ᱯᱮᱸᱭᱟᱡᱽ ᱠᱩᱢᱲᱩ
ᱢᱤᱫᱼᱴᱮᱱ ᱠᱩᱢᱲᱩ ᱟᱛᱩ ᱦᱚᱲ ᱠᱚᱣᱟᱜ ᱯᱮᱸᱭᱟᱡᱮ ᱠᱩᱢᱲᱩ ᱠᱮᱫᱟ᱾ ᱠᱩᱢᱲᱩ ᱠᱟᱛᱮᱜ ᱚᱱᱟ ᱯᱮᱸᱭᱟᱡᱽ ᱟᱭᱟᱜ ᱚᱲᱟᱜ ᱨᱮᱱᱟᱜ ᱪᱚᱴ ᱠᱚᱴᱷᱟ ᱨᱮᱭ ᱫᱚᱦᱚ ᱠᱮᱫᱟ᱾ ᱯᱮᱸᱭᱟᱡᱽ ᱢᱟᱭ ᱠᱩᱢᱲᱩ ᱠᱮᱫ, ᱢᱮᱱᱠᱷᱟᱱ ᱢᱚᱱᱮ ᱨᱮ ᱫᱚ ᱵᱚᱛᱚᱨ ᱛᱟᱦᱮᱸᱭᱮᱱ ᱛᱟᱭᱟ᱾ ᱯᱮᱸᱭᱟᱡᱽ ᱨᱮᱱᱟᱜ ᱠᱟᱛᱷᱟ ᱜᱩᱱᱟᱹᱱ ᱜᱩᱱᱟᱹᱱ ᱛᱮ ᱜᱤ ᱧᱤᱫᱟᱹᱭ ᱡᱟᱹᱯᱤᱫ ᱠᱮᱫᱟ᱾
 |
ᱯᱮᱸᱭᱟᱪᱽ ᱠᱩᱢᱲᱩ |
ᱯᱮᱸᱭᱟᱡᱽ ᱠᱩᱢᱲᱩ ᱫᱚ ᱫᱚᱥᱟᱨ ᱦᱤᱞᱟᱹᱜ ᱥᱮᱛᱟᱜ ᱡᱟᱹᱯᱤᱫ ᱠᱷᱚᱱ ᱵᱤᱨᱤᱫ ᱛᱚᱨᱟ ᱟᱛᱩ ᱨᱮᱱ ᱦᱚᱲᱟᱜ ᱜᱟᱞᱢᱟᱨᱟᱣᱮ ᱟᱧᱡᱚᱢ ᱠᱮᱫᱟ᱾ ᱯᱩᱞᱤᱥᱟᱜ ᱠᱟᱛᱷᱟ ᱟᱧᱡᱚᱢ ᱠᱟᱛᱮᱜ ᱟᱨᱦᱚᱸᱭ ᱵᱚᱛᱚᱨ ᱮᱱᱟ᱾ ᱟᱡ ᱯᱮᱸᱭᱟᱡᱮ ᱠᱩᱢᱲᱩ ᱟᱠᱟᱫᱟ ᱚᱱᱟ ᱡᱟᱦᱟᱸ ᱞᱮᱠᱟᱛᱮ ᱠᱩ ᱵᱟᱰᱟᱭ ᱞᱮᱠᱷᱟᱱ ᱡᱮᱦᱮᱞ ᱪᱟᱞᱟᱜ ᱦᱩᱭᱩᱜ ᱛᱟᱭᱟ᱾ ᱱᱚᱝᱠᱟᱭ ᱩᱭᱦᱟᱹᱨ ᱠᱟᱱᱟ᱾ ᱩᱱ ᱚᱠᱛᱮ ᱟᱭᱟᱜ ᱚᱲᱟᱜ ᱨᱮᱱ ᱥᱤᱢ ᱦᱚᱯᱚᱱ ᱥᱮᱛᱟᱜ ᱠᱷᱚᱱ ᱠᱩ ᱨᱟᱨᱟᱜ ᱠᱟᱱᱟ, ᱪᱤᱸᱭᱟᱹᱵ~~ ᱪᱤᱸᱭᱟᱹᱵ~~ ᱾ ᱠᱩᱢᱲᱩ ᱫᱚ ᱵᱚᱛᱚᱨ ᱛᱮ ᱚᱱᱟ ᱜᱤ ᱯᱮᱸᱭᱟᱡᱽ~~ ᱯᱮᱸᱭᱟᱡᱽ~~ ᱮ ᱟᱧᱡᱚᱢ ᱠᱮᱫᱟ᱾ ᱩᱱᱤ ᱫᱚᱭ ᱢᱚᱱᱮ ᱠᱮᱫᱟ ᱱᱩᱠᱩ ᱥᱤᱢ ᱦᱚᱯᱚᱱ ᱫᱚ ᱯᱟᱥᱮᱡ ᱦᱚᱞᱟ ᱯᱮᱸᱭᱟᱡᱽ ᱠᱩᱢᱲᱩ ᱠᱩ ᱧᱮᱞ ᱞᱤᱫᱤᱭᱟ᱾ ᱚᱱᱟᱛᱮ ᱯᱮᱸᱭᱟᱡᱽ ᱯᱮᱸᱭᱟᱡᱽ ᱠᱩ ᱞᱟᱹᱞᱟᱹᱭ ᱠᱟᱱᱟ᱾ ᱚᱱᱟᱛᱮ ᱩᱱᱤ ᱫᱚ ᱩᱱᱠᱩ ᱥᱤᱢ ᱦᱚᱯᱚᱱᱮ ᱞᱟᱜᱟ ᱠᱮᱫ ᱠᱚᱣᱟ᱾ ᱥᱤᱢ ᱦᱚᱯᱚᱱ ᱫᱚ ᱵᱚᱛᱚᱨ ᱛᱮ ᱟᱨᱦᱚᱸ ᱠᱟᱡᱟᱠ ᱛᱮ ᱪᱤᱸᱭᱟᱹᱵ ᱪᱤᱸᱭᱟᱹᱵ ᱠᱩ ᱨᱟᱜ ᱮᱫᱟ᱾ ᱠᱩᱢᱲᱩ ᱫᱚ ᱯᱮᱸᱭᱟᱡᱽ ᱯᱮᱸᱭᱟᱡᱮ ᱟᱧᱡᱚᱢ ᱮᱫᱟ᱾ ᱟᱫᱚᱭ ᱩᱭᱦᱟᱹᱨ ᱠᱮᱫᱟ, ᱱᱚᱝᱠᱟ ᱠᱷᱟᱱ ᱢᱟ ᱱᱩᱠᱩ ᱥᱤᱢ ᱜᱤ ᱯᱮᱸᱭᱟᱡᱽ ᱠᱩᱢᱲᱩ ᱠᱩ ᱞᱟᱹᱭ ᱛᱩᱫᱤᱧ᱾ ᱚᱱᱟ ᱨᱟᱝᱜᱟᱣ ᱛᱮ ᱩᱱᱤ ᱫᱚ ᱥᱟᱱᱟᱢ ᱥᱤᱢ ᱦᱚᱯᱚᱱᱮ ᱜᱚᱡᱽ ᱠᱮᱫ ᱠᱚᱣᱟ᱾
 |
| ᱥᱤᱢ ᱠᱩ ᱨᱟᱜ ᱮᱫᱟ ᱯᱮᱸᱭᱟᱡᱽ ᱯᱮᱸᱭᱟᱡᱽ |
ᱠᱩᱢᱲᱩ ᱫᱚ ᱥᱤᱢ ᱦᱚᱯᱚᱱᱮ ᱜᱚᱡ ᱠᱮᱫ ᱠᱩ ᱠᱷᱟᱱ ᱥᱤᱢ ᱮᱝᱜᱟ ᱫᱚ ᱵᱚᱛᱚᱨ ᱛᱮ ᱠᱚᱴᱠᱚᱴᱮᱫ~~ ᱠᱚᱴᱠᱚᱴᱮᱫ~~ ᱨᱟᱨᱟᱜᱼᱮ ᱞᱟᱜᱟᱣ ᱮᱱᱟ᱾ ᱠᱩᱢᱲᱩ ᱫᱚ ᱚᱱᱟ ᱜᱤ ᱠᱚᱴᱠᱚᱴᱷᱟᱛ~~ ᱠᱚᱴᱠᱚᱴᱷᱟᱛ~~ ᱞᱮᱠᱟᱭᱟ ᱟᱧᱡᱚᱢ ᱠᱮᱫᱟ᱾ ᱟᱫᱚ ᱩᱱᱤ ᱫᱚᱭ ᱢᱚᱱᱮ ᱠᱮᱫᱟ, ᱥᱤᱢ ᱦᱚᱯᱚᱱ ᱢᱟ ᱯᱮᱸᱭᱟᱡᱽ ᱯᱮᱸᱭᱟᱡᱽ ᱠᱩ ᱞᱟᱹᱭᱮᱫ ᱛᱟᱦᱮᱸ᱾ ᱟᱨ ᱱᱩᱭ ᱥᱤᱢ ᱮᱝᱜᱟ ᱢᱟ ᱚᱠᱟᱨᱮ ᱯᱮᱸᱭᱟᱡᱤᱧ ᱫᱚᱦᱚ ᱟᱠᱟᱫ ᱚᱱᱟ ᱠᱚᱴᱷᱟᱭ ᱞᱟᱹᱭᱮᱫ ᱠᱟᱱ᱾ ᱚᱱᱟᱛᱮ ᱩᱱᱤ ᱫᱚ ᱥᱤᱢ ᱮᱝᱜᱟᱭ ᱞᱟᱞᱜᱟ ᱠᱤᱫᱤᱭᱟ᱾ ᱞᱟᱜᱟ ᱠᱤᱫᱤ ᱠᱷᱟᱱ ᱩᱱᱤ ᱥᱤᱢ ᱫᱚ ᱵᱚᱛᱚᱨ ᱛᱮ ᱟᱨᱦᱚᱸ ᱠᱟᱡᱟᱠ ᱛᱮ ᱠᱚᱴᱠᱚᱴᱮᱫ~~ ᱠᱚᱴᱠᱚᱴᱮᱫ~~ ᱮ ᱨᱟᱜ ᱮᱫᱟ᱾ ᱩᱱᱤ ᱠᱩᱢᱲᱩ ᱫᱚᱭ ᱢᱚᱱᱮ ᱠᱮᱫᱟ ᱱᱚᱝᱠᱟ ᱛᱮ ᱠᱷᱟᱱ ᱢᱟ ᱱᱩᱭ ᱥᱤᱢ ᱜᱤ ᱠᱚᱴᱷᱟ ᱨᱮᱱᱟᱜ ᱯᱮᱸᱭᱟᱡᱽ ᱢᱟ ᱦᱚᱲᱮ ᱞᱟᱹᱭ ᱟᱠᱚ᱾ ᱚᱱᱟ ᱨᱟᱝᱜᱟᱣ ᱛᱮ ᱩᱱᱤ ᱫᱚ ᱥᱤᱢ ᱮᱝᱜᱟ ᱜᱚᱡᱮ ᱞᱟᱹᱜᱤᱫᱼᱮ ᱞᱟᱜᱟ ᱠᱤᱫᱤᱭᱟ᱾ ᱢᱮᱱᱠᱷᱟᱱ ᱥᱤᱢ ᱮᱝᱜᱟ ᱢᱟᱭ ᱫᱟᱹᱲ ᱠᱮᱫ᱾ ᱟᱨ ᱠᱚᱴᱠᱚᱴᱷᱟᱛ~~ ᱠᱚᱴᱠᱚᱴᱷᱟᱛ~~ ᱮ ᱨᱟᱜ ᱠᱟᱱᱟ᱾ ᱜᱚᱴᱟ ᱟᱛᱩ ᱞᱟᱜᱟ ᱞᱟᱜᱟᱛᱮᱭ ᱥᱟᱵ ᱠᱤᱫᱤᱭᱟ ᱟᱨᱮ ᱜᱚᱡ ᱠᱤᱫᱤᱭᱟ᱾
ᱱᱚᱣᱟ ᱜᱷᱚᱴᱚᱱᱟ ᱟᱛᱩ ᱨᱮᱱ ᱦᱚᱲ ᱫᱚ ᱠᱩ ᱧᱮᱞ ᱛᱤᱭᱟᱹᱜ ᱠᱮᱫᱟ᱾ ᱟᱫᱚ ᱩᱱᱤ ᱠᱩ ᱠᱩᱞᱤ ᱤᱫᱤᱭᱟ, ᱪᱮᱫᱟᱜ ᱥᱤᱢ ᱦᱚᱯᱚᱱ ᱟᱨ ᱥᱤᱢ ᱮᱝᱜᱟ ᱫᱚᱢ ᱜᱚᱡ ᱠᱮᱫ ᱠᱚᱣᱟ?
