ᱫᱷᱟᱹᱨᱛᱤ ᱞᱟᱲᱟᱣᱺ ᱥᱟᱱᱛᱟᱞᱤ ᱢᱤᱛᱷᱚᱞᱚᱡᱤ ᱟᱨ ᱥᱟᱬᱮᱥ

ᱦᱚᱨᱚ ᱫᱮᱭᱟ ᱨᱮ ᱞᱮᱱᱰᱮᱫ ᱦᱟᱥᱟᱭ ᱨᱟᱠᱟᱵ ᱮᱫᱟ᱾

ᱦᱚᱲᱦᱚᱯᱚᱱᱟᱜ ᱢᱤᱛᱷᱚᱞᱚᱡᱤ ᱨᱮ ᱚᱛ ᱞᱟᱲᱟᱣ:

ᱥᱟᱱᱛᱟᱞᱤ ᱢᱤᱛᱷᱚᱞᱚᱡᱤ ᱞᱮᱠᱟᱛᱮ, ᱱᱟᱦᱟᱜ ᱚᱛ ᱦᱟᱥᱟ ᱥᱤᱨᱡᱟᱣᱚᱜ ᱞᱟᱦᱟᱨᱮ ᱱᱚᱣᱟ ᱫᱚ ᱯᱩᱨᱟᱹ ᱯᱩᱨᱤ ᱫᱟᱜ ᱨᱮ ᱩᱱᱩᱢ ᱛᱟᱦᱮᱸ ᱠᱟᱱᱟ᱾ ᱚᱛ ᱫᱚ ᱫᱟᱜ ᱞᱟᱛᱟᱨ ᱨᱮ ᱛᱟᱦᱮᱸ ᱠᱟᱱᱟ᱾ ᱴᱷᱟᱹᱠᱩᱨ ᱟᱨ ᱴᱷᱟᱹᱠᱨᱟᱱ ᱚᱱᱟ ᱦᱟᱥᱟ ᱨᱟᱠᱟᱵ ᱠᱟᱛᱮᱜ ᱚᱛ ᱦᱟᱥᱟ ᱵᱮᱱᱟᱣ ᱨᱮᱭᱟᱜ ᱠᱤᱱ ᱜᱚᱴᱟ ᱠᱮᱫᱟ, ᱡᱟᱦᱟᱸᱭ ᱫᱚ ᱠᱤᱱ ᱦᱩᱭᱩᱜ ᱠᱟᱱᱟ ᱥᱤᱥᱤᱨᱡᱟᱹᱧᱤᱡᱼᱟᱜ ᱵᱟᱵᱟ ᱟᱨ ᱟᱭᱚ ᱨᱩᱯ᱾ ᱩᱱᱠᱤᱱ ᱫᱚ ᱚᱛ ᱦᱟᱥᱟ ᱛᱮᱭᱟᱨ ᱨᱮᱭᱟᱜ ᱫᱟᱭᱤᱠ ᱥᱟᱱᱛᱟᱞ ᱠᱚ ᱨᱮᱱ ᱢᱟᱨᱟᱝ ᱵᱚᱝᱜᱟ ᱢᱟᱨᱟᱝᱵᱩᱨᱩ ᱠᱤᱱ ᱮᱢᱟᱫᱤᱭᱟ᱾ ᱢᱟᱨᱟᱝᱵᱩᱨᱩ ᱫᱚ ᱩᱱᱠᱤᱱᱟᱜ ᱟᱫᱮᱥ ᱞᱮᱠᱟᱛᱮ ᱚᱛ ᱦᱟᱥᱟ ᱛᱮᱭᱟᱨ ᱨᱮᱭᱟᱜ ᱠᱟᱹᱢᱤᱭᱮ ᱮᱦᱚᱵ ᱠᱮᱫᱟ᱾

ᱢᱟᱨᱟᱝᱵᱩᱨᱩ ᱫᱚ ᱯᱩᱭᱞᱩ ᱨᱮ ᱛᱟᱭᱟᱝᱮ ᱦᱚᱦᱚ ᱟᱫᱮᱭᱟ ᱚᱛ ᱦᱟᱥᱟ ᱵᱮᱱᱟᱣ ᱞᱟᱹᱜᱤᱫ᱾ ᱛᱟᱭᱟᱝᱮ ᱢᱮᱛᱟᱫᱮᱭᱟ ᱫᱟᱜ ᱞᱟᱛᱟᱨ ᱠᱷᱚᱱ ᱦᱟᱥᱟ ᱟᱹᱜᱩ᱾ ᱛᱟᱭᱟᱝ ᱦᱟᱥᱟᱭ ᱟᱹᱜᱩ ᱠᱮᱫ ᱜᱮᱭᱟ, ᱢᱮᱱᱠᱷᱟᱱ ᱫᱟᱜ ᱪᱮᱛᱟᱱ ᱨᱮ ᱚᱱᱟ ᱫᱚᱦᱚ ᱥᱟᱶᱛᱮ ᱟᱹᱛᱩ ᱪᱟᱞᱟᱣ ᱮᱱᱟ᱾ ᱛᱟᱭᱟᱝ ᱚᱛ ᱦᱟᱥᱟ ᱵᱟᱭ ᱛᱮᱭᱟᱨ ᱫᱟᱲᱮᱭᱟᱫᱟ᱾ ᱚᱱᱟ ᱛᱟᱭᱚᱢ ᱢᱟᱨᱟᱝᱵᱩᱨᱩ ᱫᱚ ᱤᱪᱟᱹᱜ ᱦᱟᱠᱳᱭ ᱦᱚᱦᱚ ᱟᱫᱮᱭᱟ᱾ ᱤᱪᱟᱹᱜ ᱦᱟᱠᱳ ᱦᱚᱸ ᱚᱝᱠᱟ ᱜᱤ ᱦᱟᱥᱟᱭ ᱟᱹᱜᱩ ᱠᱮᱫᱟ᱾ ᱢᱮᱱᱠᱷᱟᱱ ᱚᱱᱟ ᱦᱚᱸ ᱟᱹᱛᱩ ᱪᱟᱞᱟᱣ ᱮᱱᱟ᱾ ᱩᱱᱤ ᱦᱚᱸ ᱚᱛ ᱦᱟᱥᱟ ᱵᱟᱭ ᱛᱮᱭᱟᱨ ᱫᱟᱲᱮᱭᱟᱫᱟ᱾ ᱚᱟᱱ ᱛᱟᱭᱚᱢ ᱢᱟᱨᱟᱝᱵᱩᱨᱩ ᱫᱚ ᱵᱚᱣᱟᱲ ᱦᱟᱠᱳᱭ ᱦᱚᱦᱚ ᱟᱫᱮᱭᱟ᱾ ᱩᱱᱤ ᱦᱚᱸ ᱚᱱᱠᱟ ᱜᱤ ᱚᱛ ᱦᱟᱥᱟ ᱵᱟᱭ ᱛᱮᱭᱟᱨ ᱫᱟᱲᱮᱭᱟᱫᱟ᱾ ᱚᱱᱟ ᱛᱟᱭᱚᱢ ᱢᱟᱨᱟᱝᱵᱩᱨᱩ ᱫᱚ ᱫᱷᱤᱨᱤ ᱠᱟᱴᱠᱟᱢᱮ ᱦᱚᱦᱚ ᱟᱫᱮᱭᱟ᱾ ᱩᱱᱤ ᱦᱚᱸ ᱚᱱᱠᱟ ᱜᱤ ᱵᱟᱭ ᱫᱟᱲᱮ ᱞᱮᱱᱟ᱾

ᱚᱨᱡᱚ ᱞᱮᱠᱟᱛᱮ, ᱢᱟᱨᱟᱝᱵᱩᱨᱩ ᱫᱚ ᱮᱴᱟᱜ ᱯᱚᱱᱛᱷᱟᱭ ᱦᱟᱛᱟᱣ ᱠᱮᱫᱟ᱾ ᱢᱟᱨᱟᱝᱵᱩᱨᱩ ᱦᱚᱨᱚ ᱨᱟᱡᱟᱮ ᱦᱚᱦᱚ ᱟᱫᱮᱭᱟ᱾ ᱦᱚᱨᱚ ᱫᱟᱜ ᱨᱮ ᱪᱟᱢᱯᱮᱹᱞ ᱛᱟᱦᱮᱱᱮ ᱢᱮᱛᱟᱫᱮᱭᱟ᱾ ᱯᱳᱱ ᱱᱟᱠᱷᱟ ᱯᱳᱱ ᱠᱷᱩᱱᱴᱤ ᱨᱮ ᱥᱚᱱᱟ ᱨᱮᱱᱟᱜ ᱥᱤᱠᱲᱤ ᱛᱮ ᱦᱚᱨᱚᱣᱟᱜ ᱡᱟᱝᱜᱟ ᱥᱤᱠᱲᱤ ᱦᱩᱭ ᱮᱱᱟ᱾

