ᱛᱟᱹᱨᱩᱵ ᱟᱨ ᱵᱷᱤᱰᱤ
ᱟᱹᱰᱤ ᱫᱤᱱ ᱞᱟᱦᱟ, ᱢᱤᱫᱼᱴᱮᱱ ᱛᱟᱹᱨᱩᱵ ᱵᱩᱨᱩ ᱟᱲᱮ ᱡᱷᱟᱨᱱᱟ ᱨᱮ ᱫᱟᱜᱼᱮ ᱧᱩ ᱠᱟᱱ ᱛᱟᱦᱮᱸ ᱠᱟᱱᱟ᱾ ᱩᱱ ᱚᱠᱛᱚ ᱞᱟᱛᱟᱨ ᱥᱮᱡ ᱠᱚᱭᱚᱜ ᱠᱟᱛᱮᱜᱼᱮ ᱧᱮᱞ ᱠᱮᱫᱟ, ᱢᱤᱫᱼᱴᱮᱱ ᱵᱷᱤᱰᱤ ᱦᱚᱯᱚᱱ ᱡᱷᱟᱨᱱᱟ ᱨᱮ ᱫᱟᱜᱼᱮ ᱧᱩ ᱠᱟᱱᱟ᱾ ᱟᱫᱚ ᱛᱟᱹᱨᱩᱵᱼᱮ ᱩᱭᱦᱟᱹᱨ ᱠᱮᱫᱟ, “ᱱᱩᱭ ᱵᱷᱤᱰᱤ ᱛᱮᱜᱤᱧ ᱠᱤᱫᱩᱜᱚᱜᱼᱟ ᱛᱤᱦᱤᱧ ᱫᱚ᱾ ᱠᱷᱟᱹᱞᱤ ᱢᱤᱫᱼᱴᱮᱱ ᱥᱩᱥᱤ ᱧᱟᱢ ᱞᱟᱜᱟᱣᱟᱹᱧᱟᱹ᱾”
ᱚᱱᱟ ᱛᱟᱭᱚᱢ ᱦᱟᱹᱱᱰᱨᱟᱹᱣ ᱟᱛᱮ ᱵᱷᱤᱰᱤᱭᱮ ᱢᱮᱛᱟᱫᱮᱭᱟ, “ᱤᱱᱟᱹᱜ ᱢᱟᱨᱟᱝ ᱥᱟᱦᱚᱥ ᱛᱟᱢ, ᱤᱧᱟᱜ ᱧᱩ ᱫᱟᱜᱼᱮᱢ ᱵᱚᱰᱮ ᱮᱫᱟ?”
“ᱵᱟᱝ ᱢᱟᱦᱟᱥᱚᱭ ᱵᱟᱝ”, ᱵᱷᱤᱰᱤ ᱦᱚᱯᱚᱱᱮ ᱢᱮᱱ ᱠᱮᱫᱟ; “ᱟᱨ ᱵᱚᱰᱮᱜ ᱠᱟᱱ ᱠᱷᱟᱱ ᱞᱟᱛᱟᱨ ᱥᱮᱱᱟᱜ ᱫᱟᱜ ᱵᱚᱰᱮᱜ ᱠᱟᱱᱟ᱾ ᱚᱱᱟ ᱫᱟᱜ ᱫᱚ ᱟᱢ ᱥᱮᱡ ᱵᱟᱝ ᱪᱟᱞᱟᱜ ᱠᱟᱱᱟ, ᱞᱟᱛᱟᱨ ᱥᱮᱡ ᱟᱹᱛᱩ ᱪᱟᱞᱟᱜ ᱠᱟᱱᱟ᱾”
“ᱮᱱᱠᱷᱟᱱ ᱴᱷᱤᱠ ᱜᱮᱭᱟ”, ᱛᱟᱹᱨᱩᱵᱼᱮ ᱨᱚᱲ ᱠᱮᱫᱟ; “ᱪᱟᱞᱟᱣ ᱮᱱ ᱥᱮᱨᱢᱟ ᱪᱮᱫᱟᱜᱼᱮᱢ ᱮᱜᱮᱨ ᱞᱤᱫᱤᱧᱟᱹ?”
“ᱵᱟᱝ, ᱚᱱᱟ ᱫᱚ ᱵᱟᱝ ᱦᱩᱭ ᱫᱟᱲᱮᱭᱟᱜᱼᱟ”, ᱵᱷᱤᱰᱤ ᱦᱚᱯᱚᱱᱮ ᱢᱮᱱ ᱠᱮᱫᱟ, “ᱪᱮᱫᱟᱜ ᱥᱮ ᱪᱟᱞᱟᱣᱮᱱ ᱥᱮᱨᱢᱟ ᱫᱚ ᱤᱧᱟᱜ ᱡᱟᱱᱟᱢ ᱜᱤ ᱵᱟᱝ ᱦᱩᱭ ᱟᱠᱟᱱ ᱛᱟᱦᱮᱸ ᱠᱟᱱᱟ᱾ ᱤᱧᱢᱟ ᱮᱠᱮᱱ ᱛᱩᱨᱩᱭ ᱪᱟᱱᱫᱚ ᱩᱢᱮᱨ ᱛᱤᱧ᱾”
“ᱤᱧ ᱪᱮᱫ ᱦᱚᱸ ᱵᱟᱹᱧ ᱵᱩᱡᱷᱟᱹᱣᱟ,” ᱛᱟᱨᱩᱵ ᱵᱚᱦᱚᱜ ᱜᱷᱟᱹᱨᱤᱭᱟᱹ ᱠᱟᱛᱮᱜᱼᱮ ᱨᱚᱲ ᱠᱮᱫᱟ, “ᱡᱩᱫᱤ ᱟᱢ ᱵᱟᱢ ᱛᱟᱦᱮᱸ ᱠᱟᱱᱟ ᱟᱢ ᱵᱟᱵᱟᱭ ᱛᱟᱦᱮᱸ ᱠᱟᱱᱟ; ᱟᱨ ᱚᱱᱟ ᱢᱮᱱ ᱠᱟᱛᱮᱜ ᱵᱷᱤᱰᱤ ᱦᱚᱯᱚᱱᱮ ᱫᱚᱱ ᱟᱫᱮᱭᱟ ᱟᱨᱮ ᱡᱚᱢ ᱠᱤᱫᱤᱭᱟ᱾