ᱠᱩᱢᱲᱩ ᱫᱚᱭ ᱢᱮᱱ ᱠᱮᱫᱟ, ᱧᱮᱞ ᱯᱮ ᱥᱮ ᱟᱛᱩ ᱨᱮᱱᱟᱜ ᱯᱮᱸᱭᱟᱡᱽ ᱠᱩᱢᱲᱩ ᱟᱠᱟᱱᱟ᱾ ᱟᱨ ᱱᱩᱠᱩ ᱥᱤᱢ ᱦᱚᱯᱚᱱ ᱥᱮᱛᱟᱜ ᱠᱷᱚᱱ ᱯᱮᱸᱭᱟᱡᱽ ᱯᱮᱸᱭᱟᱡᱽ ᱠᱩ ᱟᱱᱫᱚᱲ ᱪᱟᱵᱟ ᱟᱠᱟᱰᱫᱟ᱾ ᱱᱚᱝᱠᱟᱛᱮ ᱢᱟ ᱤᱧ ᱜᱤ ᱯᱮᱸᱭᱟᱡᱽ ᱠᱩᱢᱲᱩ ᱠᱩ ᱢᱚᱱᱮᱭᱤᱧ᱾ ᱟᱱᱟ ᱨᱟᱝᱜᱟᱣ ᱛᱮ ᱥᱤᱢ ᱦᱚᱯᱚᱱᱤᱧ ᱜᱚᱡ ᱠᱮᱫ ᱠᱚᱣᱟ᱾ ᱥᱤᱢ ᱦᱚᱦᱚᱱᱤᱧ ᱜᱚᱡ ᱠᱮᱫ ᱠᱩ ᱠᱷᱟᱱ ᱢᱟ ᱥᱤᱢ ᱮᱝᱜᱟ ᱠᱚᱴᱠᱚᱴᱷᱟᱛ~~ ᱠᱚᱴᱠᱚᱴᱷᱟᱛ~~ ᱞᱟᱹᱞᱟᱹᱭᱮ ᱞᱟᱜᱟᱣ ᱟᱠᱟᱜ᱾ ᱱᱚᱝᱠᱟ ᱛᱮ ᱢᱟ ᱦᱚᱲ ᱠᱩ ᱢᱚᱱᱮᱭ ᱤᱧ ᱜᱤ ᱯᱮᱸᱭᱟᱡᱽ ᱠᱩᱢᱲᱩ ᱠᱟᱛᱮᱜ ᱠᱚᱴᱷᱟ ᱨᱮᱧ ᱫᱚ ᱟᱠᱟᱫᱟ᱾ ᱚᱱᱟ ᱨᱟᱝᱜᱟᱣ ᱛᱮ ᱥᱤᱢ ᱮᱝᱜᱟᱧ ᱜᱚᱡ ᱠᱤᱫᱤᱭᱟ᱾
ᱱᱚᱣᱟ ᱠᱩ ᱟᱧᱡᱚᱢ ᱠᱟᱛᱮᱜ ᱟᱛᱩ ᱨᱮᱱ ᱦᱚᱲ ᱫᱚ ᱩᱱᱤ ᱜᱤ ᱠᱩ ᱤᱱᱫᱤᱫ ᱥᱮ ᱥᱚᱱᱫᱮᱦᱚ ᱠᱤᱫᱤᱭᱟ ᱯᱮᱸᱭᱟᱡᱽ ᱠᱩᱢᱲᱩ ᱢᱮᱱᱛᱮ᱾ ᱟᱨ ᱩᱱᱤᱭᱟᱜ ᱚᱲᱟᱜ ᱠᱚᱴᱷᱟ ᱠᱩ ᱥᱮᱱᱫᱽᱨᱟ ᱠᱮᱫᱟ᱾ ᱟᱨ ᱯᱮᱸᱭᱟᱡᱽ ᱠᱩ ᱧᱟᱢ ᱠᱮᱫᱟ᱾ ᱟᱨ ᱠᱩᱢᱲᱩ ᱫᱚ ᱯᱩᱞᱤᱥ ᱛᱤ ᱨᱮ ᱠᱩ ᱨᱟᱠᱟᱵ ᱠᱟᱫᱮᱭᱟ᱾