ᱩᱱᱨᱮ ᱦᱚᱨᱚᱭ ᱢᱮᱱ ᱠᱮᱫᱟ, " ᱢᱚᱦᱟᱨᱟᱡᱽ, ᱤᱧᱟᱜ ᱡᱟᱝᱜᱟᱢ ᱥᱤᱠᱲᱤ ᱠᱮᱫᱟ᱾. ᱱᱤᱛ ᱫᱚ ᱤᱧ ᱵᱟᱹᱧ ᱫᱟᱸᱲᱟ ᱫᱟᱲᱮᱭᱟᱜ-ᱟ᱾ ᱮᱱᱠᱷᱟᱱ ᱪᱮᱫ ᱞᱮᱠᱟ ᱛᱮ ᱡᱚᱢᱟᱜ ᱤᱧ ᱧᱟᱢᱟ?"

ᱩᱱᱨᱮ ᱢᱟᱨᱟᱝᱵᱩᱨᱩ ᱦᱚᱨᱚᱭ ᱢᱮᱛᱟᱫᱤᱭᱟ, "ᱟᱞᱚᱢ ​​ᱵᱷᱟᱵᱽᱱᱟᱜ-ᱟ᱾ ᱤᱧ ᱟᱢ ᱞᱟᱹᱜᱤᱫ ᱡᱚᱢᱟᱜᱼᱤᱧ ᱥᱟᱯᱲᱟᱣ ᱟᱠᱟᱫᱟ᱾ ᱟᱢᱟᱜ ᱢᱚᱪᱟ ᱥᱟᱢᱟᱝ ᱨᱮ ᱯᱳᱱᱮᱭᱟ ᱵᱷᱩᱜᱟᱹᱜ ᱛᱟᱸᱦᱮᱱᱟ᱾ ᱚᱱᱟ ᱫᱚ ᱫᱷᱟᱹᱨᱛᱤ ᱨᱮᱱᱟᱜ ᱚᱛ ᱠᱷᱚᱱ ᱛᱟᱸᱦᱮᱱᱟ᱾ ᱫᱷᱟᱹᱨᱛᱤ ᱨᱮ ᱡᱟᱦᱟᱸᱭ ᱜᱤ ᱡᱟᱦᱟᱱᱟᱜ ᱡᱚᱢ ᱠᱷᱟᱱ ᱩᱱᱤ ᱟᱢ ᱩᱭᱦᱟᱹᱨ ᱛᱮ ᱱᱟᱥᱮ ᱡᱚᱢᱟᱜ ᱚᱛ ᱨᱮᱭ ᱦᱟᱹᱨᱤᱡᱟ᱾ ᱚᱱᱟ ᱡᱚᱢᱟᱜ ᱯᱳᱱᱮᱭᱟ ᱵᱷᱩᱜᱟᱹᱜ ᱛᱮ ᱟᱢᱟᱜ ᱢᱚᱪᱟ ᱨᱮ ᱥᱮᱴᱮᱨᱚᱜᱼᱟ᱾ ᱟᱢ ᱚᱱᱟ ᱡᱚᱢᱛᱮᱢ ᱵᱟᱧᱪᱟᱣ ᱛᱟᱦᱮᱱᱟ᱾"

ᱱᱚᱶᱟ ᱠᱷᱟᱹᱛᱤᱨ ᱜᱤ ᱥᱟᱱᱛᱟᱞ ᱠᱳ ᱡᱚᱢᱟᱜ ᱡᱚᱢ ᱞᱟᱦᱟᱨᱮ ᱚᱛ ᱨᱮ ᱠᱳ ᱦᱟᱹᱨᱤᱡᱟ᱾

ᱦᱚᱨᱚᱭ ᱢᱮᱱ ᱠᱮᱫᱟᱭ, "ᱚᱱᱟ ᱫᱚ ᱴᱷᱤᱠ ᱜᱮᱭᱟ ᱢᱚᱦᱟᱨᱟᱡᱽ᱾ ᱢᱮᱱᱠᱷᱟᱱ ᱤᱧ ᱞᱟᱝᱜᱟᱜ ᱠᱷᱟᱱ ᱫᱚ ᱪᱮᱫᱼᱤᱧ ᱪᱮᱠᱟᱭᱟ?"

