱣᱟ ᱡᱚᱯᱲᱟᱣᱮ ᱛᱟᱦᱮᱱᱟ᱾ ᱱᱚᱣᱟ ᱵᱟᱦᱟ ᱛᱟᱞᱟ ᱛᱮ ᱜᱤ ᱜᱚᱜᱚ-ᱵᱟᱵᱟ ᱴᱷᱮᱱ ᱠᱷᱚᱱ ᱜᱤᱫᱽᱨᱟᱹᱣᱟᱜ ᱦᱚᱲᱢᱚ ᱨᱮ ᱡᱤᱣᱤ ᱥᱟᱨᱥᱟᱣᱚᱜᱼᱟ᱾ ᱚᱠᱟ ᱡᱤᱣᱤ ᱫᱚ ᱴᱷᱟᱹᱠᱩᱨᱟᱜ ᱚᱝ ᱛᱮ ᱦᱟᱸᱥ ᱦᱟᱺᱥᱤᱞ ᱪᱮᱬᱮ ᱛᱟᱞᱟ ᱛᱮ ᱟᱵᱩ ᱴᱷᱮᱱ ᱦᱮᱡ ᱟᱠᱟᱱᱟ᱾ ᱱᱚᱣᱟ ᱡᱤᱣᱤ ᱫᱚ ᱴᱷᱟᱹᱠᱩᱨ ᱥᱮ ᱪᱟᱱᱫᱚ ᱵᱟᱵᱟᱣᱟᱜ ᱦᱤᱸᱥ ᱠᱟᱱᱟ᱾
ᱚᱱᱟᱛᱮ ᱜᱤ ᱵᱟᱦᱟ ᱵᱚᱝᱜᱟ ᱛᱟᱞᱟ ᱛᱮ ᱪᱟᱱᱫᱚ ᱵᱟᱵᱟ ᱴᱷᱟᱹᱠᱩᱨ ᱡᱤᱣ ᱵᱩ ᱥᱟᱨᱦᱟᱣ ᱫᱤᱭᱟ᱾ ᱡᱟᱦᱮᱨ ᱛᱷᱟᱱ ᱨᱮ ᱵᱚᱝᱜᱟ ᱵᱩᱨᱩ ᱴᱷᱮᱱ ᱜᱚᱰ ᱠᱟᱛᱮᱜ ᱡᱤᱣᱤ ᱵᱩ ᱡᱤᱭᱟᱹᱲ ᱫᱚᱦᱚᱭᱟ᱾ ᱱᱚᱣᱟ ᱥᱤᱨᱡᱳᱱ ᱱᱟᱱᱟᱦᱩᱱᱟᱹᱨ ᱨᱩᱯ ᱛᱮ ᱥᱟᱡᱟᱣ ᱛᱟᱦᱮᱱ ᱨᱮᱱᱟᱜ ᱵᱩᱱ ᱱᱮᱦᱚᱨᱟ᱾
ᱯᱷᱟᱹᱜᱩᱱ ᱪᱟᱱᱫᱚ ᱨᱮ ᱟᱵᱩ ᱦᱚᱲ ᱦᱚᱯᱚᱱ ᱫᱚ ᱵᱩ ᱵᱟᱦᱟᱜᱼᱟ᱾ ᱯᱷᱟᱹᱜᱩᱱ ᱪᱟᱱᱫᱚ ᱛᱤᱱᱟᱹᱜ ᱫᱤᱱᱮ ᱛᱟᱦᱮᱱᱟ ᱚᱱᱟ ᱢᱩᱫᱽ ᱨᱮ ᱥᱮ ᱫᱟᱨᱮ ᱱᱟᱹᱲᱤ ᱵᱟᱦᱟᱜ ᱚᱠᱛᱚ ᱟᱵᱩ ᱦᱚᱲ ᱦᱚᱯᱚᱱ ᱫᱚ ᱵᱩ ᱵᱟᱦᱟ ᱵᱚᱝᱜᱟᱜᱼᱟ᱾ ᱵᱟᱦᱟ ᱚᱠᱛᱮ ᱥᱟᱨᱡᱚᱢ, ᱢᱟᱛᱠᱚᱢ, ᱠᱩᱛ, ᱱᱤᱢ, ᱢᱟᱨᱟᱲ, ᱢᱩᱨᱩᱫ ᱵᱟᱦᱟᱜᱼᱟ᱾ ᱡᱟᱦᱮᱨ ᱛᱷᱟᱱ ᱨᱮ ᱱᱟᱭᱠᱮ ᱵᱟᱵᱟ ᱡᱟᱦᱮᱨ ᱟᱭᱚ ᱧᱩᱛᱩᱢ ᱛᱮ ᱦᱮᱲᱟᱜ ᱠᱟᱞᱚᱴ, ᱢᱟᱨᱟᱝᱵᱩᱨᱩ ᱧᱩᱛᱩᱢ ᱛᱮ ᱯᱩᱸᱰ ᱥᱤᱢ, ᱫᱷᱚᱨᱚᱢ ᱜᱚᱸᱥᱟᱭ ᱧᱩᱛᱩᱢ ᱛᱮ ᱟᱨᱟᱜ ᱥᱟᱺᱰᱤ ᱟᱨ ᱢᱚᱬᱮ ᱠᱚ ᱛᱩᱨᱩᱭ ᱠᱚ ᱧᱩᱛᱩᱢ ᱛᱮ ᱟᱨᱟᱜ ᱯᱩᱸᱰ ᱥᱤᱢᱮ ᱵᱚᱝᱜᱟ ᱠᱚᱣᱟ᱾ ᱟᱱᱟ ᱥᱟᱶ ᱵᱟᱦᱟ ᱟᱨ ᱡᱚ ᱦᱚᱸᱭ ᱵᱚᱝᱜᱟᱭᱟ᱾ ᱠᱩᱰᱟᱹᱢ ᱱᱟᱭᱠᱮ ᱫᱚ ᱥᱤᱢᱟᱹ ᱴᱟᱺᱰᱤ ᱨᱮ ᱥᱤᱢᱟᱹᱥᱟᱲᱮ ᱧᱩᱛᱩᱢ ᱛᱮ ᱦᱮᱱᱫᱮ ᱥᱤᱢᱮ ᱵᱚᱝᱜᱟᱭᱤᱭᱟ᱾ ᱵᱟᱦᱟ ᱵᱚᱝᱜᱟ ᱨᱮᱱᱟᱜ ᱯᱩᱭᱞᱩ ᱢᱟᱦᱟ ᱫᱚ ᱵᱩ ᱢᱮᱛᱟᱜᱼᱟ ᱵᱟᱦᱟ ᱩᱢ, ᱫᱚᱥᱟᱨ ᱢᱟᱦᱟ ᱫᱚ ᱵᱟᱦᱟ ᱥᱟᱹᱨᱫᱤ ᱟᱨ ᱛᱮᱥᱟᱨ ᱥᱮ ᱢᱩᱪᱟᱹᱫ ᱢᱟᱦᱟ ᱫᱚ ᱵᱟᱦᱟ ᱢᱩᱪᱟᱹᱫ ᱥᱮ ᱵᱟᱦᱟ ᱵᱟᱥᱠᱮ ᱦᱚᱸ ᱵᱩ ᱢᱮᱛᱟᱜᱼᱟ᱾
ᱯᱷᱮᱰᱮᱛ ᱯᱚᱛᱚᱵ ᱠᱩ -
᱑ᱹ ᱡᱚᱢᱥᱤᱢ ᱵᱤᱱᱛᱤ - ᱥᱳᱢᱟᱭ ᱠᱤᱥᱠᱩ
᱒ᱹ ᱡᱟᱦᱮᱨ ᱵᱚᱸᱜᱟ ᱥᱟᱱᱛᱟᱲ ᱠᱳ - ᱨᱟᱢᱮᱥᱣᱚᱨ ᱢᱩᱨᱢᱩ(ᱟᱹᱫᱤᱢ ᱥᱟᱱᱛᱟᱲ)
᱓ᱹ ᱦᱚᱲ ᱠᱳ ᱨᱮᱱ ᱢᱟᱨᱮ ᱦᱟᱯᱲᱟᱢ ᱠᱳ ᱨᱮᱭᱟᱜ ᱠᱟᱛᱷᱟ - ᱠᱚᱞᱮᱭᱟᱱ ᱜᱩᱨᱩ