ᱩᱱ ᱡᱚᱠᱷᱚᱡ ᱢᱟᱨᱟᱝᱵᱩᱨᱩ ᱫᱚ ᱦᱚᱨᱚᱣᱟᱜ ᱢᱤᱫ ᱡᱟᱝᱜᱟᱭ ᱞᱟᱲᱟ ᱠᱟᱫ ᱛᱟᱭᱟ᱾ ᱟᱨᱮ ᱢᱮᱛᱟᱫᱤᱭᱟ, "ᱱᱚᱣᱟ ᱢᱤᱫ ᱡᱟᱝᱜᱟᱧ ᱨᱟᱲᱟ ᱠᱮᱫᱟ᱾ ᱱᱚᱣᱟᱢ ᱨᱟᱲᱟᱣ ᱵᱟᱲᱟ ᱞᱮᱠᱷᱟᱱ ᱜᱤ ᱟᱢᱟᱜ ᱞᱟᱝᱜᱟ ᱪᱟᱵᱟᱜᱼᱟ᱾"

ᱱᱚᱶᱟ ᱠᱷᱟᱹᱛᱤᱨ ᱜᱤ ᱦᱚᱨᱚ ᱡᱚᱠᱷᱚᱱ ᱞᱟᱝᱜᱟ ᱛᱮ ᱡᱟᱝᱜᱟᱭ ᱞᱟᱲᱟᱣ ᱛᱟᱭᱟ ᱩᱱ ᱡᱚᱠᱷᱚᱡ ᱜᱤ ᱫᱷᱟᱹᱨᱛᱤ ᱞᱟᱲᱟᱜᱼᱟ᱾

ᱚᱱᱟ ᱛᱟᱭᱚᱢ ᱦᱚᱨᱚᱣᱟᱜ ᱫᱮᱭᱟ ᱨᱮ ᱥᱚᱱᱟ ᱨᱮᱭᱟᱜ ᱛᱷᱟᱹᱨᱤ ᱵᱟᱹᱭᱥᱟᱹᱣ ᱦᱩᱭ ᱮᱱᱟ᱾ ᱚᱱᱠᱟ ᱜᱤ ᱦᱩᱭ ᱮᱱᱟ᱾

ᱚᱱᱟ ᱛᱟᱭᱚᱢ ᱞᱮᱱᱰᱮᱫ ᱨᱟᱡᱟ ᱦᱚᱦᱚ ᱦᱩᱭᱮᱱᱟ᱾ ᱢᱟᱨᱟᱝᱵᱩᱨᱩ ᱫᱚ ᱩᱱᱤᱭ ᱢᱮᱛᱟᱫᱤᱭᱟ ᱫᱟᱜ ᱞᱟᱛᱟᱨ ᱨᱮᱱᱟᱜ ᱦᱟᱥᱟ ᱡᱚᱢ ᱠᱟᱛᱮ ᱥᱚᱱᱟ ᱛᱷᱟᱹᱨᱤ ᱨᱮ ᱤᱡ ᱠᱟᱛᱮᱜ ᱚᱛ ᱦᱟᱥᱟ ᱵᱮᱱᱟᱣ ᱢᱮ᱾ ᱞᱮᱱᱰᱮᱫ ᱫᱚ ᱫᱟᱜ ᱞᱟᱛᱟᱨ ᱠᱷᱚᱱ ᱦᱟᱥᱟ ᱨᱟᱠᱟᱵ ᱠᱟᱛᱮᱜ ᱥᱚᱱᱟ ᱛᱷᱟᱹᱨᱤ ᱨᱮ ᱫᱚᱦᱚᱭ ᱞᱟᱜᱟᱣ ᱮᱱᱟ᱾ ᱚᱱᱟ ᱛᱟᱭᱚᱢ ᱢᱟᱨᱟᱝᱵᱩᱨᱩ ᱟᱲᱜᱷᱚᱢ ᱛᱮᱭ ᱥᱚᱢᱟᱱ ᱠᱮᱫᱟ᱾ ᱚᱠᱟ ᱠᱳ ᱡᱟᱭᱜᱟ ᱥᱚᱢᱟᱱ ᱮᱱᱟ ᱚᱱᱟ ᱫᱚ ᱥᱚᱢᱚᱛᱚᱞ ᱦᱩᱭ ᱮᱱᱟ᱾ ᱟᱨ ᱚᱠᱟ ᱠᱳ ᱡᱟᱭᱜᱟ ᱵᱟᱝ ᱥᱚᱢᱟᱱ ᱞᱮᱱᱟ ᱚᱱ ᱠᱳ ᱫᱚ ᱰᱩᱝᱨᱤ, ᱵᱩᱨᱩ ᱦᱩᱭ ᱮᱱᱟ᱾

ᱫᱷᱟᱹᱨᱛᱤ ᱞᱟᱲᱟᱣ

ᱫᱷᱟᱹᱨᱛᱤ ᱞᱟᱲᱟᱣ ᱨᱮᱭᱟᱜ ᱥᱟᱬᱮᱥᱤ ᱵᱩᱡᱷᱟᱹᱣᱺ

ᱟᱹᱰᱤ ᱥᱮᱨᱢᱟ ᱞᱟᱦᱟ, ᱡᱮᱜᱮᱛ ᱨᱮᱱᱟᱜ ᱡᱚᱛᱚ ᱚᱛ ᱦᱟᱥᱟ ᱢᱤᱫ ᱥᱟᱶᱛᱮ ᱛᱟᱦᱮᱸ ᱠᱟᱱᱟ᱾ ᱫᱷᱟᱹᱨᱛᱤ ᱨᱮᱭᱟᱜ ᱪᱮᱛᱟᱱ ᱫᱚ ᱟᱭᱢᱟ ᱠᱮᱴᱮᱡ ᱯᱞᱮᱴ ᱛᱮ ᱵᱮᱱᱟᱣ ᱟᱠᱟᱱᱟ ᱚᱠᱟ ᱫᱚ ᱵᱟᱹᱭ ᱵᱟᱹᱭ ᱛᱮ ᱵᱷᱮᱜᱟᱨ ᱮᱱᱟ᱾ ᱥᱟᱬᱮᱥᱤᱭᱟᱹ ᱠᱳ ᱱᱚᱶᱟ ᱯᱞᱮᱴ ᱫᱚ ᱴᱮᱠᱴᱚᱱᱤᱠ ᱯᱞᱮᱴ ᱠᱳ ᱢᱮᱛᱟᱜᱼᱟ᱾ ᱟᱵᱚᱣᱟᱜ ᱫᱷᱟᱹᱨᱛᱤ ᱨᱮᱭᱟᱜ ᱯᱟᱦᱴᱟ ᱫᱚ ᱟᱭᱢᱟ ᱯᱞᱮᱴ ᱛᱮ ᱵᱮᱱᱟᱣ ᱟᱠᱟᱱᱟ᱾ ᱴᱮᱠᱴᱚᱱᱤᱠ ᱯᱞᱮᱴ ᱠᱳ ᱢᱤᱫ ᱥᱟᱶᱛᱮ ᱯᱟᱱᱛᱤ ᱛᱮ ᱞᱟᱜᱟᱣ ᱛᱟᱦᱮᱱᱟ᱾ ᱚᱱᱟᱠᱩ ᱡᱟᱦᱟᱱ ᱠᱟᱨᱚᱱ ᱛᱮ ᱟᱯᱟᱱ ᱟᱯᱤᱱ ᱥᱟᱶ ᱛᱟᱯᱟᱢ ᱞᱮᱱᱠᱷᱟᱱ ᱫᱟᱲᱮ ᱛᱮᱭᱟᱨᱚᱜ ᱠᱟᱱᱟ᱾ ᱱᱚᱣᱟ ᱫᱟᱲᱮ ᱫᱚ ᱥᱤᱥᱢᱤᱠ ᱛᱟᱨᱠᱳ ᱞᱮᱠᱟ ᱯᱟᱥᱱᱟᱜᱼᱟ᱾ ᱡᱩᱫᱤ ᱛᱟᱨᱠᱳ ᱠᱟᱡᱟᱠ ᱦᱩᱭᱩᱜ, ᱮᱱᱠᱷᱟᱱ ᱱᱚᱣᱟ ᱫᱷᱟᱹᱨᱛᱤ ᱨᱮᱭᱟᱜ ᱪᱮᱛᱟᱱ ᱨᱮ ᱥᱮᱴᱮᱨᱚᱜᱼᱟ᱾ ᱟᱨ ᱡᱩᱫᱤ ᱩᱱᱨᱮᱦᱚᱸ ᱰᱷᱮᱨ ᱫᱟᱲᱮ ᱫᱟᱲᱮ ᱛᱟᱦᱮᱱᱟ, ᱮᱱᱠᱷᱟᱱ ᱚᱱᱟ ᱚᱛᱮ ᱞᱟᱲᱟᱣᱟ᱾ ᱱᱚᱣᱟ ᱞᱟᱲᱟᱣ ᱜᱤᱚᱛ ᱞᱟᱲᱟᱣ ᱠᱟᱱᱟ᱾ ᱫᱷᱟᱹᱨᱛᱤ ᱨᱮᱭᱟᱜ ᱵᱷᱤᱛᱨᱤ ᱨᱮ ᱡᱚᱛᱚ ᱜᱩᱞᱩᱝ ᱡᱤᱱᱤᱥ ᱯᱞᱮᱴ ᱞᱟᱛᱟᱨ ᱨᱮ ᱢᱮᱱᱟᱜᱼᱟ᱾ ᱛᱤᱱ ᱨᱮ ᱱᱚᱶᱟ ᱜᱩᱞᱩᱝ ᱡᱤᱱᱤᱥ ᱠᱚ ᱱᱮᱪᱟᱨᱟᱞ ᱠᱟᱨᱚᱱ ᱛᱮ ᱮᱴᱟᱜ ᱥᱮᱡᱚᱜᱼᱟ, ᱯᱞᱮᱴ ᱠᱚ ᱦᱚᱸ ᱱᱟᱥᱮ ᱮᱴᱟᱜ ᱥᱮᱡᱚᱜᱼᱟ᱾ ᱚᱱᱟ ᱠᱷᱟᱹᱛᱤᱨ ᱛᱮ, ᱢᱤᱫ ᱯᱞᱮᱴ ᱨᱮᱭᱟᱜ ᱦᱟᱹᱴᱤᱧ ᱮᱴᱟᱜ ᱯᱞᱮᱴ ᱞᱟᱛᱟᱨ ᱨᱮ ᱵᱚᱞᱚᱱᱟ, ᱚᱱᱟ ᱛᱮ ᱚᱛ ᱛᱟᱨᱠᱳ ᱛᱮᱭᱟᱨᱚᱜ ᱠᱟᱱᱟ᱾ ᱟᱨ ᱱᱚᱣᱟ ᱛᱟᱨᱠᱳ ᱜᱤ ᱫᱷᱟᱹᱨᱛᱤ ᱞᱟᱲᱟᱣ ᱵᱩ ᱢᱮᱛᱟᱜ ᱠᱟᱱᱟ᱾

ᱯᱷᱮᱰᱮᱛ:

᱑. ᱡᱚᱢᱥᱤᱢ ᱵᱤᱱᱛᱤ - ᱥᱳᱢᱟᱭ ᱠᱤᱥᱠᱩ

᱒. The culture and philosophy of Santal - Bhogla Soren

᱓. ᱦᱚᱲ ᱠᱳ ᱨᱮᱱ ᱢᱟᱨᱮ ᱦᱟᱯᱲᱟᱢ ᱠᱳ ᱨᱮᱭᱟᱜ ᱠᱟᱛᱷᱟ - ᱠᱚᱞᱮᱭᱟᱱ ᱜᱩᱨᱩ

᱔. ᱦᱚᱲ ᱦᱚᱯᱚᱱ ᱥᱟᱱᱛᱟᱞ ᱤᱛᱤᱦᱟᱥ - ᱡᱚᱦᱚᱱ ᱦᱟᱸᱥᱫᱟ, ᱡᱩᱞᱤᱭᱟᱱ ᱴᱩᱰᱩ, ᱡᱤᱹ ᱡᱚᱱᱛᱟ

᱕. ᱡᱟᱦᱮᱨ ᱵᱚᱸᱜᱟ ᱥᱟᱱᱛᱟᱲ ᱠᱳ - ᱨᱟᱢᱮᱥᱣᱚᱨ ᱢᱩᱨᱢᱩ(ᱟᱹᱫᱤᱢ ᱥᱟᱱᱛᱟᱲ)

᱖ᱹ ᱤᱱᱴᱟᱨᱱᱮᱴ